Ma Suhmuhslah
Alma 46


Sapta 46

Amalickiah el orek inkacnek elan tohkohsrah—Moroni el kohlwack sifac luhn moul sukohsohk—El oracni mwet uh in lango alu lalos—Mwet luhlahlfongi pwacye elos pahngpahng Mwet Christian—Sie sruf lal Joseph ac fah painmoullac—Amalickiah ac mwet lain elos kahinglac nuh fin acn lal Nephi—Elos suc fah tiac kahsruh pahtok srihpac luhn sukohsohk elos acnwucki. Sahp ke yac 73–72 Met Liki Kraist.

1 Ac tukun ma inge elos nuhkwewa suc tiac porongo kahs lal Helaman ac mwet wiyacl elos toweni nuh sie in lain mwet wiyaclos.

2 Ac inge liye, elos arulacna kasrkuhsrak, yohkna oruh elos insacnweacng in onweltahluh.

3 Inge mwet kol lalos suc kasrkuhsrak lain mwet wiyaclos ah el sie mwet yohk ac fokoko; ac inel pa Amalickiah.

4 Ac Amalickiah el kena tuh elan tohkohsrah; ac mwet ma tuh kasrkuhsrak ah elos oacyacpac kena tuh elan tohkohsrah lalos; ac elos pa inkaiyaclos suc mwet nuhnuhnkuh srihsrihk luhn acn uh, ac elos sukok kuh.

5 Ac elos kolyuck ke eyeinse lal Amalickiah, tuh elos fin kahsrel ac oakiyac tuh elan tohkohsrah lalos el ac oraclah elos in mwet kol luhn mwet ah.

6 Ohinge elos kolyucklac sel Amalickiah in lain, finne in lain luti lal Helaman ac mwet wiyacl, ahok, finne ke karihngihnyuck na wo lalos ke alu uh, tuh elos mwet tol fuhlwact ke alu uh.

7 Ac puhs mwet ke alu uh suc luhlahlfongi kahs in eyeinse lal Amalickiah, ke ma inge elos puhtatlac liki alu uh; ac ohinge mukwikwi luhn mwet lal Nephi arulacna fosrngah ac sensen, finne ke kuhtanglah yohk lalos suc elos eislah sin mwet Laman, ac engan yohk lalos suc elos oruh ke srihpen moliyucklac lalos ke poun Leum.

8 Ohinge kuht liye lah fuhkah pihsrpihsriyac ke tuhlihk nuhtin mwet elos muhlkuhnlah Leum God lalos, ahok, lah fuhkah pihsrpihsriyac in oruh ma koluk, ac in kolyucklac sin el suc koluk.

9 Ahok, ac kuht oacyacpac liye ma koluk yohk ma sie mwet koluk na pwacye el kuh in oruh in sikyak inmahsrlon tuhlihk nuhtin mwet.

10 Ahok, kuht liye lah Amalickiah, ke srihpen el sie mwet kuhtasrihk ac sie mwet suc puhs kahs in ahkluhng la, el tuh kohllah insiacn mwet pucspucs in oruh ma koluk; ahok, ac in suk in kuhnahoslah alu luhn God, ac in kuhnahoslah pwelucng luhn moul sukohsohk ma God El sang nuh selos, kuh suc mwe insewowo God El suhpwacma nuh fin acn ah ke srihpaclos suc suwohswohs.

11 Ac na tukun ma inge ke Moroni, suc pa mwet kol fuhlwact luhn mwet mweun luhn mwet Nephi, el lohngwack ke lainyuck inge, el kasrkuhsrakwack sel Amalickiah.

12 Ac tukun ma inge el seyac nuknuk lal; ac el eis sie ip kac ah; ac suhmuhslah kac—In mwe acsmakihn luhn God lasr, alu lasr, ac sukohsohk, ac mislac lasr, muhtwacn kiyacsr, ac tuhlihk nahtuhsr—ac el kapriyac ke muhtuhn pohlohn sahk soko.

13 Ac el akweacng mwe loango insifacl, ac mwe loango iniwacl, ac mwe loango lal, ac nokomwacng mwe lweyuck lal ke fohnohl; ac el eis sahk soko ah, ma nuknuk se lal ah kapriyucki ke sahflahiyac ah, (ac el pahngon sifac luhn moul sukohsohk) ac el puhtati nuh infohk uh, ac el pruhe na upac nuh sin God lal nuh ke mwe insewowo luhn moul sukohsohk in puhtatyang nuh fin mwet wiyacl, fin oasr na sie un mwet Christian luhlah in muhta fin acn uh—

14 Tuh ohinge mwet luhlahlfongi nuhkwewa luhn Kraist, suc wi alu luhn God, pahngonyuck selos suc tiacna wi alu uh.

15 Ac elos suc tuh wi alu uh elos luhlahlfongi; ahok, elos nuhkwewa suc mwet luhlahlfongi pwacye in Kraist elos, engan, in eis nuh faclos inen Kraist, kuh mwet Christian oacna ke elos pahngonyuck, ke srihpen luhlahlfongi lalos in Kraist suc ac fah tuhkuh.

16 Ac ke ma inge, ke pacl se inge, Moroni el pruhe tuh srihpac luhn mwet Christian, ac sukohsohk luhn acn ah in luhngkihnyuck.

17 Ac tukun ma inge ke el okwaclah nguhnal nuh sin God, el sang inen acn ah nohfohn ma oan epang ke acn Ahsor, ahok, ac in ahkkahlwemye, fin acn ah nohfohn, kwewana nuh acir ac nuh epang—Sie acn suleyucklac, ac acn luhn sukohsohk.

18 Ac el fahk: Pwacyena God El fah tiacna lwelah tuh kuht, suc koaseyuck ke srihpen kuht eis nuh facsr inen Kraist, ac fah longyucki nuh ten ac kuhnausyucklac, ne ke na kuht eis nuh facsr ke ma tahfonglac lasr sifacna.

19 Ac ke Moroni el fahklah kahs inge, el som nuh inmahsrlon mwet ah, furok ip mihsaclihk ke nuknuk lal nuh ke yen engyeng uh, tuh mwet nuhkwewa in kuh in liye ma sihmlac suc el suhmuhslah ke ip mihsaclihk sac, ac wowoyak ke sie puhsra luhlahp, fahk:

20 Liye, kuhtwena mwet suc fah sruok sifac se inge fin acn uh, lwelah elos in tuhkuh ke kuhlacna luhn Leum, ac ilyak nuh ke sie wuhlweacng tuh elos ac fah sruokyac na ma pwacye lalos, ac alu lalos, tuh Leum God Elan ahkinsewowoyaclos.

21 Ac tukun ma inge ke Moroni el fahkwack kahs inge, liye, mwet ah kahsruhsr tuhkuh ueni ac mwe loango lalos kapriyucki nuh fohnohlos, seyac nuknuk lalos in mwe akucl, kuh in oacna sie wuhlwelah, tuh elos ac tiac som liki Leum God lalos; kuh, ke kahs sahyac, elos fin tahfonglac ke masap luhn God, kuh puhtatlac nuh ke tahfonglac, ac mwekihn in eis nuh faclos inen Kraist, Leum El ac suhpuhkuhloslac oacna ke elos seyac nuknuk lalos.

22 Na pa inge wuhlweacng se ma elos tuh oraclah, ac elos sislah nuknuk lalos nuh ke niyacl Moroni, fahk: Kuht wuhlweacng nuh sin God lasr, tuh kuht fah kuhnausyucklac, oacna mwet wiyacsr fin acn oan nuh acir, kuht ac fin puhtatyang nuh ke tahfonglac; ahok, El ac siskuhtyang nuh ke niyacn mwet lokoalok lasr, oacna ke kuht tohlwacng nuknuk lasr nuh ke niyom in longyuck ye niyac, fin kuht puhtatyang nuh ke tahfonglac.

23 Moroni el fahk nuh selos: Liye, kuht sie un mwet luhlah ke fihtac lal Jacob; ahok, kuht sie un mwet luhlah ke fihtac lal Joseph, suc kot lal tuh seyucki sin tamuhlwel wiyacl nuh ke ip pucspucs; ahok, ac inge liye, lwelah kuht in esam in liyacacng masap luhn God, fin tiac nuknuk lasr ac fah seyucki sin mwet wiyacsr, ac kuht tolyuckyang nuh ke nien srohoh, kuh kuhkwackihnyucklac, kuh acnwucki.

24 Ahok, lwelah kuht in karuhnguhnwacng moul sukohsohk lasr oacna sie un mwet luhlah lal Joseph; ahok, lwelah kuht in esam kahs lal Jacob, met liki misac lal, tuh liye, el liye lah sie ipin kot lal Joseph ah karihngihnyuckyang ac tiacna kuhlamlah. Ac el fahk—Oacpacna ke ipin kot se luhlah inge luhn wen nuhtihk karihngihnyuckyang, ac oacyacpac sie un mwet luhlah ke fihtac luhn wen nuhtihk in karihngihnyuckyang ke poun God, ac eis nuh facl sifacna, ac ke un mwet luhlah ke fihtac lal Joseph fah misac, finne in oacna ipin nuknuk luhlah ke nuknuk lal.

25 Na liye, ma inge use ahsor nuh in nguhnihk; ne ohinge, nguhnihk engan ke wen nuhtihk, ke srihpen ip luhlah se ke fihtac lal suc fah eisyuck sin God.

26 Na liye, pa inge kahs lal Jacob.

27 Ac inge suc etuh sahyacn ma suc un mwet luhlah ke fihtac lal Joseph, suc fah kuhnausyucklac oacna nuknuk lal, pa elos suc tuhkuh ke fahko lasr? Ahok, ac finne kuht sifacna kuht fin tiac tu na kuh in luhlahlfongi ke Kraist.

28 Ac na tukun ma inge ke Moroni el fahklah kahs inge el som, ac oacyacpac suhpwaclah nuh ke acn nuhkwewa fin acn ma oasr fohs we, ac oracni nuh sie nohfohn mwet suc kena sruokyac na moul sukohsohk lalos, in tuyak lainuhl Amalickiah ac elos suc tuhkuh, suc pahngpahng mwet Amalickiah.

29 Ac tukun ma inge ke Amalickiah el liye tuh mwet lal Moroni ah puhs liki mwet Amalickiah—ac el oacyacpac liye tuh mwet lal elos ahlohloh ke nuhnuhnkuh suwohs luhn srihpac lalos—ke ma inge, fosrngah lah el ac tiac kuhtanglah acn sac, el eisuhlos suc mwet lal suc ke wi ac som nuh fin acn lal Nephi.

30 Inge Moroni el nuhnkuh tuh tiacna fal tuh mwet Laman ah in fokoko luhkwelos; ke ma inge el nuhnkuh in kosrwaclah mwet lal Amalickiah, kuh in eisaclos ac fohlohkohnohloslac, ac unilyac Amalickiah; ahok, tuh el etuh lah el ac puhrakwack mwet Laman in kasrkuhsrakwack selos, ac oruh elos in tuhkuh in mweun lainuhlos; ac ma inge el etuh lah Amalickiah el ac oruh tuh elan kuh in oraclah srihpac lal.

31 Ke ma inge Moroni el nuhnkuh tuh fal elan eis mwet mweun lal, suc sifacna toweni nuh sie, ac us kuhfwen mwe mweun, ac ilyak nuh ke sie wuhlweacng in karuhnguhnwacng mislac—ac tukun ma inge el eis un mwet mweun lal ac mahs som us lohm nuknuk sel nuh innimac, in kohsrwaclah inkacnek lal Amalickiah ke innimac.

32 Ac tukun ma inge el oraclah fal nuh ke luhngse lal, ac mahs som nuh innimac, ac ukwe un mwet mweun lal Amalickiah.

33 Ac tukun ma inge Amalickiah el kahing wi sie u srihsrihk sin mwet lal, ac mwet luhlah ah elos ituckyang nuh in pahol Moroni ac elos fohlohkihnyucklac nuh fin acn Zarahemla.

34 Inge, Moroni el sie mwet suc srihsrngiyucki sin mwet nuhnuhnkuh fuhlwact ac ke puhsren mwet uh, ke ma inge oasr kuh lal fal nuh ke luhngse lal nuh ke un mwet mweun luhn mwet Nephi, in oakiyac ac in mukwikwi ke kuh se inge faclos.

35 Ac tukun ma inge oacna sie sin mwet Amalickiah suc tiacna ilyak nuh ke sie wuhlweacng in kahsruh ke srihpac luhn sukohsohk, tuh elos in kuh in muhta na ke sie kafucrmacn sukohsohk, el oruh tuh elos in acnwucki; ac suhpuhs selos suc sruhnga wuhlweacng luhn sukohsohk.

36 Ac oacyacpac tukun ma inge, el oruh tuh sifac luhn moul sukohsohk in srihpsrihpyak fin taor nuhkwewa fin acn ah nohfohn, suc ma sin mwet Nephi; ac ohinge Moroni el oakiyac ohiyac luhn moul sukohsohk inmahsrlon mwet Nephi.

37 Ac elos muhtwacwacack in sifilpac mislac fin acn ah; ac ohinge elos tuh muhta ke mislac fin acn ah ne ke na apkuhran nuh ke sahflahiyacn yac ahksingucul yuc ke kolyuck luhn mwet nuhnuhnkuh.

38 Ac Helaman ac mwet tol fuhlwact elos oacyacpac karuhnguhnwacng akwuck luhn alu uh; ahok, finne nuh ke lusen yac ahkosr elos muhta in mislac ac engan ke alu uh.

39 Ac tukun ma inge puhslac mwet suc misac, luhlahlfongi yohk lah nguhnalos moliyucklac sin Leum Jisus Kraist; ohinge elos engan som liki facluh.

40 Ac oasr mwet misac ke fol luhn mahno, suc ke kuhtuh puhlan pacl ke yac uh arulacna fusus fin acn ah—tuhsruhk tiac arulacna upac ke fol uh, ke srihpen wolacnaiyacn sahk ac okah pucspucs ma God El ahknoelah in unwelah srihpen mas uh, ma mwet uh puhlakihn ke puhlan pacl uh—

41 Tuhsruhk oasr mwet pucspucs suc misac ke matwac mahtuh; ac elos suc misac ac luhlahlfongi ke Kraist elos engan in El, oacna ke kuht enenuh in nuhnkuh.