Tusitusiga Paia
Alema 46


Mataupu 46

Ua faufau leaga Amalekia ia avea ma tupu—Ua sisi a’e e Moronae le tagavai o le saolotoga—Ua ia tomatauina le nuu ia puipui la latou tapuaiga—O e ua talitonu faamaoni ua ta’ua o Kerisiano—O le a faasaoina se vaega o totoe o Iosefa—Ua sosola Amalekia ma e faatuiese i le laueleele o Nifae—O i latou o ē e lē lagolagoina le faamoemoe o le saolotoga o le a fasiotia. E tusa o le 73–72 T.L.M.

1 Ma sa oo ina o le toatele o ē sa lē fia faalogo i upu a Helamana ma ona uso sa faapotopoto faatasi e faasaga tetee i o latou uso.

2 Ma o lenei faauta, sa latou feita tele, sa oo ai ina latou naunau e fasioti i latou.

3 O lenei o le ta’ita’i o i latou o ē na feita e faasaga i o latou uso o se tagata tino ese ma le malosi; ma o lona igoa o Amalekia.

4 Ma sa manao Amalekia ia avea o ia ma tupu; ma o tagata ia o ē sa feita sa latou mananao foi ia avea o ia ma o latou tupu; ma o le toatele o i latou o afaamasino maualalalo o le laueleele, ma sa latou saili mo le pule.

5 Ma sa taitaiina i latou i upu faaviivii a Amalekia, e faapea afai latou te lagolagoina o ia ma faatu o ia e avea ma o latou tupu o le a ia faia i latou ma pule i luga o le nuu.

6 Sa faapea ona taitaieseina i latou e Amalekia i le faatuiese, e ui lava i le talaiga a Helamana ma ona uso, ioe, e ui lava i lo latou matuā faaeteete tele i le leoleoina o le ekalesia, ona o i latou o faitaulaga sili o le ekalesia.

7 Ma sa i ai le toatele i le ekalesia o e sa talitonu i upu faaviivii a Amalekia, o le mea lea na latou faatuiese atu ai lava mai le ekalesia; ma sa faapea ona lugā ma tugā tele ai mataupu o le nuu o Nifae, e ui i lo latou amanumalo tele i luga o sa Lamanā, ma lo latou olioli tele sa maua ona o le laveaiina o i latou e le aao o le Alii.

8 Ua faapea ona tatou vaai ai i le avave tele ona galo i le fanauga a tagata o le Alii lo latou Atua, ioe, le vave tele ona fai o le amioletonu, ma taitaieseina e le ua leaga.

9 Ioe, ma ua tatou vaai ai foi i le aamioleaga tele e mafai e se tagata amioleaga e toatasi ona faatupuina i totonu o le fanauga a tagata.

10 Ioe, ua tatou vaai o Amalekia, ona o ia o se tagata faitogafiti poto leaga ma o se tagata mau upu faaviivii, sa ia ta’ita’i ese ai loto o tagata e toatele e fai le amioleaga; ioe, ma saili e faaumatia le ekalesia a le Atua, ma faaumatia le faavae o le asaolotoga lea na tuuina mai e le Atua ia te i latou, po o se faamanuiaga lea na auina mai e le Atua i luga o le laueleele mo le manuia o e e eamiotonu.

11 Ma o lenei sa oo ina ua faalogo Moronae, o le sa avea ma ataitaiau sili o autau a sa Nifaē, i nei faatuiese, sa ita o ia ia Amalekia.

12 Ma sa oo ina saeia e ia lona ofu; ma sa ia ave sina vaega, ma ia tusi ai i luga—aMo le manatuaina o lo tatou Atua, ma la tatou tapuaiga, ma le saolotoga, ma lo tatou filemu, a tatou avā, ma a tatou fanau—ma sa ia nonoa i luga o le pito o se pou.

13 Ma sa ia faamaulu lona puloutau, ma lona ufifatafata, ma ana talitā, ma sulu lona ofutau faataamilo i ona sulugatiti; ma sa ia ave le pou, lea sa i ai i lona pito lona ofu ua sasae, (ma sa ia ta’ua o le tagavai o le saolotoga) ma sa ifo o ia lava i le eleele, ma ia tatalo faatauanau atu i lona Atua mo faamanuiaga o le saolotoga ia i luga o ona uso, pe afai e i ai pea se vaega o tagata Kerisiano e totoe e fai mo i latou le laueleele—

14 Ona sa faapea ona ta’ua o tagata uma sa talitonu moni ia Keriso, o ē sa auai i le ekalesia a le Atua, e i latou o ē sa le auai i le ekalesia.

15 Ma o i latou o e sa auai i le ekalesia sa faamaoni; ioe, o i latou uma o e sa talitonu moni ia Keriso sa latou ave ma le fiafia i o latou luga le asuafa o Keriso, po o le au eKerisiano e pei ona sa ta’ua ai i latou, ona o lo latou talitonu ia Keriso o lē o le a afio mai.

16 Ma o lea, na tatalo atu ai Moronae, i le taimi lea, ina ia mafai ona alofagia le faamoemoe o le au Kerisiano, ma le saolotoga o le laueleele.

17 Ma sa oo ina ua ia tuuina atu lona agaga i le Atua, sa ia ta’ua le laueleele atoa lea sa i le itu i saute o le laueleele o aTafuna’iga, ioe, ma i se aotelega, le laueleele uma lea, i matu uma ma saute—O se laueleele filifilia, ma le laueleele o le saolotoga.

18 Ma sa ia fai mai: E moni o le a le tuu lava e le Atua i tatou, o e ua inosia ona ua tatou ave i o tatou luga le suafa o Keriso, ia solia i tatou i lalo ma faaumatiaina, vagana ai ua tatou aumaia i o tatou luga e ala ia tatou lava solitulafono.

19 Ma ina ua uma ona fai mai e Moronae o nei upu, sa ia alu atu i totonu o le nuu, ua faaagiagia atu i le ea le vaega o lona aofu na sasae, ina ia mafai e tagata uma ona iloa mai tusitusiga ia na ia tusia i luga o le vaega o le ofu na sasae, ma alaga atu ma se leo tele, e faapea:

20 Faauta, soo se tasi e loto ia faatumauina lenei tagavai i luga o le laueleele, ia latou o mai i luma i le malosi o le Alii, ma ulu atu i se feagaiga o le a latou faatumauina a latou aia, ma la latou tapuaiga, ina ia faamanuiaina i latou e le Alii le Atua.

21 Ma sa oo ina ua uma ona faasilasila atu e Moronae o nei upu, faauta, sa taufetuli faatasi mai le nuu ma o latou ofutau ua sulu faataamilo i o latou sulugatiti, ma saeia o latou ofu e fai ma faailoga, po o se feagaiga, o le a latou le tuulafoaiina lava le Alii lo latou Atua; pe faapea, afai latou te solia poloaiga a le Atua, pe pa’u’ū atu i le solitulafono, ma amamā e ave i o latou luga le suafa o Keriso, o le Alii na te saeia i latou e pei lava ona latou saeia o latou ofu.

22 O lenei o le feagaiga lenei sa latou faia, ma sa latou lafo atu o latou ofu i vae o Moronae, ua fai mai: Matou te osi feagaiga ma lo matou Atua, ia faaumatia i matou, e pei lava o o matou uso i le laueleele i matu, pe afai matou te pa’u’ū atu i le solitulafono; ioe, ia lafoina e ia i matou i vae o o matou fili, e pei lava ona matou lafo atu o matou ofu i ou vae ia soli i lalo e vae, pe afai matou te pa’u’ū atu i le solitulafono.

23 Sa fai atu Moronae ia te i latou: Faauta, o i tatou o se vaega o totoe o le fanau a Iakopo; ioe, o i tatou o se vaega o totoe o le afanau a eIosefa, o le e ona le i’ofu na saeia e ona uso i ni fasi ie e tele; ioe, ma o lenei faauta, ia tatou manatua e tausi i poloaiga a le Atua, a leai o le a saeia o tatou ofu e o tatou uso, ma lafo i tatou i le falepuipui, pe faatau atu i tatou, pe fasiotia.

24 Ioe, ia tatou faasaoina lo tatou saolotoga o se avaega o totoe o Iosefa; ioe, ia tatou manatua upu a Iakopo, ae lei maliu o ia, aua faauta, sa vaai o ia ua faasaoina se vaega o le toega o le ofu o Iosefa ma sa lē pala. Ma sa fai mai o ia—E pei ona faasaoina lenei toega o le ofu o lou atalii, o le a faapea lava ona faasaoina e le aao o le Atua se evaega o totoe o le fanau a lou atalii, ma ia avea mo ia lava, ao le vaega e totoe o le fanau a Iosefa o le a fano, e pei lava o le vaega na totoe o lona ofu.

25 O lenei faauta, ua aumai e lenei mea le faanoanoa i lo’u agaga; ae ui i lea, ua olioli lo’u agaga i lo’u atalii, ona o lena vaega o lana fanau lea o le a tuuina atu i le Atua.

26 O lenei faauta, o le gagana lea a Iakopo.

27 Ma o lenei o ai na te iloa vagana le vaega o totoe o le fanau a Iosefa, lea o le a fano e pei o lona ofu, o i latou ia o e ua faatuiese mai ia te i tatou? Ioe, ma o i tatou foi ia pe afai tatou te le tutumau mausali i le faatuatua ia Keriso.

28 Ma o lenei sa oo ina ua uma ona fai atu e Moronae nei upu sa alu atu o ia, ma auina atu foi ni avefeau i vaega uma o le laueleele sa i ai faatuiesega, ma faapotopoto faatasi tagata uma o e sa mananao e faatumauina lo latou saolotoga, e tutula’i e tetee faasaga atu ia Amalekia ma i latou o e na faatuiese, o e ua ta’ua o sa Amalekiā.

29 Ma sa oo ina ua vaai Amalekia ua sili atu ona toatele tagata a Moronae nai lo sa Amalekiā—ma sa ia vaai foi ua masalosalo ona tagata e uiga i le tonu o le faamoemoe ua latou faia—o lea, i le fefe ne’i ona le maua le faamoemoe, na ia ave ai i latou o ona tagata o e na mananao i ai, ma ua o ese atu i le laueleele o Nifae.

30 O lenei sa manatu Moronae sa le tatau ona toe maua e sa Lamanā se malosi faateleina; o lea na manatu ai o ia e sisi’o mai tagata o Amalekia, pe taofi i latou ma toe aumai i latou, ma ia fasiotia Amalekia; ioe, ona sa ia iloa o le a ia faaosoina sa Lamanā ia feita e faasaga mai ia te i latou, ma uunaia i latou ia o mai e tau faasaga mai ia te i latou; ma sa iloa e ia o le a fai e Amalekia lenei mea ina ia mafai ona ia maua ai o ona faamoemoega.

31 O lea na manatu ai Moronae e tatau ona ia ave o ana autau, o e ua latou faapotopoto faatasi i latou lava, ma ua faaauupegaina i latou lava, ma ua ulu atu i se feagaiga e tausi le filemu—ma sa oo ina ave e ia lana autau ma savali atu i fafo faatasi ma ona faleie i le vao, e faasalavei le ala o Amalekia i le vao.

32 Ma sa oo ina faia e ia e tusa ma ona manao, ma savali atu i le vao, ma muamua e taofi mai autau a Amalekia.

33 Ma sa oo ina sosola Amalekia ma se vaega toaitiiti o ona tagata, ma o e na totoe na tuu mai i lima o Moronae ma sa toe faafoi atu i le laueleele o Sara’emila.

34 O lenei, ona o Moronae o se tagata o le na atofia e faamasino sili ma le leo o le nuu, o lea na i ai ia te ia le pule e faia ai soo se mea e tusa ma le mea e loto i ai, i autau a sa Nifaē, e faatu ma faatino ai le pule i luga o i latou.

35 Ma sa oo ina o soo se tasi o sa Amalekiā sa lē fia osi feagaiga e lagolago le faamoemoe o le saolotoga, ina ia mafai ona latou maua pea se malo saoloto, sa ia faatonu ina ia fasiotia; ma sa toaitiiti i latou sa faafitia le feagaiga o le saolotoga.

36 Ma sa oo foi ina ua ia faatonu atu, ia sisi ae i luga le tagavai o le saolotoga i olo uma sa i le laueleele atoa, lea sa fai mo sa Nifaē; ma sa faapea ona faatu e Moronae le tagavai o le saolotoga i totonu o sa Nifaē.

37 Ma sa amata ona latou toe maua o le filemu i le laueleele; ma sa faapea ona latou tausia o le filemu i le laueleele seia toeitiiti lava oo i le faaiuga o le lona sefulu iva o tausaga o le nofoaiga a faamasino.

38 Ma sa faatumauina foi e Helamana ma afaitaulaga sili le maopoopo i le ekalesia; ioe, sa oo lava ina latou maua le filemu tele ma le olioli i le ekalesia i le va o le fa tausaga.

39 Ma sa oo ina feoti le toatele, ma le atalitonu mausali ua togiolaina o latou agaga e le Alii o Iesu Keriso; o lea na latou tuua ai le lalolagi ma le olioli.

40 Ma sa i ai ni isi o e na oti i ma’i-fiva, ia sa masani ona pepesi i le laueleele i ni isi vaitau o le tausaga—ae sa le toatele naua na feoti i ma’i-fiva, ona o le aoga silisili o le tele o alaau ma aa na saunia e le Atua e aveese ai le pogai o ma’i, ia sa maua ai tagata ona o le uiga o le tau—

41 Ae sa toatele e na feoti ona ua loa o latou soifua; ma o i latou o e na oti ma le faatuatua ia Keriso ua afiafia ia te ia, e pei ona tatau ona tatou manatu i ai.