1 Karon mobalik kita sa atong talaan kang Amalickiah ug niadtong ^amilayas uban kaniya ngadto sa kamingawan; kay tan-awa, gidala niya kadtong miuban kaniya, ug mitungas sa ^byuta sa Nephi taliwala sa mga Lamanita, ug mihulhog sa mga Lamanita nga masuko batok sa katawhan ni Nephi, hangtod nga ang hari sa mga Lamanita mipadala og usa ka pahibalo sa iyang tibuok yuta, taliwala sa tanan niya nga katawhan, nga sila kinahanglan magpundok sa ilang mga kaugalingon pag-usab aron sa pagpakig-away batok sa mga Nephita.

2 Ug nahitabo nga sa dihang ang pahibalo miabot kanila nahadlok sila sa hilabihan; oo, nahadlok sila nga masilo ang hari, ug nahadlok usab sila nga makig-away batok sa mga Nephita basin pa og mangamatay sila. Ug nahitabo nga sila dili, o ang kadaghanan kanila dili, motuman sa mga sugo sa hari.

3 Ug karon nahitabo nga ang hari nasuko tungod sa ilang pagkamasinupakon; busa mihatag siya kang Amalickiah og kamandoan niana nga bahin sa iyang kasundalohan nga masulundon sa iyang mga sugo, ug nagmando kaniya nga siya moadto ug mopugos kanila sa pagpakig-away.

4 Karon tan-awa, mao kini ang tinguha ni Amalickiah; kay siya nga usa ka maliputon kaayo nga tawo sa pagbuhat og daotan busa mihimo siya og plano sa iyang kasingkasing sa pagpalagpot sa hari sa mga Lamanita gikan sa iyang trono.

5 Ug karon naangkon na niya ang kamandoan niadtong mga bahin sa mga Lamanita nga pabor sa hari; ug nagtinguha siya nga makaangkon og pabor niadtong dili mga masulundon; busa miadto siya sa dapit nga gitawag og ^aOnidah, kay didto ang tanang Lamanita milayas; kay ilang nadiskobrehan ang kasundalohan nga nagsingabot, ug, nagtuo nga miadto sila aron sa pagpatay kanila, busa nanglayas sila ngadto sa Onidah, sa dapit sa mga hinagiban.

6 Ug mipili sila og tawo nga mahimo nilang hari ug pangulo, nga may hugot kaayo ug determinado nga hunahuna nga sila dili mahimong mandoan sa pakiggubat batok sa mga Nephita.

7 Ug nahitabo nga nagpundok sila sa ibabaw sa bungtod nga gitawag og Antipas, sa pagpangandam sa pagpakig-away.

8 Karon dili tuyo ni Amalickiah ang pagpakig-away kanila sumala sa mga sugo sa hari; apan tan-awa, ang iyang tuyo nga makaangkon og pabor sa kasundalohan sa mga Lamanita, aron iyang mapahimutang ang iyang kaugalingon nga pangulo ug palagpoton ang hari ug makapanag-iya sa gingharian.

9 Ug tan-awa, nahitabo nga gisugo niya ang iyang kasundalohan sa pagpabarog sa ilang mga tolda diha sa walog nga duol sa bungtod sa Antipas.

10 Ug nahitabo nga sa dihang miabot ang kagabhion mipadala siya og usa ka tinago nga embahada ngadto sa bungtod sa Antipas, nagtinguha nga ang pangulo niadtong kinsa anaa sa bungtod, kansang ngalan mao si Lehonti, nga molugsong siya sa bungtod, kay nagtinguha siya nga makigsulti kaniya.

11 Ug nahitabo nga sa pagkadawat ni Lehonti sa mensahe wala siya mangahas sa paglugsong sa bungtod. Ug nahitabo nga si Amalickiah mipadala pag-usab sa ikaduha nga higayon, nagtinguha nga siya manaog. Ug nahitabo nga si Lehonti dili gayod; ug mipadala siya pag-usab sa ikatulo nga higayon.

12 Ug nahitabo nga sa dihang nahibaloan ni Amalickiah nga dili niya mapalugsong si Lehonti gikan sa bungtod, mitungas siya ngadto sa bungtod, duol sa kampo ni Lehonti; ug mipadala siya pag-usab sa ikaupat nga higayon sa iyang mensahe ngadto kang Lehonti, nagtinguha nga siya molugsong, ug nga siya mahimong magdala sa iyang mga tigbantay uban kaniya.

13 Ug nahitabo nga sa dihang si Lehonti milugsong uban sa iyang mga tigbantay ngadto kang Amalickiah, tinguha ni Amalickiah nga ikuyog niya sa paglugsong ang iyang kasundalohan sa panahon sa kagabhion, ug moliyok niadtong mga tawo nga naa sa ilang mga kampo nga gihatag sa hari kaniya nga mandoan, ug nga siya motugyan kanila ngadto sa mga kamot ni Lehonti, kon siya mohimo kaniya (ni Amalickiah) nga ikaduha nga pangulo sa tibuok nga kasundalohan.

14 Ug nahitabo nga milugsong si Lehonti uban sa iyang mga tawo ug miliyok sa mga tawo ni Amalickiah, aron nga sa dili pa sila momata sa kaadlawon sila giliyokan na sa kasundalohan ni Lehonti.

15 Ug nahitabo nga sa dihang nakita nila nga giliyokan na sila, nagpakiluoy sila kang Amalickiah nga siya motugot kanila nga makighiusa sa ilang kaigsuonan, aron dili sila pamatyon. Karon mao gayod kini ang butang nga gitinguha ni Amalickiah.

16 Ug nahitabo nga gitugyan niya ang iyang mga tawo, ^asupak sa kamandoan sa hari. Karon mao kini ang butang nga gitinguha ni Amalickiah, nga matuman niya ang iyang mga plano sa pagpalagpot sa hari gikan sa trono.

17 Karon nabatasan na sa mga Lamanita, nga kon ang ilang labaw nga pangulo mamatay, nga pilion ang ikaduha nga pangulo nga mahimong ilang labaw nga pangulo.

18 Ug nahitabo nga gisugo ni Amalickiah ang usa sa iyang mga sulugoon nga hiloan sa hinay-hinay si Lehonti, nga siya namatay.

19 Karon, sa dihang patay na si Lehonti, ang mga Lamanita mipili kang Amalickiah nga mahimo nilang pangulo ug ilang labaw nga komandante.

20 Ug nahitabo nga si Amalickiah mimartsa uban sa iyang kasundalohan (kay naangkon na niya ang iyang mga tinguha) ngadto sa yuta sa Nephi, ngadto sa siyudad sa Nephi, nga mao ang labing mahinungdanon nga siyudad.

21 Ug ang hari migawas aron sa pagsugat kaniya uban sa iyang mga tigbantay, kay nagtuo siya nga si Amalickiah mituman sa iyang mga mando, ug nga si Amalickiah mipundok sa daghan kaayo nga kasundalohan aron makig-away batok sa mga Nephita.

22 Apan tan-awa, samtang ang hari migawas aron sa pagsugat kaniya si Amalickiah misugo sa iyang mga sulugoon nga mosugat sa hari. Ug nangadto sila ug miyukbo sa ilang mga kaugalingon atubangan sa hari, ingon og mitahod kaniya tungod sa iyang pagkagamhanan.

23 Ug nahitabo nga ang hari mituyhad sa iyang kamot aron sa pagpatindog kanila, ingon sa nabatasan sa mga Lamanita, agi og ilhanan sa kalinaw, nga ang maong pamatasan nakuha nila gikan sa mga Nephita.

24 Ug nahitabo nga sa dihang siya nakapatindog sa nahauna gikan sa yuta, tan-awa gidunggab niya ang hari sa kasingkasing; ug natumba siya sa yuta.

25 Karon ang mga sulugoon sa hari nanagan; ug ang mga sulugoon ni Amalickiah misinggit, nga nag-ingon:

26 Tan-awa, ang mga sulugoon sa hari midunggab kaniya sa kasingkasing, ug siya namatay ug sila nanagan; tan-awa, dali sud-onga.

27 Ug nahitabo nga mimando si Amalickiah nga ang iyang kasundalohan momartsa ug motan-aw unsa ang nahitabo sa hari; ug sa dihang miabot sila sa dapit, ug nakakita sa hari nga naghigda nga samaran, si Amalickiah nagpakaaron-ingnon nga nasuko, ug miingon: Kinsa kadtong nahigugma sa hari, paadtoa, ug ipagukod ang iyang mga sulugoon aron sila patyon.

28 Ug nahitabo nga silang tanan nga nahigugma sa hari, sa dihang nakabati sila niini nga mga pulong, miduol ug migukod sa mga sulugoon sa hari.

29 Karon sa dihang ang mga sulugoon sa hari nakakita og kasundalohan nga migukod kanila, nangahadlok sila pag-usab, ug nanagan paingon sa kamingawan, ug miabot didto sa yuta sa Zarahemla ug mitipon sa ^akatawhan ni Ammon.

30 Ug ang kasundalohan nga migukod kanila namauli, human napakyas sa paggukod kanila; ug sa ingon niana si Amalickiah, pinaagi sa iyang panglimbong, nakaangkon sa mga kasingkasing sa katawhan.

31 Ug nahitabo nga sa pagkaugma misulod siya sa siyudad sa Nephi uban sa iyang kasundalohan, ug gipanag-iya ang siyudad.

32 Ug karon nahitabo nga ang rayna, sa dihang nakadungog siya nga gipatay ang hari—kay si Amalickiah mipadala og embahada ngadto sa rayna nga nagpahibalo kaniya nga ang hari gipatay sa iyang mga sulugoon, nga gigukod niya sila uban sa iyang kasundalohan, apan kini nakawang, ug nakaikyas sila—

33 Busa, sa pagkadawat sa rayna niini nga mensahe nagpasugo siya ngadto kang Amalickiah, nagtinguha nga dili niya pamatyon ang mga tawo sa siyudad; ug nagtinguha usab siya nga moadto kaniya; ug siya usab nagtinguha nga magdala siya og mga saksi uban kaniya aron mopamatuod mahitungod sa kamatayon sa hari.

34 Ug nahitabo nga si Amalickiah midala sa samang sulugoon nga mipatay sa hari, ug silang tanan nga uban kaniya, ug miadto sa rayna, ngadto sa dapit diin siya naglingkod; ug silang tanan mipamatuod ngadto kaniya nga ang hari gipatay sa iyang kaugalingon nga mga sulugoon; ug miingon usab sila: Nanagan sila; dili ba kini ang pagpamatuod batok kanila? Ug sa ingon niana natagbaw nila ang rayna mahitungod sa kamatayon sa hari.

35 Ug nahitabo nga si Amalickiah naningkamot nga magustohan sa rayna, ug mihimo kaniya nga iyang asawa; ug sa ingon niana pinaagi sa iyang panglimbong, ug pinaagi sa tabang sa iyang malipoton nga mga sulugoon, naangkon niya ang gingharian; oo, siya giila nga hari sa tibuok nga yuta, taliwala sa tanang katawhan sa mga Lamanita, nga ^agilangkoban sa mga Lamanita ug mga Lemuelita ug sa mga Ishmaelita, ug sa tanang masupilon sa mga Nephita, gikan sa paghari ni Nephi hangtod karon nga panahon.

36 Karon kining mga ^amasupilon, kay nakadawat og sama nga panudlo ug sama nga impormasyon sa mga Nephita, oo, nga natudloan sa sama nga ^bkahibalo bahin sa Ginoo, bisan pa niana, katingalahan nga isaysay, nga sa wala madugay human sa ilang mga pagbiya nahimo silang labaw pa nga tig-a ug ^cdili mahinulsolon, ug labaw pa ka luog, daotan ug mabangis kay sa mga Lamanita—misagop sa mga tradisyon sa mga Lamanita; misunod sa pamaagi sa katapolan, ug sa tanang matang sa pagkamaulagon; oo, gikalimtan sa hingpit ang Ginoo nga ilang Dios.