1 O lenei sa oo i le lona ono o tausaga o le nofoa’iga a faamasino i le nuu o Nifae, sa lē i ai ni finauga po o ni taua i le ^anuu o Sara’emila.

2 Peitai sa puapuagatia le nuu, ioe, puapuagatia tele lava i le ^atoesea o o latou uso, ma le toesea foi o a latou lafu ma fagaga, ma le faatama’ia foi o a latou faatoaga saito, ia na soli i lalo e vae ma faatauma’oia e sa Lamanā.

3 Ma o le tetele na’uā o o latou puapuaga o lea sa i ai i tagata taitoatasi se pogai na faanoanoa ai; ma sa latou talitonu o ia mea o faamasinoga ia a le Atua ua auina mai i o latou luga ona o lo latou amioleaga ma a latou mea inosia; o lea na fagua ai i latou i le manatuaina o lo latou tiute.

4 Ma sa amata ona latou faatulaga atoatoa le ekalesia; ioe, ma e toatele sa ^apapatisoina i vai o Saitonu ma auai i le ekalesia a le Atua; ioe, sa papatisoina i latou i le lima o Alema, o lē na faapaiaina o le ^efaitaulaga sili i luga o tagata o le ekalesia, e le lima o lona tamā o Alema.

5 Ma sa oo i le lona fitu o tausaga o le nofoa’iga a faamasino, sa i ai e tusa o le tolu afe lima selau agaga sa aufaatasi atu i latou lava i le ^aekalesia a le Atua ma papatisoina. Ma sa faapea ona faai’u o le lona fitu o tausaga o le nofoa’iga a faamasino i le nuu o Nifae, ma sa faaauau ona i ai pea o le filemu i lena taimi atoa.

6 Ma sa oo i le lona valu o tausaga o le nofoa’iga a faamasino, sa amata ona faamaualuluga tagata o le ekalesia, ona o lo latou ^amauoa tele, ma a latou ^esilika lelei, ma a latou ie lino miloa lelei, ma ona o le tele o a latou lafu ma fagaga, ma a latou auro ma a latou ario, ma ituaiga uma o mea taua eseese, ia sa latou maua e ala i lo latou galulue maelega; ma o nei mea uma sa faafefeteina ai i latou i le faamaualuluga e pei ona iloa i o latou mata, ona sa amata ona latou o’ofu i ofu taugata tele.

7 O lenei sa avea lenei mea ma pogai o le puapuaga tele o Alema, ioe, ma le toatele o tagata o e na ^afaapaiaina e Alema e avea ma a’oa’o, ma faitaulaga, ma toeaina i luga o le ekalesia; ioe, o le toatele o i latou sa faanoanoa tele i le amioleaga sa latou vaai ua amata ona i ai i totonu o o latou tagata.

8 Ona sa latou iloa ma vaai atu ma le faanoanoa tele i le amata e tagata o le ekalesia ona siitia a’e i le ^afaamaualuluga i o latou mata, ma tuu atu o latou loto i luga o oa ma luga o mea lē aoga o le lalolagi, i le sa amata ai ona latou inoino, o le tasi i le isi, ma amata ona latou sauaina ai i latou o e sa ^elē talitonu e tusa ma o latou lava loto ma manaoga.

9 Ma sa faapea, i le lona valu o tausaga o le nofoa’iga a faamasino, ona amata ona i ai o ^afinauga tetele i totonu o tagata o le ekalesia; ioe, sa i ai ^elosilosivalega, ma finauga, ma le lotoleaga, ma sauaga, ma le faamaualuga, sa sili atu i le faamaualuluga o i latou o e sa lē auai i le ekalesia a le Atua.

10 Ma sa faapea ona faai’u o le lona valu o tausaga o le nofoa’iga a faamasino; ma o le amioleaga o le ekalesia, sa avea o se maa tu’ia tele ia te i latou o e sa lē auai i le ekalesia; ma sa faapea ona amata ona vaivai le ekalesia i lona alualu i luma.

11 Ma sa oo i le amataga o le lona iva o tausaga, sa vaaia ai e Alema le amioleaga o le ekalesia, ma sa ia vaaia foi ua amata ona ta’ita’i atu e ^afaataitaiga a tagata o le ekalesia, i latou o e sa lē talitonu, mai le tasi amioletonu i le isi amioletonu, ma faapea ona aumai ai o le faafanoga o le nuu.

12 Ioe, sa ia vaaia i le lē tutusa tele i totonu o tagata, o ni isi ua latou faafefete a’e i latou lava i lo latou faamaualuluga, ua inoino i isi, ua fuli atu o latou tua i e ua ^alē tagolima ma e ua lē lavalavā, ma i latou o e ua ^efia aai, ma i latou o e ua fia feinu, ma i latou o e ua mama’i ma puapuagatia.

13 O lenei sa avea lenei mea ma pogai o auega i totonu o le nuu, a’o isi sa latou faalotomaualaloina i latou lava, i le fesoasoani atu lea ia te i latou o e na manaomia la latou fesoasoani, e pei o le ^afaasoa atu o a latou mea i e ua matitiva ma e ua lē tagolima, ma fafaga i e sa fia aai, ma mafatia i ituaiga o ^epuapuaga uma, ⁱmo Keriso, o lē o le a afio mai e tusa ma le agaga o valoaga;

14 Ole tulimatai atu i lena aso, ua faapea ona ^afaatumauina ai le faamagaloina o a latou agasala; ua faatumuina i le ^eolioli tele ona o le toetutū mai o e ua oti, e tusa ma le finagalo ma le mana ma le lavea’iga a Iesu Keriso mai fusi o le oti.

15 Ma o lenei sa oo ina ua vaai atu Alema i puapuaga o tagata lotomaualalalo na mulimuli i le Atua, ma sauaga sa fatufatu a’e i o latou luga e le vaega na totoe o ona tagata, ma vaai i mea uma sa latou ^aeseese ai, sa amata ona faanoanoa tele o ia; ae ui i lea sa lē tuulafoa’iina o ia e le Agaga o le Alii.

16 Ma sa ia filifilia se tagata poto sa i ai i totonu o toeaina o le ekalesia, ma tuu atu ia te ia le pule e tusa ma le ^afinagalo o le nuu, ina ia mafai e ia ona maua le mana e faamalosia ai ^etulafono e tusa ma tulafono na tuuina mai, ma faamalosia ia tulafono e tusa ma amioleaga ma solitulafono a tagata.

17 O lenei o le igoa o lenei tagata o Nifaea, ma sa tofia o ia e avea ma ^afaamasino sili; ma sa nofo o ia i le nofoa-faamasino e faamasino ma pulea le nuu.

18 O lenei sa lē tuuina atu e Alema ia te ia le tofiga o le avea ma faitaulaga sili i le ekalesia, ae sa ia taofi pea le tofiga o le faitaulaga sili ia te ia lava; ae sa ia tuuina atu le nofoa-faamasino ia Nifaea.

19 Ma sa ia faia lenei mea ina ia mafai e ^aia lava ona alu atu i ona tagata, po o tagata o Nifae, ina ia mafai ona ia tala’i atu le ^eafioga a le Atua ia te i latou, e ⁱuunai i latou, ia ^omanatua lo latou tiute, ma ina ia mafai ona ia faamaulaloina, e ala i le afioga a le Atua, le faamaualuga uma ma le pepelo ma finauga uma sa i ai i lona nuu, i le vaai atu ua leai se auala e mafai ai ona ia toe aumai o i latou, vagana ai le faamalosi atu e ala i le ^umolimau mamā e faasaga ia te i latou.

20 Ma sa faapea i le amataga o le lona iva o tausaga o le nofoa’iga a faamasino i le nuu o Nifae, ona tuuina atu e Alema o le nofoa-faamasino ia ^aNifaea, ma tuu atu atoatoa o ia lava i le ^eperisitua maualuga o le faatulagaga paia a le Atua, i le molimau o le afioga a le Atua, e tusa ai ma le agaga o faaaliga ma valoaga.