Ol toktok we Alma, Hae Pris folem tabu oda blong God, i bin talemaot long ol pipol long ol bigtaon blong olgeta mo ol vilej truaot long graon.
I stap long japta 5 nomo.

Japta 5

Blong kasem fasin blong sevem man, ol man i mas sakem sin mo holem ol komanmen, oli mas bon bakegen, oli mas klinim ol klos blong olgeta tru long blad blong Kraes, oli mas putum tingting blong olgeta i stap daon mo oli mas stopem fasin ia blong gat hae tingting mo wantem samting blong narafala man, mo mekem ol wok blong stret fasin—Gudfala Man blong lukaotem ol sipsip i singaotem ol pipol blong hem—Olgeta we oli mekem ol wok we oli nogud oli ol pikinini blong devel—Alma i talem testemoni blong hem se doktrin blong hem i tru mo i talem long ol man blong sakem sin—Ol nem blong olgeta we i stret bae oli raetem daon olgeta long buk blong laef. Raonabaot 83 yia bifo Kraes i bon.

 Nao i bin hapen se, Alma i bin stat blong talemaot toktok blong God long ol pipol, stat long graon blong Sarahemla, mo afta, truaot long evri ples long graon.

 Mo hemia ol toktok we hem i bin talem long ol man long jos we oli bin stanemap long bigtaon blong Sarahemla, folem histri blong hem bakegen, i talem:

 Mi, Alma, mi bin kasem konsekresen tru long papa blong mi, Alma, blong kam wan hae pris blong jos blong God, hem i bin gat paoa mo raet long God blong mekem ol samting ia, luk, mi talem long yufala se hem i bin stat blong stanemap wan jos long graon we i bin stap long ol boda blong Nifae; yes, graon we oli bin singaotem graon blong Momon; yes, mo hem i bin baptaesem ol brata blong hem long wota blong Momon.

 Mo luk, mi talem long yufala, oli bin go fri mo kamaot tru long ol han blong ol man blong king Noa, tru long sore mo paoa blong God.

 Mo luk, afta, oli bin kam slef long ol han blong ol laen blong Leman long ples we i no gat man long hem; yes, mi talem long yufala, oli stap olsem we oli stap long kalabus, mo bakegen, Lod i bin mekem oli kamaot long slef tru long paoa blong toktok blong hem; mo hem i bin tekem yumi i kam long graon ia mo yumi stat blong stanemap jos blong God long ples ia, long evri ples blong graon ia tu.

 Mo nao luk, mi talem long yufala, ol brata blong mi, yufala blong jos ia, yufala i bin holem taet naf long tingting blong yufala, se ol bubu blong yufala oli stap long kalabus? Yes, mo yufala i bin holem taet naf long tingting blong yufala, sore mo save wet longtaem blong God long olgeta? Mo antap long samting ia, yufala i bin holem taet inaf long tingting blong yufala, se hem i bin sevem ol sol blong olgeta long hel?

 Luk, hem i bin jenisim hat blong olgeta; yes, hem i bin wekemap olgeta long wan dip slip, mo oli bin wekap long God. Luk, oli bin stap long medel blong ol klaod blong tudak; be, laet blong toktok ia we i no save en, i bin laetem ol sol blong olgeta; yes, ol rop blong ded, mo ol jen blong hel, i bin raonem olgeta, mo wan ded we i no save en i bin stap wet long olgeta.

 Mo nao mi askem yufala, ol brata blong mi, yufala i ting se olgeta oli bin lus olgeta? Luk, mi talem long yufala, No, oli no bin lus.

 Mo bakegen mi askem, yufala i ting se ol rop blong ded oli brok, mo se ol jen blong hel we i bin raonem olgeta, oli bin kamaot? Mi talem long yufala, Yes, oli bin kamaot, mo ol sol blong olgeta i bin gru bigwan, mo oli bin singim singsing blong lav blong pemaot man. Mo mi talem long yufala se oli sev.

 10 Mo nao mi askem yufala se long wanem stamba tingting nao oli sev? Yes, long wanem stamba tingting nao we oli bin gat hop blong kasem fasin blong sevem man? Wanem nao i bin mekem olgeta i kamaot long ol rop blong ded, yes, mo tu long ol jen blong hel?

 11 Luk, mi save talem long yufala—papa blong mi Alma i no bin biliv long ol toktok we oli bin kamaot long maot blong Abinadae? Mo yufala i ting se hem i no wan tabu profet? Yufala i ting se hem i no talemaot ol toktok blong God, mo papa blong mi Alma i bilivim olgeta?

 12 Mo folem fet blong hem, wan bigfala jenis i bin hapen long hat blong hem. Luk mi talem long yufala se evri samting ia i tru.

 13 Mo luk, hem i bin prijim ol toktok long ol bubu blong yufala, mo tu wan bigfala jenis i bin hapen long ol hat blong olgeta. Mo oli bin putum tingting blong olgeta daon mo oli bin putum tras blong olgeta long tru God we i stap laef. Mo luk, oli bin holem taet fet kasem en; Taswe oli bin sev.

 14 Mo nao luk, mi askem yufala, ol brata blong mi blong jos, yufala i bin bon long spirit blong God? Yufala i bin kasem pikja blong hem long fes blong yufala? Yufala i ting se yufala i bin kasem bigfala jenis ia long ol hat blong yufala?

 15 Yufala i yusum fet long fasin blong pemaot man, blong hem we i bin mekem yufala? Yufala i lukluk i go long fored wetem wan ae blong fet, mo luk bodi we i save ded i girap long wan bodi we i nomo save ded, mo roten ia i girap long wan bodi we i nomo save roten, blong stanap long fored blong God blong hem i jajem yufala folem ol wok we yufala i bin mekem long bodi blong wol ia?

 16 Mi talem long yufala, traem tingbaot se yufala i harem voes blong Lod, we i talem long yufala, long dei ia: Kam long mi yufala we mi blesem yufala, from luk, ol wok blong yufala oli ol wok blong stret fasin long fes blong wol?

 17 O traem tingbaot se yufala i save giaman long Lod long dei ia, mo talem—Lod, ol wok blong mifala i bin ol stret wok long fes blong wol—mo talem se, bae hem i sevem yufala?

 18 O sapos no, traem tingbaot taem bae God i karem yufala i kam long kot blong hem wetem ol sol blong yufala we oli fulap wetem rong mo sore, filim wan tingting blong evri rong blong yufala, yes, wan ful tingting bak long evri rong blong yufala, yes, wan ful tingting bak we yufala i bin tanem baksaed blong yufala long ol komanmen blong God?

 19 Mi talem long yufala, yufala i ting se yufala i save luk God long dei ia wetem wan klin hat mo ol klin han? Mi talem long yufala se, yufala i ting se yufala i save leftemap ae blong yufala wetem pikja blong God we i stap long fes blong yufala?

 20 Mi talem long yufala, yufala i ting se oli save sevem yufala taem yufala i bin givim yufala long devel blong kam ol man blong hem?

 21 Mi talem long yufala, bae yufala i save long dei ia se yufala i no save sev; from i no save gat wan man we i save sev hemia nomo sapos hem i wasem klos ia i kam waet. Yes, ol klos blong hem i mas klin kasem taem we evri mak i kamaot, tru long blad blong man ia we ol bubu blong yumi oli bin tokbaot, we bae hem i kam blong pemaot ol pipol blong hem aot long ol sin blong olgeta.

 22 Mo nao mi askem long yufala, ol brata blong mi, bae yufala i filim olsem wanem, sapos yufala i stanap long fored blong kot blong God, wetem ol blad mo evri kaen mak i stap long ol klos blong yufala? Luk, ol samting ia bae oli go agensem yufala long wanem?

 23 Luk, bae oli no talemaot se yufala i ol man blong kilim man i ded, yes, mo tu se oli faenem rong blong yufala long evri kaen fasin nogud?

 24 Luk, ol brata blong mi, yufala i ting se wan man olsem i save gat wan ples blong sidaon long hem long kingdom blong God, wetem Ebraham, wetem Aesak, mo wetem Jekob, mo tu evri tabu profet, we ol klos blong olgeta oli klin, mo oli no gat mak, oli klin gud tumas mo oli waet?

 25 Mi talem long yufala, No; hemia nomo sapos yufala i mekem Krieta blong yumi i wan man blong giaman long stat, o sapos hem i wan man blong giaman long stat, yufala i no save traem tingbaot se man olsem i save gat wan ples long kingdom blong heven; be bae oli sakemaot olgeta from oli ol pikinini blong kingdom blong devel.

 26 Mo nao luk, mi talem long yufala, ol brata blong mi, sapos yufala i bin gat wan jenis we i hapen long hat, mo sapos yufala i bin wantem blong singim singsing blong lav blong pemaot man, bae mi askem, yufala i save filim samting ia naoia?

 27 Yufala i bin wokbaot long wol ia, laef blong yufala i no gat rong long fored blong God? Yu save talem, sapos God i singaotem yufala naoia blong ded, insaed long yufala bakegen, se tingting blong yufala i bin stap daon inaf? Ol klos blong yufala oli klin, mo oli kam waet tru long blad blong Kraes ia, we bae hem i kam blong pemaot ol pipol blong hem, aot long ol sin blong olgeta?

 28 Luk, yufala i bin karemaot fasin blong gat hae tingting long yufala? Mi talem long yufala, sapos yufala i no bin mekem samting ia yet, yufala i no rere blong mitim God. Luk yufala i rere kwik; from kingdom blong heven i kam klosap, mo ol man olsem ia bae oli no gat laef we i no save finis.

 29 Luk, mi talem, i gat wan long medel blong yufala we i no bin karemaot fasin ia blong wantem samting blong narafala man long hem? Mi talem long yufala se man olsem ia i no rere; mo mi wantem blong hem i mas rere kwik, from aoa i kam klosap, mo hem i no save wanem taem bae samting ia i hapen; from man olsem ia bae oli no save faenemaot se hem i no gat rong.

 30 Mo bakegen mi talem long yufala, i gat wan long yufala we i stap jikim brata blong hem, o we i hipimap ol hadtaem antap long hem?

 31 Sore tumas long wan man olsem, from hem i no rere, mo taem i klosap we hem i mas sakem sin o hem i no save sev!

 32 Yes, sore tumas long yufala evriwan we i stap mekem rabis fasin; sakem sin, sakem sin, from Lod God i bin talemaot samting ia!

 33 Luk, hem i sendemaot wan toktok long evri man blong kam, from ol han blong sore i stretem i go long olgeta, mo hem i talem: Sakem sin, mo bae mi tekem yufala.

 34 Yes, hem i talem: Kam long mi mo bae yufala i save kakae frut blong tri blong laef; Yes, bae yufala kakae mo dring bred mo ol wota blong laef fri nomo;

 35 Yes, kam long mi mo karem i kam ol wok blong stret fasin, mo bae oli no save katem daon yufala mo sakem yufala i go long faea—

 36 From luk, taem i kam klosap we eni man we i no karem i kam gudfala frut, o eni man we i no mekem ol wok blong stret fasin, ol sem man ia, bae oli krae mo tingting hevi from stamba tingting ia.

 37 O yufala ol man blong mekem ol rabis fasin, yufala we i fulap long ol samting blong wol we oli blong nating, yufala we i talemaot se yufala i bin save ol rod blong stret fasin be stil yufala i go long rabis rod, olsem wan sipsip we i no gat man we i stap lukaotem hem, i no mata we wan man blong lukaotem sipsip i bin singaotem yufala mo i stil singaotem yufala, be yufala i no lisin long voes blong hem!

 38 Luk, mi talem long yufala se, gudfala man blong lukaotem ol sipsip i singaotem yufala; Yes, mo hem i singaotem yufala long nem blong hem bakegen, we i nem blong Kraes; Mo sapos yufala i no lisin long voes blong gudfala man blong lukaotem ol sipsip, long nem we hem i stap singaotem yufala wetem, luk yufala i no sipsip blong gudfala man blong lukaotem sipsip.

 39 Mo nao sapos yufala i no sipsip blong gudfala man blong lukaotem ol sipsip, yufala i blong wanem yad? Luk, mi talem long yufala se, devel i man blong lukaotem sipsip blong yufala, mo yufala i yad blong hem; mo nao huia i save tanem baksaed long samting ia? Luk, mi talem long yufala, eni man we i tanem baksaed blong olgeta long samting ia, hem i wan giaman man mo hem i wan pikinini blong devel.

 40 From mi talem long yufala se, eni samting we i gud i kam long God, mo eni samting we i nogud i kam long devel.

 41 Taswe, sapos wan man i karem i kam ol gudfala wok hem i lisin long voes blong gudfala man blong lukaotem ol sipsip, mo hem i stap folem hem; Be eni man we i karem i kam ol nogud wok, semfala man ia i kam wan pikinini blong devel, from hem i lisin long voes blong hem, mo i stap folem hem.

 42 Mo eni man we i mekem samting ia i mas kasem pei blong hem long hem; Taswe, pei blong hem we bae hem i kasem, hem i ded long saed blong ol samting blong stret fasin, from hem i ded long evri gudfala wok.

 43 Mo nao, ol brata blong mi, mi wantem yufala blong lisin long mi, from mi toktok wetem paoa blong sol blong mi; From luk, mi bin toktok long yufala long wan klia fasin blong mekem se yufala i no save mestem, o mi bin toktok folem ol komanmen blong God.

 44 From oli singaotem mi blong toktok long fasin ia nao, folem tabu oda blong God, we i stap long Kraes Jisas; Yes, oli talem long mi blong stanap mo talem testemoni long pipol ia long ol samting we ol bubu blong yumi oli bin talemaot long saed blong ol samting we bae oli kam.

 45 Mo i no hemia nomo. Yufala i no ting se mi save ol samting ia mi wan bakegen? Luk, mi talem long yufala se mi save se ol samting we mi bin talemaot long yufala oli tru. Mo olsem wanem nao yufala i ting se mi save se oli tru?

 46 Luk, mi talem long yufala se, Tabu Spirit blong God i bin mekem mi save ol samting ia. Luk, mi bin livim kakae mo prea plante dei blong mi save ol samting ia mi wan. Mo nao mi save long mi wan se oli tru; from Lod God i bin soemaot olgeta long mi tru long Tabu Spirit blong hem; Mo hemia spirit blong revelesen we i stap long mi.

 47 Mo antap long samting ia, mi talem long yufala se oli bin talem long mi se, ol toktok we ol bubu blong yumi oli bin talemaot oli tru, long sem fasin tu folem spirit blong profesi we i stap long mi, we tu i kam tru long fasin blong soemaot blong Spirit blong God.

 48 Mi talem long yufala, se mi save long miwan se eni samting we bae mi talem long yufala, long saed blong samting we bae i kam, i tru; Mo mi talem long yufala, se mi save se Jisas Kraes bae i kam, yes, Pikinini, Wan Pikinini Nomo blong Papa, we i gat fulap gladhat, mo sore, mo trutok. Mo luk, hem nao we bae i kam blong tekemaot ol sin blong wol, yes, ol sin blong evri man we oli biliv semak evri taem long nem blong hem.

 49 Mo nao mi talem long yufala se, hemia oda we oli singaotem mi long hem, yes, blong prij long ol brata blong mi we mi lavem tumas, yes, mo evriwan we oli stap long graon; Yes, blong prij long evriwan, ol olfala tugeta wetem ol yangfala, long olgeta we oli stap long kalabus tugeta wetem olgeta we oli fri; Yes, mi talem long yufala, ol olfala, mo olgeta medel man, mo olgeta we oli stap gru yet i kam antap; yes, blong talemaot strong long olgeta se oli mas sakem sin mo oli mas bon bakegen.

 50 Yes, Spirit i talem se: Sakem sin, yufala evriwan long evri en blong wol, from kingdom blong heven i stap kam klosap; Yes, bae Pikinini blong God i kam long glori blong hem mo long strong blong hem, long fasin we i hae tumas, long paoa mo long kontrol. Yes, ol brata blong mi we mi lavem tumas, mi talem long yufala se, Spirit i talem: Luk, glori blong King blong ful wol ia, mo tu King blong heven bae i no long taem; hem i saen tu long medel blong evri pikinini blong ol man.

 51 Mo tu Spirit i talem long mi se, yes, talem long mi wetem wan strong voes, i se: Go fored mo talem long pipol ia—Sakem sin, from hemia nomo sapos yufala i no sakem sin, yufala i no save go stap long kingdom blong heven.

 52 Mo bakegen mi talem long yufala, Spirit i talem: Luk, oli putum akis long rus blong tri; taswe evri tri we i no karem gudfala frut bae oli katem daon mo sakem i go long faea, yes, wan faea we i no save stop, yes wan faea we oli no save kilim i ded. Luk, mo tingbaot, Tabu Wan i bin talem samting ia.

 53 Mo nao olgeta brata blong mi we mi lavem tumas, mi talem long yufala, yufala i ting se yufala i save go agensem ol samting ia; Yes, yufala i save putum ol samting ia long saed, mo purumbut long Tabu Wan andanit long leg blong yufala; yes, yufala i save fulap long hae tingting long hat blong yufala; yes, bae yufala i gohed blong werem ol klos we oli sas plante mo putum hat blong yufala long ol samting blong wol we oli blong nating, antap long ol rij samting blong yufala?

 54 Yes, bae yufala i gohed blong stap soem se yufala i moa gud bitim ol narafala wan, yes, bae yufala i gohed long ol fasin ia blong givim hadtaem long ol brata blong yufala, olgeta ia we tingting blong olgeta i stap daon mo oli wokbaot folem tabu oda blong God, we tru long hem nao, oli kam joenem jos ia, mo oli bin kam klin tru long Tabu Spirit, mo oli mekem ol wok we oli blong fasin blong sakem sin—

 55 Yes, mo bae yufala i gohed blong tanem baksaed blong yufala long ol pua, mo olgeta we oli nidim help, mo no serem ol samting blong yufala wetem olgeta?

 56 Mo las toktok, yufala evriwan we i gohed long ol fasin nogud, mi talem long yufala se olgeta ia oli olgeta we bae oli katem daon olgeta mo sakem olgeta i go long faea hemia nomo sapos oli no sakem sin kwiktaem.

 57 Mo nao mi talem long yufala, yufala evriwan we i wantem blong folem voes blong gudfala man blong lukaotem ol sipsip, yufala i kamaot long ol nogud man, mo yufala i stap defren, mo no tajem ol samting blong olgeta we i no klin; Mo luk, bae oli tekemaot nem blong olgeta nogud man, blong mekem se oli no kaontem olgeta wetem nem blong olgeta we i stret, blong mekem se toktok blong God i save hapen, we i talem: Ol nem blong ol nogud man bae oli no miks wetem ol nem blong ol man blong mi;

 58 From ol nem blong olgeta we i stret bae oli raetem daon long buk blong laef, mo bae mi givim long olgeta wan ples we i kam long ol papa long raet han blong mi. Mo nao, ol brata blong mi, yufala i gat wanem blong talem agensem samting ia? Mi talem long yufala, sapos yufala i toktok agensem samting ia, i oraet nomo, from toktok blong God i mas hapen.

 59 Huia long yufala we i man blong lukaotem sipsip we i gat plante sipsip be i no lukaotem olgeta, blong ol wael dog oli no save go insaed mo kakae ol anamol blong hem? Mo luk, sapos wan wael dog i go insaed long ol grup blong anamol blong hem, bae hem i no ronemaot hem? Yes, mo long en, sapos hem i save, bae hem i kilim hem i ded.

 60 Mo nao, mi talem long yufala se gudfala man blong lukaotem ol sipsip i stap singaotem yufala; mo sapos yufala i lisin long voes blong hem bae hem i tekem yufala i go long yad blong hem, mo yufala i sipsip blong hem; mo hem i talem long yufala blong no letem wan rabis wael dog i kam insaed, blong yufala i no save ded.

 61 Mo nao mi, Alma, mi givim oda long yufala long lanwis blong hem we i bin talem long mi, blong yufala i folem olgeta toktok we mi bin talemaot long yufala.

 62 Mi toktok folem wei blong oda long yufala, we i blong jos; Mo long olgeta we oli no blong jos, mi toktok folem wei blong askem, se: Kam mo kasem baptaes blong sakem sin, blong mekem se yufala tu i save kam mo kakae frut blong tri blong laef.