1 Ug karon nahitabo nga si Moroni wala mohunong sa paghimo og mga pagpangandam alang sa gubat, o sa pagpanalipod sa iyang katawhan batok sa mga Lamanita; kay misugo siya nga ang iyang kasundalohan magsugod sa sinugdanan sa ikakawhaan nga tuig sa pagmando sa mga maghuhukom, nga sugdan nila ang pagkalot og mga bungdo sa yuta libot sa tanang siyudad, sa tibuok nga mga yuta nga gipanag-iya sa mga Nephita.

2 Ug sa ibabaw niini nga mga bungdo sa yuta gipabutangan niya og mga troso, oo, giugbok nga mga troso tupong sa gitas-on sa usa ka tawo, libot sa mga siyudad.

3 Ug mimando siya nga nianang mga tinukod nga troso kinahanglan adunay bayanan sa mga talinis nga kahoy nga iliyok sa mga troso; ug kini lig-on ug tag-as.

4 Ug mimando siya nga magtukod og mga tore nga magdungaw niadtong mga tinukod nga talinis nga kahoy, ug mimando siya nga magtukod og mga dapit nga dangpanan diha sa mga tore, aron ang mga bato ug ang mga panâ sa mga Lamanita dili makaigo kanila.

5 Ug andam sila nga makalabay og mga bato gikan sa itaas niini, sumala sa ilang kahimuot ug sa ilang kusog, ug mopatay kaniya kinsa mosulay sa pagduol sa mga paril sa siyudad.

6 Sa ingon niana si Moroni miandam og mga kuta batok sa pag-abot sa ilang mga kaaway, libot sa matag siyudad sa tibuok yuta.

7 Ug nahitabo nga mimando si Moroni nga ang iyang kasundalohan kinahanglan moadto sa silangan sa kamingawan; oo, ug nangadto sila ug miabog sa tanang Lamanita nga anaa sa silangan sa kamingawan ngadto sa ilang kaugalingong mga yuta, nga anaa sa habagatan sa yuta sa Zarahemla.

8 Ug ang yuta sa Nephi tul-id ang direksyon nga nagagikan sa silangan nga dagat paingon sa kasadpan.

9 Ug nahitabo nga sa dihang si Moroni miabog sa tanang Lamanita gikan sa silangan nga kamingawan, nga naa sa amihanan sa mga yuta nga ilang gipanag-iya, mimando siya nga ang mga lumulupyo nga atua sa yuta sa Zarahemla ug sa naglibot nga yuta kinahanglan moadto didto sa silangan nga kamingawan, gani sa mga utlanan daplin sa baybayon, ug manag-iya sa yuta.

10 Ug gibutangan usab niya og kasundalohan ang habagatan, sa mga utlanan sa ilang mga gipanag-iya, ug mimando kanila sa pagtukod og ^amga kuta aron mapanalipdan nila ang ilang kasundalohan ug ang ilang katawhan gikan sa mga kamot sa ilang mga kaaway.

11 Ug sa ingon niana giguba niya ang tanang kuta sa mga Lamanita sa silangan nga kamingawan, oo, ug usab sa kasadpan, naglig-on sa utlanan taliwala sa mga Nephita ug sa mga Lamanita, taliwala sa yuta sa Zarahemla ug sa yuta sa Nephi, gikan sa kasadpan nga dagat, subay sa ulohan sa suba sa Sidon—ang mga Nephita nga mipanag-iya sa tanang yuta paingon sa amihanan, oo, gani ang tibuok yuta nga paingon sa amihanan sa yuta sa Bountiful, sumala sa ilang kahimuot.

12 Sa ingon niana si Moroni, uban sa iyang kasundalohan, nga nagkadaghan matag adlaw tungod sa pasalig sa panalipod nga ilang nakita sa iyang mga buhat, naningkamot nga malumpag ang kalig-on ug gahom sa mga Lamanita gikan sa mga yuta nga ilang gipanag-iya, aron sila wala nay gahom sa mga yuta nga ilang gipanag-iya.

13 Ug nahitabo nga ang mga Nephita misugod sa pagbutang og pundasyon sa usa ka siyudad, ug gitawag nila ang siyudad og Moroni; ug kini diha buyon sa silangan sa dagat; ug kini buyon sa habagatan sa utlanan nga gipanag-iya sa mga Lamanita.

14 Ug gisugdan usab nila ang katukoran sa usa ka siyudad taliwala sa siyudad sa Moroni ug sa siyudad sa Aaron, nagsumpay sa mga utlanan sa Aaron ug sa Moroni; ug gitawag nila ang ngalan sa siyudad, o ang yuta og Nephihah.

15 Ug gisugdan usab nila nianang sama nga tuig ang pagtukod og daghang siyudad sa amihanan, ang usa sa tinuyo nga pamaagi nga ilang gitawag og Lehi, nga anaa sa amihanan buyon sa mga utlanan sa baybayon.

16 Ug sa ingon niana natapos ang ikakawhaan nga tuig.

17 Ug ingon niini ang mauswagong mga sitwasyon sa katawhan ni Nephi sa pagsugod sa ikakawhaan ug usa nga tuig sa pagmando sa mga maghuhukom ibabaw sa katawhan ni Nephi.

18 Ug miuswag sila sa hilabihan, ug nahimo silang hilabihan ka adunahan; oo, ug midaghan ug nag-anam sila ka lig-on dinhi sa yuta.

19 Ug sa ingon niana nakita nato unsa kamaluluy-on ug kamakiangayon ang tanang kahimoan sa Ginoo, sa pagpatuman sa iyang tanang pulong ngadto sa katawhan; oo, nakita nato nga ang iyang mga pulong gipamatud-an, bisan karon nga panahon, nga iyang gisulti kang Lehi, nga nag-ingon:

20 Bulahan ikaw ug ang imong mga anak; ug sila bulahan, tungod kay kon motuman sila sa akong mga sugo mouswag sila dinhi sa yuta. Apan hinumdomi, kon dili sila motuman sa akong mga sugo ^aisalikway sila gikan sa atubangan sa Ginoo.

21 Ug atong nakita nga kining mga saad napamatud-an sa katawhan ni Nephi; kay tungod sa ilang mga panag-away ug sa ilang mga panagbingkil, oo, sa ilang mga pagpatay, ug sa ilang mga pagpanglungkab, sa ilang pagsimba og mga dios-dios, sa ilang mga malaw-ay nga mga buhat, ug sa ilang mga pagkasalawayon, nga diha taliwala kanila, nga maoy nakaingon sa ilang mga gubat ug sa ilang mga kalaglagan.

22 Ug kadtong kinsa mga matinud-anon sa pagtuman sa mga sugo sa Ginoo giluwas sa tanang panahon, samtang kaliboan sa ilang daotang kaigsuonan nahimong ulipon, o nangamatay pinaagi sa espada, o mikunhod tungod sa pagkawalay pagtuo, ug mitipon sa mga Lamanita.

23 Apan tan-awa walay laing panahon nga mas ^amalipayon ang katawhan ni Nephi, sukad sa mga adlaw ni Nephi, kay sa mga adlaw ni Moroni, oo, bisan karon nga panahon, sa ikakawhaan ug usa nga tuig sa pagmando sa mga maghuhukom.

24 Ug nahitabo nga ang ikakawhaan ug duha nga tuig sa pagmando sa mga maghuhukom natapos usab sa kalinaw; oo, ug ang ikakawhaan ug tulo nga tuig usab.

25 Ug nahitabo nga sa pagsugod sa ikakawhaan ug upat nga tuig sa pagmando sa mga maghuhukom, malinawon na usab unta ang katawhan ni Nephi kon dili pa tungod sa ^apanagbingkil nga nahitabo kanila mahitungod sa yuta sa Lehi, ug sa yuta sa Morianton, diin nagsumpay sa mga utlanan sa Lehi; ang duha nga anaa sa mga utlanan buyon sa baybayon sa dagat.

26 Kay tan-awa, ang katawhan nga nanag-iya sa yuta sa Morianton miangkon og usa ka bahin sa yuta sa Lehi; busa dihay nagsugod nga mainiton nga panagbingkil tali kanila, hangtod nga ang katawhan sa Morianton miandam sa mga hinagiban batok sa ilang kaigsuonan, ug hugot ang ilang tinguha nga mogamit sa espada sa pagpatay kanila.

27 Apan tan-awa, ang katawhan nga nanag-iya sa yuta sa Lehi milayas ngadto sa kampo ni Moroni, ug nangayo kaniya og tabang; kay tan-awa dili sila ang nasayop.

28 Ug nahitabo nga sa dihang ang katawhan sa Morianton, nga gipangulohan sa usa ka tawo kansang ngalan mao si Morianton, nakakita nga ang katawhan sa Lehi milayas ngadto sa kampo ni Moroni, nahadlok sila sa hilabihan basin pa unya og ang kasundalohan ni Moroni mosulong kanila ug mopatay kanila.

29 Busa, si Morianton midasig sa ilang mga kasingkasing nga kinahanglan molayas sila ngadto sa yuta dapit sa amihanan nga bahin, nga nalukop sa lapad nga katubigan ug panag-iyahon ang yuta nga anaa sa amihanan nga bahin.

30 Ug tan-awa, matuman unta nila kini nga plano, (nga mao unta ang hinungdan sa pagbasol) apan tan-awa, si Morianton ingon nga usa ka tawo nga dali masuko, busa nasuko siya sa usa sa iyang mga sulugoon nga babaye, ug siya midagmal kaniya ug mibunal kaniya pag-ayo.

31 Ug nahitabo nga milayas siya, ug miadto sa kampo ni Moroni, ug misulti kang Moroni sa tanang butang mahitungod sa nahitabo, ug usab mahitungod sa ilang mga tumong nga molayas ngadto sa yuta dapit sa amihanan nga bahin.

32 Karon tan-awa, ang katawhan kinsa tua sa yuta sa Mabungahon, o sa Moroni diay, nahadlok nga sila mopatalinghog sa mga pulong ni Morianton ug makighiusa sa iyang katawhan, ug sa ingon niana manag-iya siya niadtong mga bahin sa yuta, nga maoy mahimong hinungdan sa makuyaw nga mga sangpotanan sa katawhan ni Nephi, oo, diin nga mga sangpotanan mosangpot sa pagkapukan sa ilang ^akalingkawasan.

33 Busa si Moroni mipadala og kasundalohan, dala ang ilang kagamitan sa gubat, sa pagsanta sa katawhan ni Morianton, sa pagpahunong sa ilang panaw ngadto sa yuta sa amihanan nga bahin.

34 Ug nahitabo nga wala sila makasanta kanila hangtod nga miabot sila sa mga utlanan sa yuta sa ^aKamingawan; ug didto sila nakasanta kanila, dapit sa may pig-ot nga agianan paingon sa dagat ngadto sa yuta sa amihanan nga bahin, oo, subay sa dagat, diha sa kasadpan ug sa silangan.

35 Ug nahitabo nga ang kasundalohan nga gipadala ni Moroni, nga gipangulohan sa usa ka tawo kansang ngalan mao si Teancum, misugat sa katawhan ni Morianton; ug nagdumili sa pagsunod ang katawhan ni Morianton, (ingon nga nadasig sa iyang pagkadaotan ug sa iyang ulog-ulog nga mga pulong) nagsugod ang gubat tali kanila, diin si Teancum mipatay kang Morianton ug mibuntog sa iyang kasundalohan, ug midala kanila nga mga binilanggo, ug mibalik sa kampo ni Moroni. Ug sa ingon niana natapos ang ikakawhaan ug upat nga tuig sa pagmando sa mga maghuhukom sa katawhan ni Nephi.

36 Ug sa ingon niana ang katawhan ni Morianton gidala pagbalik. Ug sa ilang pagpakigsaad sa pagpatunhay sa kalinaw sila gipahiuli sa yuta sa Morianton, ug usa ka paghiusa nahitabo tali kanila ug sa katawhan sa Lehi; ug sila usab gipabalik sa ilang mga yuta.

37 Ug nahitabo nga sa samang tuig nga ang katawhan sa Nephi adunay kalinaw nga nabalik nganha kanila, nga si Nephihah, ang ikaduhang labaw nga maghuhukom, namatay, human nga nakalingkod sa hukmanan uban sa hingpit nga katarong sa atubangan sa Dios.

38 Bisan pa niana, mibalibad siya kang Alma nga maoy mogunit sa mga talaan ug niadtong mga butang nga gitamod ni Alma ug sa iyang mga amahan nga labing sagrado; busa si Alma mitugyan niini sa iyang anak nga lalaki, si Helaman.

39 Tan-awa, nahitabo nga ang anak nga lalaki ni Nephihah gitudlo nga molingkod sa hukmanan, puli sa iyang amahan; oo, gitudlo siya nga labaw nga maghuhukom ug gobernador sa katawhan, uban ang panumpa ug sagrado nga ordinansa sa paghukom sa pagkamatarong, ug sa pagpatunhay sa kalinaw ug kagawasan sa katawhan, ug sa paghatag kanila sa ilang sagrado nga mga kahigayonan sa pagsimba sa Ginoo nga ilang Dios, oo, sa pagbulig ug sa pagpatunhay sa katuyoan sa Dios sa tanan niyang mga adlaw, ug sa pagdala sa mga daotan ngadto sa kaangayan sumala sa ilang kalapasan.

40 Karon tan-awa, ang iyang ngalan mao si Pahoran. Ug si Pahoran mipuli sa katungdanan sa iyang amahan, ug misugod sa iyang pagmando sa kataposan sa ikakawhaan ug upat nga tuig, sa katawhan ni Nephi.