iVolanikalou
Alama 50


Wase 50

E sa vakaukauwataka vakaivalu ko Moronai na nodra vanua na Nifaiti—Era sa tara e vuqa na veikoro lelevu—E sa yaco vei ira na Nifaiti na ivalu kei na veivakarusai ena gauna ni nodra caka ca ka itovo vakasisila—E sa vakadrukai ko Morienitoni kei na nona ilawalawa era a se tani, mai vei Tenikamu—E sa mate ko Nifaia, ka sa dabeca na nona itikotiko ni veilewai ko Paorani na luvena tagane. Rauta na 72–67 B.K.

1 Ka sa yaco ni sa sega ni cegu ko Moronai ena nona vakavakarau tiko ki na ivalu, se me taqomaki ira na nona tamata mai vei ira na Leimanaiti; ia ena itekivu ni i ka ruasagavulu ni yabaki ni nodra veiliutaki na turaganilewa, sa vakaroti ira kina na nona mataivalu me ra kelia na ikeli ni valu ka binia na qele me wavokita na veikoro kece ena nodra vanua na Nifaiti.

2 A sa vakarota me tara ena dela ni ibinibini qele oqori na vatavata kau me vaka na balavu ni tamata na kena cecere me wavokita kece sara na veikoro lelevu.

3 A sa vakarota tale ga me viri ena vatavata oqori na moto gagata me caka me kaukauwa sara ka rewa icake tale ga.

4 A sa vakarota me tara e so na vale cecere me irova sobu tu mai na bai vakamoto oqori, ia me tara vakaukauwa sara me kakua kina ni vakamavoataki ira na gasau ni dakai titi se na nodra vatu ni irabo na Leimanaiti.

5 Ia a ra sa vakarau tu me ra toka mai ena dela ni vale cecere ko ya, ka qai viritaka sobu yani na vatu me vaka ga na nodra gagadre kei na nodra kaukauwa, ka vakamatei ira era via toso volekata mai na bai ni veikoro lelevu.

6 Sa vakaoqo na nona vakarautaka ko Moronai na veitikotiko kaukauwa ni valu me wavokita na veikoro kece sara ena vanua taucoko, me vorati ira na meca era na lako mai.

7 Ka sa yaco ni lewa ko Moronai me ra lako yani na nona mataivalu ki na lekutu ena tokalau; io, era sa lako kina ka vakasavi ira na Leimanaiti kece era tiko mai na lekutu ena tokalau, me ra lako ki na nodra vanua, ena ceva ni vanua ko Saraemala.

8 Ia na vanua ko Nifai sa tekivu ga mai na wasawasa ena tokalau ka kauta vakadodonu yani ki na wasawasa ena ra.

9 Ka sa yaco ni sa vakasavi ira tani kece na Leimanaiti ko Moronai mai na lekutu ena tokalau, na lekutu ka koto ena vualiku ni nodra vanua, sa vakarota me ra toki yani na tamata mai na vanua ko Saraemala kei na veivanua volekata, me ra laki tawana na veikau mai na tokalau, ia me ra laki tawana na iyalayala ni vanua ko ya me yaco ki matasawa.

10 Ia sa biuta tale ga eso na nona mataivalu ena ceva, ena iyalayala ni nodra vanua, ka vakarota me ra viria na kena abai me taqomaki ira na nona mataivalu kei na nona tamata mai na ligadra na nodra meca.

11 A sa sogolatia kina na nodra koro ni valu na Leimanaiti mai na lekutu ena tokalau, io, ka vakakina ena yasana ki na ra, ka viribaita na iyalayala ni nodra vanua na Nifaiti kei ira na Leimanaiti, ena maliwa ni vanua ko Saraemala kei na vanua ko Nifai, mai na wasawasa ena ra, ka cici ravita na ulu ni wai ko Saitoni—era sa tawana tu na Nifaiti na veivanua kece ena vualiku; io, na veivanua kece ena vualiku ni vanua ko Vanuasautu me vaka na veika era gadreva.

12 Sa vakaoqo na nodra segata ko Moronai, kei na nona mataivalu ka sa levu cake tiko ga e veisiga na kedra iwiliwili, ena nodra sa kila na tamata na veitaqomaki kaukauwa era cakava tiko, me ra sogota na nodra igu kei na nodra kaukauwa na Leimanaiti ena veivanua kece era taukena, ka me muduki kina na nodra kaukauwa ena vanua era sa taukena.

13 Ka sa yaco me ra sa tekivu tara e dua na koro levu ko ira na Nifaiti, ka vakatoka me yacana ko Moronai; a sa tiko ena yasa ni matasawa ki na tokalau; ia ena ceva ni nodra vanua na Leimanaiti.

14 Ia e ra sa tekivu tara tale ga e dua na koro levu ena kedrau maliwa na koro ko Moronai kei na koro ko Eroni, me semata na iyalayala ni vanua ko Moronai kei Eroni; a ra sa vakatoka me yaca ni koro levu ko ya, se na vanua ko ya, ko Nifaia.

15 Ia ena yabaki vata ga ko ya e ra sa tekivu tara tale ga kina e vuqa na veikoro ki na vanua ena vualiku, ka dua ena dua na ke na ivakarau ka ra vakatoka me yacana ko Liai, ka sa toka e matasawa ena iyalayala ni vanua ki na vualiku.

16 Ia sa mai cava eke na ikaruasagavulu ni yabaki.

17 Ia sa sautu tu vakaoqo na nodra bula na tamata i Nifai ena itekivu ni ikaruasagavulu kadua ni yabaki ni nodra veiliutaki na turaganilewa vei ira na tamata i Nifai.

18 Era sa sautu vakalevu sara ka ra vutuniyau vakalevu tale ga; io, era sa tubu me lewevuqa me ra tamata kaukauwa vakalevu sara ena vanua.

19 Ka eda sa raica oqo na yalololoma kei kena dodonu sara ni nona ivalavala na Turaga, ena kena dau vakayacori na veika e yalataka vei ira na luve ni tamata; io, eda rawa ni raica ni sa vakadinadinataki na nona vosa, ena gauna sara ga oqo, ni a tukuna vei Liai ka kaya:

20 Ko sa kalougata ko iko kei ira na nomu kawa; ia era na vakalougatataki ka ra na tiko sautu ena vanua, kevaka era sa muria na noqu ivakaro. Ia mo nanuma tiko, kevaka era sega ni muria na noqu ivakaro era na amuduki tani mai na nona iserau na Turaga.

21 Ia eda sa raica ni sa vakadinadinataki na vosa ni yalayala kece oqo vei ira na tamata i Nifai; ni sa baleta na nodra veiba kei na veileti, io, na nodra daulaba, kei nodra daubutako, kei na nodra dauqarava na kalou matakau, na nodra veibutakoci, kei na nodra itovo vakasisila, ka tu vei ira, a vakavuna na nodra veivaluvaluti kei na nodra vakarusai.

22 Ia era sa dauvakabulai ga ena veigauna kece sara ko ira na yalodina ni ra muria na ivakaro ni Turaga, ia ko ira na lewe vica na udolu na wekadra ka ra sa kitaka tiko ga na i vakarau ca, era a vakabobulataki, se vakamatei ena iseleiwau, se malumalumu ena tawavakabauta, ka veimaliwai ke ira na Leimanaiti.

23 Ia raica e sega mada ni bau dua na agauna me ra a marau vakalevu kina na tamata i Nifai, me tekivu mai na gauna i Nifai, ka vakakina na gauna i Moronai, io, me vaka ena gauna oqo, na ikaruasagavulu kadua ni yabaki ni nodra veiliutaki na turaganilewa.

24 Ka sa yaco me mai cava tale ga yani na ikaruasagavulu karua ni yabaki ni nodra veiliutaki na turaganilewa ena sautu; io, sa vakatale ga kina ena ikaruasagavulu katolu ni yabaki.

25 Ka sa yaco ni ena itekivu ni ikaruasagavulu kava ni yabaki ni nodra veiliutaki na turaganilewa, ke a yaco tiko ga na tiko sautu ena kedra maliwa na Nifai kevaka me a sega na aveiqatitaki ni vanua ko Liai kei na vanua ko Morienitoni, o koya ka semata na vanua ko Liai; ka rau tiko ruarua e matasawa.

26 Ia raica, era kaya na tamata era tawana tiko na vanua ko Morienitoni ni nodra e dua na tiki ni vanua ko Liai; o koya e qai tubu kina e dua na nodra veileti kaukauwa sara ka vakavuna me ra tauri iyaragi na kai Morienitoni ka vakadeitaka me ra vakamatei ira ena iseleiwau.

27 Ia raica, era sa dro ko ira na tamata ka a tiko mai na vanua ko Liai ki na keba nei Moronai, ka kerei koya me vukei ira; ia raica era sa sega ni cala ko ira.

28 Ka sa yaco ni ena gauna era sa raica kina ko ira na kai Morienitoni ka liutaki ira e dua na tamata, na yacana ko Morienitoni, ni ra sa dro na kai Liai ki na keba nei Moronai, era sa rere vakalevu sara, de na lako mai na mataivalu nei Moronai ka vakarusai ira.

29 O koya, sa vakauqeti ira kina ko Morienitoni me ra dro ki na vanua ena vualiku ena bati ni veiwasawasa lelevu, me ra laki tawana kece na vanua ena vualiku.

30 Ia raica, kevaka me yaco na inaki oqo, (ni dua na ka me rarawataki) ia raica, a tamata dauyalokatakata sara ko Morienitoni, o koya a cudruva kina e dua na nona marama dauveiqaravi, ka qai mokulaki koya sara vakaca.

31 Ka sa yaco ni qai dro ko koya ki na keba i Moronai, ka laki tukuna kina na ka a yaco, ka vakatalega kina na inakinaki me ra na dro cake ki na vanua ena vualiku.

32 Raica oqo, sa ririkotaka ko Moronai de na rawai ira na tiko mai Vanuasautu na vosa nei Morienitoni, ka ra mani tovata me ra sa taukena na yasa ni vanua ko ya, ia kevaka e yaco vakakina, e sa na tauyavutaki kina e dua na yavu me na vakatubu leqa vei ira na tamata i Nifai, io, na leqa oqori ena rawa ni vakavuna na kena vuaviritaki na nodra abula galala.

33 O koya sa tala yani kina e dua na mataivalu kei na nodra keba ko Moronai, me takosovi ira na kai Morienitoni, ka tarova me ra kakua ni dro yani ki na vanua ena vualiku.

34 Ka sa yaco ni ra a sega ni takosovi ira rawa me yacova ni ra sa yaco ki na iyalayala kei aVanualala; e kea era sa qai laki takosovi ira rawa kina ena iyarabale ka wasea tani na vanua ena vualiku, io, mai na wasawasa ena ra ki na wasawasa ena tokalau.

35 Ka sa yaco ni mataivalu ka tala ko Moronai sa liutaki yani mai vua e dua na turaganivalu, na yacana ko Tenikamu, era sota kei ira na tamata i Morienitoni; ni ra sa tamata yalokaukauwa sara, (ni sa vakauqeti ira ena ivadi ca kei na nona vosa veicavilaki) ka sa tekivutaki kina e dua na vala, ka vakamatei Morienitoni kina ko Tenikamu, ka vakadruka tale ga na nona mataivalu, a sa kauti ira vakavesu ki na itikotiko i Moronai. Sa mai cava kina na ikaruasagavulu kava ni yabaki ni nodra veiliutaki na turaganilewa vei ira na tamata i Nifai.

36 Ia sa vakaoqori na nodra kau lesu mai na tamata i Morienitoni. Ia ni ra sa veiyalayalati me ra na maroroya na tiko veisaututaki, era sa qai vakalesui tale ki na vanua ko Morienitoni, ka sa yaco e dua na duavata vei ira kei ira na tamata i Liai ka ra a vakalesui tale ga ki na nodra vanua.

37 Ka sa yaco ni ena yabaki vata koya sa vakalesui tale kina vei ira na Nifai na tiko sautu, a sa mate ko Nifaia na ikarua ni turaganilewa levu, o koya ka qarava tiko mai vakadodonu ena yalodina na itikotiko ni veilewai ena mata ni Kalou.

38 Ia oqo, e a sega ni vakadonuya ko koya vei Alama me taura na ivolatukutuku kei na veika rau a nanuma ko Alama kei Tamana ni ka tabu; o koya sa mani solia kina ko Alama kivei Ilamani na luvena.

39 Raica, sa yaco ni sa lesi na luvei Nifaia me sosomitaki tamana, ena itikotiko ni veilewai; io, sa digitaki me turaganilewa levu me lewai ira na tamata, ena vosa bubului kei na cakacaka tabu vakalotu ni na daulewa vakadodonu, ka taqomaka na tiko sautu kei na nodra galala na tamata, ka solia vei ira na galala me ra qarava na Turaga na nodra Kalou, io, ni na totaka ka karona tiko na inaki ni Kalou ena nona bula taucoko, ka kauti ira mai na tamata ca me ra mai lewai vakadodonu me vaka na nodra cala.

40 Raica sa yaca ni tamata oqo ko Paorani. Ia sa sosomitaki tamana ko Paorani, sa tekivu na nona veiliutaki vei ira na tamata i Nifai ena icavacava ni ika ruasagavulu kava ni yabaki.