1 Ket ita napasamak a saan a nagsardeng ni Moroni nga agsagsagana para iti gubat, wenno mangsalaknib kadagiti taona kadagiti Lamanita; ta imbilinna dagiti soldadona a masapul a mangrugi iti panangrugi ti maikaduapulo a tawen a panagturay dagiti ukom, a nasken a mangrugida nga agkali iti ginabsuon a daga iti aglawlaw ti amin a siudad, iti intero a daga a tinagikua dagiti Nephita.

2 Ket imbilinna a mapatakderan kadagiti troso ti tuktok dagitoy a buntuon ti daga, wen, nangikabilda iti troso nga agingga iti katayag ti tao, iti aglawlaw dagiti siudad.

3 Ket imbilinna a nasken a madarekdekan dagiti mapatakder a troso iti aglawlaw; ket nalagda ken nangatoda.

4 Ket imbilinna a mabangon dagiti torre a mangtannawag kadagiti darekdek, ken imbilinna a mabangon dagiti lugar a pagkamangan kadagiti torre, tapno saan ida a madangran dagiti bato ken pana dagiti Lamanita.

5 Ket nakasaganada a kabaelanda nga agibakal kadagiti bato manipud iti tuktok daytoy, a mayannurot iti pakaragsakan ken iti pigsada, ket papatayenda ti asino man nga agpanggep nga umasideg kadagiti alad ti siudad.

6 Isu ti gapuna a nangisagana ni Moroni kadagiti sarikedked maibusor kadagiti dumteng a kabusor, iti aglawlaw ti tunggal siudad iti amin a daga.

7 Ket napasamak nga imbilin ni Moroni a nasken a mapan dagiti buyotna iti daya a langalang; wen, ket napanda ket inabogda dagiti Lamanita nga adda iti daya a langalang kadagiti dagada, nga adda iti abagatan ti daga a Zarahemla.

8 Ket aglaylayon a diretso ti turong ti daga ni Nephi manipud iti daya agingga iti baybay iti laud.

9 Ket napasamak nga idi naabog ni Moroni amin dagiti Lamanita iti ruar ti langalang iti daya, nga amiananen dagiti daga a kukuada, imbilinna a mapan iti langalang iti daya dagiti agindeg iti daga a Zarahemla ken iti daga iti aglawlaw, agingga iti igid ti baybay, ket tagikuaenda ti daga.

10 Ken kasta met a nangipuesto kadagiti soldado iti abagatan, kadagiti pagbeddengan dagiti kukuada, ket binilinna ida a mangipatakder kadagiti ^asarikedked tapno mapatalgedda dagiti soldadoda ken dagiti tattaoda manipud kadagiti ima dagiti kabusorda.

11 Ket kasta a linappedanna amin dagiti sarikedked dagiti Lamanita iti langalang iti daya, wen, ken kasta met iti laud, sinarikedkedanna ti nagbaetan dagiti Nephita ken dagiti Lamanita, iti nagbeddengan ti daga a Zarahemla ken ti daga a Nephi, manipud iti baybay iti laud, a lumasat iti ulo ti karayan Sidon—kukua dagiti Nephita ti amin a daga nga agpaamianan, wen, uray pay dagiti amin a daga nga amiananen iti daga a Bountiful, a mayannurot iti pakaragsakanda.

12 Isu a ni Moroni, kadua dagiti buyotna, nga inaldaw nga immadu gapu iti pammatalged a pannalaknib nga impaay ti aramidna kadakuada, pinanggepna a lappedan ti pigsa ken bileg dagiti Lamanita manipud iti daga a kukuada, tapno awan ti bilegda kadagiti daga a kukuada.

13 Ket napasamak a rinugian dagiti Nephita ti pamuon iti maysa a siudad, ket inawaganda ti siudad a Moroni; ket adda daytoy iti baybay iti daya; ket adda iti abagatan a nagbeddengan dagiti kukua dagiti Lamanita.

14 Ken kasta met a rinugianda ti pamuon iti maysa a siudad iti nagbaetan ti siudad ni Moroni ken ti siudad ni Aaron, a kumamang kadagiti beddeng ti Aaron ken Moroni; ket inawaganda ti nagan ti siudad, wenno ti daga, iti Nephihah.

15 Ken kasta met a rinugianda iti isu met la a tawen ti nagbangon iti adu a siudad iti amianan, maysa ti naisalsalumina a naawagan iti Lehi, nga adda iti amianan a bumeddeng iti baybay.

16 Ket kasta ti panaggibus ti maikaduapulo a tawen.

17 Ket adda iti narang-ay a kasasaad dagiti tattao ni Nephi iti rugi ti maikaduapulo ket maysa a tawen a panagturay dagiti ukom kadagiti tattao ni Nephi.

18 Ket rimmang-ayda iti kasta unay, ken nagbalinda a nakabakbaknang; wen, ket immaduda ken pimmigsada iti daga.

19 Ket kasta a makitatayo ti kinamanangngaasi ken kinalinteg ti amin a pannakilangen ti Apo, iti pannakatungpal ti amin a balikasna kadagiti annak ti tattao; wen, maimatangantayo a napatalgedan dagiti balikasna, uray pay daytoy a kanito, nga insaona ken ni Lehi, a kinunana:

20 Nabendisionanka ken dagiti annakmo; ket mabendisionandanto, rumang-aydanto iti daga no la ket ta tungpalenda dagiti bilbilinko. Ngem laglagipem,no saandanto a tungpalen dagiti bilbilinko ^amaisinadanto manipud iti sanguanan ti Apo.

21 Ket makitatayo a napatalgedan dagitoy a kari kadagiti tattao ni Nephi; agsipud ta dagiti panagaapada ken dagiti panagsisinnusikda, wen, dagiti panagpapatayda, ken dagiti panagsamsamda, dagiti panagrukbabda kadagiti didiosen, dagiti kinabalangkantisda, ken dagiti kinarimonda, nga adda kadakuada, ti nakaigapuan dagiti gubatda ken ti pannakadadaelda.

22 Ket naisalakan iti amin a gundaway dagiti napudno a nagtungpal kadagiti bilin ti Apo, idinto a rinibribu kadagiti nadangkes a kakabsatda ti naikumit iti pannakaadipen, wenno maungaw babaen ti espada, wenno in-inut a panagpukaw gapu iti saan a panamati, ken makipulapol kadagiti Lamanita.

23 Ngem kitaen awan ti ^anaragragsak pay a kanito kadagiti tattao ni Nephi, manipud kadagiti aldaw ni Nephi, ngem kadagiti aldaw ni Moroni, wen, uray pay daytoy a kanito, iti maikaduapulo ket maysa a tawen a panagturay dagiti ukom.

24 Ket napasamak a naggibus met nga addaan iti kappia ti maikaduapulo ket dua a tawen a panagturay dagiti ukom; wen, ken kasta met ti maikaduapulo ket tallo a tawen.

25 Ket napasamak nga iti panangrugi ti maikaduapulo ket uppat a tawen a panagturay dagiti ukom, adda koma met kappia kadagiti tattao ni Nephi no saan a gapu iti ^apanagsususik a napasamak kadakuada maipanggep iti daga a Lehi, ken ti daga a Morianton, a nagkinnamang iti beddeng ti Lehi; nga agpadpada nga adda iti beddeng ti baybay.

26 Agsipud ta kitaem, inaguman dagiti tattao nga agtagikua iti daga a Morianton ti paset ti daga a Lehi; ngarud nangrugi ti napudot a panagsususik iti nagbaetanda, isu a nagarmas dagiti tattao ni Morianton maibusor kadagiti kakabsatda, ket inkeddengda a papatayenda ida babaen ti espada.

27 Ngem kitaen, naglibas dagiti tattao nga akinkukua iti daga a Lehi iti kampo ni Moroni, ket dimmawatda kenkuana iti tulong; agsipud ta kitaen awan kadakuada ti biddut.

28 Ket napasamak nga idi makita dagiti tattao ni Morianton, nga indauluan ti maysa a lalaki nga agnagan iti Morianton, a nagkamang dagiti tattao ni Lehi iti kampo ni Moroni, nalaus ti butengda ta amangan nga umay kadakuada ti buyot ni Moroni ket dadaelenda ida.

29 Ngarud, inmula ni Morianton kadagiti pusoda a nasken nga agkamangda iti daga nga agpaamianan, a naaplagan iti dakkel a bagi ti danum, ket tinagikuada ti daga nga agpaamianan.

30 Ket kitaem, naaramidda koma daytoy a plano, (a nakaigapuan koma ti panagladingit) ngem kitaen, maysa a tao ni Morianton nga aduan iti gartem, ngarud kinapungtotna ti maysa kadagiti babbai a katulonganna, ket dinarupna ket dinangranna iti napalalo.

31 Ket napasamak a naglibas, ket nagturong iti kampo ni Moroni, ket imbagana ken ni Moroni ti amin a banag a maipanggep daytoy a banag, ken kasta met ti maipanggep kadagiti panggepda nga aglibas nga agturong iti daga nga agpaamianan.

32 Ita kitaem, nagbuteng dagiti tattao nga adda iti daga a Bountiful, wenno Moroni, nga amangan no dumngegda kadagiti balikas ni Morianton ket makitiponda kadagiti taona, ket matagikuada dagiti paset ti daga, a pagtaudan ti nakas-ang a pagbanagan dagiti tattao ni Nephi, wen, a dagiti pagbanagan ti mangiturong iti pannakaparmek ti ^akinawayada.

33 Ngarud nangibaon ni Moroni iti buyot, kadua iti kampoda, tapno sabten dagiti tattao ni Morianton, tapno malapdan ti panagtarayda nga agturong iti daga nga agpaamianan.

34 Ket napasamak a saanda nga indauluan ida agingga a nakadanonda iti igid ti daga a ^aDesolation; ket sadiay a nakamakamda ida, iti akikid a dalan a lumabas iti baybay a kumamang iti daga nga agpaamianan, wen, asideg iti baybay, iti laud ken iti daya.

35 Ket napasamak a talaga a nasabat dagiti tattao ni Morianton ti buyot nga imbaon ni Moroni, nga indauluan ti lalaki nga agnagan iti Teancum; ket nasukir unay dagiti tattao ni Morianton, (agsipud ta naparegtada iti kinadakesna ken dagiti makapadayaw a balikasna) isu a nangrugi ti panagdadangadangda, iti dayta talaga a napapatay ni Teancum ni Morianton ken naparmek ti buyotna, ket innalada ida a balud, ken nagsublida iti kampo ni Moroni. Ket kasta ti naggibusan ti maikaduapulo ket uppat a tawen a panagturay dagiti ukom kadagiti tattao ni Nephi.

36 Ket iti kasta a napasubli dagiti tattao ni Morianton. Ket napasublida iti daga a Morianton gapu iti pannakitulagda a mamagtalinaed iti kappia, ket napasamak ti maysa a panagtipon iti nagbaetanda ken dagiti tattao ni Lehi; ken kasta met a napasublida kadagiti dagada.

37 Ket napasamak nga iti dayta met la a tawen a napasubli dagiti tattao ni Nephi ti kappiada, a natay ni Nephihah, ti maikadua a pangulo nga ukom, a nakapagtugaw iti pangukoman nga addaan iti naan-anay a kinalinteg iti imatang ti Dios.

38 Nupay kasta, nagkedked ken Alma nga alaenna dagiti kasuratan ken kadagiti bambanag a binigbig ni Alma ken dagiti ammana a kasagraduan; ngarud intalek ida ni Alma iti lalaki nga anakna, ni Helaman.

39 Kitaen, napasamak a nadutokan ti lalaki nga anak ni Nephihah nga agtugaw iti pangukoman, a mangsukat iti amana; wen, nadutokan a pangulo nga ukom ken gobernador dagiti tattao, nga addaan iti sapata ken sagrado nga ordinansa a mangukom a sililinteg, ken pagtalinaedenna ti kappia ken ti wayawaya dagiti tattao, ken mangipaay kadakuada kadagiti sagrado a gundawayda nga agdaydayaw iti Apo a Diosda, wen, a sumaranay ken mangtaginayon iti pagayatan ti Dios iti amin nga aldawna, ken idanon kadagiti nadangkes iti linteg a sigun iti kasoda.

40 Ita kitaen, Pahoran ti naganna. Ket inakem ni Pahoran iti tugaw ti amana, ket rinugianna ti panagturayna iti naggibusan ti maikaduapulo ket uppat a tawen, kadagiti tattao ni Nephi.