1 Ug karon, nahitabo nga sa ikakawhaan ug unom nga tuig sa pagmando sa mga maghuhukom sa katawhan ni Nephi, tan-awa, sa dihang ang mga Lamanita nahigmata sa unang buntag sa unang bulan, tan-awa, nakita nila si Amalickiah nga patay na diha sa iyang kaugalingon nga tolda; ug nakita usab nila nga si Teancum andam na sa pagpakiggubat kanila nianang adlawa.

2 Ug karon, sa dihang ang mga Lamanita nakakita niini nangahadlok sila; ug wala sila mopadayon sa ilang laraw nga momartsa ngadto sa yuta sa amihanan nga bahin, ug misibog uban sa tanan nilang kasundalohan ngadto sa siyudad sa Mulek, ug nanago sila didto sa ilang mga kuta.

3 Ug nahitabo nga ang igsoon nga lalaki ni Amalickiah natudlo nga hari sa katawhan; ug ang iyang ngalan mao si Ammoron; sa ingon niana si hari Ammoron, ang igsoon nga lalaki ni hari Amalickiah, mao ang napili nga momando puli kaniya.

4 Ug nahitabo nga mimando siya nga ang iyang katawhan kinahanglang manalipod niadtong mga siyudad nga ilang nakuha pinaagi sa pagpaagas sa dugo; kay wala sila makakuha og bisan hain nga mga siyudad gawas nga sila nakabsan og daghang dugo.

5 Ug karon, nakita ni Teancum nga ang mga Lamanita determinado nga manalipod niadtong mga siyudad nga ilang nakuha, ug niadtong mga bahin sa yuta nga ilang napanag-iya; ug usab nagtan-aw sa ilang hilabihan kadaghan, si Teancum nakahunahuna nga dili maayo nga mosulay siya sa pagsulong kanila sa ilang mga kuta.

6 Apan gipabilin niya ang mga tawo sa palibot, ingon og nangandam alang sa gubat; oo, ug sa pagkatinuod nangandam siya sa pagpanalipod sa iyang kaugalingon batok kanila, pinaagi sa ^apagtukod og mga paril sa palibot ug nangandam og mga dapit nga katagoan.

7 Ug nahitabo nga nagpadayon siya sa pagpangandam alang sa gubat hangtod nga mipadala si Moroni og daghang kalalakin-an aron sa paglig-on sa iyang kasundalohan.

8 Ug si Moroni mipadala usab og mga mando ngadto kaniya nga kinahanglan ipabilin niya ang tanang binilanggo nga nahulog sa iyang mga kamot; kay sama nga ang mga Lamanita nakakuha og daghang binilanggo, nga kinahanglan nga iyang ipabilin ang tanang binilanggo nga mga Lamanita isip lukat alang niadtong nadakpan sa mga Lamanita.

9 Ug mipadala usab siya og mga mando ngadto kaniya nga kinahanglan lig-onon niya ang yuta sa Bountiful, ug mopanalipod sa ^apig-ot nga agianan nga nagpaingon sa yuta sa amihanan nga bahin, basin pa unya og makuha sa mga Lamanita kana nga dapit ug makaangkon og gahom sa pagsamok kanila sa matag dapit.

10 Ug si Moroni mipadala usab kaniya og mensahe, nagtinguha nga siya magmatinud-anon sa pagpanalipod nianang bahin sa yuta, ug nga magtinguha sa tanang kahigayonan sa pagkastigo sa mga Lamanita niana nga bahin, kutob sa mahimo sa iyang gahom, aron mabawi niya pag-usab pinaagi sa taktika o sa ubang lahi nga pamaagi kadtong mga siyudad nga nakuha gikan sa ilang mga kamot; ug nga lig-onon ug panalipdan niya ang mga siyudad sa palibot, nga wala mahulog sa mga kamot sa mga Lamanita.

11 Ug miingon usab siya ngadto kaniya, moanha ako kanimo, apan tan-awa, ang mga Lamanita misulong kanamo sulod sa mga utlanan sa yuta duol sa kasadpan nga dagat; ug tan-awa, makig-away ako batok kanila, busa dili pa ako makaanha kanimo.

12 Karon, ang hari (si Ammoron) mibiya gikan sa yuta sa Zarahemla, ug mipahibalo sa rayna mahitungod sa kamatayon sa iyang igsoon nga lalaki, ug mipundok og daghang kalalakin-an, ug mimartsa batok sa mga Nephita diha sa mga utlanan sa may kasadpan nga dagat.

13 Ug sa ingon niana naningkamot siya sa pagsamok sa mga Nephita, ug sa pagpaatras sa usa ka bahin sa ilang kasundalohan niana nga bahin sa yuta, samtang mimando siya niadtong kinsa iyang gibilin nga manag-iya sa mga siyudad nga iyang nakuha, nga sila usab mosamok sa mga Nephita duol sa mga utlanan dapit sa silangan nga dagat, ug kinahanglan manag-iya sa ilang mga yuta kutob sa mahimo sa ilang gahom, sumala sa gahom sa ilang kasundalohan.

14 Ug sa ingon niana ang mga Nephita nahimutang nianang makuyaw nga mga kahimtang sa kataposan sa ikakawhaan ug unom nga tuig sa pagmando sa mga maghuhukom sa katawhan ni Nephi.

15 Apan tan-awa, nahitabo nga sa ikakawhaan ug pito nga tuig sa pagmando sa mga maghuhukom, nga si Teancum, pinaagi sa mando ni Moroni—kinsa nakapundok og kasundalohan sa pagpanalipod sa habagatan ug sa kasadpang mga utlanan sa yuta, ug nakasugod sa iyang pagmartsa paingon sa yuta sa Mabungahon, aron matabangan niya si Teancum uban sa iyang mga tawo sa pagbawi sa mga siyudad nga nawala kanila—

16 Ug nahitabo nga si Teancum nakadawat og mga mando sa pagsulong sa siyudad sa Mulek, ug sa pagbawi niini kon mahimo.

17 Ug nahitabo nga si Teancum mihimo og mga pagpangandam sa pag-atake sa siyudad sa Mulek, ug mimartsa uban sa iyang kasundalohan batok sa mga Lamanita; apan nakita niya nga imposible nga iyang mabuntog sila samtang sila anaa sa ilang mga kuta; busa wala siya mopadayon sa iyang mga laraw ug mibalik pag-usab ngadto sa siyudad sa Mabunahon, aron maghulat sa pag-abot ni Moroni, aron makadawat siya og kusog sa iyang kasundalohan.

18 Ug nahitabo nga si Moroni miabot uban sa iyang kasundalohan sa yuta sa Mabungahon, sa ulahing bahin sa ikakawhaan ug pito nga tuig sa pagmando sa mga maghuhukom sa katawhan ni Nephi.

19 Ug sa pagsugod sa ikakawhaan ug walo nga tuig, si Moroni ug si Teancum ug daghan sa mga labaw nga kapitan nagpatawag og usa ka katigoman sa gubat—unsa ang ilang buhaton aron ang mga Lamanita manggawas batok kanila sa pakiggubat; o nga sila sa laing mga paagi moulog-ulog kanila aron manggawas gikan sa ilang mga kuta, aron sila makabintaha kanila ug mabawi pag-usab ang siyudad sa Mulek.

20 Ug nahitabo nga mipadala sila og mga embahada ngadto sa kasundalohan sa mga Lamanita, nga nanalipod sa siyudad sa Mulek, ngadto sa ilang pangulo, kansang ngalan mao si Jacob, nagtinguha kaniya nga siya mogawas uban sa iyang kasundalohan aron makigsangka kanila sa mga kapatagan taliwala sa duha ka siyudad. Apan tan-awa, si Jacob, kinsa usa ka Zoramita, dili mogawas uban sa iyang kasundalohan aron makigsangka kanila sa mga kapatagan.

21 Ug nahitabo nga si Moroni, kay wala na maglaom nga makigsangka kanila sa patas nga dapit, busa, mihimo siya og plano nga iyang pan-an ang mga Lamanita aron manggawas sa ilang mga kuta.

22 Busa gisugo niya si Teancum nga magdala og gamay nga pundok sa mga tawo ug momartsa duol sa baybayon; ug si Moroni ug ang iyang kasundalohan, sa pagkagabii, momartsa sa kamingawan, sa kasadpan sa siyudad sa Mulek; ug sa ingon niana, sa pagkaugma, sa dihang ang mga magbalantay sa mga Lamanita nakakita kang Teancum, nanagan sila ug gisulti kini ngadto kang Jacob nga ilang pangulo.

23 Ug nahitabo nga ang kasundalohan sa mga Lamanita mimartsa batok kang Teancum, nagdahom nga tungod sa ilang gidaghanon mabuntog si Teancum tungod sa kagamay sa ilang pundok. Ug sa pagkakita ni Teancum sa kasundalohan sa mga Lamanita nga nanggawas batok kaniya misugod siya sa pagsibog ubos sa may baybayon, sa amihanan nga bahin.

24 Ug nahitabo nga sa dihang ang mga Lamanita nakakita nga misugod siya sa paglayas, nangisog sila ug migukod kanila sa tumang kapintas. Ug samtang gipalayo ni Teancum ang mga Lamanita nga kawang nga migukod kanila, tan-awa, mimando si Moroni nga usa ka bahin sa iyang kasundalohan nga uban kaniya momartsa paingon sa siyudad, ug manag-iya niini.

25 Ug sa ingon niana sila nakahimo, ug mipatay sa tanan nga nahibilin sa pagpanalipod sa siyudad, oo, sa tanan nga dili motugyan sa ilang mga hinagiban sa gubat.

26 Ug sa ingon niana napanag-iya ni Moroni ang siyudad sa Mulek uban sa usa ka bahin sa iyang kasundalohan, samtang mimartsa siya uban sa nahibilin sa pagsugat sa mga Lamanita sa ilang pagbalik gikan sa paggukod ni Teancum.

27 Ug nahitabo nga ang mga Lamanita migukod ni Teancum hangtod miabot sila duol sa siyudad sa Mabungahon, ug gisugat sila ni Lehi ug sa diyotay nga kasundalohan, nga gibilin aron manalipod sa siyudad sa Mabungahon.

28 Ug karon tan-awa, sa dihang ang labaw nga mga kapitan sa mga Lamanita nakakita ni Lehi uban sa iyang kasundalohan nga misulong batok kanila, misibog sila sa hilabihan nga kalibog, basin pa unya og dili sila makaabot sa siyudad sa Mulek sa dili pa si Lehi makaapas kanila; kay sila luya na tungod sa ilang pagmartsa, samtang ang mga tawo ni Lehi mga abtik pa.

29 Karon ang mga Lamanita wala masayod nga si Moroni anaa sa ilang luyo uban sa iyang kasundalohan; ug ang tanan nga ilang gikahadlokan mao si Lehi ug ang iyang mga tawo.

30 Karon si Lehi wala magtinguha nga makaapas kanila hangtod nga ilang masugatan si Moroni ug sa iyang kasundalohan.

31 Ug nahitabo nga sa wala pa makasibog og layo ang mga Lamanita naliyokan na sila sa mga Nephita, sa mga tawo ni Moroni sa usa ka bahin, ug sa mga tawo ni Lehi sa lain, ang tanan kinsa mga abtik ug puno sa kusog; apan ang mga Lamanita mga luya na tungod sa ilang taas nga pagmartsa.

32 Ug mimando si Moroni sa iyang mga tawo nga moataki kanila hangtod nga itugyan nila ang ilang mga hinagiban sa gubat.

33 Ug nahitabo nga si Jacob, nga mao ang ilang pangulo, nga usa usab ka ^aZoramita, ug adunay dili mabuntog nga espiritu, siya ang nangulo sa mga Lamanita sa pagpakiggubat sa tumang kabangis batok ni Moroni.

34 Si Moroni kay anaa sa ilang agianan, busa si Jacob hugot nga nagtinguha nga mopatay kanila ug moagi padulong sa siyudad sa Mulek. Apan tan-awa, si Moroni ug ang iyang mga tawo mas gamhanan pa; busa sila wala mohatag og agianan sa mga Lamanita.

35 Ug nahitabo nga nag-away sila sa tumang kabangis; ug dihay daghan nga namatay sa duha ka pundok; oo, ug si Moroni nasamdan ug si Jacob namatay.

36 Ug si Lehi midasmag sa ilang luyo sa tumang kabangis uban sa iyang kusgan nga mga tawo, nga ang mga Lamanita dapit sa luyo mitugyan sa ilang mga hinagiban sa gubat; ug ang nahibilin kanila, ingon nga naglibog kaayo, wala masayod kon molayas o mosukol ba.

37 Karon si Moroni nakakita sa ilang kalibog, miingon siya ngadto kanila: Kon kamo modala sa inyong mga hinagiban sa gubat ug motugyan niini, tan-awa kami mohunong sa pagpaagas sa inyong dugo.

38 Ug nahitabo nga sa dihang nakabati ang mga Lamanita niini nga mga pulong, ang ilang labaw nga mga kapitan, kadtong tanan nga wala mamatay, miduol ug milabay sa ilang mga hinagiban sa gubat sa tiilan ni Moroni, ug mimando usab sa ilang mga tawo nga mobuhat sa ingon.

39 Apan tan-awa, dihay daghan nga nagdumili; ug kadtong kinsa dili motugyan sa ilang mga espada gidakop ug gigapos, ug ang ilang mga hinagiban sa gubat gikuha gikan kanila, ug gipugos sila sa pagmartsa uban sa ilang mga kaigsuonan ngadto sa yuta sa Mabungahon.

40 Ug karon ang gidaghanon sa binilanggo nga nadakpan milabaw pa kay sa gidaghanon sa namatay, oo, labaw pa niadtong nangamatay sa isigka-pundok.