1 Ket ita, napasamak iti maikaduapulo ket innem a tawen a panangituray dagiti ukom kadagiti tattao ni Nephi, kitaen, idi nakariing dagiti Lamanita iti umuna nga agsapa ti umuna a bulan, kitaen, nakitada a natay ni Amalickiah iti toldana; ken nakitada met a sisasagana ni Teancum a makidangadang kadakuada iti dayta nga aldaw.

2 Ket ita, napabutngan dagiti Lamanita idi makitada daytoy; ket tinallikudanda ti panggepda nga agmartsa nga agpaamianan iti daga, ket nagsanudda amin kadagiti buyotda iti siudad ti Mulek, ket nagsapulda iti pakaisalakanan kadagiti sarikedkedda.

3 Ket napasamak a natudingan ti kabsat ni Amalickiah nga ari dagiti tattao; ket Ammoron ti naganna; isu a ni ari Ammoron, ti kabsat ni ari Amalickiah, ti natudingan a mangsukat iti panagturayna.

4 Ket napasamak nga imbilinna a nasken a taginayonen dagiti taona dagidiay a siudad, a naalada babaen ti panagsayasay ti dara; gapu ta awan ti sinakupda a siudad malaksid no adu ti napukawda a dara.

5 Ket ita, nakita ni Teancum nga inkeddeng dagiti Lamanita a taginayonen dagidiay siudad a naalada, ken dagidiay paset ti daga a natagikuada; ken kasta met nga iti pannakakitana iti kinaadu ti bilangda, napanunot ni Teancum a saan pay a mainugot a panggepenna a rauten ida kadagiti trinserada.

6 Ngem pinagtalinaedna dagiti taona iti aglawlaw, a kasla mangisagsagana para ti gubat; wen, ket pudno nga agsagsagana a mangsalaknib iti bagina kadakuada, babaen ti ^apanangbangonna ti pader iti aglawlaw ken ti panangisaganana iti lugar a pagkamangan.

7 Ket napasamak nga intultuloyna ti panangisagana para iti gubat agingga a nangipatulod ni Moroni iti dakkel a bilang ti lallaki a mangpapigsa iti buyotna.

8 Ken nangipatulod pay ni Moroni iti bilin kenkuana a nasken a pagtalinaedenna dagiti amin a balud a natnag kadagiti imana; agsipud ta adu ti naala dagiti Lamanita a balud, nasken a pagtalinaedenna amin a balud a Lamanita a kas pangsaka kadagiti innala dagiti Lamanita.

9 Ken nangipatulod pay iti bilin kenkuana a nasken a sarikedkedanna ti daga a Bountiful, ken patalgeden ti ^aakikid a pagnaan nga agturong iti daga nga agpaamianan, amangan la ketdi ta maala dagiti Lamanita dayta a lugar ken maaddaan iti bileg a mangriribuk kadakuada iti agsumbangir a sikigan.

10 Ken nangipatulod pay ni Moroni iti mensahe kenkuana, a tarigagayanna a matalek koma isuna iti panangmantenerna iti dayta a disso ti daga, ken bumirok ti tunggal gundaway a dangranna dagiti Lamanita iti dayta a disso, agingga nga adda bilegna, ta nalabit a maalana manen babaen ti nainsiriban a pamuspusan wenno sabsabali pay a wagas dagidiay siudad a naalan manipud kadagiti imada; ken kasta met a patibkerenna ken papigsaenna dagiti siudad iti aglawlaw, a saan a natnag kadagiti ima dagiti Lamanita.

11 Ken kinunana pay kenkuana, umayakto kenka, ngem kitaen, adda dagiti Lamanita a mangraut kadakami iti beddeng ti daga iti baybay iti laud; ket kitaen, mapannak sumaranget kadakuada, ngarud saannak makaumay kenka.

12 Ita, pimmanaw ti ari (ni Ammaron) iti daga a Zarahemla, ket impadamagna iti reyna ti pannakatay ti kabsatna, ket nangummong iti dakkel a bilang ti lallaki, ket nagmartsada a simmaranget kadagiti Nephita iti beddeng ti baybay iti laud.

13 Ket kasta nga inkagumaanna a ribbuoten dagiti Nephita, ken allukoyenna ti maysa a paset ti puersada iti dayta a paset ti daga, kabayatan a binilinna dagiti imbatina a mangtagikua kadagiti siudad a naalana, a ribbuotenda pay dagiti Nephita iti beddeng iti baybay iti daya, ken nasken a tagikuaenda dagiti dagada agingga nga adda bilegda, a mayannurot iti bileg dagiti buyotda.

14 Ket kasta nga adda dagiti Nephita kadagidiay nakaam-amak a kasasaad iti panaggibus ti maikaduapulo ket innem a tawen a panagturay dagiti ukom kadagiti tattao ni Nephi.

15 Ngem kitaen, napasamak iti maikaduapulo ket pito a tawen a panagturay dagiti ukom, a ni Teancum, babaen ti bilin ni Moroni—a nangbukel kadagiti buyot tapno masalakniban ti abagatan ken ti laud a beddeng ti daga, ken nangrugi a nagmartsa nga agturong iti daga a Bountiful, tapno matulonganna ni Teancum kadagiti taona iti panangpasublida kadagiti siudad a napukawda—

16 Ket napasamak a nakaawat ni Teancum kadagiti bilin a rauten ti siudad ti Mulek, ken pasublienna no mabalin.

17 Ket napasamak a nagsagana ni Teancum a rauten ti siudad ti Mulek, ket nagmartsa kadua dagiti buyotna a mapan kadagiti Lamanita; ngem nakitana a saan mabalin a maparmekna ida bayat ti kaaddada kadagiti trinserada; ngarud binaliwanna dagiti planona ket nagsubli manen iti siudad ti Bountiful, a manguray iti idadateng ni Moroni, tapno makaawat iti puersa ti buyotna.

18 Ket napasamak a nakadanon ni Moroni ken dagiti buyotna iti daga a Bountiful, iti arinunos ti maikaduapulo ket pito a tawen a panagturay dagiti ukom kadagiti tattao ni Nephi.

19 Ket iti panangrugi ti maikaduapulo ket walo a tawen, nangangay da Moroni ken Teancum ken adu kadagiti pangulo a kapitan iti konseho ti gubat—no ania ti nasken nga aramidenda a mangparuar kadagiti Lamanita a makidangadang kadakuada; wenno iti sumagmamano a pamuspusan mapasabloganda ida a rummuar kadagiti sarikedkedda, tapno magundawayanda ida ket maalada manen ti siudad ti Mulek.

20 Ket napasamak a nangibaonda kadagiti embahada dagiti buyot dagiti Lamanita, a nangsalaknib iti siudad ti Mulek, iti dadauloda, a Jacob ti naganna, a tarigagayanda a rummuar a kaduana dagiti buyotna tapno masabet ida iti patad a nagbaetan ti dua a siudad. Ngem kitaen, saan a rummuar ni Jacob, a maysa a Zoramita, a kaduana ti buyotna a sumaranget kadakuada iti patad.

21 Ket napasamak a ni Moroni, a napukawan iti namnama a sarangten ida iti awan makagundaway a lugar, ngarud, nangikeddeng iti maysa a plano a mabalinna a pangngati kadagiti Lamanita tapno rummuarda kadagiti sarikedkedda.

22 Ngarud imbilinna ni Teancum a masapul nga umay a kaduanati bassit a bilang ti lallaki ket agmartsa nga agpababa iti asideg ti igid ti baybay; ket nagmartsa ni Moroni ken dagiti soldadona, iti rabii, iti langalang, iti laud ti siudad ti Mulek; ket iti kasta, iti kabigatanna, idi natakuatan dagiti guardia dagiti Lamanita ni Teancum, nagtatarayda ket imbagada ken ni Jacob, ti dadauloda.

23 Ket napasamak nga immabante ti soldado dagiti Lamanita tapno rautenda ni Teancum, ta impagarupda a babaen iti kinaaduda maabakda ni Teancum gapu iti kinabassit ti bilangna. Ket idi makita ni Teancum dagiti buyot dagiti Lamanita a mangsaranget kenkuana rinugianna ti nagsanud iti igid ti baybay, nga agpaamianan.

24 Ket napasamak nga idi nakita dagiti Lamanita ti panaglibasna, timmuredda ket kinamatda ida a sibibileg. Ket bayat ngarud nga iyad-adayo ni Teancum dagiti Lamanita a mangkamkamat kadakuada nga awan ti pagmamaayan ti panangkamatda kadakuada, kitaen, binilin ni Moroni a nasken nga agmartsa ti maysa a paset ti buyotna a kakaduana nga agturong iti siudad, ket tagikuaenna daytoy.

25 Ket kasta ti inaramidda, ket pinapatayda amin dagiti nabati a mangsalaknib iti siudad, wen, amin dagidiay saan a mangisuko kadagiti armasda a pakigubat.

26 Ket iti kasta nagun-od ni Moroni a matagikua ti siudad ti Mulek babaen iti maysa a paset ti buyotna, bayat ti pannagmartsana a kadua dagiti nabati tapno sabtenda dagiti Lamanita no agsublida manipud iti panangkamatda ken ni Teancum.

27 Ket napasamak a kinamat dagiti Lamanita ni Teancum agingga a nakaasidegda iti siudad ti Bountiful, ket kalpasanna sinaranget ida ni Lehi ken ti bassit a buyot, a nabati a mangsalaknib iti siudad ti Bountiful.

28 Ket ita kitaen, idi makita dagiti pangulo a kapitan dagiti Lamanita ni Lehi a kaduana ti buyotna a sumaranget kadakuada, naglilibasda iti pannakatikawda, amangan la ketdi a saanda makadanon iti siudad ti Mulek sakbay a makamakam ida ni Lehi; agsipud ta nabannogda gapu iti pannagmartsada, ket saan pay a nabannog dagiti tattao ni Lehi.

29 Ita saan nga ammo dagiti Lamanita nga adda iti likudanda ni Moroni a kadua ti buyotna; ket ni la Lehi ken dagiti taona ti kinabutengda.

30 Ita saan a tinarigagayan ni Lehi a kamakamen ida agingga a masabatda ni Moroni ken ti buyotna.

31 Ket napasamak a sakbay a nakapagsanud dagiti Lamanita iti adayo napalawlawandan kadagiti Nephita, babaen dagiti tattao ni Moroni iti maysa a bangir, ken dagiti tattao ni Lehi iti sabali a bangir, a saanda pay amin nabannog ken napnoda iti pigsa; ngem nabannogen dagiti Lamanita gapu iti atiddog a panagmartsada.

32 Ket binilin ni Moroni dagiti taona a darupenda ida agingga nga isukoda dagiti igamda a pakigubat.

33 Ket napasamak a ni Jacob, gapu ta isu ti dadaulo, ken kasta met a gapu ta maysa a ^aZoramita, ken addaan iti saan a maparmek nga espiritu, indauluanna dagiti Lamanita a nakidangadang nga addaan iti napalalo a rungsot ken ni Moroni.

34 Iti kaadda ni Moroni iti pagturongan ti martsada, naikeddeng ngarud ni Jacob a papatayen ida ket lumasat nga agturong iti siudad ti Mulek. Ngem kitaen, nabilbileg ni Moroni ken dagiti taona; ngarud saanda a sinanudan dagiti Lamanita.

35 Ket napasamak a nakidangadangda iti agsumbangir iti napalalo a rungsot babaen ti dua nga imada; ket adu ti napapatay iti agsumbangir; wen, nasugatan ni Moroni ken natay ni Jacob.

36 Ket dimmarup ni Lehi iti likudanda a sirurungsot a kadua dagiti napipigsa a taona, isu nga insuko dagiti Lamanita iti makinlikud dagiti igamda a pakigubat; ket dagiti nabati kadakuada, gapu iti pannakatikawda, saanda ammo no aglibas wenno tumiro.

37 Ita iti pannakakita ni Moroni iti pannakatikawda, kinunana kadakuada: No yegyo dagiti igamyo a pakigubat ket isukoyo ida, kitaen isardengmi iti panagsayasay ti darayo.

38 Ket napasamak nga idi nangngeg dagiti Lamanita dagitoy a balikas, dagiti pangulo a kapitanda, amin dagiti saan a napapatay, immasidegda ket impuruakda dagiti igamda a pakigubat iti sakaanan ni Moroni, ken kasta met a binilinda dagiti tattaoda nga obraenda met.

39 Ngem kitaen, adu ti saan a nagtungpal; ket naala ken napungo dagiti saan a nangisuko kadagiti espadada, ket naala kadakuada dagiti igamda a pakigubat, ket napilitanda nga agmartsa kadua dagiti kakabsatda nga agturong iti daga ti Bountiful.

40 Ket ita ad-adu ti bilang dagiti nabalud ngem ti bilang dagiti napapatay, wen, ad-adu ngem kadagiti napapatay iti agsumbangir.