Pāpa’ira’a mo’a
Alama 53


Pene 53

’Ua fa’a’ohipahia te feiā mau-’āuri ’āti Lamana nō te pāruru ha’apa’ari i te ’oire nō ’Auhune—Nā roto i te mau mārōra’a i tupu i rotopū i te mau ’āti Nephi, ’ua upo’oti’a ihora te mau ’āti Lamana—’Ua rave ihora Helamana i te fa’aterera’a i te mau tamari’i tamāroa ’āpī e piti tauatini a te mau ta’ata nō Amona. Fātata 64–63 H.M.

1 ’E i muri a’era, ’ua fa’ata’a ihora rātou i te mau fa’ehau tīa’i i te feiā mau-’āuri nō te mau ’āti Lamana, ’e ’ua ha’avī atu ra ia rātou ’ia haere atu e huna i tō rātou feiā pohe ; ’oia ïa, ’e te feiā pohe ato’a o te mau ’āti Nephi i taparahihia ; ’e ’ua fa’ata’a atu ra Moroni i te mau ta’ata i ni’a ia rātou nō te tīa’i ia rātou ’a rave ai rātou i tā rātou mau ’ohipa.

2 ’E ’ua haere atu ra Moroni rāua ’o Lehi i roto i te ’oire ra nō Muleka, ’e ’ua rave ihora i te fa’aterera’a nō te ’oire, e hōro’a atu ra i te reira ia Lehi. I teienei, inaha, ’o taua Lehi nei, ’o te hō’ē ïa ta’ata i pīha’i iho ia Moroni i te pae rahi o te taime nō tāna mau ’arora’a ; ’e ’ua au tōna huru i tō Moroni, ’e e mea ’oa’oa rāua i tō rāua ataata ’ore, te tahi i te tahi ; ’oia ïa, ’ua here rāua te tahi i te tahi, ’e ’ua here-ato’a-hia rāua e te feiā ato’a o Nephi ra.

3 ’E i muri a’era, ’ia fa’aoti a’era te mau ’āti Lamana i te tanu i tō rātou feiā pohe ’e i te feiā pohe ato’a o te mau ’āti Nephi, ’ua fa’aho’ihia atu ra rātou i te fenua ra nō ’Auhune ; ’e nā roto i te mau fa’auera’a a Moroni, ’ua fa’aue atu ra Teanekuma ia ’ō rātou i te hō’ē ’āpo’o ē ’ati noa a’e te fenua, ’oia ho’i te ’oire ra nō ’Auhune.

4 ’E ’ua fa’aue ’oia ia rātou ’ia hāmani i te hō’ē ’āua rā’au i ni’a i te pae roto o taua ’āpo’o ra, ’e ’ua ha’apu’e mai ra rātou i te repo nō roto mai i te ’āpo’o i pīha’i iho i te ’āua rā’au ; ’e ’ua nā reira rātou i te fa’arave i te mau ’āti Lamana i te ’ohipa ē tae noa atu ’ua ha’a’ati roa rātou i te ’oire ra nō ’Auhune i te ’āua pa’ari i hāmanihia i te rā’au ’e te repo, ’e e mea teitei ho’i te reira.

5 ’E ’ua riro a’era teie ’oire ’ei ha’apūra’a pa’ari roa mai taua taime atu ra ; ’e ’ua ha’apa’o noa rātou i te feiā mau-’āuri o te mau ’āti Lamana i roto i teie nei ’oire ; ’oia ïa, i roto i te ’āua tā rātou i fa’aue i te mau ’āti Lamana ’ia hāmani i tō rātou iho rima. I teienei, e mea ti’a roa ia Moroni ’ia fa’aue i te mau ’āti Lamana ’ia rave i te ’ohipa, nō te mea e mea ’ōhie ’ia ha’apa’o ia rātou ’a rave ai rātou i te ’ohipa ; ’e ’ua hina’aro ho’i ’oia i tōna mau ta’ata pā’āto’a i te taime ’oia e ’aro atu ai i te mau ’āti Lamana.

6 ’E i muri a’era, e mea nā reira Moroni i te upo’oti’a i ni’a a’e i te hō’ē o te mau nu’u fa’ehau rahi roa a’e o te mau ’āti Lamana, ’e ’ua roa’a iāna te ’oire ra nō Muleka, ’o te hō’ē ïa o te mau vāhi pa’ari roa a’e o te mau ’āti Lamana i roto i te fenua ra nō Nephi ; ’e ’ua hāmani ato’a ’oia i te hō’ē ha’apūra’a pa’ari nō te tāpe’a i tāna feiā mau-’āuri.

7 ’E i muri a’era, ’aita ’oia i tāmata fa’ahou ’ia ’aro atu i te mau ’āti Lamana i taua matahiti ra, ’āre’a rā ’ua fa’a’ohipa ’oia i tōna mau ta’ata nō te fa’aineine noa nō te ’aro atu ; ’oia ïa, ’e nō te hāmani i te mau pā nō te pāruru ia rātou iho i te mau ’āti Lamana ; ’oia ïa, nō te fa’aora i tā rātou mau vahine ’e tā rātou mau tamari’i i te o’e ’e te ’ati, ’e nō te fāri’i i te mā’a nā tō rātou mau nu’u fa’ehau.

8 ’E i teienei, i muri a’era, tē pārahi ra te mau nu’u fa’ehau o te mau ’āti Lamana i te pae apato’a nō te miti i te pae tō’o’a o te rā, ’e tei te ātea ’ē ’o Moroni ; ’e nō te mau ’ohipa tāviri i rotopū i te mau ’āti Nephi, ’ua tupu ihora te mau mārōra’a i rotopū ia rātou, ’e ’ua roa’a ihora i te mau ’āti Lamana te mana ri’i i ni’a i te mau ’āti Nephi, ’oia ïa, ’e nō reira ho’i ’ua roa’a ia rātou e rave rahi o tō rātou mau ’oire i taua pae fenua ra.

9 ’E nō te mau ’ohipa ’ī’ino i rotopū ia rātou iho, ’oia ïa, nō te mau mārōra’a ’e te ’ohipa tāviri i rotopū ia rātou iho, i ro’ohia ai rātou i te mau fifi rahi roa.

10 ’E i teienei, inaha, e parau ri’i tā’u nō ni’a i te feiā o Amona, i riro na ho’i rātou i te mātāmua ’ei mau ’āti Lamana ; ’āre’a rā nā roto ia Amona ’e tōna ra mau taea’e, ’e ’aore rā, nā roto i te mana o te parau a te Atua ’ua fa’afāriuhia mai rātou i te Fatu ; ’e ’ua arata’ihia rātou i raro i te fenua ra nō Zarahemela, ’e mai reira atu ’ua pāruruhia rātou e te mau ’āti Nephi.

11 ’E nō tā rātou tapura’a, ’ua tāpe’ahia rātou ’eiaha rātou e rave i te mauha’a tama’i nō te ’aro atu i tō rātou mau taea’e ; nō te mea ’ua tapu rātou ē, ’aita roa rātou e ha’amani’i fa’ahou i te toto ; ’e mai te au i tā rātou ra tapu, e pohe rātou, ’oia ïa, e fa’ati’a rātou ia rātou iho ’ia ma’iri i roto i te rima o tō rātou mau taea’e, ’āua’a a’e rā te aroha ’e te here rahi o Amona ’e tō tōna mau taea’e ia rātou.

12 Nō te reira tumu i arata’ihia mai ai rātou i raro i te fenua ra nō Zarahemela ; ’e mai te reira mai taime ’ua pāruru-noa-hia rātou e te mau ’āti Nephi.

13 ’Āre’a rā i muri a’era, ’ia ’ite a’era rātou i te pe’ape’a, ’e te mau ’ati ’e te ahoaho ’o tā te mau ’āti Nephi i amo nō rātou, ’ua tupu ihora tō rātou aroha ’e ’ua hina’aro ihora rātou ’ia rave i te mau mauha’a tama’i nō te pāruru i tō rātou fenua.

14 Inaha rā, ’a fātata ai rātou i te rave i tā rātou mau mauha’a tama’i, ’ua fa’aro’o ihora rātou i te mau parau tāparu a Helamana ’e tōna mau taea’e, ’e ’ua fātata roa ho’i rātou i te ’ōfati i te tapu tā rātou i tapu.

15 ’E ’ua mata’u Helamana ’o te mou tō rātou vārua ’ia nā reira rātou ; nō reira ’ua tītauhia ia rātou pā’āto’a ’o tei fa’aoti i taua fafaura’a ra, ’ia hi’o noa atu i tō rātou mau taea’e i te haerera’a nā roto i tō rātou mau ’ati, i roto i tō rātou mau pe’ape’a rahi i teie taime.

16 Inaha rā, i muri a’era, e rave rahi tā rātou mau tamari’i tamāroa tei ’ore i fafau i taua fafaura’a ra, ’oia ho’i, ’aita rātou e rave i tā rātou mau mauha’a tama’i nō te pāruru ia rātou iho i tō rātou mau ’enemi ; nō reira ’ua putuputu ’āmui mai ra rātou i teie taime, ’o rātou ato’a ’o tei ti’a ’ia rave i te mau mauha’a tama’i ; ’e ’ua parau rātou ia rātou iho e mau ’āti Nephi.

17 ’E ’ua fafau rātou i te hō’ē fafaura’a ’ia ’aro nō te ti’amāra’a o te mau ’āti Nephi ; ’oia ïa, ’ia pāruru i te fenua ē tae noa atu i te hōro’ara’a i tō rātou iho ora ; ’oia ïa, ’ua fafau ho’i rātou ē e ’ore roa rātou e fa’aru’e i tō rātou ti’amāra’a, ’āre’a rā e tama’i noa rātou nō te pāruru i te mau ’āti Nephi ’e ia rātou iho i te fa’atītīra’a.

18 I teienei, inaha, e piti tauatini rahira’a mau taure’are’a tāne teie ’o tei fa’aoti i teie fafaura’a ’e tei rave i tā rātou mau mauha’a tama’i nō te pāruru i tō rātou fenua.

19 ’E i teienei, inaha, ’aita tō te mau ’āti Nephi e pe’ape’a ia rātou i te tau i ma’iri a’enei, i teienei rā ’ua riro rātou ’ei tauturura’a rahi ato’a ; ’e ’ua rave ho’i rātou i tā rātou mau mauha’a tama’i, ’e ’ua hina’aro rātou ’ia riro Helamana ’ei ta’ata fa’atere nō rātou.

20 E mau taure’are’a tāne ’āpī roa rātou ato’a, ’e ’ua hau rahi roa tō rātou itoito, ’e tō rātou pūai ato’a ’e tā rātou ho’i ’ohipa ; inaha rā, e ’ere i te reira ana’e—e mau tāne ’ohipa parau mau rātou i te mau taime ato’a ’e i roto i te mau mea ato’a e tītauhia ia rātou.

21 ’Oia ïa, e mau ta’ata parau mau rātou ’e te ha’apa’o maita’i, ’e ’ua ha’api’ihia ho’i rātou ’ia ha’apa’o i te mau fa’auera’a a te Atua ’e ’ia haere ma te parauti’a i mua iāna.

22 ’E i teienei, i muri a’era, ’ua haere atu ra Helamana i mua roa i tōna mau fa’ehau ’āpī roa e piti tauatini, nō te tauturu i te mau ta’ata i te mau ’ōti’a o te fenua i te pae apato’a, i pīha’i iho i te miti i te tō’o’a o te rā.

23 ’E oti a’era te matahiti e piti ’ahuru ’e ma va’u nō te fa’aterera’a a te mau ha’avā i ni’a i te mau ’āti Nephi.