1 Ket napasamak a nangikabilda kadagiti guardia kadagiti balud a Lamanita, ket pinilitda ida a mapan ken itabon dagiti minatayda, wen, ken kasta met kadagiti minatay dagiti Nephita a napapatay; ket nangipuesto ni Moroni iti tattao a mangbantay kadakuada bayat ti panangaramida kadagiti trabahoda.

2 Ket napan ni Moroni iti siudad ti Mulek a kaduana ni Lehi, ket impanguluanna ti siudad ken intedna daytoy ken ni Lehi. Ita kitaen, maysa a tao daytoy a Lehi a nakadua ni Moroni iti adadu a paset ti amin a pannakigubatna; ket maysa a tao isuna a ^akasla ken ni Moroni, ket nagrag-oda iti kinatalged ti tunggal maysa; wen, ay-ayatenda ti tunggal maysa, ken kasta met nga ay-ayatenda ida iti amin a tattao ni Nephi.

3 Ket napasamak a kalpasan ti panangikali kadagiti minatayda ken kadagiti minatay dagiti Nephita, nagmartsada a nagsubli iti daga a Bountiful; ket imbilin ni Teancum, babaen ti pammilin ni Moroni, a nasken a rugianda ti mangkali iti kanal iti aglawlaw ti daga, wenno ti siudad, a Bountiful.

4 Ket imbilinna a nasken a mangbangonda kadagiti ^asaripda a troso iti akin-uneg a ngarab ti kanal; ket imbuntuonda dagiti nakali a daga ti kanal kadagiti saripda a troso; ket kasta a pinagobrada dagiti Lamanita agingga a mapalawlawanda ti siudad ti Bountiful kadagiti natibker a pader a truso ken daga, iti nalabes ti kangatona.

5 Ket nagbalin daytoy a siudad a nabileg a sarikedked kalpasanna; ket binantayanda dagiti balud a Lamanita iti daytoy a siudad; wen, uray pay iti uneg ti pader a pinabangonda kaniada babaen kadagiti imada. Ita napilitan ni Moroni a mangpaobra kadagiti Lamanita, gapu ta nalaklaka a bantayan ida bayat ti panagobrada; ket tinarigagayanna amin a buyotna inton nasken a rumautda kadagiti Lamanita.

6 Ket napasamak a nagun-od ni Moroni ti balligi iti maysa kadagiti kapigsaan a buyot dagiti Lamanita, ket natagikuana ti siudad ti Mulek, a maysa kadagiti kapigsaan a sarikedked dagiti Lamanita iti daga a Nephi; ket iti kasta nangbangon pay iti sarikedked tapno mapagtalinaedna dagiti baludna.

7 Ket napasamak a saannan a pinadas pay ti makidangadang kadagiti Lamanita iti dayta a tawen, ngem pinagtrabahona dagiti taona iti panagsaganada para iti gubat, wen, ken iti panagaramidda kadagiti sarikedked a mangsalaknib maibusor kadagiti Lamanita, wen, ken kasta met a pangiliklikda kadagiti babbaida ken dagiti annakda manipud iti bisin ken rigat, ken panangtaraonda kadagiti buyotda.

8 Ket ita napasamak a nakaala iti sumagmamano a lugar kadagiti Nephita dagiti buyot dagiti Lamanita, iti baybay iti laud, iti abagatan, bayat ti kaawan ni Moroni gapu iti sumagmamano a sinisikap kadagiti Nephita, a nakaigapuan ti panagsisinnuppiat kadakuada, wen, ta uray la a natagikuada ti sumagmamano kadagiti siudadda iti dayta a paset ti daga.

9 Ket kasta gapu iti kinadangkes kadakuada, wen, gapu iti sinnuppiat ken sinisikap kadakuada naipanda kadagiti kapeggadan a kasasaad.

10 Ket ita kitaen, adda kayatko nga ibaga maipanggep ti ^atattao ni Ammon, nga, idi damo, Lamanitada; ngem babaen ni Ammon ken dagiti lallaki a kabsatna, wenno babaen iti bileg ken balikas ti Dios, ^bnamalbaliwda iti Apo; ket naipanda iti daga a Zarahemla, ket manipud idi nasalaknibanda babaen kadagiti Nephita.

11 Ket gapu iti sapatada napawilanda nga agarmas maibusor kadagiti kabsatda; gapu ta nagsapatada a saandanto a ^apulosen mangpasayasay iti dara; ket mayannurot iti sapatada naungawda koman; wen, binay-anda koma ti bagbagida a matnag kadagiti ima dagiti kabsatda, no saan a gapu iti asi ken aglaplapusanan nga ayat nga impaay kadakuada ni Ammon ken dagiti kabsatna.

12 Ket gapu iti daytoy naipanda iti daga a Zarahemla; ket manipud idi ^anasalaknibanda babaen kadagiti Nephita.

13 Ngem napasamak nga idi nakitada ti peggad, ken ti adu a rigat ken panagtutuok nga inibturan dagiti Nephita para kadakuada, natignayda iti panangngaasi ket ^atinarigagayanda nga agarmas para iti pannakasalaknib iti pagilianda.

14 Ngem kitaen, idi alaenda koman dagiti igamda a pakigubat, rimmimbaw kadakuada ti panangallukoy ni Helaman ken dagiti kakabsatna, gapu ta dandanida a ^alabsingen ti ^bsapata nga inaramidda.

15 Ket nagamak ni Helaman amangan la ketdi a no aramidenda mapukaw dagiti kararuada; ngarud napilitan amin dagiti simrek iti daytoy a katulagan a kitaenda dagiti kabsatda ti panagsagabada kadagiti rigatda, iti napeggad a kasasaadda iti daytoy a panawen.

16 Ngem kitaen, napasamak nga adu ti lallaki nga annakda, a saan a simrek iti katulagan a saan a mangala kadagiti igamda a pakigubat tapno salaknibanda ti bagbagida kadagiti kabusorda; ngarud inummongda a sangsangkamaysa ti bagbagida iti daytoy a panawen, a kas iti kaadu dagiti makabael nga agiggem iti armas, ket inawaganda ti bagbagida iti Nephita.

17 Ket simrekda iti katulagan a makiranget para iti wayawaya dagiti Nephita, wen, a mangsalaknib iti daga uray pay iti pannakaungaw ti biagda; wen, intulagda pay a saandanto a pulos nga isuko ti ^awayawayada, ngem makirangetda iti ania man a kasasaad tapno masalakniban dagiti Nephita ken ti bagbagida manipud iti pannakaadipen.

18 Ita kitaen, addaan dua ribu dagidiay nga agtutubo a lallaki, ti simrek iti daytoy a katulagan ket innalada dagiti armasda a pakigubat tapno salaknibanda iti pagilianda.

19 Ket ita kitaen, kas iti kaano man saanda nagbalin a pagdaksan dagiti Nephita, nagbalinda ita iti daytoy a panawen a nabileg met a katulongan; agsipud ta innalada dagiti igamda a pakigubat, ket kinayatda a ni Helaman ti mangidaulo kadakuada.

20 Ket agtutuboda amin a lallaki, ket nalaus ti ingel ti ^aturedda, ken kasta met iti pigsa ken alibtak; ngem kitaen, saan laeng a daytoy—lallakida a ^bnapudno iti amin a panawen iti ania man a banag a maitalek kadakuada.

21 Wen, lallakida iti kinapudno ken kinaparbeng, agsipud ta naisuro kadakuada a mangtungpal kadagiti bilin ti Dios ken ^amagna a sililinteg iti sanguananna.

22 Ket ita napasamak a nagmartsa ni Helaman a dadaulo ti ^adua ribu nga agtutubo a soldado, para iti suporta iti tattao kadagiti beddeng ti daga iti abagatan babaen ti laud a baybay.

23 Ket kasta ti naggibusan ti maikaduapulo ket walo a tawen a panagturay dagiti ukom kadagiti tattao ni Nephi.