1 Ka sa qai yaco ena ikaruasagavulu kaciwa ni yabaki ni nodra veiliutaki na turaganilewa, a vakauta kina ko ^aAmoroni e dua na itukutuku vei Moronai, ka gadreva me rau veisau kaivesu.

2 Ka sa yaco ni sa marau vakalevu sara ko Moronai ena gagadre oqori, ni sa vinakata me ra kania ga na nona tamata na iwase ni kakana e dau vakarautaki tiko vei ira na Leimanaiti; ia sa gadrevi ira talega na nona tamata, me ra lewe levu cake kina na nona mataivalu.

3 Oqo ko ira na Leimanaiti era sa kauti ira tale ga vakavesu na nodra yalewa kei na nodra gone, ia sa sega sara na yalewa se gone vei ira na kaivesu i Moronai, se vei ira na kaivesu ka taura ko Moronai; o koya sa nakita kina ko Moronai me navuca e dua na kena ivadi qaseqase me ra sereka mai kina mai vei ira na Leimanaiti e vuqa sara vei ira na Nifaiti ke rawa me vakakina.

4 O koya sa vola kina ko koya e dua na ivola, ka solia vua na dauniveiqaravi i Amoroni, ka a kauta mai na itukutuku vei Moronai. Ia sa vakaoqo na veivosa ka vola vei Amoroni:

5 Raica, i Amoroni, au sa volavola yani oqo vei iko ena vuku ni nomu valuti ira tiko na noqu tamata, se na ivalu a tekivuna ko ^atuakamu ka sa lomamu mo vakuria tiko ni sa mate yani ko koya.

6 Raica, au na tukuna mada vei iko na veika sa baleta na ^alewa dodonu ni Kalou, kei na iseleiwau ni nona cudru waqawaqa, ka sa lili tu e delamuni kevaka ko sega ni veivutuni ka kauta lesu na nomu mataivalu ki na nomu vanua, se na vanua ko ni sa tawana tiko, ko ya na vanua ko Nifai.

7 Io, sa rawa me’u na tukuna vei iko na veika oqo kevaka ko sa via muria; io au na tukuna vei iko na veika sa baleta na ^aeli rerevaki sa waraki ira tu mai na ^bdaulaba me vakataki iko kei tuakamu, ia ko na qai bula ga kevaka ko na veivutuni ka muduka sara na nomu inaki ni veivakamatei, ka kauta lesu na nomu mataivalu ki na nomu vanua.

8 Ia me vaka ni ko ni sa daubeca na veika oqo ka valuti ira tiko na tamata ni Turaga, au kila ni o ni na baci kitaka tale vakakina.

9 Ia oqo raica, sa rawa ni keimami ciqomi kemuni; io, kevaka o ni sa sega ni vakasuka sara na nomuni inaki, raica ena tau vei kemuni na cudru ni Kalou ko koya ko ni beca tiko, ka ko ni na rusa vakaidina kina.

10 Ia, me vaka sa bula na Turaga, ena kabai kemuni yani na neimami mataivalu kevaka ko ni na sega ni vakasuka, ko ni na sikovi vakatotolo sara, mai vei mate, ni keimami na taura lesu na neimami veikoro lelevu kei na neimami vanua; io, keimami na qarava na neimami lotu kei na inaki ni neimami Kalou.

11 Ia raica, au kila ni sa tawayaga na noqu tukuna vei iko na veika oqo; ia e vaka vei au ni ko sa ^aluvei eli; o koya me’u tinia kina na noqu ivola au na qai veisautaki ira wale ga na noqu kaivesu kevaka e vakayacori vakaoqo, na kaivesu yadua au sereka yani, me kena isau mai e dua na tagane, ko watina kei na luvedrau; kevaka ko sa vakadonuya na kena ivakarau oqo, au na qai veisautaki ira na noqu kaivesu.

12 Ia raica, kevaka ko sa sega ni vakadonuya, au na kauta yani na noqu mataivalu me keimami valuti kemuni; io, au na vakaiyaragitaki ira na neimami yalewa kei na gone ka keimami na valuti kemuni ka vakasavi kemuni ki na nomuni vanua, na vanua ka ^aneimami ivotavota vakawa tu e liu; io, me isau ni dra na dra, io ka isau ni bula na bula; ia au na valuti kemuni tiko me yacova ni ko ni sa vakarusai vakadua e delai vuravura.

13 Raica, au sa cudru sara koi au, kei ira na noqu tamata; ni ko ni sa segata mo ni vakamatei keimami ia keimami sa taqomaki keimami ga. Ia raica, kevaka ko ni sa segata tale mo ni vakamatei keimami, keimami sa na segata tale ga me vakamatei kemuni; io, keimami na segata me keimami taura lesu tale na neimami vanua se na vanua ka neimami ivotavota vakawa tu e liu.

14 Oqo au sa tinia na noqu ivola. Koi au ko Moronai; koi au na nodra iliuliu na Nifaiti.

15 Ka sa yaco ni sa cudru sara vakalevu ko Amoroni ni sa wilika oti na ivola; raica sa vola tale e dua na ivola vei Moronai, ka sa vakaoqo na veivosa ka e kaya kina:

16 Koi au ko Amoroni, na nodra tui na Leimanaiti; na tuakaqu ko Amalikaia, o koya ko a ^alabata. Raica au na sauma vakaidina vei iko na nona dra, io, ena valuti iko yani na noqu mataivalu, raica au sega ni rerevaka na nomu vosa bolebole.

17 Ia raica, ko ira na nomuni qase era a vakaisini ira na wekadra ka kovea na nodra ^aitutu, me ra lewa na matanitu.

18 Ia oqo raica, kevaka ko ni sa biuta sobu na nomuni iyaragi ka vakarorogo vei ira ka dodonu ga me ra lewa na matanitu, au na qai vakaroti ira na noqu tamata me ra biuta sobu tale ga na nodra iyaragi ka me mudu sara na veivaluvaluti.

19 Raica sa rui bibi sara na vosa ni veivakarerei ko tauca mai vei au kei ira na noqu tamata; ia keimami sega sara ni rerevaka na nomu veivakarerei.

20 Ia oqo au na vakadonuya ena marau me ra veisautaki na kaivesu ena kena ivakarau ko vakatura mai, ni’u sa via maroroya na keimami kakana me kedra ga na noqu tamata ivalu; ia eda sa na vala tiko ga me yacova ni ko ni sa vakarorogo na Nifaiti ki na neimami lewa, se yacova ni ko ni sa vakarusai kece sara ka tawamudu.

21 Ia na veika me baleta na Kalou ko tukuna mai ni keimami sa cata, raica keimami sega ni kilai koya; ko ni sa sega tale ga ni kilai koya koi kemuni; ia kevaka sa tiko dina e dua na tamata vakaoqo, keimami sega ni kila ni a buli keimami ka vakatalega kina vei kemuni.

22 Ia kevaka e dina ni dua tiko na tevoro kei na dua na eli, raica ena sega li ni vakatalai iko ko koya mo drau laki tiko vata kina kei tuakaqu ko mai kaya tiko oqo ni sa lako ki na dua na vanua vakaoqori? Ia raica sa sega so ni dua na ka na veika kece oqo.

23 Koi au ko Amoroni, e dua na kawa i ^aSoramu, o koya ka ra a vakasaurarataka na nomuni qase, ka kauti koya tani mai na vanua ko Jerusalemi.

24 Ia raica, edaidai au sa dua tu na Leimanaiti yaloqaqa; raica sa yaco tiko na ivalu oqo me isau ni cala a vakayacori vei ira na neimami qase, ia me qaravi ka tauri kina na nodra dodonu ki na matanitu; ia au sa tinia eke na noqu ivola vei Moronai.