O Le Tusi a Alema O Le Atalii o Alema

Mataupu 58

Ua maua e Helamana, Kita, ma Teominea le aai o Maneti i se togafiti—Ua tuumuli sa Lamanā—Ua faasaoina atalii o le nuu o Amona ao latou tutu mausali i le puipuiga o lo latou saolotoga ma lo latou faatuatuaga. E tusa o le 63–62 T.L.M.

 Ma faauta, o lenei sa oo ina o lo matou faamoemoe na sosoo ai o le mauaina lea o le aai o Maneti; ae faauta, sa leai se ala sa mafai ai ona matou taitai ese o i latou i fafo mai le aai ia matou autau toaitiiti. Aua faauta, sa latou manatua mea ia na matou faia e oo mai i le taimi nei; o lea na le mafai ai ona matou amaunu ese o i latou mai o latou olo malolosi.

 Ma sa silisili atu lo latou toatele nai la matou autau, sa matou le fia o atu ai ma osofai i latou i o latou olo malolosi.

 Ioe, ma sa oo ina tatau ia te i matou ona faaaoga a matou tagata e taofi ai vaega na o le laueleele ia na matou toe maua mai; o lea sa oo ai ina tatau ia te i matou ona faatalitali, ina ia mafai ona matou maua o se malosi atili mai i le laueleele o Saraʼemila ma se sapalai fou o meaai.

 Ma sa oo ina faapea ona ou auina atu o se avefeau i le kovana o lo tatou laueleele, e faailoa atu ia te ia e uiga i mea ua tutupu i o tatou tagata. Ma sa oo ina matou faatalitali ia maua mai ni meaai ma se malosi mai le laueleele o Saraʼemila.

 Ae faauta, sa laitiiti se aoga na matou maua mai i lenei mea; ona sa maua foi e sa Lamanā se malosi tele mai lea aso i lea aso, ma le tele foi o meaai; ma sa faapea o matou tulaga i lea vaitaimi.

 Ma sa o mai sa Lamanā e faasaga mai ia te i matou i lea taimi i lea taimi, ua tautino e faaumatia i matou i togafiti; e ui i lea sa le mafai ona matou o atu e tau ma i latou, ona o o latou malutaga ma o latou olo malolosi.

 Ma sa oo ina matou faatalitali i nei tulaga faigata mo le va o masina e tele, seia oo lava ina tauau a matou fano i le leai o se meaai.

 Peitai sa oo ina matou maua ni meaai, ia sa momoli puipui mai ia i matou e se autau o tane e lua afe, e fesoasoani ia te i matou; ma ona pau lea o le fesoasoani na matou maua mai, e puipui ai i matou lava ma lo tatou atunuu mai le pauu atu i lima o o tatou fili, ioe, e tau ai ma se fili sa le mafaitaulia le toatele.

 Ma o lenei o le pogai o o matou maasiasi nei, po o le pogai na latou le auina mai ai se malosi atili ia te i matou, ua matou le iloa; o lea na matou faanoanoa ai ma faatumulia foi i le fefefe, ina nei i ai se ala e oo mai ai faamasinoga a le Atua i luga o lo tatou laueleele, e faatoilalo ma faaumatia atoa ai i tatou.

 10 O lea na sasaa atu ai o matou agaga i le Atua i le tatalo, ina ia faamalosia e ia i matou ma laveai i matou i fafo mai lima o o tatou fili, ioe, ma tuu mai foi ia i matou le malosi e mafai ai ona matou taofi o tatou aai, ma o tatou laueleele, ma a tatou meatotino, mo le tausiga o o tatou tagata.

 11 Ioe, ma sa oo ina asiasi mai le Alii lo tatou Atua ia i matou ma ni tautinoga o le a ia laveaiina i matou; ioe, sa oo ina ia fetalai mai le filemu i o matou agaga, ma tuu mai ia te i matou le faatuatua tele, ma faatonu i matou ia matou faamoemoe mo le laveaiga mai ia te ia.

 12 Ma sa matou maua le lototetele i la matou autau toaitiiti lea na matou maua mai, ma sa matou tautino ma le mauai e faatoilalo o tatou fili, ma ataofi mau o tatou laueleele, ma a tatou meatotino, ma a tatou ava, ma a tatou fanau, ma le faamoemoe o lo tatou esaolotoga.

 13 Ma sa faapea ona matou o atu faatasi ma lo matou malosi atoa e faasaga ia sa Lamanā, o e sa i le aai o Maneti; ma sa matou faatutu o matou faleie i tafatafa o le vao, lea sa latalata atu i le aai.

 14 Ma sa oo i le aso na sosoo ai, ina ua vaai mai sa Lamanā ua matou i ai i tuaoi i tafatafa o le vao lea sa latalata atu i le aai, sa latou aauina mai i fafo a latou sipai faataamilo ia te i matou ina ia mafai ona latou iloa le aofai ma le malosi o la matou autau.

 15 Ma sa oo ina latou vaai mai ua matou le malolosi, e tusa ma lo matou aofai, ma i le fefefe nei matou vavae ese i latou mai ia latou mea e fesoasoani ia i latou vagana ai ua latou o mai e tau faasaga mai ia te i matou ma fasioti i matou, ma i le manatu foi e faigofie ona latou faaumatia i matou i le toatele o a latou autau, o lea na amata ai ona latou faia o sauniuniga e o mai i fafo e faasaga mai ia i matou i le taua.

 16 Ma ina ua matou vaai atu ua latou faia sauniuniga e o mai i fafo e faasaga mai ia te i matou, faauta, sa ou faatonu atu ia Kita, faatasi ma se aofai toaitiiti o tagata, e alu o ia e lafi i le vao, ma e tatau foi ia Teominea ma se aofai toaitiiti o tagata, ona lalafi foi i latou i le vao.

 17 O lenei o Kita ma ana tagata sa i le itu taumatau, ae o isi sa i le itu tauagavale; ma ina ua faapea ona uma ona latou lalafi, faauta, sa ou nofo pea, faatasi ma e na totoe o lau autau, i le mea lava sa matou muai faatutu ai o matou faleie, e faatalitali ai le taimi e o mai ai sa Lamanā i fafo e tau.

 18 Ma sa oo ina o mai i fafo sa Lamanā ma la latou autau toatele e faasaga mai ia te i matou. Ma ina ua latou o mai ma toeitiiti pauu ifo ma le pelu i o matou luga, sa ou faatonu atu, e tatau i au tagata, i latou ia o e na faatasi ma au, ona solomuli atu i le vao.

 19 Ma sa oo ina tuliloa mai i matou e sa Lamanā ma le televavave tele, ona sa latou naunau lava ia latou maua mai i matou, ina ia mafai ona latou fasioti i matou; o lea na latou mulimuli mai ai ia i matou i le vao; ma sa matou ui atu i le va o Kita ma Teominea, i se ala sa le iloa ai i latou e sa Lamanā.

 20 Ma sa oo ina ua tea atu sa Lamanā, pe ina ua tea atu le autau, sa tutulai mai Kita ma Teominea mai o laua lafitaga, ma ua sisio ese sipai a sa Lamanā, ina ia latou le toe foi atu i le aai.

 21 Ma sa oo ina ua uma ona latou sisio ese o i latou, sa latou tamomoe atu i le aai ma pauu atu i luga o leoleo o e na tuu e leoleoina le aai, sa oo ina latou faaumatia i latou ma latou ave le aai.

 22 O lenei sa faia lenei mea, ona sa tuu e sa Lamanā la latou autau atoa, vagana ai nao ni leoleo toaitiiti, ia taitai ese atu i le vao.

 23 Ma sa oo ina maua e Kita ma Teominea i lenei ala o latou olo mau. Ma sa oo ina alu lo matou ala, ina ua mavae la matou malaga mamao i le vao, agai i le laueleele o Saraʼemila.

 24 Ma ina ua vaai mai sa Lamanā ua latou savavali agai atu i le laueleele o Saraʼemila, sa latou matatau tele, nei i ai se fuafuaga ua tatao e taitai atu ai i latou i le faafanoga; o lea na amata ai ona latou toe solomuli i le vao, ioe, i tua i le auala lava lea na latou o mai ai.

 25 Ma faauta, sa po, ma sa latou faatutu ai o latou faleie, ona sa manatu kapeteni sili o sa Lamanā ua vaivai sa Nifaē ona o la latou savaliga; ma i le manatu ua latou tuliloaina la latou autau atoa, o lea sa latou le manatu ai e uiga i le aai o Maneti.

 26 O lenei sa oo ina ua po, sa ou faatonu atu ia aua nei momoe au tagata, ae e tatau ona latou savavali atu i se tasi auala agai i le laueleele o Maneti.

 27 Ma ona o la matou savaliga lenei i le po, faauta, o le aso na sosoo ai, na matou i ai i tala atu o sa Lamanā, sa oo ina matou taunuu i le aai o Maneti i luma atu o i latou.

 28 Ma sa faapea ona oo ina matou maua o le aai o Maneti, e ala i lenei togafiti, e aunoa ma le faamasaaina o le toto.

 29 Ma sa oo ina ua taunuu latalata mai autau a sa Lamanā i le aai, ma vaai mai ua matou saunia e faafetaiai i latou, sa latou ofo tele ma taia i le matau tele, sa oo ina latou sosola i le vao.

 30 Ioe, ma sa oo ina sosola ese i fafo autau a sa Lamanā mai lenei vaega uma o le laueleele. Ae faauta, sa latou ave faatasi ma i latou o fafine ma tamaiti e toatele, i fafo o le laueleele.

 31 Ma o aaai ia na ave e sa Lamanā, o ia aai uma ua matou mauaina i le taimi nei; ma o o tatou tamā, ma o tatou fafine, ma a tatou tamaiti ua toe foi atu i o latou fale, i latou uma lava ia vagana ai i latou o e ua ave faapagota ma aveese atu e sa Lamanā.

 32 Ae faauta, ua toaitiiti a matou autau e taofia le tele naua o aai ma le tele o mea ua maua.

 33 Peitai faauta, matou te faalagolago i lo tatou Atua o le na ia foai mai ia te i tatou le manumalo i luga o ia laueleele, ua oo ina tatou maua ai ia aai ma ia laueleele, ia sa a tatou lava.

 34 O lenei matou te le iloa le pogai ua le tuuina mai ai e le malo se faamalosiga atili ia te i matou; pe ua iloa foi e tagata ia o e na o mai ia te i matou, le pogai ua matou le maua ai se faamalosiga atili.

 35 Faauta, ua matou le iloa ae pe ua outou le manuia, ma ua e aveese atu ai autau i lena vaega o le laueleele; afai o lea, matou te le fia muimui.

 36 Ae afai e le o lea, faauta, matou te popole ua i ai se afevaevaega i le malo, ua latou le auina mai ai ni tagata faaopoopo e fesoasoani ia te i matou; ona ua matou iloa ua sili atu lo latou toatele nai lo le aofai na latou auina mai.

 37 Ae, faauta, ua le afaina—matou te faalagolago o le a alaveaiina i matou e le Atua, e ui i le vaivai o a matou autau, ioe, ma laveai i matou i fafo mai lima o o tatou fili.

 38 Faauta, o le tausaga lea e lua sefulu ma le iva, i le taufaaiuiuga, ma ua matou mauaina o tatou laueleele; ma ua sosola sa Lamanā i le laueleele o Nifae.

 39 Ma o atalii na o le nuu o Amona, o e sa ou tautala maualuga atu ai, o loo faatasi ma au i le aai o Maneti; ma ua lagolagoina i latou e le Alii, ioe, ma taofi i latou mai le pauu i le pelu, ua oo lava ina leai se tagata e atoatasi ua fasiotia.

 40 Ae faauta, sa oo ia i latou manua e tele; e ui i lea ua latou tutu mausali i le asaolotoga lena na faasaoloto ai i latou e le Atua; ma ua latou tausisisi ia manatua le Alii lo latou Atua mai lea aso i lea aso; ioe, ua latou tausisisi e tausi i ana tulafono, ma ana faamasinoga, ma ana poloaiga e le aunoa; ma ua malolosi o latou faatuatua i valoaga e uiga i mea o le a oo mai.

 41 Ma o lenei, lou uso pele e, Moronae, tau ina ia alofa le Alii lo tatou Atua, o le ua ia togiolaina i tatou ma faasaolotoina i tatou, ia tausia pea oe i ona luma e le aunoa; ioe, ma talosia ia faapitoa e ia lenei nuu, seia oo lava ina mafai ona outou maua le manuia i le mauaina o mea uma na ave e sa Lamanā mai ia te i tatou, ia sa mo lo tatou tausiga. Ma o lenei, faauta, ou te faaiu lau tusi. O au o Helamana, le atalii o Alema.