1 Ma faauta, o lenei sa oo ina o lo matou faamoemoe na sosoo ai o le mauaina lea o le aai o Maneti; ae faauta, sa leai se ala sa mafai ai ona matou taitai ese o i latou mai le aai ia matou autau toaitiiti. Aua faauta, sa latou manatua mea ia na matou faia e oo mai i le taimi nei; o lea na le mafai ai ona matou ^ataitaiese ai i latou mai o latou olo malolosi.

2 Ma sa silisili atu lo latou toatele nai lo la matou autau, sa matou le fia o atu ai ma osofai i latou i o latou olo malolosi.

3 Ioe, ma sa oo ina tatau ia te i matou ona faaaoga o matou tagata e taofi ai vaega na o le laueleele ia na matou toe maua mai mo i matou; o lea sa oo ai ina tatau ia te i matou ona faatalitali, ina ia mafai ona matou maua o se malosi atili mai i le laueleele o Sara’emila ma se oloa fou o mea manaomia.

4 Ma sa oo ina faapea ona ou auina atu o se avefeau i le kovana o lo tatou laueleele, e faailoa atu ia te ia e uiga i mea ua tutupu i o tatou tagata. Ma sa oo ina matou faatalitali ia maua mai ni meaai ma se malosiaga mai le laueleele o Sara’emila.

5 Ae faauta, sa laitiiti se aoga na matou maua mai i lenei mea; ona sa maua foi e sa Lamanā se malosi tele mai lea aso i lea aso, ma le tele foi o meaai; ma sa faapea o matou tulaga i lea vaitaimi.

6 Ma sa o mai sa Lamanā e faasaga mai ia te i matou i lea taimi i lea taimi, ua tautino e faaumatia i matou i togafiti; ae ui i lea sa le mafai ona matou o atu e tau ma i latou, ona o o latou malutaga ma o latou olo malolosi.

7 Ma sa oo ina matou faatalitali i nei tulaga faigata mo le va o masina e tele, seia oo lava ina tauau a matou fano ai i le leai o se meaai.

8 Peitai sa oo ina matou maua ni meaai, ia sa momoli puipuia mai ia i matou e se autau o tane e lua afe e fesoasoani ia te i matou; ma ona pau lea o le fesoasoani na matou maua mai, e puipui ai i matou lava ma lo tatou atunuu mai le pa’u’ū atu i lima o o tatou fili, ioe, e faasagatau atu i se fili sa le mafaitaulia le toatele.

9 Ma o lenei o le pogai o o matou maasiasi nei, po o le pogai na latou le auina mai ai se malosiaga atili ia te i matou, ua matou le iloa; o lea na matou faanoanoa ai ma faatumulia foi i le fefefe, ina nei i ai se ala e oo mai ai faamasinoga a le Atua i luga o lo tatou laueleele, e faatoilalo ma faaumatia atoa ai i tatou.

10 O lea na tuuina atu ai o matou agaga i le Atua i le tatalo, ina ia faamalosia e ia i matou ma laveai i matou mai lima o o tatou fili, ioe, ma tuu mai foi ia i matou le malosi e mafai ai ona matou taofi i o tatou aai, ma o tatou laueleele, ma a tatou meatotino, mo le tausiga o o tatou tagata.

11 Ioe, ma sa oo ina asiasi mai le Alii lo tatou Atua ia i matou ma ni folafolaga o le a ia laveaiina i matou; ioe, sa oo ina ia fetalai mai le filemu i o matou agaga, ma tuu mai ia te i matou le faatuatua tele, ma faatonu i matou ia matou faamoemoe mo lo matou laveaiina mai ia te ia.

12 Ma sa matou maua le lototetele i la matou autau toaitiiti lea na matou maua mai, ma sa matou tautino ma le mauai e faatoilalo o tatou fili, ma ^ataofi mau o tatou laueleele, ma a tatou meatotino, ma a tatou avā, ma a tatou fanau, ma le faamoemoe o lo tatou ^esaolotoga.

13 Ma sa faapea ona matou o atu faatasi ma lo matou malosi atoa e faasaga ia sa Lamanā, o e sa i le aai o Maneti; ma sa matou faatutū o matou faleie i tafatafa o le vao, lea sa latalata atu i le aai.

14 Ma sa oo i le aso na sosoo ai, ina ua vaai mai sa Lamanā ua matou i ai i tuaoi i tafatafa o le vao lea sa latalata atu i le aai, sa latou auina mai a latou sipai e faataamilo ia te i matou ina ia mafai ona latou iloa le aofai ma le malosi o la matou autau.

15 Ma sa oo ina latou vaai mai ua matou le malolosi, e tusa ma lo matou aofai, ma i le fefefe nei matou vavae ese i latou mai ia latou mea e lagolago ia i latou vagana ai ua latou o mai e tau faasaga mai ia te i matou ma fasioti i matou, ma i le manatu foi e faigofie ona latou faaumatia i matou i le toatele o a latou autau, o lea na amata ai ona latou faia o sauniuniga e o mai e faasaga mai ia i matou i le taua.

16 Ma ina ua matou vaai atu ua latou faia sauniuniga e o mai e faasagatau mai ia te i matou, faauta, sa ou faatonu atu ia Kita, faatasi ma se vaega toaitiiti o tagata, e alu o ia e lafi i le vao, ma e tatau foi ia Teominea ma se vaega toaitiiti o tagata, ona lalafi foi i latou i le vao.

17 O lenei o Kita ma ona tagata sa i le itu taumatau, ae o isi sa i le itu tauagavale; ma ina ua faapea ona uma ona latou lalafi, faauta, sa ou nofo pea, faatasi ma e na totoe o la’u autau, i le mea lava sa matou muai faatutū ai o matou faleie, e faatalitali ai le taimi e o mai ai sa Lamanā i fafo e tau.

18 Ma sa oo ina o mai sa Lamanā ma la latou autau toatele e faasagatau mai ia te i matou. Ma ina ua latou o mai ma toetoe ina a osofaia i matou i le pelu, sa ou faatonu atu i o’u tagata, i latou ia o e na faatasi ma a’u, e tatau ona solomuli agai atu i le vao.

19 Ma sa oo ina tuliloa mai i matou e sa Lamanā ma le televavave tele, ona sa latou naunau lava ia latou maua mai i matou, ina ia mafai ona latou fasioti i matou; o lea na latou mulimuli mai ai ia i matou i le vao; ma sa matou ui atu i le va o Kita ma Teominea, i se ala sa le iloa ai i latou e sa Lamanā.

20 Ma sa oo ina ua te’a atu sa Lamanā, pe ina ua te’a atu le autau, sa tutulai mai Kita ma Teominea mai o la’ua lafitaga, ma ua sisi’o ese sipai a sa Lamanā, ina ia latou le toe foi atu i le aai.

21 Ma sa oo ina ua uma ona latou sisi’o ese o i latou, sa latou tamomoe atu i le aai ma osofaia leoleo o e na tuu e leoleo le aai, sa oo ina latou faaumatia i latou ma fai mo latou le aai.

22 O lenei sa faia lenei mea, ona sa tuu e sa Lamanā la latou autau atoa, vagana ai na’o ni leoleo toaitiiti, ia taitai ese atu i le vao.

23 Ma sa oo ina maua e Kita ma Teominea i lenei ala o latou olo mau. Ma sa oo ina sa matou o i lo matou ala, ina ua mavae la matou malaga mamao i le vao agai atu i le laueleele o Sara’emila.

24 Ma ina ua vaai mai sa Lamanā ua latou savavali agai atu i le laueleele o Sara’emila, sa latou matata’u tele, nei i ai se fuafuaga ua faataatia e ta’ita’i atu ai i latou i le faafanoga; o lea na amata ai ona latou toe solomuli i le vao, ioe, i tua i le auala lava lea na latou o mai ai.

25 Ma faauta, sa po, ma sa latou faatutū ai o latou faleie, ona sa manatu kapeteni sili o sa Lamanā ua vaivai sa Nifaē ona o la latou savaliga; ma i le manatu ua latou tuliloaina la latou autau atoa, o lea sa latou le manatu ai e uiga i le aai o Maneti.

26 O lenei sa oo ina ua po, sa ou faatonu atu ia aua nei momoe o’u tagata, ae e tatau ona latou savavali atu i se tasi auala agai i le laueleele o Maneti.

27 Ma ona o la matou savaliga lenei i le po, faauta, o le aso na sosoo ai, na matou i ai i tala atu o sa Lamanā, sa oo ina matou taunuu i le aai o Maneti e muamua atu ia i latou.

28 Ma sa faapea ona oo ina matou maua o le aai o Maneti, e ala i lenei togafiti, e aunoa ma le faamasaaina o le toto.

29 Ma sa oo ina ua taunuu latalata mai autau a sa Lamanā i le aai, ma vaai mai ua matou saunia e faafetaia’i i latou, sa latou ofo tele ma taia i le mata’u tele, sa fai ma mea na latou sosola ese atu ai i le vao.

30 Ioe, ma sa oo ina sosola ese atu autau a sa Lamanā mai lenei vaega uma o le laueleele. Ae faauta, sa latou ave faatasi ma i latou o fafine ma tamaiti e toatele, mai le laueleele.

31 Ma o ^ana aai ia na ave e sa Lamanā, o ia aai uma ua matou mauaina i le taimi nei; ma o o tatou tamā, ma o tatou fafine, ma a tatou tamaiti ua toe foi atu i o latou fale, i latou uma lava ia vagana ai i latou o e ua ave faapagota ma aveese atu e sa Lamanā.

32 Ae faauta, ua toaitiiti a matou autau e tausia le tele naua o aai ma le tele o mea ua maua.

33 Peitai faauta, matou te faalagolago i lo tatou Atua o le na ia foai mai ia te i tatou le manumalo i luga o ia laueleele, ua oo ina tatou maua ai ia aai ma ia laueleele, ia na fai mo tatou lava.

34 O lenei matou te le iloa le pogai ua le tuuina mai ai e le malo se malosiaga atili ia te i matou; pe ua iloa foi e tagata ia o e na o mai ia te i matou, le pogai ua matou le maua ai se malosiaga sili atu.

35 Faauta, ua matou le iloa ae pe ua outou le manuia ai, ma ua e aveese atu ai autau i lena vaega o le laueleele; afai o lea, matou te le fia muimui.

36 Ae afai e le o lea, faauta, matou te popole ua i ai se ^afevaevaeaiga i le malo, ua latou le auina mai ai ni tagata faaopoopo e fesoasoani ia te i matou; ona ua matou iloa ua sili atu lo latou toatele nai lo le aofai na latou auina mai.

37 Ae, faauta, ua le afaina—matou te faalagolago o le a ^alaveaiina i matou e le Atua, e ui i le vaivai o a matou autau, ioe, ma laveai i matou mai lima o o tatou fili.

38 Faauta, o le tausaga lea e luasefulu ma le iva, i le taufaaiuiuga, ma ua matou mauaina o tatou laueleele; ma ua sosola sa Lamanā i le laueleele o Nifae.

39 Ma o na atalii o le nuu o Amona, o e sa ou tautala faaviivii atu ai, o loo faatasi ma a’u i le aai o Maneti; ma ua lagolagoina i latou e le Alii, ioe, ma tausia i latou mai le faaumatia e le pelu, ua oo lava ina e le’i i ai se tagata e ^atoatasi na fasiotia.

40 Ae faauta, sa maua i latou i manua e tele; ae ui i lea ua latou tutulai mausali i le ^asaolotoga lena na faasaoloto ai i latou e le Atua; ma ua latou tausisi ia manatua le Alii lo latou Atua mai lea aso i lea aso; ioe, ua latou tausisi e tausi i ana tulafono, ma ana faamasinoga, ma ana poloaiga e le aunoa; ma ua malolosi o latou faatuatua i valoaga e uiga i mea o le a oo mai.

41 Ma o lenei, lou uso pele e, Moronae, tau ina ia alofa le Alii lo tatou Atua, o le ua ia togiolaina i tatou ma faasaolotoina i tatou, ia tausia pea oe i ona luma e le aunoa; ioe, ma talosia ia faapitoa e ia lenei nuu, seia oo lava ina mafai ona outou maua le manuia i le mauaina o mea uma na ave e sa Lamanā mai ia te i tatou, e mo le tausiga o i tatou. Ma o lenei, faauta, ou te faaiu la’u tusi. O a’u o Helamana, le atalii o Alema.