1 Ma o lenei sa oo ina ua uma ona tautala atu o Alema i tagata o le ekalesia, lea sa faatuina i le aai o Sara’emila, sa ia ^afaauuina faitaulaga ma ^etoeaina, i le faaee atu o ona ⁱlima, e tusa ma le faatulagaga a le Atua, e pulefaamalumalu ma ^oleoleo i luga o le ekalesia.

2 Ma sa oo ina o soo se tasi sa lē auai i le ekalesia o e na salamo i a latou agasala sa ^apapatisoina i le salamo, ma taliaina i le ekalesia.

3 Ma sa oo foi ina o soo se tasi sa auai i le ekalesia o e sa lē ^asalamo i a latou amioleaga ma sa lē faamaualalalo i latou lava i luma o le Atua—o lona uiga o i latou ia o e sa faafefeteina i le ^efaamaualuluga o o latou loto—o i latou lava ia sa lē taliaina, ma ⁱsoloi esea o latou igoa, ina ia lē faitauina o latou igoa i totonu o e ua amiotonu.

4 Ma sa faapea ona amata ona latou faatuina o le faatulagaga o le ekalesia i le aai o Sara’emila.

5 O lenei ou te manao ina ia outou malamalama sa tuu saoloto mai le afioga a le Atua i tagata uma, sa leai se tasi sa faafitia mai i le aiā e potopoto faatasi ai i latou lava e faalogologo i le afioga a le Atua.

6 Ae ui i lea sa poloaiina fanau a le Atua e tatau ona latou faapotopoto faatasi soo i latou lava, ma aufaatasi i le ^aanapogi ma le tatalo malosi mo le manuia o agaga o i latou o e sa latou lē iloaina le Atua.

7 Ma o lenei sa oo ina ua uma ona faia e Alema nei faatonuga sa alu ese atu o ia mai ia te i latou, ioe, mai le ekalesia lea sa i le aai o Sara’emila, ma alu a’e i luga i le itu i sasa’e o le vaitafe o Saitonu, i le ^avanu o Kitiona, lea sa faatuina ai iina se aai, lea sa ta’ua o le aai o Kitiona, lea sa i le vanu sa ta’ua o Kitiona, lea sa faaigoa i le tagata o lē na ^efasioti e le lima o Ne’oa i le pelu.

8 Ma sa alu atu Alema ma amata ona alaga atu o le afioga a le Atua i le ekalesia lea sa faatuina i le vanu o Kitiona, e tusa ma le faaaliga o le moni o le afioga lea na tautalagia e ona tamā, ma e tusa ma le agaga o valoaga sa ia te ia, e tusa ma le ^amolimau e uiga ia Iesu Keriso, le Alo o le Atua, o lē o le a afio mai e togiola ona tagata mai ia latou agasala, ma e tusa ma le faatulagaga paia lea na valaaulia i ai o ia. Ma ua faapea ona tusia. Amene.