წმინდა წერილი
ალმა 7


ალმას სიტყვები, რომლებიც მან ხალხისთვის წარმოთქვა გიდეონში, მისი საკუთარი ჩანაწერების მიხედვით.

მოიცავს მე-7 თავს.

თავი 7

ქრისტე იშვება მარიამის მიერ. ის გაწყვეტს სიკვდილის ბორკილებს და თავის თავზე აიღებს საკუთარი ხალხის ცოდვებს. ისინი, ვინც ინანიებენ, ინათლებიან და მცნებებს იცავენ, მიიღებენ მარადიულ სიცოცხლეს. უწმიდური ვერ დაიმკვიდრებს ღვთის სასუფეველს. საჭიროა თავმდაბლობა, რწმენა, იმედი და გულმოწყალება. დაახლოებით 83 წ. ჩვენს წელთაღრიცხვამდე.

1 აჰა, ჩემო საყვარელო ძმებო, ნება მიბოძეს რა თქვენთან მოვსულიყავი, ვეცდები მოგმართოთ ჩემს ენაზე; დიახ, ჩემი საკუთარი პირით, ვინაიდან ეს არის პირველად, როდესაც თქვენ მოგმართავთ ჩემს ბაგეთაგან სიტყვებით, რადგან მთლიანად შეზღუდული ვიყავი მოსამართლის სავარძლის გამო, მქონდა რა იმდენი საქმე, რომ ვერ შევძელი თქვენთან მოსვლა.

2 ახლაც კი, ამ დროს, ვერ მოვიდოდი თქვენთან, მოსამართლის სავარძელი სხვისთვის რომ არ გადაეცათ, რათა ჩემ მაგივრად ემართა; და უფალმა დიდი წყალობით მიბოძა ნება, თქვენთან მოვსულიყავი.

3 და აჰა, მე მოვედი, მაქვს რა დიდი იმედები და ძლიერი სურვილი, დავინახო, რომ თავი დაიმდაბლეთ ღმერთის წინაშე და გააგრძელეთ ვედრება მისი მადლის მისაღებად, დავინახო, რომ უდანაშაულონი ხართ მის წინაშე, დავინახო, რომ არ ხართ ისეთ საშინელ მდგომარეობაში, როგორც იყვნენ ჩვენი ძმები ზარაჰემლაში.

4 მაგრამ კურთხეული იყოს ღმერთის სახელი, რადგან მაუწყა, დიახ, ძალზედ დიდი სიხარული მიბოძა იმის ცოდნით, რომ ისინი კვლავ განმტკიცდნენ მისი სამართლიანობის გზაზე.

5 და მე ვიმედოვნებ, ღმერთის სულის თანხმობით, რომელიც ჩემშია, რომ თქვენ გამოც გავიხარებ; მიუხედავად ამისა, მე არ მსურს, რომ თქვენ გამო სიხარული მოვიდეს ჩემთან იმდენი გაჭირვებისა და დარდის გზით, რაც მე გადავიტანე ჩემი ძმების გამო ზარაჰემლასთან, რადგან, აჰა, მეღირსა სიხარული მათ გამო მრავალი გაჭირვებისა და დარდის გადატანის შედეგად.

6 მაგრამ, აჰა, მე ვიმედოვნებ, რომ თქვენ არ ხართ ისეთ დიდ ურწმუნო მდგომარეობაში, როგორც თქვენი ძმები იყვნენ; ვიმედოვნებ, რომ არ აღზევდით თქვენი გულის ამპარტავნობით; დიახ, ვიმედოვნებ, რომ არ მიუძღვენით გული სიმდიდრესა და ამქვეყნიურ ამაოებას; დიახ, ვიმედოვნებ, რომ კერპებს არ ეთაყვანებით, არამედ ეთაყვანებით ჭეშმარიტ და ცოცხალ ღმერთს და თქვენ, მარადიული რწმენით, მოელით თქვენი ცოდვების მიტევებას, რომელიც მოვა.

7 რადგან, აჰა, მე გეუბნებით, მოსასვლელია მრავალი რამ; და აჰა, არის ერთი რამ, რაც ყველაფერ დანარჩენზე უფრო მნიშვნელოვანია, რადგან, აჰა, არ არის შორს ის დრო, სადაც გამომსყიდველი ცხოვრობს და მოდის თავის ხალხთან.

8 აჰა, მე არ ვამბობ, რომ ის მოვა ჩვენ შორის იმ დროს, როდესაც იცხოვრებს თავის მოკვდავ ტაძარში; რადგან, აჰა, სულმა არ მითხრა, რომ ასე იქნება. ახლა, ამის შესახებ მე არ ვიცი; მაგრამ ვიცი, რომ უფალ ღმერთს აქვს იმის ძალა, გააკეთოს ყველაფერი, რაც შეესაბამება მის სიტყვას.

9 მაგრამ, აჰა, სულმა მითხრა ამდენი, სიტყვებით: შეჰღაღადე ამ ხალხს: მოინანიეთ თქვენ და განუმზადეთ გზა უფალს და იარეთ მისი ბილიკებით, რომლებიც სწორია; რადგან, აჰა, მოახლოვდა ცათა სასუფეველი და ძე ღვთისა მოდის დედამიწის ზედაპირზე.

10 და აჰა, ის იშვება მარიამისგან, იერუსალიმთან, რომელიც ჩვენი წინაპრების მიწაა, მარიამი, არის რა ქალწული, ძვირფასი და რჩეული ჭურჭელი, რომელიც იქნება დაჩრდილული და ნაყოფი ჩაისახება სულიწმინდის ძალით და იშვება ძე, დიახ, ძე ღვთისა. ღმერთის ძე.

11 და ის ივლის, აიტანს რა ყველანაირ ტკივილსა და ტანჯვას და ცდუნებას; და ეს ყველაფერი იმისათვის, რომ აღსრულდეს სიტყვა, რომელიც ამბობს: ის აიღებს თავის თავზე საკუთარი ხალხის ტკივილსა და ავადმყოფობას.

12 და ის თავის თავზე აიღებს სიკვდილს, რათა გაწყვიტოს სიკვდილის ბორკილები, რომლებითაც შებოჭილია მისი ხალხი; და ის აიღებს თავის თავზე მათ უძლურებას, რათა მისი წიაღი წყალობით აღივსოს ხორციელისამებრ, რათა მან შეიცნოს ხორციელის შესაბამისად, თუ როგორ დაეხმაროს საკუთარ ხალხს მისივე უძლურების შესაბამისად.

13 ახლა, სულმა იცის ყველაფერი; მიუხედავად ამისა, ძე ღვთისა იტანჯება ხორციელისამებრ, რათა საკუთარ თავზე აიღოს თავისი ხალხის ცოდვები, რათა წაშალოს მათი შეცოდებანი თავისი გამომხსნელი ძალის შესაბამისად; და ახლა, ეს არის დამოწმება, რომელიც ჩემშია.

14 ახლა, მე თქვენ გეუბნებით, რომ უნდა მოინანიოთ და იშვათ ხელახლა; რადგან სული ამბობს: თუ არ იქნებით ხელახლა შობილნი, ვერ მიიღებთ მემკვიდრეობით ცათა სასუფეველს; ამიტომ, მოდით და მოინათლეთ მოსანანიებლად, რათა ჩამოგერეცხოთ ცოდვები, რათა იქონიოთ რწმენა ღვთის კრავში, რომელიც იღებს ცოდვებს ამა ქვეყნისა, რომელსაც აქვს ხსნისა და ყოველგვარი უკეთურობისაგან განწმენდის ძალა.

15 დიახ, თქვენ გეუბნებით, მოდით და ნუ გეშინიათ და უარყვეთ ყოველი ცოდვა, რომელიც ადვილად გაბრკოლებთ, რომელიც გბოჭავთ გასანადგურებლად, დიახ, მოდით და იარეთ წინ და დაანახეთ თქვენს ღმერთს, რომ მზად ხართ თქვენი ცოდვების მოსანანიებლად და მასთან აღთქმის დასადებად, რომ დაიცავთ მის მცნებებს და დაუმოწმებთ ამ დღეს ნათლობის წყალში ჩასვლით.

16 და ყველას, ვინც ასე იქცევა და იცავს ღვთის მცნებებს, ამიერიდან ემახსოვრება, რას ვეუბნები მას, დიახ, მას ემახსოვრება ის, რაც ვუთხარი, რომ ექნება მარადიული სიცოცხლე, სულიწმინდის დამოწმებისამებრ, რომელიც ჩემში მოწმობს.

17 და ახლა, ჩემო საყვარელო ძმებო, გწამთ ამ ყველაფრის? აჰა, მე გეუბნებით, დიახ, ვიცი, რომ გწამთ ამისი; და გზა, რომლითაც, ვიცი რომ გწამთ ამისა, არის სულის გამოცხადება, რომელიც არის ჩემში. და ახლა, ვინაიდან თქვენი რწმენა ამის შესახებ არის ძლიერი, დიახ, იმის შესახებ, რაც ვილაპარაკე, დიდია ჩემი სიხარული.

18 რადგან, როგორც თავიდანვე გეუბნებოდით, მქონდა დიდი სურვილი, არ ყოფილიყავით თქვენი ძმების მდგომარეობაში; და ამგვარად ვიხილე, რომ ჩემი სურვილი ახდა.

19 რადგან ვხვდები, რომ ხართ სამართლიანობის გზაზე; მე მივხვდი, რომ ხართ გზაზე, რომელიც მიდის ღმერთის სასუფევლისკენ; დიახ, მე მივხვდი, რომ ასწორებთ მის ბილიკებს.

20 ვხვდები, რომ თქვენ მისი სიტყვის დამოწმებით გაგენდოთ ის, რომ მას არ შეუძლია მრუდე ბილიკებით სიარული; და არც გადათქვამს თავის ნათქვამს; არც მარჯვნიდან მარცხნივ ცვლილების ჩრდილი არ ახლავს მას ანუ იმისგან, რაც ჭეშმარიტია, იმისკენ, რაც არის ტყუილი; ამიტომ, გეზი მისი არის ერთი მარადიული წრე.

21 და ის არ იმყოფება ბილწ ტაძრებში; არც სიბინძურე ან რაიმე სისაძაგლე იქნება ღვთის სასუფეველში მიღებული; ამიტომ, მე გეუბნებით, რომ მოვა დრო, დიახ, და ეს იქნება უკანასკნელ დღეს, რომ ის, რომელიც არის ბინძური, დარჩება თავის სიბინძურეში.

22 და ახლა, ჩემო საყვარელო ძმებო, მე თქვენ გითხარით ეს ყველაფერი, რათა გაგაღვიძოთ, რათა იგრძნოთ ღმერთის წინაშე თქვენი მოვალეობა, რომ თქვენ უდანაშაულოდ იაროთ მის წინაშე, რათა იაროთ ღმერთის წმინდა წესის შესაბამისად, რომლითაც თქვენ იყავით მიღებულნი.

23 და ახლა, მე მინდა, რომ იყოთ თავმდაბალნი და იყოთ მორჩილნი და კეთილნი; გულისხმიერნი თხოვნისადმი; მოთმინებითა და სულგრძელობით აღსავსენი; იყოთ ზომიერნი ყველაფერში, ყოველთვის იყოთ ბეჯითნი ღმერთის მცნებების დაცვაში; სთხოვეთ ყველაფერი, რაც დაგჭირდებათ, როგორც სულიერი, ისე მიწიერი; ყოველთვის გადაუხადეთ მადლობა ღმერთს ყველაფრისთვის, რასაც იღებთ.

24 და თვალ-ყური ადევნეთ, რომ გქონდეთ რწმენა, იმედი და გულმოწყალება და მაშინ თქვენ ყოველთვის აღსავსენი იქნებით კეთილი საქმეებით.

25 დაე, უფალმა გაკურთხოთ და დაიცვას თქვენი სამოსელი უმწიკვლოდ, რომ საბოლოოდ იქნეთ მიყვანილნი, რათა დასხდეთ აბრაამთან, ისააკთან და იაკობთან და წმინდა წინასწარმეტყველებთან, რომლებიც იყვნენ ქვეყნის დასაბამიდანვე, და რომ გქონდეთ სამოსელი უმწიკვლო, დიახ, უმწიკვლო, როგორც მათი სამოსელი, ცათა სასუფეველში რომ იმყოფებიან, რათა აღარ გამოხვიდეთ გარეთ.

26 და ახლა, ჩემო საყვარელო ძმებო, მე გითხარით ეს სიტყვები სულის შესაბამისად, რომელიც მოწმობს ჩემში; და სული ჩემი ძალზედ ხარობს განსაკუთრებული სიბეჯითისთვის და ყურადღებისთვის, რომელიც თქვენ მიუძღვენით ჩემს სიტყვებს.

27 და ახლა, დაე, იყოს ღვთის მშვიდობა თქვენზედ და თქვენს სახლებზე და მიწებზე და თქვენს წვრილფეხა და მსხვილფეხა საქონელზე და ყველაფერზე, რაც გაქვთ, თქვენს ქალებსა და შვილებზე, თქვენი რწმენისა და კეთილი საქმეების შესაბამისად, აწ და მარადის. და ეს ასე ვთქვი. ამინ.