1 Pea ko ʻeni naʻe hoko ʻo pehē naʻe foki mai ʻa ʻAlamā mei he ^afonua ko Kitioné, hili ʻene akoʻi ki he kakai ʻo Kitioné ha ngaahi meʻa lahi ʻoku ʻikai faʻa lava ʻo tohi, hili ʻene fokotuʻu ʻa e lakanga ʻo e siasí, ʻo hangē ko ia kuó ne fai ʻi he fonua ko Seilahemalá, ʻio, naʻá ne foki mai ki hono fale ʻoʻona ʻi Seilahemalá ke mālōlō mei he ngaahi ngāue kuó ne faí.

2 Pea naʻe ʻosi pehē hono hiva ʻo e taʻu ʻo e pule ʻa e kau fakamāú ki he kakai ʻo Nīfaí.

3 Pea naʻe hoko ʻo pehē ʻi he kamata hono hongofulu ʻo e taʻu ʻo e pule ʻa e kau fakamāú ki he kakai ʻo Nīfaí, naʻe ʻalu atu mei ai ʻa ʻAlamā ʻo ne fai ʻene fonongá ki he fonua ko Mīlekí ʻi he fakahihifo ʻo e ^avaitafe ko Saitoné, ʻi he potu hihifó ʻo ofi ki he ngaahi ngataʻanga ʻo e feituʻu maomaonganoá.

4 Peá ne kamata ke ako ki he kakai ʻi he fonua ko Mīlekí ʻo fakatatau ki he ^alakanga toputapu ʻo e ʻOtuá, ʻa ia kuo uiuiʻi ai iá; ʻo ne kamata ke ako ki he kakaí ʻi hono kotoa ʻo e fonuá ko Mīlekí.

5 Pea naʻe hoko ʻo pehē naʻe haʻu kiate ia ʻa e kakai ʻi he ngaahi ngataʻanga fonua kotoa pē ʻo e fonuá ʻa ia naʻe ʻi he veʻe feituʻu maomaonganoá. Pea naʻa nau papitaiso ʻi he potu kotoa pē ʻo e fonuá;

6 Ko ia, ʻi heʻene fakaʻosi ʻene ngāue ʻi Mīlekí, naʻá ne ʻalu leva mei ai, ʻo fononga ʻi ha ʻaho ʻe tolu ʻi he tokelau ʻo e fonua ko Mīlekí; pea naʻá ne aʻu atu ki ha kolo naʻe ui ko ʻAmonaihā.

7 Ko ʻeni ko e anga foki ʻo e kakai ʻo Nīfaí ke ui honau ngaahi fonuá, mo honau ngaahi kolo lalahí, mo honau ngaahi kolo īkí, ʻio, naʻa mo honau fanga kiʻi kolo īkí, ʻi he hingoa ʻo ia ʻa ia naʻe fuofua maʻu iá; pea naʻe pehē mo e fonua ko ʻAmonaihaá.

8 Pea naʻe hoko ʻo pehē ʻi he aʻu atu ʻa ʻAlamā ki he kolo ko ʻAmonaihaá, naʻá ne kamata ke malanga ʻaki ʻa e folofola ʻa e ʻOtuá kiate kinautolu.

9 Ko ʻeni kuo ^amaʻu ʻe Sētane ha mālohi lahi ʻi he loto ʻo e kakai ʻo e kolo ko ʻAmonaihaá; ko ia naʻe ʻikai te nau fie fanongo ki he ngaahi lea ʻa ʻAlamaá.

10 Ka neongo iá naʻe ^angāue lahi ʻa ʻAlamā ʻi he laumālie, ʻo ne ^bfāinga mo e ʻOtuá ʻi he fuʻu lotu ^clahi, ke ne lilingi hifo hono Laumālié ki he kakai naʻe ʻi he koló; pea ke ne tuku foki kiate ia ke ne papitaiso ʻa kinautolu ki he fakatomalá.

11 Ka neongo iá naʻa nau fakafefeka honau lotó, ʻo pehē kiate ia: Vakai, ʻoku mau ʻiloʻi ko ʻAlamā koe; pea ʻoku mau ʻilo ko e taulaʻeiki lahi koe ki he siasi ʻa ia kuó ke fokotuʻu ʻi ha ngaahi feituʻu lahi ʻo e fonuá, ʻo fakatatau ki hoʻomou ngaahi talatukufakaholó; pea ʻoku ʻikai ke mau kau ki ho siasí, pea ʻoku ʻikai te mau tui ki ha ngaahi talatukufakaholo fakasesele pehē.

12 Pea ko ʻeni ʻoku mau ʻilo koeʻuhi ʻoku ʻikai te mau kau ki ho siasí, ʻoku mau ʻiloʻi ʻoku ʻikai te ke maʻu ha mālohi kiate kimautolu; pea kuó ke tuku ʻa e lakanga fakamāú kia ^aNīfaihā; ko ia ʻoku ʻikai ko e fakamaau lahi koe kiate kimautolu.

13 Pea ko ʻeni ʻi he ʻosi hono lea ʻaki ʻeni ʻe he kakaí, ʻo nau fakafetauʻi ʻene ngaahi lea kotoa pē, ʻo manukiʻi ia, mo ʻaʻanu kiate ia, ʻo nau pule ke kapusi ki tuʻa mei honau koló, naʻá ne ʻalu atu leva mei ai, ʻo fai ʻene fonongá ki he kolo naʻe ui ko ʻĒlone.

14 Pea naʻe hoko ʻo pehē ʻi he lolotonga ʻene fononga ki aí, pea mafasia hono lotó ʻi he mamahi, ʻo ne fefaʻuhi mo e ^amamahi mo e feinga lahi ʻo e laumālie, koeʻuhi ko e fai angahala ʻa e kakai naʻe ʻi he kolo ko ʻAmonaihaá, naʻe hoko ʻo pehē lolotonga ʻa e mafasia ʻa ʻAlamā ʻi he loto-mamahí, vakai naʻe hā mai kiate ia ha ^bʻāngelo ʻa e ʻEikí, ʻo pehē ange:

15 ʻOkú ke monūʻia koe, ʻe ʻAlamā; ko ia, hanga hake ho matá pea fiefia, he ʻoku ʻi ai ha ʻuhinga lahi ke ke fiefia; he kuó ke tui faivelenga ʻi hono tauhi ʻo e ngaahi fekau ʻa e ʻOtuá talu mei he taimi naʻá ke maʻu ai ʻa e ʻuluaki folofola meiate iá. Vakai, ko au ia ne u ^aʻomi ia kiate koé.

16 Pea vakai, kuo fekau kiate au ke u tuʻutuʻuni kiate koe ke ke foki ki he kolo ko ʻAmonaihaá, ʻo toe malanga ki he kakai ʻo e koló; ʻio, malanga kiate kinautolu. ʻIo, pehē ange kiate kinautolu, kapau ʻe ʻikai te nau fakatomala ʻe ^afakaʻauha ʻa kinautolu ʻe he ʻEiki ko e ʻOtuá.

17 He vakai, ʻoku nau lolotonga fifili he taimí ni ke nau lava ʻo fakaʻauha ʻa e tauʻatāina ʻa ho kakaí (he ʻoku folofola peheni ʻe he ʻEikí) ʻa ia ʻoku taʻehoa mo e ngaahi laó mo e ngaahi fakamāú pea mo e ngaahi fekau kuó ne fai ki hono kakaí.

18 Pea ko ʻeni naʻe hoko ʻo pehē ʻi he hili ʻa e maʻu ʻe ʻAlamā ʻene pōpoaki mei he ʻāngelo ʻa e ʻEikí naʻá ne foki fakavavevave leva ki he fonua ko ʻAmonaihaá. Pea naʻá ne hū atu ki he koló ʻi ha hala kehe, ʻio, ʻi he hala ʻoku ʻi he potu tonga ʻo e kolo ko ʻAmonaihaá.

19 Pea ʻi heʻene hū atu ki he kolo, naʻá ne fiekaia, ʻo ne pehē atu ki ha tangata: Te ke ʻofa mai muʻa ki ha tamaioʻeiki māʻulalo ʻo e ʻOtuá ha meʻakai ke ne maʻu?

20 Pea naʻe pehē ange ʻa e tangatá kiate ia: Ko ha tangata Nīfai au, pea ʻoku ou ʻiloʻi ko ha palōfita māʻoniʻoni koe ʻa e ʻOtuá, he ko koe ʻa e tangata ʻa ia naʻe pehē mai ʻe ha ^aʻāngelo ʻi ha meʻa-hā-mai: Ke tali ia. Ko ia, ta ō mo au ki hoku falé pea te u foaki kiate koe mei heʻeku meʻakaí; pea ʻoku ou ʻilo te ke hoko ko ha tāpuaki kiate au pea mo hoku falé.

21 Pea naʻe hoko ʻo pehē naʻe tali ia ʻe he tangatá ki hono falé; pea ko e hingoa ʻo e tangatá ko ^aʻAmuleki; peá ne ʻomai ha mā mo ha kakanoʻi manu, ʻo tuku ʻi he ʻao ʻo ʻAlamaá.

22 Pea naʻe hoko ʻo pehē naʻe kai ʻe ʻAlamā ʻa e maá ʻo ne mākona; peá ne ^atāpuakiʻi ʻa ʻAmuleki mo hono falé, ʻo ne fakafetaʻi ki he ʻOtuá.

23 Pea hili ʻene kai ʻo mākoná naʻá ne pehē ange kia ʻAmuleki: ko ʻAlamā au, pea ko e ^ataulaʻeiki lahi au ki he siasi ʻo e ʻOtuá ʻi hono kotoa ʻo e fonuá.

24 Pea vakai, kuo uiuiʻi au ke u malanga ʻaki ʻa e folofola ʻa e ʻOtuá ʻi he lotolotonga ʻo e kakaí ni hono kotoa, ʻo fakatatau ki he laumālie ʻo e fakahaá mo e kikité; pea ne u ʻi he fonuá ni ka naʻe ʻikai te nau fie tali au, ka naʻa nau ^akapusi au ki tuʻa, peá u meimei sītuʻa mei he fonuá ni ʻo taʻengata.

25 Kae vakai, kuo fekau kiate au ke u toe foki mai, ʻo kikite ki he kakaí ni, ʻio, mo fakamoʻoniʻi kiate kinautolu ʻa ʻenau ngaahi angahalá.

26 Pea ko ʻeni, ʻe ʻAmuleki, ko e meʻa ʻi hoʻo fafangaʻi au mo tali au ki ho falé, ʻokú ke monūʻia ai; he ne u fiekaia, he naʻá ku ʻaukai ʻi ha ngaahi ʻaho lahi.

27 Pea naʻe nofo ʻa ʻAlamā ʻi he ngaahi ʻaho lahi mo ʻAmuleki ʻi he teʻeki ai kamata ke ne malanga ki he kakaí.

28 Pea naʻe hoko ʻo pehē naʻe fakaʻau ke fai ʻe he kakaí ha ngaahi angahala mamafa ange.

29 Pea naʻe hoko mai ʻa e folofola kia ʻAlamā, ʻo pehē: ʻAlu; peá ke lea foki ki heʻeku tamaioʻeiki ko ʻAmuleki, ʻalu atu pea kikite ki he kakaí ni, ʻo pehē—Mou ^afakatomala, he ʻoku folofola peheni ʻe he ʻEikí, kapau ʻe ʻikai te mou fakatomala te u ʻaʻahi ki he kakaí ni ʻi heʻeku ʻitá, ʻio, pea ʻe ʻikai te u lolou ʻa ʻeku ʻita kakahá.

30 Pea naʻe ʻalu atu ʻa ʻAlamā, pea mo ʻAmuleki foki, ʻi he lotolotonga ʻo e kakaí, ke fakahā ʻa e ngaahi folofola ʻa e ʻOtuá kiate kinautolu; pea naʻe fakafonu ʻa kinaua ʻaki ʻa e Laumālie Māʻoniʻoní.

31 Pea naʻe foaki kiate kinaua ʻa e ^amālohi, naʻe pehē fau hono lahí naʻe ʻikai lava ai ke fakapōpulaʻi ʻa kinaua ʻi he ngaahi ʻana fakapōpula; pea naʻe ʻikai lava foki ʻe ha tangata ʻo tāmateʻi ʻa kinaua; ka neongo iá naʻe ʻikai te na ngāue ʻaki hona ^bmālohí kae ʻoua kuo haʻi ʻa kinaua ʻi he ngaahi nonoʻo pea lī ki he fale fakapōpulá. Ko ʻeni, naʻe fai ʻeni koeʻuhi ke lava ʻe he ʻEikí ʻo fakahā atu hono māfimafí ʻiate kinaua.

32 Pea naʻe hoko ʻo pehē naʻá na ʻalu atu ʻo kamata ke malanga mo kikite ki he kakaí, ʻo fakatatau ki he laumālie mo e mālohi kuo tuku kiate kinaua ʻe he ʻEikí.