1 Ket manen, siak, ni Alma, gapu ta binilinnak ti Dios a nasken nga ikuyogko ni Amulek ket mapanak ket mangasaba manen kadagitoy a tao, wenno kadagiti tattao nga adda iti siudad ti Ammonihah, napasamak bayat a rinugiak ti mangasaba kadakuada, rinugianda a makiranget kaniak, a kunkunada:

2 Asinoka? Ipagarupmo kadi a mamatikami iti pammaneknek ti ^amaysa a tao, uray pay no ikasabana kadakami a mapukawto ti daga?

3 Ita awan a pulos ti naawatanda kadagiti balikas nga insaoda; agsipud ta saanda ammo a nasken a mapukaw ti daga.

4 Ken kinunada pay: Saanmi patien dagiti balikasmo no ipadtom a madadaelto daytoy dakkel a siudad iti ^amaysa nga aldaw.

5 Ita saanda ammo a maaramid ti Dios dagiti kasta a nakaskasdaaw nga aramid, agsipud ta natangken ti panagpuspuso ken nasukirda a tattao.

6 Ket kinunada: ^aAsino ti Dios, a ^bsaanen a mangibaon iti ad-adu ngem maysa a turay kadagitoy a tao, a mangiwaragawag kadakuada iti kinapudno dagita naindaklan ken nakaskasdaaw a banag?

7 Ket immasidegda tapno gammatandak; ngem kitaen, saanda nga inaramid. Ket situtured a timmakderak tapno iwaragawag kadakuada, wen, situtured nga impaneknekko kadakuada, a kunkunak:

8 Kitaen, O dakayo a dakes ken barusngi a ^asangkaputotan, kasano a nalipatanyo ti kaugalian dagiti ammayo; wen, anian ta nalipatanyo a dagus dagiti bilin ti Dios.

9 Saanyo kadi malagip a ti amatayo, a ni Lehi, naipanaw manipud iti Jerusalem babaen ti ^aima ti Dios? Saanyo kadi malagip nga inturongna amin ida iti panaglabasda iti langalang?

10 Ken dagusyo kadi a nalipatan no namin-ano nga insalakanna dagiti ammatayo kadagiti ima dagiti kabusorda, ket sinaluadanna ida manipud iti pannakadadaelda, uray pay kadagiti ima dagiti kabsatda?

11 Wen, ket no saan koma a gapu iti awan kaasping a bilegna, ken ti asina, ken ti naunday a panagibturna para kadatayo, saantayo koma naliklikan ti pannakadadaelyo manipud iti rabaw ti daga a nabayagen sakbay pay daytoy a panawen, ken nalabit a naikumittayo koman iti ^aawan inggana a kinaleddaang ken kinaay-ay-ay.

12 Kitaen, ita kunak kadakayo a binilinnakayo nga agbabawi; ken malaksid no agbabawikayo, saanyo la ketdi matawid ti pagarian ti Dios. Ngem kitaen, saan la a dagitoy—binilinnakayo nga agbabawi, wenno maminpinsan a ^adadaelennakayonto manipud iti rabaw ti daga; wen, sarungkarannakayonto iti pungtotna, ket iti ^bnakaam-amak a pungtotna saanto a pumanaw.

13 Kitaen, saanyo kadi malagip dagiti balikas nga imbagana ken ni Lehi, a kinunana: ^aNo la ketdi tungpalenyo dagiti bilinko, rumang-aykayonto iti daga? Ket manen nasao nga: No la ketdi saanyo tungpalen dagiti bilinko maisinakayo manipud iti imatang ti Apo.

14 Ita kayatko a laglagipenyo, a no la ketdi saan a tungpalen dagiti Lamanita dagiti bilin ti Dios, ^anaisinadan manipud iti imatang ti Apo. Ita makitatayo a napasingkedan ti balikas ti Apo iti daytoy a banag, ket naisinan dagiti Lamanita manipud iti imatangna, manipud iti nangrugian dagiti panaglabsingda iti daga.

15 Nupay kasta kunak kadakayo, nalaglag-anto para kadakuada a ^amaibturan iti aldaw ti panangukom ngem kadakayo, no agtalinaedkayo iti basbasolyo, wen, ken napaypanuynoyto para kadakuada iti daytoy a biag ngem kadakayo, malaksid no agbabawikayo.

16 Agsipud ta adu ti kari a ^anaited kadagiti Lamanita; agsipud ta gapu kadagiti ^bkaugalian dagiti ammada ti nakaigapuan ti panagtalinaedda iti kasasaadda a ^ckinaignorante; ngarud kaasianto ida ti Apo ket ^diyatiddognanto ti panagbiagda iti daga.

17 Ket iti sumagmamano a batang ti panawen ^amaiturongdanto a mamati iti balikasna, ken mangammo iti kinabiddut dagiti kaugalian dagiti ammada; ket adunto kadakuada ti maisalakan, agsipud ta kaasian ti Apo iti amin nga ^bumawag iti naganna.

18 Ngem kitaen, kunak kadakayo a no itultuloyyo ti kinadakesyo saan nga agpaut dagiti aldawyo iti daga, agsipud ta maibaonto dagiti ^aLamanita kadakayo; ket no saankayo nga agbabawi umaydanto iti kanito a saanyo nga ammo, ket masarungkarankayonto iti ^bnaminpinsan a pannakadadael; ket mayannurot daytoy iti nakaam-amak a ^cpungtot ti Apo.

19 Agsipud ta saannanto ipalubos nga agbiagkayo iti kinadangkesyo, a mangdadael kadagiti taona. Kunak kadakayo, Saan; kaykayatna pay nga ipalubos a ^adadaelen dagiti Lamanita amin a taona a naawagan iti tattao ni Nephi, no ^bmatnagda kadagiti panagbasol ken panaglabsing, kalpasan iti kaadadda iti nabuslon a lawag ken nabuslon a pannakaammo a naited kadakuada ti Apo a Diosda;

20 Wen, kalpasan ti pannakaibilangda a naparaburan unay a tattao ti Apo; wen, kalpasan ti pannakaibilangda a naparaburan unay kadagiti dadduma a pagilian, puli, pagsasao, wenno tattao; kalpasan a ^anaaramid ti pannakaipakaammo kadakuada ti amin a banag, a mayannurot kadagiti tarigagayda, ken ti pammatida, ken karkararag, iti dayta a napasamaken, ken mapasamak, ken dumtengto;

21 Kalpasan a sinarungkaran ida ti Espiritu ti Dios; kalpasan a nakasarita ida dagiti anghel, ken kalpasan a nakasao ida ti timek ti Apo; ken addaanda iti espiritu ti panagipadto, ken ti espiritu ti paltiing, ken kasta met ti adu a sagut, ti sagut iti panagsao dagiti dila, ken ti sagut ti panangasaba, ken ti sagut ti Espiritu Santo, ken ti sagut ti ^apanagipatarus;

22 Wen, ken kalpasan a ^anawayawayaanda ti Dios manipud iti daga ti Jerusalem, babaen ti ima ti Apo; kalpasan a naisalakan ida manipud iti bisin, ken manipud iti sakit, ken amin a kasasaad dagiti sakit ti tunggal kita; ken kalpasan a napapigsa ida iti pannakidangadang, tapno saanda a madadael; kalpasan a nawayawayaan ida iti ^bpannakaadipen iti tunggal kanito, ken kalpasan a nasalakniban ken nataginayon ida agingga ita; ken kalpasan a naparang-ay ida agingga a bimmaknangda iti amin a bambanag—

23 Ket ita kitaen kunak kadakayo, a no aglabsing dagitoy a tattao, a nakaawat kadagiti nakaad-adu a bendision manipud iti ima ti Apo, a makaniwas iti lawag ken pannakaammo nga adda kadakuada, kunak kadakayo a no kastoy ti mapasamak, a no matnagda iti panaglabsing, nalaglag-anto a ^amaibturan para kadagiti Lamanita ngem kadakuada.

24 Agsipud ta kitaen, naidiaya dagiti ^akari ti Apo kadagiti Lamanita, ngem saan a para kadakayo no aglabsingkayo; agsipud ta saan kadi nga impeksa ti Apo ti karina ken sititibker nga impaulogna, ta no sumupringkayo a maibusor kenkuana maminpinsan a madadaelkayo iti rabaw ti daga?

25 Ket ita gapu iti daytoy, a tapno saankayo a madadael, imbaon ti Apo ti anghelna a sarungkaran ti adu a taona, a mangipakdaar kadakuada a nasken a mapanda ken sipapasnek a mangiyawag kadagiti tattao, a kunkunana: ^aAgbabawikayo dakayo, ta asidegen ti pagarian ti langit;

26 Ket iti ^asaan a mabayag manipud ita umayto ti Anak ti Dios a nagloriaan; ket ti gloriana isu ti gloria ti ^bBugbugtong ti Ama, a napnuan iti ^cparabur, panagpapada, ken kinapudno, napno iti kinaanus, ^dasi, ken naunday a panagibtur, nadaras a ^emakangngeg kadagiti araraw dagiti taona ken mangsungbat kadagiti kararagda.

27 Ket kitaen, umay a ^amangsubbot kadagitinto a ^bmabuniagan gapu iti panagbabawi, babaen ti pammatida iti naganna.

28 Ngarud, isaganayo ti dalan ti Apo, agsipud ta asidegen ti kanito nga apiten dagiti tattao ti gunggona kadagiti ^atrabahoda, a maibatay iti naaramiddan—no nalintegda ^bapitendanto ti pannakaisalakan dagiti kararuada, a mayannurot iti bileg ken panangisalakan ni Jesucristo; ket no dakesda apitenda ti ^cpannakailunod dagiti kararuada, a mayannurot iti bileg ken pammalud ti sairo.

29 Ita kitaen, daytoy ti timek ti anghel, a mangiyaw-awag kadagiti tattao.

30 Ket ita, ^aay-ayatek a kakabsatko, agsipud ta dakayo ti kakabsatko, ket rumbeng a maayatkayo, ken rumbeng a mangiyegkayo kadagiti aramid a mangipakita iti panagbabawi, a makitayo a napalalo a timmangken ti puspusoyo a mangkontra iti balikas ti Dios, ken makitayo a ^bnapukaw ken natnagkayo a tattao.

31 Ita napasamak nga idi siak, ni Alma, naisaokon dagitoy a balikas, kitaen, kinapungtotdak dagiti tattao gapu ta imbagak kadakuada a natangken ti panagpuspuso ken ^anasukirda a tattao.

32 Kasta met a gapu ta imbagak kadakuada a managbasol ken natnagda a tattao nakaungetda kaniak, ket pinanggepdak a tiliwindak, tapno iserrekdak iti pagbaludan.

33 Ngem napasamak a saan a pinalubosan ida ti Apo a matiliwdak iti dayta a kanito ket iserrekdak iti pagbaludan.

34 Ket napasamak a napan ni Amulek ket nagtakder, ken rinugianna met ti nangasaba kadakuada. Ket ita saan a naisurat amin a ^abalikas ni Amulek, nupay kasta naisurat iti daytoy a libro ti paset dagiti balikasna.