TiLibro ni Mormon

Paspasamak Nga Insurat Ti Ima Ni Mormon Kadagiti Pinanid A Naala Manipud Kadagiti Pinanid Ni Nephi

Gapuna, iti pannakayababa ti kasuratan dagiti tao ni Nephi, ken kasta met dagiti Lamanite—Naisurat kadagiti Lamanite a natda iti balay ti Israel; ken kasta met kadagiti Hudio ken Gentil—Naisurat babaen ti pammilin, ken kasta met babaen ti espiritu ti pammadto ken panangipaltiing—Naisurat ken naiserra, ken naidulin babaen ti Apo, tapno saanda koma a madadael—A mairuar babaen ti sagut ken pannakabalin ti Dios iti pannakaipatarus daytoy—Naiserra babaen ti ima ni Moroni, ken nailemmeng babaen ti Apo, a mairuar iti naituding a panawen babaen dagiti Gentil—Babaen ti sagut ti Dios ti pannakaipatarus daytoy.

Ti pannakayababa manipud met iti Libro ni Ether, a kasuratan dagiti tao ni Jared, a nagsisina idi panawen a pinagduduma ti Apo ti pagsasao dagiti tao, idi mangipatpatakderda iti torre a dumanon idiay langit—A mangipakita kadagiti natda iti balay ti Israel no ania a naindaklan a bambanag ti naaramid ti Apo kadagiti am-ammada; ken tapno maammuanda ti katulagan ti Apo, a saanda a naiwalin nga agnanayon—Kasta met iti pannakaguyugoy dagiti Hudio ken Gentil a ni Jesus isu ti Cristo, ti Agnanayon a Dios, a mangiparparangarang iti bagina kadagiti amin a pagilian—Ket ita, no adda riro, nagkurangan dagiti tao; gapuna, saanyo nga uyawen dagiti banag ti Dios, tapno masarakankayonto nga awan mulitna iti pangukoman ni Cristo.

Orihinal a patarus manipud kadagiti pinanid iti Ingles ni Joseph Smith, Jun.

Umuna nga edision iti Ingles a naipablaak iti Palmyra, Nueva York, EUA, idi 1830