Scriptures
Enos 1


Ri Vuj richin ri Enos

Tanaj 1

Ri Ajaf can nusuj vi chi jun retal quibanobal ri Nefiʼiʼ xtipe apon chique ri Lamaniʼ. Nutzijoj ri quinaʼoj, y ri quibanon, y ri coyoval ri caʼiʼ vinakul.

1 Vaveʼ cʼa, xcʼulvachitej chi yin Enos vetaman chi ri nataʼ jun achin choj. Rijaʼ xirutijoj cʼa yin chire ri ruchʼabel, y chukaʼ chire ri etamabel y ri pixabanic richin ri Ajaf. Nim ruva rukʼij ri nu Dios romariʼ.

2 Xtintzijoj cʼa chive ri tok janíla xintij nukʼij chuvech ri Dios, tok cʼa manjani tincʼul ri cuyubel quichin ri numac.

3 Can kitzij vi, xibe chiquicanoxic chicopiʼ e aj pa qʼuechelaj. Cʼariʼ, can xokaka vi chinucʼuʼx ri chʼabel ri xinvacʼaxaj riqʼuin ri nataʼ chirij ri cʼaslen jumul, y ri quicoten quichin ri chojlaxelaʼ.

4 Xnum ri vánima y xixuqueʼ chuvech ri Nutzʼucunel, y janíla xichʼo akʼanij riqʼuin rijaʼ pa lokʼolej chʼoven, y xincʼutuj pa ruviʼ ri nucʼaslemal yin. Chijun kʼij xichʼo cʼa akʼanij riqʼuin rijaʼ. Cʼa cʼariʼ tok xocokʼaʼ, cʼa xichʼo na cof akʼanij, richin queriʼ xapon ri nuchʼoven chicaj.

5 Cʼa cʼariʼ, xpe jun chʼabel viqʼuin y quereʼ xubij: Enos, yecuyutej cʼa ri amac. Rat can xcaturusatej vi cʼa.

6 Yin Enos, vetaman cʼa chi ri Dios man nitiquir ta nutzʼuc tzij. Roma cʼariʼ tok xeyoj el ri numac.

7 Xincʼutuj cʼa quereʼ: ¿Achique cʼa beyal chi xbanatej can quereʼ?

8 Cʼariʼ, rijaʼ quereʼ xubij pe chuve: Xbanatej cʼa roma ri acukubabel cʼuʼx riqʼuin ri Cristo, ri manjun bey avacʼaxan, ni atzʼeton. Qʼuiy junaʼ xquekʼax cʼa apon, tok manjani xtucʼut riʼ riqʼuin ri ruchʼacul. Roma cʼariʼ, cabiyin cʼa. Ri acukubabel cʼuʼx at ruchʼajchʼojirisan.

9 Xcʼulvachitej cʼa chi tok xinvacʼaxaj re chʼabel reʼ, ri vánima xtʼojtʼut coma ri vachʼalal, ri Nefiʼiʼ. Roma cʼariʼ tok riqʼuin ronojel ri vánima xichʼo akʼanij riqʼuin ri Dios coma rijeʼ.

10 Tok yitajin rutijic nukʼij pa vuxlabal, ri ruchʼabel ri Ajaf xpe pa ri nunojibal jun bey chic, y quereʼ xubij chuve: Yin xquenkʼejelaʼ ri avachʼalal, achiʼel cʼa rijeʼ niquitij quikʼij richin yequitakej ri nupixaʼ. Nuyaʼon cʼa chique rijeʼ re ruvachʼulef reʼ, y can ja vi reʼ jun lokʼolej ruvachʼulef. Xaxe cʼa vi rijeʼ niquiben ri itzel, jariʼ tok xtinvetzelaj re ruvachʼulef reʼ. Quereʼ cʼa, yin xquenkʼejelaʼ ri avachʼalal achiʼel cʼa ri xinbij can. Vi niquikʼej cʼa ri nupixaʼ, xtincʼajisaj quivech, y xtinben chi janíla xquebison.

11 Tok yin, Enos, xinvacʼaxaj re chʼabel reʼ, ri nucukubabel cʼuʼx riqʼuin ri Ajaf can man xsilon ta vi chic. Cʼa cʼariʼ tok janíla xintij rukʼij richin xichʼo akʼanij riqʼuin ri Ajaf coma ri Lamaniʼ, ri vachʼalal.

12 Xcʼulvachitej cʼa chi tok can janíla vi xichʼo akʼanij chi utzil riqʼuin ri Ajaf, rijaʼ quereʼ xubij pe chuve: Roma cʼa ri acukubabel cʼuʼx, yin xtinyaʼ chave achiʼel ri narayij rat.

13 Can kitzij vi cʼa, jareʼ ri xinrayij riqʼuin rijaʼ: chi vi ta ri nuvinakul yin, ri Nefiʼiʼ, janíla xquequikʼej ta ri rupixaʼ ri Ajaf y xqueyojtej ta romariʼ, y ri Lmaniʼ man ta xqueyojtej can, xinrayij cʼa chi ri Ajaf Dios nuchajij ta ri retal quibanobal ri nuvinakul yin, ri Nefiʼiʼ. Xinrayij cʼa chi xticʼam ta pe chique ri Lamaniʼ pa jun chic kʼij apon, stapeʼ vi ta cʼo chi nichajix ta roma ri ruchukʼaʼ ri lokʼolej rukʼaʼ rijaʼ. Riqʼuin cʼariʼ, sakpe xtiyaʼox ta kʼij chique rijeʼ richin xquecolotej.

14 Pa re tak kʼij reʼ cʼa, ri kasamaj roj richin yekaqʼuen pe chic pa ri kitzij tijonic, can manek vi rejkalen. Rijeʼ can xquisuj vi can chike roma ri coyoval, chi vi ta cʼo banel, rijeʼ xkojquiyoj ta roj, y chukaʼ ri retal kabanobal, y chukaʼ ri nakʼisan tak quibanobal ri kateʼ katataʼ ojer.

15 Yin vetaman cʼa chi ri Ajaf Dios xtiquir xuchajij ri retal kabanobal. Roma cʼariʼ, tok junelic xichʼo akʼanij riqʼuin. Rijaʼ quereʼ cʼa rubin can chuve: Xabachique ri nacʼutuj pa rubiʼ ri Cristo riqʼuin ri acukubabel cʼuʼx, y vi can nanimaj vi chi xtacʼul, jariʼ tok can xtacʼul vi riʼ.

16 Cʼo cʼa nucukubabel cʼuʼx y xincʼutuj akʼanij chire ri Dios chi rijaʼ tuchajij cʼa ri retal kabanobal. Cʼa cʼariʼ, rijaʼ can xusuj vi chuve chi xtibe cʼa ri retal kabanobal quiqʼuin ri Lamaniʼ, jampeʼ cʼa rijaʼ xtukʼijuj chi utz.

17 Cʼariʼ, yin Enos vetaman chi xtibanatej cʼa can achiʼel vi rijaʼ xusuj can chuve. Roma cʼariʼ tok xuxlan ri vánima.

18 Ri Ajaf quereʼ cʼa xubij pe chuve: Queriʼ chukaʼ quirayin can ri atataʼ amamaʼ. Can xtibanatej vi cʼa achiʼel ri quicukubabel cʼuʼx rijeʼ. Ri quicukubabel cʼuʼx rijeʼ can nim vi, achiʼel cʼa ri acukubabel cʼuʼx rat.

19 Xcʼulvachitej cʼa chi yin, Enos, xibe chiquicojol ri ruvinakul ri Nefi y xinyaʼ lokʼolej rutzijol chirij ri xticʼulvachitej cʼa apon. Xinjiquibaʼ cʼa chirij ri xintzʼet y ri xinvacʼaxaj.

20 Yin ninjiquibaʼ cʼa vaveʼ chi ri ruvinakul ri Nefi can xquitij vi quikʼij richin yequitzolij ri Lamaniʼ pa ri kitzij tijonic richin ri Dios. Man riqʼuin vi riʼ, ri kasamaj manek rejkalen chiquivech. Ri quetzelanic can jiquiban vi, y rijeʼ xa xeyukex vi el roma ri itzel quinaʼoj. Xeʼoc cʼa jun vinakul camisanel y tzʼil, y manek quinaʼoj, y xquiyaʼ quikʼij ri tak tiox, y xecʼaseʼ achiʼel aj pa kʼayis chicopiʼ. Xa xquitij ri camisanelaʼ tak chicopiʼ. Xecʼaseʼ pa tak quimoʼc y xaxe xebiyajlaʼ chupan ri tolan ruvachʼulef. Xoc quitziak jun rutzʼumal chicop ri ximon xeʼ quipan y socan jumul ri quijolon. Can jebel vi quetaman xquicusaj ri cʼakbel chʼab, y ri cotoquic tazqʼuibel, y ri iquiej. E qʼuiy cʼa chique rijeʼ can xaxe vi xquitij ri rex tiʼij y junelic xquitij quikʼij richin yojquicamisaj.

21 Xcʼulvachitej cʼa chi ri ruvinakul ri Nefi xquixmajij ri ulef, y xquiqʼuiytisaj conojel ruvech qʼuimal y ruvech cheʼ. Chukaʼ xquiqʼuiytisaj e qʼuiy kʼataj chicopiʼ, y kʼataj richin conojel ruvech váquix, y tzuntzun, y aj pa kʼayis tzuntzun, y chukaʼ e cʼo e qʼuiy quiej.

22 Chukaʼ e cʼo qʼuiy yaʼol lokʼolej rutzijol chikacojol roj. Ri vinakiʼ cʼa, can cof vi ri cánima, y ekal cʼa xquetamaj.

23 Ri e yaʼol lokʼolej rutzijol can cof vi xechʼo cʼa quiqʼuin, y xechʼabalin, y xquiyaʼ lokʼolej rutzijol chirij ri oyoval, y ri cʼaxinic, y ri vulatajic. Junelic cʼa xenatan chirij ri camic, y ri cʼaslen jumul, y ri rukʼatonic tzij y ri ruchukʼaʼ ri Dios. Riqʼuin cʼa ronojel reʼ, xequiyukʼ junelic richin tiquiyalaʼ rukʼij ri Ajaf. Manjun chic banel. Xaxe chic, vi can choj vi xechʼo quiqʼuin, cʼariʼ man xquekaʼ ta chaʼnin cʼariʼ man xquekaʼ ta chaʼnin pa vulatajic. Quereʼ cʼa nintzʼibaj chiquij rijeʼ.

24 Pa ri nucʼaslen yin, can xentzʼet vi tak oyoval chiquicojol ri Nefiʼiʼ y ri Lamaniʼ.

25 Xcʼulvachitej cʼa chi yin xirijix. E kʼaxinek cʼa can vakxakcʼal belejlajuj junaʼ tok ri katataʼ Leʼi tel pe pa Jerusalem.

26 Xintzʼ cʼa chi xa jubaʼ chic xquibe ka pa ri numukubel. Roma ri ruchukʼaʼ ri Dios, yin xitak can richin xichʼabalin, y xinyaʼ lokʼolej rutzijol chique re vinakiʼ reʼ, y chukaʼ richin xinkʼalajirisaj ri tijonic chiquivech rijeʼ, achiʼel cʼa ri kitzij tijonic richin ri Cristo. Chijun ri nucʼaslen nukʼalajirisan pe, y janíla xiquicot riqʼuin riʼ chuvech xabachique chic ri cʼo chuvachʼulef.

27 Jubaʼ chic cʼa xquibe pa ri cʼojlibel acuchi xquinuxlan vi. Ri cʼojlibel riʼ cʼo riqʼuin ri Lokʼolej Velesanel. Vetaman cʼa chi xquinuxlan can riqʼuin rijaʼ. Yiquicot cʼa riqʼuin ri kʼij tok ri nuchʼacul xtoc man camel ta chic. Cʼa cʼariʼ, xquipaʼeʼ riqʼuin ri Ajaf y riqʼuin quicoten xtintzʼet ri ruvech. Rijaʼ quereʼ cʼa xtubij chuve: Catámpe cʼa viqʼuin. Nim ruva akʼij. Can cʼo vi jun cʼojlibel nucʼun cʼa avichin rat chupan ri rachoch ri Nataʼ. Amen.