Ri Wuj Re Ri Enos

1 Chitampeʼ, xcʼulmataj chi ri in, Enós, wetaʼm chi ri in tat jun sucʼumalaj achi rumal rech chi xinutijoj che ri u tzijobal, y xukujeʼ chque ri retamabal y ri u pixab ri Kajawal. Rumal waʼ, tewichitalic ri u biʼ ri nu Dios.

2 Quinkʼalajisaj na chiwäch ri chʼoʼj ri xincʼulmaj in che ri Dios nabe, are majaʼ nu cʼamom ri esabal ri nu mac.

3 Are je waʼ, xebintzucuj tak awäj pa ri cʼachelaj. Y xeboc cʼu naj chupam ri wanimaʼ ri tak tzij ri qʼui mul can nu tom chic, areʼ ri xubij in tat che ri junalic cʼaslemal, xukujeʼ che ri quicotemal quech ri chʼajchʼojalaj winak.

4 Y xnum ri wanimaʼ. Xinxuquiʼ chuwäch ri nu Qʼuiyisanel, y xinchʼabej jun mayijabal tzijonic, y xintzʼonoj rumal rech ri wanimaʼ in. Y juntir ri jun kʼij xinchʼabej areʼ, jeʼ, are xoc ri akʼab xinchʼaw akʼanok, cʼä xopan nu chʼabal chicaj.

5 Xintaʼ jun chʼabal, xubij: At Enós, cäcuyutaj a mac, y cattewichitaj na.

6 Ri in, Enós, in wetaʼm chi ri Dios man cäcuin tä cuban jalum tzij. Rumal cʼu riʼ, xchup bic ri nu mac.

7 Xinbij cʼut: Wajaw, ¿jas ri u bantajic waʼ?

8 Cʼäte riʼ, xubij ri areʼ chwe: Are rumal ri a cojobal che ri Cristo. Man cʼo tä jumul a tom, y mawi awilom taj ri areʼ. Cocʼow na sibalaj junab aretak majaʼ cucʼut na rib rucʼ u tiojil cho ri uwächulew. Rumal cʼu waʼ, jat, ri a cojobal at u colom.

9 Jewaʼ xcʼulmaxic chi aretak xebintaʼ we tzij riʼ, xinchap u rayixic ri utzil qui wäch ri wachalal, ri aj Nefitas. Rumal waʼ, xinboʼchiʼnic che ri Dios chquij rucʼ juntir wanimaʼ.

10 Aretak tajin quincojo nu chukʼab rucʼ ri wuxlabal, chitampeʼ, xpe chic ri u chʼabal ri Kajawal pa nu jolom, xubij: Quebinwilo na ri awachalal je jas qui sacʼajinic jas rucʼ quequinimaj ri nu takbal. Nu yaʼom waʼ ulew chque, y are jun ulew lokʼalaj wi. Man quinsiqʼuij tä itzel puwiʼ waʼ ulew, xak xuwi we cʼo etzelal chquixol ri winak. Je cʼu waʼ, quebinsolij na ri awachalal je jas nu bim chic, y rumal qʼui ri qui mac, quinkasaj na qui mac paquiwiʼ.

11 Y cʼäte ri in, Enós, nu tom we tzij riʼ, ri in cʼut, Enós, man cäcuin tä cäsalabax bic nu cojobal che ri Ajawaxel. Y rucʼ jun mayilaj u cojic nu chukʼab, xintzʼonoj che ri areʼ rumal quech ri wachalal ri aj Lamanitas.

12 Xcʼulmataj chi ri in tzijoninak chic, nu cojom nu chukʼab rucʼ ronojel nu sacʼajanic. Cʼäte cʼu riʼ, xubij chwe ri Ajawaxel: Quinsipaj chawe jas ri curayij awanimaʼ, are rumal ri a cojobal.

13 Chitampeʼ cʼut, are waʼ ri nu rayibal ri cäraj ri wanimaʼ, chi we quetzak na pa qui mac ri nu winakil, ri aj Nefitas, xukujeʼ we quesachtaj qui wäch, y man quesachtaj tä ri qui wäch ri aj Lamanitas, je cʼu riʼ, chi ri Ajawaxel cucʼolo na jun qui tzʼib ri nu winakil ri aj Nefitas, pune rumal ri u cuinem ri lokʼalaj u kʼab. Rumal rech chi pa jun kʼij cäcʼamtaj na we jun tzʼib chquiwäch ri aj Lamanitas, rech cäcʼamtajic qui be che ri nimalaj colonem.

14 Rumal rech chi wachanim man cächacun tä cʼu waʼ, ri u cojic ka chukʼab, rech quekatzelej chupam ri kastzijalaj cojobal. Xquitzʼumaj ri kʼakʼ rucʼ coyowal chi we cuyaʼo, quequisach na ka tzʼib, y xukujeʼ cujquisäch na ri uj, xukujeʼ ronojel ri lokʼalaj qui banom ri ojer ka tataʼib.

15 Rumal cʼu riʼ, in wetaʼm chi ri Kajawal Dios xcuinic xuchajij ri ka tzʼib, tza xinchʼabej ri areʼ amakʼel, rumal rech chi u bim chic chwe: Jas ri cataʼ rucʼ a cojonic, we catcojonic chi cacʼam ulok na, pa ri u biʼ ri Cristo, kas cacʼam baʼ na.

16 Y cʼo nu cojobal, y xintzʼonoj cʼu che ri Kajaw chi cuchajij na ri tzʼib. Y xuyaʼ ri u tzij chwe chi copan na ri tzʼib pa qui kʼab ri aj Lamanitas, kas cpan na cʼä pa ri u kʼij.

17 Y ri in, Enós, wetaʼm chi cäbantaj wi na, je jas ri tzij ri u yaʼom. Rumal waʼ, xcuʼbisaj ri wanimaʼ chrij.

18 Y xubij cʼu chwe ri Ajawaxel: Junam ri qui tzʼonom ri a tataʼib, y cäyaʼ na chque je jas ri qui cojonic. Rumal ri qui cojonic areʼ junam awech.

19 Te cʼu riʼ, xcʼulmataj chi ri in, Enós, xinbe chquixol ri u winakil ri Nefi, xinkʼalajisaj chque ri cäpe na, xinkʼalajisaj chque conojel jastak ri nu tom y wilom chic.

20 Quinkʼalajisaj cʼu chi ri winakil re ri Nefi xquicoj qui chukʼab rucʼ qui sacʼajinic, rech quetzelexic ri aj Lamanitas chupam ri kastzijalaj qui cojonic che ri Dios. Xane man cʼo tä u patan ri ka banom, cʼut man cʼo tä u salabaxic ri itzel rayibal ri cʼo pa canimaʼ, rumal xquiterenej ri itzel qui banic, xemoxiric, xechʼuʼjaric, xa cäcaj cäquitij ri quicʼ. Tzʼil ri canimaʼ xukujeʼ, y xak xequikʼijilaj alaʼs tak tiox. Xequitij ri cʼaʼnalaj awaj re tak juyub. Xecʼojiʼ pa tak panibal, y xewacat pa tak ulew tzʼinowinak. Xquijos qui jolom, xaʼ u tzʼumal awaj xquichʼukbej quib xeʼ qui pam. Cʼo ri quetamabal rucʼ ri qʼuiakbal chʼab, xukujeʼ ri qʼuixbal chʼichʼ, xukujeʼ rucʼ ri icäj. E qʼui chque man cʼo tä xquitijo we xak xuwi tä ne ri räx tiʼj, y junalic xquicoj qui chukʼab chusachic ka wäch.

21 Xcʼulmataj chi ri winak re Nefi xquichaplej u tajixic ri ulew, xqʼuiyisaj conojel qui wäch tak ticʼon, u wäch cheʼ, jumulaj wacäx, xukujeʼ xqʼuiyisaj conojel tak qui wäch awaj, xukujeʼ xqʼuiyisaj qʼuisicʼ re uwo ja cucʼ ri qʼuisicʼ re juyub, xukujeʼ sibalaj quiej.

22 Chkaxol cʼut, xecʼojiʼ qʼui tak ri kʼalajisanel che ri cäpe na. Co ri canimaʼ ri winak. Man cʼo tä qui chomabal.

23 Xak xuwi xquiyaʼ chque ri mayilaj cʼaʼn tzij, ri u pixabanic y ri u kʼalajisabal ri chʼoʼj, ri cäpe na ri oyowal, re ri u sachic wächaj. Xukujeʼ cʼo ri natabal tzij chque chrij ri cämical, y xukujeʼ chrij ri nim na u xol ri junalic kʼijal, xukujeʼ chrij ri kʼatbal tzij y ri u chukʼab ri Dios. Rumal ronojel waʼ, xbantajic chi cäquixej quib rumal ri Ajawaxel. Ri in quinbij chi rumal juntir waʼ jastak, y rumal xukujeʼ ri mayilaj tak tzij, ri sibalaj kʼalaj wi, jewaʼ, xekʼatexic wi rech man quekaj tä ne chanim chusachic qui wäch.

24 Pa tak nu kʼij xinwil qʼui chʼoʼj chquixol ri aj Nefitas y ri aj Lamanitas.

25 Te riʼ, xcʼulmataj chi xinriʼjobic, ocʼowinak chic jun ciento setenta y nueve junab rech ri u relibal ulok ri Lehi pa Jerusalén.

26 Xukujeʼ xinchʼobo chi nakaj chic quinoc na pa ri mukbal we. Ri sak noʼjibal rech ri Dios oquinak pa nu jolom rumal ri u cuinem rech quintzijon chquiwäch we winak riʼ, y xukujeʼ rech quinkʼalajisaj ri cäban na chque, xukujeʼ rech quinbij ri u tzijobal je jas ri kastzij rech ri Cristo. In nu bim waʼ tzij ronojel nu kʼij, y in quicotinak na rumal waʼ chi juntir ri jastak cʼo cho ri uwächulew.

27 Nakaj chic chi quinbe pa ri cʼolbal rech wuxlanem, ri cʼo rucʼ nu Colonel, rumal rech chi wetaʼm chi rucʼ areʼ quinuxlan na. Quinquicotic che ri kʼij aretak ri nu tiojil, ri cäcämic, cucoj na ri jun cʼaslemal ri man cʼo tä u qʼuisic. Quinaqʼuiʼ na chuwäch, chi waʼ rucʼ quicotemal quinwil na ri u wäch, cubij na chwe: Tan ulok, at tewishim, cʼo jun a cʼolbal sucʼumam wi pa tak rachoch ri in Tat. Amen.