1 Ma sa oo ina o Sesa, o lē na tupuga mai ia Hetu—ona sa fano Hetu i le oge, ma lona aiga atoa vagana ai Sesa—o le mea lea, sa oo ina amata ai e Sesa ona toe atia’e se nuu na malepelepe.

2 Ma sa oo ina manatua e Sesa le faaumatiaga o ona tamā, ma sa ia atia’e se malo amiotonu; ona sa ia manatua mea na faia e le Alii i le aumaia o Iareto ma lona uso e ^afolau mai le moana; ma sa savali o ia i ala o le Alii; ma sa ia fanauina atalii ma afafine.

3 Ma o lona atalii ulumatua, o lē o lona igoa o Sesa, sa fouvale ia te ia; ae ui i lea, sa taia Sesa e le lima o se faomea, ona o lona mauoa tele, lea na toe aumai ai le toafilemu i lona tamā.

4 Ma sa oo ina fausia e lona tamā aai e tele i luga o le laueleele, ma sa toe amata ona salalau atu tagata i luga o le laueleele atoa. Ma sa soifua Sesa seia oo i ni tausaga ua toeaina lava; ma sa fanauina e ia Ripelakiso. Ma sa maliu o ia, ma nofotupu ai Ripelakiso e suitulaga ia te ia.

5 Ma sa oo ina sa le faia e Ripelakiso mea e sa’o i le silafaga a le Alii, ona sa ia te ia ni avā ma ni ^apalake e toatele, ma sa ia tuu i luga o tauau o tagata mea sa faigata ona tauaveina; ioe, sa ia faalafogaina i latou i lafoga mamafa; ma sa ia fausia ni fale laolao e tele i lafoga.

6 Ma sa ia faatuina mo ia lava se nofoalii matagofie tele; ma sa ia fausia ni falepuipui e tele, ma o soo se tasi sa le manao e totogi le lafoga sa ia lafoina i le falepuipui; ma o soo se tasi sa le mafai ona ia totogia le lafoga sa ia lafoina i le falepuipui; ma sa ia faatonu atu ia latou galulue pea mo lo latou tausiga; ma o soo se tasi sa musu e galue sa ia faatonu atu ia fasiotia.

7 O le mea lea na ia maua ai ana galuega matagofie uma, ioe, e oo lava i ana auro lelei, sa ia faatonuina ia faamama i le falepuipui; ma o galuega taulima matagofie uma o ituaiga eseese sa ia faatonuina ia faia i le falepuipui. Ma sa oo ina ia faapuapuagatia tagata i ana faitaaga ma mea inosia.

8 Ma ina ua mavae le va o tausaga e fa sefulu ma le lua o nofotupu o ia sa oo ina sa tutulai a’e tagata e fouvale faasaga ia te ia; ma sa amata ona toe i ai o taua i le laueleele, sa oo ina fasiotia ai Ripelakiso, ma tutuli ese ai ana fanau mai le laueleele.

9 Ma sa oo ina ua mavae le va o tausaga e tele, sa faapotopoto faatasi e Morianetona, (o ia o sē e tupuga mai ia Ripelakiso) se autau mai tagata na tutuli ese, ma o atu ma tau ma le nuu; ma sa oo ina ia maua le pule i luga o aai e tele; ma sa oo ina matuā faigata tele le taua, ma sa faia mo le tele o tausaga; ma sa oo ina maua e ia le pule i luga o le laueleele atoa, ma ia faatula’i ai o ia lava e fai ma tupu i luga o le laueleele uma.

10 Ma ina ua uma ona ia faatula’i o ia lava ma tupu, sa ia faamāmāina le avega a le nuu, o se mea na lelei ai o ia i le vaaiga a tagata, ma sa latou faauuina ai o ia e avea ma o latou tupu.

11 Ma sa ia faia mea tonu i tagata, ae sa ia le faia ia te ia lava, ona o ana faitaaga e tele; o le mea lea na vavae ese ai o ia mai luma o le Alii.

12 Ma sa oo ina atia’e e Morianetona aai e tele, ma sa oo ina mauoa tele tagata i lalo o lana nofoaiga, i fale, ma i auro ma ario, ma i le faatupu teleina o le saito, ma i lafu, ma fagaga, ma mea faapena sa toefuatai mai ia te i latou.

13 Ma sa ola Morianetona i tausaga e tele lava, ona ia fanauina ai lea o Kimo; ma sa nofotupu Kimo e suitulaga i lona tamā; ma sa nofotupu o ia mo tausaga e valu, ma sa oti lona tamā. Ma sa oo ina lē nofotupu Kimo i le amiotonu, o le mea lea na lē fiafia ai le Alii ia te ia.

14 Ma sa tulai a’e lona uso e fouvale e faasaga ia te ia, lea na ia aumai ai faatagataotaua o ia; ma sa tumau o ia i le faatagataotauaina i ona aso uma; ma sa ia fanauina atalii ma afafine a’o faatagataotauaina; ma i tausaga o lona toeaina lava na ia fanauina ai Levi; ma sa oti o ia.

15 Ma sa oo ina sa auauna Levi faatagataotaua ina ua mavae le oti o lona tamā, mo le va o le fa sefulu ma le lua tausaga. Ma sa ia sii taua e faasaga i le tupu o le laueleele, lea na ia maua ai mo ia lava le malo.

16 Ma ina ua uma ona ia maua o le malo mo ia lava sa ia faia mea sa tonu i le silafaga a le Alii; ma sa manuia tagata i luga o le laueleele; ma sa ola o ia i se olaga umi lava, ma sa ia fanauina ni atalii ma afafine; ma sa fanauina foi e ia Koruma, o lē na ia faauuina e avea ma tupu e sui ia te ia.

17 Ma sa oo ina faia e Koruma mea sa lelei i le silafaga a le Alii i ona aso uma; ma sa ia fanauina atalii ma afafine e toatele; ma ina ua mavae ona ia ola ai i aso e tele sa oti o ia, e pei lava o tagata uma o le lalolagi; ma sa nofotupu Kiso e suitulaga ia te ia.

18 Ma sa oo ina maliu foi Kiso, ma ua nofo Lipi e suitulaga ia te ia.

19 Ma sa oo foi ina faia e Lipi mea sa lelei i le silafaga a le Alii. Ma o aso o Lipi na faaumatia ai gata ^auogo. O le mea lea na latou o atu ai i le laueleele i saute, e saili meaai mo tagata o le laueleele, ona sa tumu le laueleele i manu o le vao. Ma sa avea foi Lipi lava ia ma tulimanu lelei tele.

20 Ma sa latou atia’e se aai tele i tafatafa o le laueleele lauitiiti, i tafatafa o le vaeluaga o le sami ma le laueleele.

21 Ma sa latou faasaoina le laueleele i saute e avea ma vao e le’i faato’aina, e tuli manu ai. Ma o le fogaeleele atoa o le fanua i matu ua ainā uma i tagata.

22 Ma sa latou toaaga tele, ma sa latou faatau mai ma faatau atu ma fefaataua’i o le tasi ma le isi, ina ia latou maua le oa.

23 Ma sa latou faia galuega i ituaiga o oa eseese uma, ma sa latou faia auro, ma ario, ma ^au’amea, ma apamemea, ma ituaiga o metala eseese uma; ma sa latou eli a’e mai le eleele; o le mea lea, na latou lafo ai i luga ni faaputuga tetele o le eleele ina ia maua ai oa, auro, ma ario, ma le u’amea, ma apamemea. Ma sa latou faia mea matagofie uiga eseese uma.

24 Ma sa latou maua silika, ma ie lino miloa lelei; ma sa latou faia ie ituaiga eseese uma, ina ia mafai ona latou faaoofuina i latou lava mai lo latou le lavalavā.

25 Ma sa latou faia meafaigaluega o ituaiga eseese uma e galuea’iina ai le eleele, e faamalu ma toto ai le eleele, e selesele ma vele ai, ma sasa ai le saito.

26 Ma sa latou faia meafaigaluega o ituaiga eseese uma sa latou faafaigaluega ai a latou manu.

27 Ma sa latou faia auupega o ituaiga eseese uma o taua. Ma sa latou faia ituaiga uma o galuega taulima uiga eseese.

28 Ma e leai se nuu sa faamanuiaina tele nai lo i latou, ma sili atu ona faatamaoaigaina tele e le aao o le Alii. Ma sa latou i ai i se laueleele sa silisili ona lelei i luga o laueleele uma, aua sa fetalai mai ai le Alii.

29 Ma sa oo ina ola Lipi i tausaga e tele, ma sa ia fanauina ni atalii ma afafine; ma sa ia fanauina foi Heatoma.

30 Ma sa oo ina nofotupu Heatoma e suitulaga i lona tamā. Ma ina ua lua sefulu ma le fa tausaga o nofotupu Heatoma, faauta, sa aveesea le malo mai ia te ia. Ma sa tautua o ia faatagataotaua i tausaga e tele, ioe, i ona aso uma lava na totoe.

31 Ma sa ia fanauina Hetu, ma sa nofo Hetu faatagataotaua i ona aso uma. Ma sa fanauina e Hetu o Arona, ma sa nofo Arona faatagataotaua i ona aso uma; ma sa ia fanauina Aminikata, ma sa nofo foi Aminikata faatagataotaua i ona aso uma; ma sa ia fanauina Korianetumu, ma sa nofo Korianetumu faatagataotaua i ona aso uma; ma sa ia fanauina Komi.

32 Ma sa oo ina faatosina ese e Komi le afa o le malo. Ma sa nofotupu o ia i luga o le afa o le malo i tausaga e fa sefulu ma le lua; ma sa ia faasaga tau i le tupu, o Aminikata, ma sa fetauai i la’ua mo le va o tausaga e tele, i le taimi lea na pulea ai e Komi ia Aminikata, ma maua le pule i luga o le vaega na totoe o le malo.

33 Ma o aso o Komi na amata ona i ai o faomea i le laueleele; ma sa latou mulimuli i fuafuaga tuai, ma latou faia ^atautoga e mulimuli i le ala a tagata anamua, ma toe saili e faaumatia le malo.

34 O lenei sa tele inatau Komi e faasaga ia te i latou; ae ui i lea, sa le’i manumalo o ia ia te i latou.