ບົດທີ 11
ສົງຄາມ, ການແຕກແຍກ, ແລະ ຄວາມຊົ່ວຮ້າຍຄອບງຳຊີວິດຂອງຊາວຢາເຣັດ—ສາດສະດາໃຫ້ຖ້ອຍຄຳເຖິງການທຳລາຍຂອງຊາວຢາເຣັດເວັ້ນເສຍແຕ່ພວກເຂົາຈະກັບໃຈເສຍກ່ອນ—ຜູ້ຄົນບໍ່ຍອມຮັບຟັງຄຳຂອງສາດສະດາ.
1 ແລະ ໃນວັນເວລາຂອງຄອມ ໄດ້ມີສາດສະດາຫລາຍທ່ານອີກ, ແລະ ໄດ້ທຳນາຍເຖິງຄວາມພິນາດອັນໃຫຍ່ຫລວງຂອງຜູ້ຄົນ ຖ້າຫາກພວກເຂົາບໍ່ກັບໃຈ, ແລະ ຫັນໄປຫາພຣະຜູ້ເປັນເຈົ້າ, ແລະ ປະຖິ້ມການຄາດຕະກຳ, ແລະ ຄວາມຊົ່ວຮ້າຍຂອງພວກເຂົາ.
2 ແລະ ເຫດການໄດ້ບັງເກີດຂຶ້ນຄື ຜູ້ຄົນບໍ່ຍອມຮັບຟັງຄຳຂອງສາດສະດາ, ແລະ ພວກເພິ່ນໄດ້ໜີໄປຫາຄອມເພື່ອຄວາມປອດໄພ, ເພາະວ່າຜູ້ຄົນພະຍາຍາມທີ່ຈະທຳລາຍພວກເພິ່ນ.
3 ແລະ ພວກເພິ່ນໄດ້ທຳນາຍຫລາຍເລື່ອງແກ່ຄອມ; ແລະ ລາວໄດ້ຮັບພອນຕະຫລອດວັນເວລາທີ່ເຫລືອຢູ່ຂອງລາວ.
4 ແລະ ລາວໄດ້ມີຊີວິດຢູ່ຢ່າງດົນນານ, ແລະ ໄດ້ມີລູກຊາຍຊື່ວ່າ ຊິບລຳ; ແລະ ຊິບລຳໄດ້ຂຶ້ນປົກຄອງແທນ. ແລະ ນ້ອງຊາຍຂອງຊິບລຳໄດ້ກະບົດຕໍ່ລາວ, ແລະ ເລີ່ມມີສົງຄາມໃຫຍ່ທີ່ສຸດທົ່ວແຜ່ນດິນ.
5 ແລະ ເຫດການໄດ້ບັງເກີດຂຶ້ນຄື ນ້ອງຊາຍຂອງຊິບລຳໃຫ້ຂ້າສາດສະດາທັງໝົດຊຶ່ງໄດ້ທຳນາຍເຖິງຄວາມພິນາດຂອງຜູ້ຄົນ;
6 ແລະ ມັນໄດ້ມີຄວາມສູນເສຍອັນໃຫຍ່ຫລວງທົ່ວແຜ່ນດິນ, ເພາະພວກເພິ່ນໄດ້ໃຫ້ຖ້ອຍຄຳວ່າ ຄຳສາບແຊ່ງອັນໃຫຍ່ຫລວງຈະມາສູ່ແຜ່ນດິນ, ແລະ ມາສູ່ຜູ້ຄົນນຳອີກ, ແລະ ວ່າມັນຈະມີຄວາມພິນາດອັນໃຫຍ່ຫລວງໃນບັນດາພວກເຂົາທີ່ບໍ່ເຄີຍມີມາກ່ອນໃນຜືນແຜ່ນດິນໂລກເລີຍ, ແລະ ວ່າກະດູກຂອງພວກເຂົາກະຈາຍ ກກອງກັນຂຶ້ນເທິງແຜ່ນດິນ ຖ້າຫາກພວກເຂົາບໍ່ກັບໃຈຈາກຄວາມຊົ່ວຮ້າຍຂອງພວກເຂົາເສຍກ່ອນ.
7 ແລະ ພວກເຂົາບໍ່ໄດ້ເຊື່ອຟັງສຸລະສຽງຂອງພຣະຜູ້ເປັນເຈົ້າເລີຍ, ຍ້ອນວ່າການມົ້ວສຸມລັບອັນຊົ່ວຮ້າຍຂອງພວກເຂົາ; ດັ່ງນັ້ນ ມັນຈຶ່ງເລີ່ມມີສົງຄາມ ແລະ ມີການຂັດແຍ້ງກັນຂຶ້ນທົ່ວແຜ່ນດິນ, ແລະ ມັນມີຄວາມອຶດຢາກ ແລະ ພະຍາດໂລຄາຢ່າງຫລວງຫລາຍນຳອີກ ເຖິງຂະໜາດທີ່ມັນໄດ້ມີຄວາມພິນາດອັນໃຫຍ່ຫລວງຢ່າງທີ່ບໍ່ເຄີຍເຫັນມາກ່ອນໃນຜືນແຜ່ນດິນໂລກ; ແລະ ທັງໝົດນີ້ເກີດຂຶ້ນໃນວັນເວລາຂອງຊິບລຳ.
8 ແລະ ຜູ້ຄົນເລີ່ມກັບໃຈຈາກຄວາມຊົ່ວຮ້າຍຂອງພວກເຂົາ; ແລະ ຕາບໃດທີ່ພວກເຂົາກັບໃຈ ພຣະຜູ້ເປັນເຈົ້າຍັງມີ ກເມດຕາຕໍ່ພວກເຂົາຢູ່ສະເໝີ.
9 ແລະ ເຫດການໄດ້ບັງເກີດຂຶ້ນຄື ຊິບລຳຖືກຂ້າ, ແລະ ເຊດຖືກຈັບໄປເປັນຊະເລີຍ, ແລະ ໄດ້ຢູ່ໃນຄວາມເປັນຊະເລີຍຕະຫລອດວັນເວລາຂອງລາວ.
10 ແລະ ເຫດການໄດ້ບັງເກີດຂຶ້ນຄື ເອຫາ ລູກຊາຍຂອງລາວໄດ້ຮັບອານາຈັກມາປົກຄອງແທນ; ແລະ ລາວໄດ້ປົກຄອງຜູ້ຄົນຕະຫລອດວັນເວລາຂອງລາວ. ແລະ ລາວໄດ້ເຮັດຄວາມຊົ່ວຮ້າຍນາໆປະການໃນວັນເວລາຂອງລາວ, ຊຶ່ງດ້ວຍເຫດນີ້ ມັນຈຶ່ງໄດ້ເຮັດໃຫ້ເກີດການຂ້າຟັນກັນຢ່າງໜັກໃນເວລາອັນສັ້ນໆຂອງລາວ.
11 ແລະ ອີເທັມ, ໂດຍທີ່ເປັນຜູ້ສືບຕະກຸນຂອງເອຫາ, ຈຶ່ງໄດ້ຮັບອານາຈັກມາປົກຄອງ; ແລະ ລາວໄດ້ເຮັດສິ່ງທີ່ຊົ່ວຮ້າຍໃນວັນເວລາຂອງລາວຄືກັນ.
12 ແລະ ເຫດການໄດ້ບັງເກີດຂຶ້ນຄື ໃນວັນເວລາຂອງອີເທັມ, ໄດ້ມີສາດສະດາຫລາຍທ່ານມາທຳນາຍແກ່ຜູ້ຄົນອີກ; ແທ້ຈິງແລ້ວ, ພວກເພິ່ນໄດ້ທຳນາຍວ່າ ພຣະຜູ້ເປັນເຈົ້າຈະທຳລາຍພວກເຂົາໃຫ້ໝົດສິ້ນໄປຈາກຜືນແຜ່ນດິນໂລກຖ້າຫາກພວກເຂົາບໍ່ກັບໃຈຈາກຄວາມຊົ່ວຮ້າຍຂອງພວກເຂົາເສຍກ່ອນ.
13 ແລະ ເຫດການໄດ້ບັງເກີດຂຶ້ນຄື ຜູ້ຄົນໄດ້ເຮັດໃຈແຂງກະດ້າງ, ແລະ ບໍ່ຍອມ ກເຊື່ອຟັງຄຳຂອງພວກເພິ່ນເລີຍ; ແລະ ສາດສະດາໂສກເສົ້າ ແລະ ໄດ້ອອກໄປຈາກບັນດາຜູ້ຄົນ.
14 ແລະ ເຫດການໄດ້ບັງເກີດຂຶ້ນຄື ອີເທັມໄດ້ດຳເນີນການຕັດສິນດ້ວຍຄວາມຊົ່ວຮ້າຍຕະຫລອດວັນເວລາທັງໝົດຂອງລາວ; ແລະ ລາວໄດ້ມີລູກຊາຍຊື່ວ່າ ໂມຣັນ. ແລະ ເຫດການໄດ້ບັງເກີດຂຶ້ນຄື ໂມຣັນໄດ້ຂຶ້ນປົກຄອງແທນ ແລະ ໂມຣັນໄດ້ເຮັດສິ່ງທີ່ຊົ່ວຮ້າຍຕໍ່ພຣະພັກຂອງພຣະຜູ້ເປັນເຈົ້າ.
15 ແລະ ເຫດການໄດ້ບັງເກີດຂຶ້ນຄື ໄດ້ເກີດມີ ກການກະບົດຂຶ້ນໃນບັນດາຜູ້ຄົນ, ຍ້ອນວ່າການມົ້ວສຸມລັບນັ້ນຊຶ່ງສ້າງຂຶ້ນເພື່ອຫາອຳນາດ ແລະ ຫາຜົນປະໂຫຍດ; ແລະ ເກີດມີຜູ້ໜຶ່ງທີ່ຍິ່ງໃຫຍ່ໃນຄວາມຊົ່ວຮ້າຍໃນບັນດາພວກເຂົາ, ແລະ ໄດ້ສູ້ຮົບກັບໂມຣັນ, ຊຶ່ງດ້ວຍເຫດນີ້ລາວຈຶ່ງໄດ້ໂຄ່ນລົ້ມອານາຈັກໄປເຄິ່ງໜຶ່ງ; ແລະ ລາວໄດ້ປົກຄອງອານາຈັກເຄິ່ງນັ້ນເປັນເວລາຫລາຍປີ.
16 ແລະ ເຫດການໄດ້ບັງເກີດຂຶ້ນຄື ໂມຣັນໄດ້ໂຄ່ນລົ້ມຄືນ, ແລະ ໄດ້ຍຶດເອົາອານາຈັກຄືນມາອີກ.
17 ແລະ ເຫດການໄດ້ບັງເກີດຂຶ້ນຄື ມີຄົນໜຶ່ງອີກທີ່ຍິ່ງໃຫຍ່; ແລະ ລາວເປັນຜູ້ສືບຕະກຸນຂອງນ້ອງຊາຍຂອງຢາເຣັດ.
18 ແລະ ເຫດການໄດ້ບັງເກີດຂຶ້ນຄື ລາວໄດ້ໂຄ່ນລົ້ມໂມຣັນ ແລະ ຍຶດເອົາອານາຈັກ; ດັ່ງນັ້ນ, ໂມຣັນຈຶ່ງໄດ້ຢູ່ໃນຄວາມເປັນຊະເລີຍຕະຫລອດວັນເວລາທີ່ເຫລືອຢູ່ຂອງລາວ; ແລະ ລາວໄດ້ມີລູກຊາຍຊື່ວ່າ ໂຄຣິອານທໍ.
19 ແລະ ເຫດການໄດ້ບັງເກີດຂຶ້ນຄື ໂຄຣິອານທໍໄດ້ຢູ່ໃນຄວາມເປັນຊະເລີຍຕະຫລອດວັນເວລາຂອງລາວ.
20 ແລະ ໃນວັນເວລາຂອງໂຄຣິອານທໍ ໄດ້ມີສາດສະດາຫລາຍທ່ານມາທຳນາຍເຖິງເລື່ອງທີ່ຍິ່ງໃຫຍ່ ແລະ ໜ້າອັດສະຈັນອີກ, ແລະ ໄດ້ປ່າວປະກາດການກັບໃຈຕໍ່ຜູ້ຄົນ, ແລະ ຖ້າຫາກພວກເຂົາບໍ່ກັບໃຈ ອົງພຣະຜູ້ເປັນເຈົ້າຈະດຳເນີນ ກການພິພາກສາພວກເຂົາ ຈົນເຖິງຄວາມພິນາດທັງໝົດຂອງພວກເຂົາ;
21 ແລະວ່າອົງພຣະຜູ້ເປັນເຈົ້າຈະສົ່ງ ຫລື ນຳເອົາ ກຄົນອື່ນມາເປັນເຈົ້າຂອງແຜ່ນດິນໂດຍອຳນາດຂອງພຣະອົງ, ຕາມວິທີທີ່ພຣະອົງນຳເອົາບັນພະບຸລຸດຂອງພວກເຂົາມານັ້ນ.
22 ແລະ ພວກເຂົາບໍ່ໄດ້ຍອມຮັບຄຳທັງໝົດຂອງສາດສະດາເລີຍ, ຍ້ອນວ່າສັງຄົມລັບ ແລະ ຄວາມໜ້າກຽດຊັງອັນຊົ່ວຮ້າຍຂອງພວກເຂົາ.
23 ແລະ ເຫດການໄດ້ບັງເກີດຂຶ້ນຄື ໂຄຣິອານທໍໄດ້ມີລູກຊາຍຊື່ວ່າ ກອີເທີ, ແລະ ລາວໄດ້ສິ້ນຊີວິດໄປ, ໂດຍຢູ່ໃນຄວາມເປັນຊະເລີຍຕະຫລອດວັນເວລາຂອງລາວ.