1 Ma sa o mai foi i aso o Komi ia perofeta e toatele, ma valoia le faaumatiaina o lena nuu tele vagana ai ua latou salamo, ma liliu mai i le Alii, ma tuu lo latou fasioti tagata ma le amioleaga.

2 Ma sa oo ina teena perofeta e tagata, ma sa latou sosola atu ia Komi mo se puipuiga, ona sa saili tagata e faaumatia i latou.

3 Ma sa latou vavalo atu ia Komi mea e tele; ma sa faamanuiaina o ia i ona aso uma na totoe.

4 Ma sa ola o ia i se soifuaga umi, ma ia fanauina Sepeloma; ma sa nofotupu Sepeloma e sui ia te ia. Ma sa fouvale le uso o Sepeloma ia te ia, ma sa amata ona i ai o se taua tele lava i le laueleele atoa.

5 Ma sa oo ina faatonu e le uso o Sepeloma ia fasiotia perofeta uma o ē na vavalo e uiga i le faaumatiaina o le nuu;

6 Ma sa i ai se malaia tele i le laueleele atoa, ona sa latou molimau atu e i ai se fetuu tele o le a oo mai i luga o le fogaeleele, ma i luga foi o tagata, ma o le a i ai se faaumatiaga tele i totonu o i latou, o se ituaiga e le’i oo mai lava i le lalolagi, ma o le a avea o latou ivi e pei o ni ^afaaputuga eleele i luga o le laueleele vagana ai ua latou salamo i a latou amioleaga.

7 Ma sa latou lē faalogo i le siufofoga o le Alii, ona o a latou faapotopotoga amioleaga; o le mea lea na amata ai ona i ai o taua ma finauga i le fogaeleele atoa, ma oge foi e tele ma faama’i, sa oo ina oo mai se faafanoga tele, o se ituaiga e le’i vaaia lava i le lalolagi; ma o nei mea uma na oo mai i aso o Sepeloma.

8 Ma sa amata ona salamo tagata i lo latou amioletonu; ma e tusa ai ma lo latou salamo, na ^aalofa mutimutivale ai le Alii ia te i latou.

9 Ma sa oo ina fasiotia Sepeloma, ma sa aumai Setu e faatagataotaua, ma sa nofo o ia faatagataotaua i ona aso uma.

10 Ma sa oo ina maua e Asa, lona atalii, le malo; ma sa nofotupu o ia i luga o le nuu i ona aso uma. Ma sa ia faia uiga amioletonu eseese uma i ona aso, lea na tupu mai ia te ia le faamasaa toto tele; ma sa itiiti ona aso.

11 Ma o Etema, ona o ia o sē e tupuga mai ia Asa, sa ia mauaina le malo; ma sa ia faia foi mea amioleaga i ona aso.

12 Ma sa oo ina o mai i aso o Etema, perofeta e toatele, ma toe vavalo atu i tagata; ioe, sa latou vavalo atu o le a matuā faaumatia lava i latou e le Alii mai luga o le fogaeleele vagana ai ua latou salamo mai i a latou amioletonu.

13 Ma sa oo ina faamaaa e tagata o latou loto, ma latou lē fia ^afaalogo i a latou upu; ma sa faanoanoa perofeta ma o ese mai totonu o le nuu.

14 Ma sa oo ina faia e Etema faamasinoga i le amioleaga i ona aso uma; ma sa ia fanauina Morona. Ma sa oo ina nofo Morona e suitulaga ia te ia; ma sa faia e Morona mea sa amioleaga i luma o le Alii.

15 Ma sa oo ina tula’i mai se ^afouvalega i totonu o tagata, ona o lena faapotopotoga faalilolilo lea sa faatuina ina ia maua ai le pule ma le oa; ma sa tula’i mai totonu o i latou se tagata malosi i le amioletonu, ma ua tau ma Morona, lea na ia faatoilaloina ai le afa o le malo; ma sa ia pulea le afa o le malo mo tausaga e tele.

16 Ma sa oo ina faatoilalo o ia e Morona, ma sa ia toe maua le malo.

17 Ma sa oo ina tula’i mai se isi tagata malosi; ma o ia o sē e tupuga mai le uso o Iareto.

18 Ma sa oo ina ia faatoilaloina Morona ma mauaina le malo; o le mea lea na nofo ai Morona faatagataotaua i ona aso uma na totoe; ma sa ia fanauina Korianetoa.

19 Ma sa oo ina nofo Korianetoa faatagataotaua i ona aso uma.

20 Ma o ona po o Korianetoa na o mai ai foi perofeta e toatele, ma vavalo mai i mea tetele ma ofoofogia, ma alaga atu le salamo i tagata, ma vagana ai ua latou salamo o le a faia e le Alii le Atua le ^afaamasinoga e faasaga ia te i latou e oo ina faaumatia atoa ai i latou.

21 Ma o le a auina mai pe aumai e le Alii le Atua se ^atasi nuu e umia le laueleele, i lona mana, e pei o le ala na ia aumai ai o latou tamā.

22 Ma sa latou teena upu uma a perofeta, ona o la latou sosaiete faalilolilo ma mea inosia amioleaga.

23 Ma sa oo ina fanauina ^aEteru e Korianetoa, ma sa oti o ia, ina o nofo faatagataotaua i ona aso uma.