1 ’E i muri a’era, tē ora ra Etera i te mau mahana o Korianetumera ; ’e e ari’i ho’i Korianetumera i ni’a i te mau fenua ato’a i reira.

2 ’E e peropheta Etera nā te Fatu ; nō reira ’ua haere mai Etera i te mau mahana o Korianetumera ’e ’ua ha’amata ihora i te tohu atu i te mau ta’ata, ’e ’aita roa e ti’a iāna ’ia tāpe’ahia, nō te mea tei roto te Vārua o te Fatu iāna.

3 ’Ua a’o atu ho’i ’oia mai te po’ipo’i ē tae noa atu i te ma’irira’a o te mahana, ma te fa’aue atu i te mau ta’ata ’ia ti’aturi i te Atua e tae atu ai i te tātarahapara’a, ’ia ’ore rātou ’ia ha’amouhia, i te nā-’ō-ra’a atu ia rātou ē, nā roto i te fa’aro’o e tupu mai ai te mau mea ato’a—

4 Nō reira, ’o ’oia ’o tē ti’aturi i te Atua, e riro ato’a ’oia i te ti’aturi ē tē vai ra te hō’ē ao maita’i roa, ’oia ïa, te hō’ē vāhi i te rima ’atau o te Atua, ’e e tae mai ho’i taua ti’aturira’a ra nā roto i te fa’aro’o, ’e e riro ho’i te reira ’ei tūtau nō te vārua o te ta’ata nei, nō te ha’apūai ’e nō te tāpe’a māite ia rātou, ’ia tāmau noa i roto i te mau ’ohipa maitata’i, ’e ’ia arata’ihia nō te fa’ahanahana i te Atua.

5 ’E i muri a’era, ’ua tohu atu ra Etera i te mau mea rarahi ’e te māerehia i te mau ta’ata, ’e ’aita rātou i ti’aturi, nō te mea ’aita rātou i ’ite mata atu i te reira.

6 ’E i teienei, e parau ri’i atu vau, ’o Moroni, nō ni’a i teie nei mau mea ; e fa’a’ite atu vau i tō te ao nei ē, te fa’aro’o ’o te ti’aturira’a ïa i te mau mea ’aore i hi’ohia ; nō reira, ’eiaha ’outou e mārō nō te mea ’aore ’outou i ’ite atu ; e ’ore ho’i ’outou e fāri’i i te ’ite pāpū ē tae noa atu i te hope’ara’a nō te tāmatara’a o tō ’outou fa’aro’o.

7 Nō te fa’aro’o ho’i i fa’a’ite mai ai te Mesia iāna iho i tō tātou ra mau metua, i muri a’e i tōna ti’afa’ahoura’a mai te pohe mai ; ’e ’aita ho’i ’oia i fa’a’ite mai iāna iho ia rātou, ē tae roa atu ’ua vai tō rātou fa’aro’o iāna ; nō reira, e mea ti’a roa ’ia vai tō te tahi mau ta’ata fa’aro’o iāna, nō te mea ’aita ’oia e fa’a’ite mai iāna iho i tō te ao nei.

8 ’E nō te fa’aro’o ho’i o te ta’ata nei i fa’a’ite mai ai ’oia iāna iho i tō te ao nei, ’e i fa’ahanahana ai i te i’oa o te Metua ; ’e i fa’aineine ai ho’i i te ’ē’a ’ia ti’a ia vetahi ’ē ’ia fāri’i i te hōro’a nō te ra’i mai, ’ia ti’a ia rātou ’ia ti’aturi i taua mau mea tei ’ore i hi’ohia e rātou ra.

9 Nō reira, e fāri’i ato’a ’outou i te ti’aturira’a, ’e i te hōro’a, mai te mea e fa’aro’o tō ’outou.

10 Inaha, nō te fa’aro’o ho’i i pi’ihia ai tō tahito ra ’ia au i te fa’anahora’a mo’a a te Atua.

11 Nō reira, nō te fa’aro’o i hōro’ahia mai ai te ture a Mose. ’Āre’a rā nā roto i te hōro’ara’a i tāna iho Tamaiti, ’ua fa’aineine te Atua i te hō’ē rāve’a maita’i a’e ; ’e nā roto ho’i i te fa’aro’o i fa’atupuhia ai te reira.

12 Mai te mea ho’i ’aore e fa’aro’o i rotopū i te mau tamari’i a te ta’ata nei, ’aore ato’a ïa e ti’a i te Atua ’ia rave i te semeio i rotopū ia rātou ; nō reira, ’aita roa ’oia i fa’a’ite mai iāna iho ia rātou ē tae noa atu ’ua tupu tō rātou fa’aro’o.

13 Inaha, nō te fa’aro’o o Alama ’e Amuleka i ha’apararīhia ai te fare tāpe’ara’a ’ia topa i ni’a i te fenua.

14 Inaha, nō te fa’aro’o o Nephi ’e Lehi i fa’ahuru-’ē-hia ai te mau ’āti Lamana, ’e nō reira ’ua bāpetizohia rātou i te auahi ’e te Vārua Maita’i.

15 Inaha, nō te fa’aro’o o Amona ’e tōna mau taea’e i tupu ai te hō’ē semeio rahi i rotopū i te mau ’āti Lamana.

16 ’Oia ïa, ’e ’o rātou ato’a ’o tei fa’atupu i te mau semeio, ’ua fa’atupu ïa rātou i te reira nā roto i te fa’aro’o, ’oia ïa, te feiā nā mua atu i te Mesia ’e te feiā ato’a i muri mai.

17 ’E nō te fa’aro’o ho’i i roa’a ai i nā pipi to’otoru te fafaura’a ē e ’ore roa rātou e ’ite i te pohe ; ’e ’aita roa rātou i fāri’i i te fafaura’a ē tae noa atu ’ua tupu tō rātou fa’aro’o.

18 ’E i te mau tau ato’a ’aore roa te ta’ata i rave i te mau semeio ē tae noa atu ’ua tupu tō rātou fa’aro’o ; nō reira, ’ua ti’aturi rātou nā mua roa i te Tamaiti a te Atua.

19 ’E hou te Mesia i tae mai ai, tē vai ra e rave rahi tei roto ia rātou te fa’aro’o rahi roa, ’e nō reira ’aore roa e ti’a ia rātou ’ia tāpe’ahia ’ia ’ore ’ia ’ite i te tahi pae mai o te pāruru, ’ua ’ite mau rā tō rātou mata i te mau mea tei hi’ohia e te mata nō te fa’aro’o, ’e ’ua ’oa’oa atu ra rātou.

20 ’E inaha, ’ua ’itea ia tātou i roto i teie nei pāpa’a parau ē, te hō’ē o rātou, ’o te taea’e ïa o Iareda ; ’e nō te rahi o tōna fa’aro’o i te Atua, i te fa’atorora’a mai te Atua i tōna manimani rima, ’aita roa e ti’a iāna ’ia huna i te reira i te mata o te taea’e o Iareda, nō tāna ho’i parau i parauhia e ana iāna ra, e parau ho’i tei roa’a iāna nā roto i te fa’aro’o.

21 ’E i muri iho i tō te taea’e o Iareda ’itera’a i te manimani rima o te Fatu, nō te fafaura’a i roa’a i te taea’e o Iareda nā roto i te fa’aro’o, ’aita roa i ti’a i te Fatu ’ia tāpe’a i te hō’ē mea mai mua atu i tōna mata ; nō reira ’ua fa’a’ite mai ’oia i te mau mea ato’a iāna, ’e ’aore roa ho’i i ti’a iāna ’ia tāpe’ahia i rāpae mai i te pāruru.

22 ’E nā roto i te fa’aro’o i roa’a ai i tō’u ra mau metua te fafaura’a ē, e tae teie nei mau mea i tō rātou mau taea’e nā roto i te mau ’Ētene ; nō reira ’ua fa’aue mai te Fatu iā’u, ’oia ’o Iesu Mesia.

23 ’E ’ua nā ’ō atu ra vau iāna : E te Fatu, e vahavaha mai te mau ’Ētene i teie nei mau mea nō tō mātou paruparu i te pāpa’i ; ’e ’ua fa’ariro ho’i ’oe ia mātou ’ei mea pūai i te parau nā roto i te fa’aro’o, ’aita rā ’oe i fa’ariro ia mātou ’ei mea pūai i te pāpa’i i te parau ; ’e ’ua fa’ariro ho’i ’oe i teie nei feiā ato’a ’ia rahi tā rātou parau vaha, nō te Vārua Maita’i tā ’oe i hōro’a mai ia rātou ra.

24 ’E ’ua fa’ariro ’oe ia mātou ’ei mea ’ite ri’i i te pāpa’i, nō te huru au ’ore o tō mātou rima. Inaha, ’aita ’oe i fa’ariro ia mātou ’ei feiā pūai i te pāpa’i mai te taea’e o Iareda ra ; ’e ’ua fa’ariro ho’i ’oe i te mau mea tāna i pāpa’i ’ei mea pūai rahi mai ia ’oe ra, ’e hina’aro roa atu ra te ta’ata e tai’o i te reira.

25 ’Ua fa’ariro ato’a ho’i ’oe i tā mātou parau ’ei mea pūai ’e te rahi, ’e ’aore e ti’a ia mātou ’ia pāpa’i i te reira ; nō reira, ’ia pāpa’i mātou i te reira, ’ua ’ite mātou i tō mātou paruparu, ’e ’ua turori atu ra i te tu’ura’a i tā mātou mau parau ; ’e tē mata’u nei au ’o te vahavaha mai te mau ’Ētene i tā mātou mau parau.

26 ’E ’ia oti a’era tā’u paraura’a i te reira ra, ’ua parau mai ra te Fatu iā’u, i te nā-’ō-ra’a mai ē : E vahavaha te feiā ma’ama’a, e ’oto rā rātou ; e nava’i ho’i tō’u maita’i nō te feiā ha’eha’a, ’ia ’ore rātou e faufa’ahia i tō ’outou paruparu.

27 ’E ’ia haere mai te ta’ata iā’u nei, e fa’a’ite atu vau ia rātou i tō rātou paruparu. Tē hōro’a nei au i te paruparu i te ta’ata nei ’ia tupu tō rātou ha’eha’a ; ’e e nava’i ho’i tō’u maita’i nō te feiā ato’a i fa’aha’eha’a ia rātou iho i mua iā’u nei ; ’e ’ia fa’aha’eha’a rātou ia rātou iho i mua iā’u nei, ’e ’ia vai ho’i tō rātou fa’aro’o iā’u nei, ’ei reira vau e fa’ariro ai i te mau mea paruparu ’ei mea pūai nō rātou.

28 Inaha, e fa’a’ite atu vau i te mau ’Ētene i tō rātou paruparu, ’e e fa’a’ite atu vau ia rātou ē, e fa’atae mai te fa’aro’o, te ti’aturi, ’e te here, i te ta’ata iā’u nei—te vai piha’a o te mau parauti’a ato’a ra.

29 ’E ’ia fa’aro’o a’era vau, ’o Moroni, i teie mau parau, ’ua tupu ihora te hau i roto iā’u, ’e ’ua nā ’ō atu ra vau : E te Fatu, ’ia tupu tō ’oe na hina’aro parauti’a, ’ua ’ite ho’i au ē, tē rave noa na ’oe i tā ’oe ’ohipa i te mau tamari’i a te ta’ata nei mai te au i tō rātou ra fa’aro’o.

30 ’Ua parau atu ho’i te taea’e o Iareda i te mou’a ra o Zerina, ’A fa’anu’u ’ē atu—’e ’ua fa’anu’u-’ē-hia atu ra. ’E ’āhiri ’aita tōna e fa’aro’o, ’aita ïa e fa’anu’u-’ē-hia atu ; nō reira ’ia vai te fa’aro’o o te ta’ata, ’ei reira ’oe e rave ai i te ’ohipa.

31 ’Ua nā reira ho’i ’oe i te fa’a’ite mai ia ’oe iho i tā ’oe ra mau pipi ; inaha i muri iho i te tupura’a tō rātou fa’aro’o, ’e i te paraura’a nā roto i tō ’oe ra i’oa, ’ei reira ’oe i fa’a’ite mai ai ia ’oe iho ia rātou ma te mana rahi.

32 ’E tē ha’amana’o ato’a nei ho’i au ē, i parau na ’oe ē, ’ua fa’aineine ’oe i te hō’ē fare nō te ta’ata nei ; ’oia ïa, i rotopū i te mau aora’i o tō ’oe ra Metua, ’ei reira e tupu ai tō te ta’ata ti’aturira’a rahi a’e ; nō reira ’ia ti’aturi te ta’ata e ti’a ai, ’e mai te mea ’aita, ’aita ïa ’oia e fāri’i i te ’āi’a i te vāhi tā ’oe i fa’aineine.

33 ’E teie fa’ahou ā, tē ha’amana’o nei au ē, i parau na ’oe ē, ’ua aroha ’oe i tō te ao nei, ’e ’ua tae roa i te tu’ura’a i tō ’oe ora i raro nō tō te ao nei, nō te rave fa’ahou mai i te reira, nō te fa’aineine i te hō’ē vāhi nō te mau tamari’i a te ta’ata nei.

34 ’E i teienei, tē ’ite nei au ē, teie aroha tō ’oe nō te mau tamari’i a te ta’ata nei ’o te aroha mau ïa ; nō reira, ’ia ’ore te aroha mau ’ia vai i roto i te ta’ata nei, e ’ore ato’a ïa e roa’a ia rātou taua vāhi ra ’o tā ’oe i fa’aineine i roto i te mau aora’i o tō ’oe ra Metua.

35 Nō reira, ’ua ’ite au nā roto i teie mea ’o tā ’oe i parau iho nei ē, mai te mea ’aita te aroha mau e vai i roto i te mau ’Ētene, nō tō mātou paruparu, e riro ’oe i te tāmata ia rātou, ’e i te rave ’ē atu i tā rātou tārēni, ’oia ïa, ’e tae noa atu i te mea tā rātou i fāri’i na, ’e ’a hōro’a atu ai nā te feiā ’o tē fāri’i rahi atu ā.

36 ’E i muri a’era ’ua pure atu ra vau i te Fatu ’ia hōro’a mai i te maita’i i te mau ’Ētene, ’ia ti’a ia rātou ’ia fāri’i i te aroha mau.

37 ’E i muri a’era ’ua nā ’ō mai ra te Fatu iā’u : Mai te mea ē ’aita te aroha mau i roto ia rātou ’aita ïa tō te reira e faufa’a ia ’oe na, ’ua ha’apa’o maita’i ho’i ’oe ; nō reira e tāmāhia tō ’oe na mau ’ahu. ’E nō te mea ho’i ’ua ’ite ’oe i tō ’oe paruparu, e fa’arirohia ïa ’oe ’ei mea pūai, ē tae noa atu i te pārahira’a i te vāhi ’o tā’u i fa’aineine i roto i te mau aora’i o tō’u ra Metua.

38 ’E i teienei, te parau nei au, ’o Moroni, i te mau ’Ētene, ’a pārahi, ’oia ïa, ’e tae noa atu ho’i i tō’u mau taea’e ’o tā’u i here, ē tae noa atu ’ua fārerei fa’ahou tātou i mua i te vāhi ha’avāra’a a te Mesia, ’e i reira te mau ta’ata ato’a e ’ite ai ē, ’aita tō’u mau ’ahu i pōra’o i tō ’outou ra toto.

39 ’E i reira ’outou e ’ite ai ē, ’ua ’ite mata vau ia Iesu, ’e ’ua paraparau mai ’oia iā’u, te mata ’e te mata, ’e ’ua fa’a’ite mai ’oia iā’u ma te ha’eha’a mau, mai tā te hō’ē ta’ata e fa’a’ite atu i te tahi atu i roto i tō’u iho reo, i teie nei mau mea.

40 ’E e mea iti roa tā’u i pāpa’i, nō tō’u paruparu i te pāpa’i.

41 ’E i teienei, tē fa’aue atu nei au ia ’outou ’ia ’imi i teie nei Iesu ’o tā te mau peropheta ’e te mau ’āpōsetolo i pāpa’i ra, ’ia vai te maita’i o te Atua te Metua, ’e tō te Fatu ra ’o Iesu Mesia, ’e tō te Vārua Maita’i i roto ia ’outou na ē a muri noa atu, nō te fa’a’ite pāpū i te reira ia ’outou na. ’Āmene.