Dagiti Nasantuan a Kasuratan
Ether 15


Kapitulo 15

Linaklaksa a Jaredite ti mapapatay iti pagbabakalan—Ummongen da Shiz ken Coriantumr dagiti amin a tao a makirapukrapok—Isardeng ti Espiritu ti Apo ti mangtarabay kadakuada—Madadael a kasta unay ti pagilian a Jaredite—Ni la Coriantumr ti mabati.

1 Ket napasamak idi makaungar ni Coriantumr kadagiti sugatna, linagipna dagiti abalikas nga imbaga kenkuana ni Ether.

2 Nakitana nga agarup a duan a laksa a tattao ti napapatay iti espada, ket nangrugi a nakarikna iti liday iti pusona; wen, addan dua a laksa a maingel a lallaki, ken kasta met dagiti assawa ken annakda.

3 Rinugianna ti nagbabawi iti dakes nga inaramidna; rinugianna a linagip dagiti balikas a nagaon iti ngiwat dagiti propeta, ket nakitana ti pannakapasamakda, uray ti ultimo a kabassitan; ket nagladingit ti kaungganna ket nagkedked a maliwliwa.

4 Ket napasamak a sinuratanna ni Shiz, a tarigagayanna a kaasianna dagiti tao, ket isukona ti pagarian tapno agbiag laeng dagiti tao.

5 Ket napasamak nga idi naawat ni Shiz ti suratna sinuratanna ni Coriantumr, a no isukona ti bagina, a mabalin a papatayenna iti espadana, maisalakanna ti biag dagiti tao.

6 Ket napasamak a saan a nagbabawi dagiti tao iti basbasolda; ket nakasuron dagiti tao ni Coriantumr kadagiti tao ni Shiz; ket nakasuron dagiti tao ni Shiz kadagiti tao ni Coriantumr; gapuna, nakidangadang dagiti tao ni Shiz kadagiti tao ni Coriantumr.

7 Ket idi makita ni Coriantumr a dandanin maabak nagpakaasi manen kadagiti tao ni Shiz.

8 Ket napasamak a nakadanon iti dandanum ti Ripliancum, nga, iti panangipatarus, dakkel, wenno rimbawanna ti amin; gapuna, idi makadanonda kadagitoy a dandanum impatakderda dagiti toldada; ket impatakder met ni Shiz ti toldana iti asidegda; ket ngarud iti kabigatanna umayda manen makidangadang.

9 Ket napasamak a nakirangetda iti nakaro a dangadang, a nakasugatan manen ni Coriantumr, ket nadalupo iti panagsayasay ti dara.

10 Ket napasamak a dinarup dagiti buyot ni Coriantumr dagiti buyot ni Shiz ket inabakda ida, a nakaigapuan ti pananglibasda kadakuada; ket naglibasda iti abagatan, ket impatakderda dagiti toldada iti lugar a naawagan iti Ogath.

11 Ket napasamak nga impatakder ti buyot ni Coriantumr dagiti toldada iti turod a Rama; ket iti dayta met la a turod ti anangilemmengan ni amak a ni Mormon kadagiti sinurat ti Apo, a nasagraduan.

12 Ket napasamak a nagtitipon amin dagiti tao iti amin a rabaw ti daga, a saan a napapatay, malaksid ni Ether.

13 Ket napasamak a naimatangan amin ni Ether dagiti ar-aramiden dagiti tao; ket naimatanganna a nakiummong dagiti tao a mangayon ken ni Coriantumr iti buyot ni Coriantumr; ket nakiummong dagiti tao a mangayon ken ni Shiz iti buyot ni Shiz.

14 Gapuna, uppat a tawen nga inum-ummongda dagiti tao, tapno maummongda amin nga adda iti rabaw ti daga, ken bareng no maawatda ti amin a pigsa a mabalinda nga awaten.

15 Ket napasamak nga idi maummongda aminen, ti tunggal maysa iti buyot a kayatna, a kaduada dagiti assawa ken annakda—lallaki, babbai ken ubbing a naarmasan kadagiti igam a pakigubat, nga addaan iti kalasag, ken akabal, ken bistukol, ken nakawesan iti pakigubat—nagmartsada a nagaabay ken nagsasaruno a mapan makidangadang; ket nakirangetda iti nagmalem, ket saanda a naabak.

16 Ket napasamak a nabannogda idi rabiin, ket naginanada kadagiti kampoda; ket kalpasan ti panaginanada kadagiti kampoda nagasugda ken nagdung-aw gapu iti pannakapukaw dagiti napapatay a tattaoda; ket napigsa ti sangsangitda, ti as-asug ken dungdung-awda, ket pinisangda ti tangatang iti uray la nga.

17 Ket napasamak nga iti kabigatanna napanda manen nakidangadang, ket naindaklan ken nakaam-amak dayta nga aldaw; nupay kasta, saanda a naparmek, ket idi dumteng manen ti rabii pinisangda ti tangatang iti sangsangitda, ken iti as-asugda, ken iti dungdung-awda, iti pannakapukaw dagiti napapatay a tattaoda.

18 Ket napasamak a sinuratan manen ni Coriantumr ni Shiz, a tinarigagayanna a saan koman nga umay pay makidangadang, ngem alaenna ti pagarian, ket isalakanna ti biag dagiti tao.

19 Ngem adtoy, insardengen ti Espiritu ti Apo ti nangtarabay kadakuada, ket sinerreken ti bileg ni aSatanas ti puspuso dagiti tao; ta insukodan iti kinatangken ti panagpuspusoda, ken ti kinabulsek ti pampanunotda tapno madadaelda; gapuna napanda manen nakidangadang.

20 Ket napasamak a nagmalmalem a nakirangetda, ket idi dumteng ti rabii naturogda kadagiti espadada.

21 Ket iti kabigatanna nakirangetda pay agingga a dimteng ti rabii.

22 Ket idi dumteng ti rabii anabartekda iti pungtot, a kas iti pannakabartek ti lalaki iti arak; ket naturogda manen kadagiti espadada.

23 Ket iti kabigatanna nakirangetda manen; ket iti rabii napasagda amin babaen ti espada malaksid ti limapulo-ket-dua kadagiti tao ni Coriantumr, ken innem-a-pulo-ket-siam kadagiti tao ni Shiz.

24 Ket napasamak a naturogda kadagiti espadada iti dayta a rabii, ket iti kabigatanna nakirangetda manen, ket nagtalekda iti kinamaingelda kadagiti espadada ken iti kalkalasagda, iti nagmalem.

25 Ket idi dumteng ti rabii adda tallopulo-ket-dua a tattao ni Shiz, ken duapulo-ket-pito ti tattao ni Coriantumr.

26 Ket napasamak a nangan ken naturogda, ken nagsaganada iti patay iti kabigatanna. Ket dadakkel ken maingelda a lallaki a kas iti kabileg ti lallaki.

27 Ket napasamak a nakirangetda iti uneg ti tallo nga oras, ket naglusdoyda iti pannakaadasda iti dara.

28 Ket napasamak nga idi nakaawat dagiti tao ni Coriantumr iti umdas a pigsa tapno makapagnada, ikalakagda koman ti biagda; ngem adtoy, timmakder ni Shiz, ken kasta met dagiti taona, ket insapatana ti pungtotna a papatayenna ni Coriantumr wenno mapukaw babaen ti espada.

29 Gapuna, kinamatna ida, ket iti kabigatanna naabutanna ida; ket nagrarangetda manen babaen ti espada. Ket napasamak nga idi naidasayda aaminen babaen ti espada, malaksid ken ni Coriantumr ken ni Shiz, adtoy naglusdoy ni Shiz iti pannakaadasna iti dara.

30 Ket napasamak nga idi agsadag ni Coriantumr iti espadana, a naginana bassit, tinagbatna ti ulo ni Shiz.

31 Ket napasamak nga idi matagbatna ti ulo ni Shiz, a timmakder ni Shiz kadagiti imana sa nadalupo; ket kalpasan dayta nagbugsot, sa natay.

32 Ket napasamak a nadalupo ni aCoriantumr iti daga, ket nagbalin a kasla awanen ti biagna.

33 Ket nagsao ti Apo ken ni Ether, a kinunana kenkuana: Mapanka. Ket napan, ket naimatanganna a natungpal aminen dagiti balikas ti Apo; ket inleppasna ti akasuratanna; (ket saanko nga insurat ti maika-sangagasut a pasetna) ket indulinna iti wagas a pannakasarak dagiti tao ni Limhi kadakuada.

34 Ita dagitoy dagiti maudi a balikas nga insurat ni aEther: Nagayatan man ti Apo a maipatarusko, wenno tinungpalko ti pagayatan ti Apo iti lasag, saan a napateg, no la ketdi dayta ti pakaisalakanak iti pagarian ti Dios. Amen.