1 Ma sa oo ina ua toe malosi mai Korianetuma i ona manu’a, sa amata ona ia manatua o ^aupu na fetalai mai e Eteru ia te ia.

2 Sa ia vaai ua uma ona fasiotia i le pelu le toetoe o le lua miliona o ona tagata, ma sa amata ona ia faanoanoa i lona loto; ioe, ua uma ona fasiotia o le lua miliona o tane malolosi, ma a latou avā foi ma a latou fanau.

3 Sa amata ona salamo o ia i le leaga lea na ia faia; sa amata ona ia manatua o upu na fetalai i ai fofoga o perofeta uma, ma sa vaai o ia ua faataunuuina lava i latou, o upu uma taitasi, e oo mai i lea lava taimi; ma sa faanoanoa lona agaga ma musu e faamafanafanaina.

4 Ma sa o’o ina ia tusi atu se tusi ia Sesa, e manao ia te ia ia faasaoina e ia tagata, ae o le a ia tuu atu le malo, mo le ola o tagata.

5 Ma sa o’o ina ua maua e Sesa lana tusi ma sa ia tusi mai se tusi ia Korianetuma, e faapea afai na te tuuina atu o ia lava, ina ia mafai ona ia fasiotia o ia i lana lava pelu, o le a ia faasaoina le ola o tagata.

6 Ma sa o’o ina le salamo tagata i lo latou amioletonu; ma sa faatupuina le ita o tagata o Korianetuma e faasaga i tagata o Sesa; ma sa faatupuina le ita o tagata o Sesa e faasaga i tagata o Korianetuma; o le mea lea, na sii taua atu ai tagata o Sesa i tagata o Korianetuma.

7 Ma ina ua vaai atu Korianetuma o le a pa’ū o ia sa toe sola o ia mai luma o tagata o Sesa.

8 Ma sa oo ina taunuu mai o ia i vai o Ripelianekuma, o lona uiga, pe a faaliliuina, e tele, pe sili atu i mea uma; o le mea lea, ina ua latou taunuu mai i nei vai, sa latou faatutū o latou faleie; ma sa faatutū foi e Sesa ona faleie latalata ane ia te i latou; ma o lea, o le aso na sosoo ai, sa latou o mai ai e tau.

9 Ma sa oo ina latou tau se taua tugā tele lava, lea na toe manu’a ai Korianetuma, ma matapogia ai o ia i le toto na masaa.

10 Ma sa oo ina fetaomi atu autau a Korianetuma i luga o autau a Sesa sa oo ina latou faatoilaloina i latou, ma sa oo ina latou faia ia te i latou ia sosola ai mai o latou luma; ma sa latou sosola agai i saute, ma sa latou faatutū o latou faleie i le nofoaga lea sa ta’ua o Okati.

11 Ma sa oo ina faatutū e autau a Korianetuma o latou faleie i tafatafa o le maupu’epu’e o Rama; ma o le maupu’epu’e lava lea na ^anatia mau ai e lo’u tamā o Mamona ia talafaamaumau, ua paia, mo le Alii.

12 Ma sa oo ina la’ua faapotopoto faatasi tagata uma i luga o le laueleele atoa, o ē sa le’i fasiotia, vagana ai Eteru.

13 Ma sa oo ina vaai Eteru i mea uma na fai e tagata; ma sa ia vaai o tagata sa mo Korianetuma ua faapotopoto faatasi i le autau a Korianetuma; ma o tagata sa mo Sesa ua faapotopoto faatasi i le autau a Sesa.

14 O le mea lea, sa la’ua faapotopoto faatasi ai tagata mo le va o le fa tausaga, ina ia mafai ona la maua tagata uma o ē sa i luga o le laueleele, ma ia mafai ona la maua le malosi uma e mafai ai ona la maua.

15 Ma sa oo ina ua latou faapotopoto faatasi uma, o tagata taitoatasi i le autau na filifili e ia, faatasi ma a latou avā ma a latou fanau—o tane, fafine ma fanau ua faaauupegaina i auupega o taua, ua i ai talita, ma ^aufifatafata, ma pulou-tau; ma ua oofu e tusa ma ofu o le taua—sa latou savavali atu e faasaga le tasi i le isi i le taua; ma sa latou tau i lena aso atoa, ma sa lē manumalo lava.

16 Ma sa oo ina ua oo mai le po sa latou vaivai, ma malolo atu i o latou togalauapi; ma ina ua uma ona latou malolo atu i o latou togalauapi, sa amata ona latou uiō ma lauē mo le toesea o o latou tagata ua fasiotia; ma sa matuā tele lava lo latou tagi, lo latou uiō ma auega, sa latou faia ua matuā taalili ai lava le vanimonimo.

17 Ma sa oo i le aso na sosoo ai, sa latou toe o atu e tau, ma sa tele ma mata’utia lena aso; ae ui i lea, sa latou le manumalo, ma ina ua toe oo mai le po sa latou faia ua taalili ai le vanimonimo i a latou tagi, ma a latou uiō, ma a latou faavauvauga, ona o le toesea o o latou tagata ua fasiotia.

18 Ma sa oo ina toe tusi atu e Korianetuma se tusi ia Sesa, ua manao mai ia aua nei toe sau e tau, ae ia ona ave le malo, ma faasao ola o tagata.

19 Ae faauta, ua le toe finau le Agaga o le Alii ma i latou, ma ua maua e ^aSatani le mana atoa i loto o tagata; ona ua tuu atu i latou i le maaa o o latou loto, ma le tauaso o o latou mafaufau, ina ia faaumatiaina i latou; o le mea lea na latou toe o atu ai foi e tau.

20 Ma sa oo ina latou tau i lena aso atoa, ma ina ua oo mai le po sa latou momoe ma a latou pelu.

21 Ma o le aso na sosoo ai sa latou tau seia oo mai le po.

22 Ma ina ua oo mai le po sa latou ^aonanā i le ita, e pei o se tagata o lē ua onā i le uaina; ma sa latou toe momoe ma a latou pelu.

23 Ma o le aso na sosoo ai sa latou toe tau; ma ina ua oo mai le po na latou pa’u’ū uma i le pelu vagana ai le lima sefulu ma le lua o tagata o Korianetuma, ma le ono sefulu ma le iva o tagata o Sesa.

24 Ma sa oo ina latou momoe ma a latou pelu i le po lena, ma o le aso na sosoo ai sa latou toe tau, ma sa latou tau ma lo latou malosi i a latou pelu ma a latou talita, i le aso atoa lena.

25 Ma ina ua oo mai le po sa totoe le tolu sefulu ma le lua o tagata o Sesa, ma le lua sefulu ma le fitu o tagata o Korianetuma.

26 Ma sa oo ina latou aai ma momoe, ma sauniuni mo le oti i le aso na sosoo ai. Ma o i latou o ni tagata tino lapopoa ma malolosi e tusa ai ma le malosi o tagata.

27 Ma sa oo ina latou tau mo le va o le tolu itula, ma sa latou matapogia i le toto masaa.

28 Ma sa oo ina ua lava le malosi na maua e tagata o Korianetuma e mafai ai ona latou savavali, sa fai o le a latou sosola mo o latou ola; ae faauta, sa tulai a’e Sesa, ma ona tagata foi, ma sa ia tauto i lona ita o le a ia fasiotia Korianetuma po ua fano o ia i le pelu.

29 O le mea lea, na ia tuliloa ai i latou, ma o le aso na sosoo ai na ia maua atu ai i latou; ma sa latou toe tau i le pelu. Ma sa oo ina ua latou pa’u’ū ^auma i le pelu, vagana ai Korianetuma ma Sesa, faauta sa matapogia Sesa i le toto masaa.

30 Ma sa oo ina ua uma ona totoo o Korianetuma i luga o lana pelu, seia malolo laitiiti o ia, ona ia vavae ese ai lea o le ulu o Sesa.

31 Ma sa oo ina ua uma ona ia vavae ese o le ulu o Sesa, sa tau tu a’e Sesa i luga i ona lima ma pa’ū ai; ina ua uma ona tauivi o ia e fia maua se manava, sa oti o ia.

32 Ma sa oo ina pa’ū ^aKorianetuma i le eleele, ma avea e peiseai ua leai se ola o ia te ia.

33 Ma sa fetalai mai le Alii ia Eteru, ma faapea mai ia te ia: Alu atu ia. Ma sa alu atu o ia, ma vaai ua faataunuuina afioga uma a le Alii; ma sa ia faaumaina lana ^atalafaamaumau; (ma ua ou le tusia le vaega e tasi o vaeselau) ma sa ia natiaina i latou i se ala na maua ai e tagata o Limae.

34 O lenei o upu mulimuli nei na tusia e ^aEteru: Pe finagalo le Alii ia ou liua, pe ou te mafatia i le finagalo o le Alii i la le tino, e le afaina, pe afai e faaolaina a’u i le malo o le Atua. Amene.