Japta 2

Ol laen blong Jared i mekem rere blong wokbaot blong olgeta blong go long wan promes graon—Hem i wan graon we i gud tumas we long hem ol man i mas wok blong Kraes o bae oli sakemaot olgeta—Lod i toktok long brata blong Jared blong tri aoa—Ol laen blong Jared i bildim ol sip—Lod i askem brata blong Jared blong givim wan plan, hao nao bae oli putum laet long ol sip ia.

 Mo i bin hapen se Jared mo brata blong hem, mo ol famle blong olgeta, mo tu ol fren blong Jared, mo brata blong hem mo ol famle blong olgeta, i bin go daon long vale we i bin stap long not, (mo nem blong vale i bin Nimrod, we oli bin singaotem afta strong man blong lukaotem anamol long bus) wetem ol anamol blong olgeta we oli bin karem i kam tugeta man mo woman blong evri kaen.

 Mo tu oli bin putum ol rop blong holem anamol mo kasem ol pigin blong skae; mo tu oli bin mekem rere wan kontena we long hem oli bin karem wetem olgeta ol fis blong wota.

 Mo tu oli bin karem wetem olgeta deseret, we, long lanwis ia, i wan sugabag; mo olsem ia nao oli bin karem wetem olgeta ol grup blong ol sugabag, mo evri kaen samting we i bin stap long fes blong graon, ol sid blong evri kaen.

 Mo i bin hapen se taem we oli bin kam daon insaed long vale blong Nimrod, Lod i bin kam daon mo bin toktok wetem brata blong Jared; mo hem i bin stap insaed long wan klaod, mo brata blong Jared i no bin luk hem.

 Mo i bin hapen se Lod i bin givim oda long olgeta se oli mas go fored insaed long ples we i no gat man long hem, yes, insaed long ples ia we i neva bin gat man i bin go bifo. Mo i bin hapen se Lod i bin go long fored blong olgeta, mo i bin toktok wetem olgeta long taem we hem i bin stanap insaed long wan klaod, mo i talemaot long olgeta wea ples oli mas wokbaot.

 Mo i bin hapen se oli bin wokbaot long ples we i no gat man long hem, mo oli bin bildim ol sip, long ol sip ia oli bin krosem ol plante wota, mo han blong Lod i bin lidim olgeta oltaem.

 Mo Lod i no bin wantem letem se oli mas stop bitim solwota long ples we i no gat man long hem, be hem i bin wantem se oli mas kam fored kasem graon blong promes, we i bin moa gud tumas bitim evri narafala graon, we Lod God i bin sevem blong wan pipol we i stret.

 Mo hem i bin mekem strong promes long kros blong hem long brata blong Jared, se eni man we bae i stap long graon blong promes, stat long taem ia i go mo blong oltaem, i mas wok blong hem, hem nomo hem i God we i tru, o bae oli mas sakemaot olgeta long taem we kros blong hem we i fulwan bae i kam long olgeta.

 Mo nao, mifala i save luk ol loa blong God long saed blong graon ia, se hem i wan graon blong promes; mo eni kantri we bae i stap long hem, i mas wok blong God, o bae God i sakemaot olgeta long taem we kros blong hem we i fulwan bae i kam long olgeta. Mo kros blong hem we i fulwan i kam long olgeta long taem we oli raep long rabis fasin.

 10 From luk, hemia i wan graon we i gud tumas bitim evri narafala graon; from samting ia hem we i stap long hem, bae i wok blong God, o bae God i sakemaot olgeta; from hemia i loa blong God we i no gat en. Mo i no kasem taem we rabis fasin long medel blong ol pikinini blong graon ia i fulwan, we God i sakemaot olgeta.

 11 Mo hemia i kam long yufala, O yufala ol Jentael, blong yufala i save gat save long saed blong ol loa blong God—blong yufala i save sakem sin, mo no gohed long rabis fasin blong yufala kasem taem we fulwan i kam, blong yufala i no mekem kros blong God we i fulwan i kam daon long yufala, olsem olgeta we i stap long graon ia i bin mekem bifo long taem ia.

 12 Luk, hemia i wan gudfala graon tumas, mo eni kantri we bae i stap long hem, bae i fri aot long slef, mo long stap andanit narafala paoa, mo long evri narafala kantri andanit long heven, sapos bae oli wok nomo blong God blong graon ia, we i Jisas Kraes, we i bin soemaot hem tru long ol samting we mifala i bin raetem.

 13 Mo nao mi gohed wetem histri blong mi; from luk, i bin hapen se Lod i bin tekem Jared mo ol brata blong hem i kam aot kasem bigfala solwota ia we i seraotem ol kantri. Mo taem we oli bin kam long solwota oli bin stanemap ol tenet blong olgeta; mo oli bin singaotem nem blong ples ia, Moriankama; mo oli bin stap long ol tenet, mo i stap long ol tenet long so blong solwota blong spes blong fo yia.

 14 Mo i bin hapen se long en blong fo yia, Lod i bin kam bakegen long brata blong Jared, mo i bin stanap insaed long wan klaod mo i bin toktok wetem hem. Mo blong spes blong tri aoa Lod i bin toktok wetem brata blong Jared, mo i bin stretem hem from hem i no bin tingbaot blong singaotem nem blong Lod.

 15 Mo brata blong Jared i bin sakem sin, blong nogud fasin we hem i bin mekem, mo i bin singaotem nem blong Lod from ol brata blong hem we i bin stap wetem hem. Mo Lod i bin talem long hem: Bae mi fogivim yu mo ol brata blong yu long ol sin blong olgeta, be yufala i no mas mekem sin bakegen, from yufala i mas tingbaot se Spirit blong mi bae i no wok oltaem wetem man; from samting ia, sapos bae yufala i mekem sin kasem taem we yufala i raep fulwan, bae Lod i katem yufala aot long fored blong hem. Mo hemia i ol tingting blong mi long saed blong graon we bae mi givim long yufala blong graon we i kam long ol papa; from bae i wan graon we i gudfala tumas bitim evri narafala graon.

 16 Mo Lod i bin talem: Go blong wok mo bildim ol sip, folem semfala fasin we yufala i bin bildim bifo. Mo i bin hapen se brata blong Jared i bin go wok, mo tu ol brata blong hem, mo oi bin bildim ol sip long samfala fasin we oli bin bildim bifo, folem ol toktok blong Lod. Mo oli bin smol, mo oli no bin hevi long solwota, semak olsem wan pijin blong skae we i no hevi long wota.

 17 Mo oli bin bildim olgeta long wan fasin we oli taet tumas, kasem se bae oli holem wota olsem wan dis; mo botom blong olgeta i bin taet olsem wan dis; mo ol saed blong olgeta i bin taet olsem wan dis; mo ol en blong olgeta i bin sap; mo ol ples antap blong olgeta i bin taet olsem wan dis; mo longfala blong olgeta i bin olsem longfala blong wan tri; mo doa blong olgeta, taem we i bin sat, i bin taet olsem wan dis.

 18 Mo i bin hapen se brata blong Jared i bin prea long Lod, i talem: O Lod mi bin mekem wok ia we yu bin talem long mi, mo mi bin mekem ol sip ia folem olsem we yu bin talem long mi.

 19 Mo luk, O Lod, long olgeta i no gat eni laet; wea ples bae mifala i stia? Mo tu mifala bae i ded, from insaed long olgeta mifala i no save pulum win, be ol win we i stap insaed long olgeta nomo, taswe bae mifala i ded.

 20 Mo Lod i bin talem long brata blong Jared: Luk, bae yufala i mekem wan hol long ples antap, mo tu long botom; mo taem we bae yufala i sot long win, bae yufala i openem hol mo kasem win. Mo sapos i olsem se wota i kam insaed long yufala, luk, bae yufala i satem hol, blong mekem se yufala i no save ded long wota we i kam insaed.

 21 Mo i bin hapen se brata blong Jared i bin mekem olsem, folem olsem we Lod i bin talem.

 22 Mo hem i bin prea bakegen long Lod, i talem: O Lod, luk mi bin mekem olsem we yu bin givim oda long mi; mo mi bin mekem rere ol sip blong ol pipol blong mi, mo luk i no gat eni laet insaed long olgeta. Luk, O Lod, bae yu letem se bae mifala i krosem bigfala wota ia long tudak?

 23 Mo Lod i bin talem long brata blong Jared: Wanem nao yu wantem se mi mas mekem blong yufala i save gat laet insaed long ol sip blong yufala? From luk, yufala i no save gat ol windo, from bae oli brokbrok long pisis; mo tu bae yufala i no tekem faea wetem yufala, from bae yufala i no mas go wetem laet blong faea.

 24 From luk, bae yufala i stap olsem wan wel fis long medel blong solwota; from ol bigfala hil blong ol wef bae i foldaon long yufala. Be bae mi karem yufala i kam antap bakegen aot long ol dip ples blong solwota; from ol win i bin go fored aot long maot blong mi, mo tu ol ren mo ol wota mi bin sendem aot.

 25 Mo luk, mi mekem rere yufala agensem samting ia; from yu no save krosem bigfala dip solwota ia sapos mi no mekem rere yufala agensem ol wef blong solwota, mo ol win we i bin go aot, mo ol wota we i bin kam antap bigwan. Taswe wanem nao yu wantem se mi mas mekem blong yu blong mekem se yufala i save gat laet long taem we ol dip ples blong solwota i kavremap yufala?