1 Pea naʻe hoko ʻo pehē naʻe ʻalu hifo ʻa Sēleti mo hono tokouá, mo hona fāmilí, mo e ngaahi kaumeʻa ʻo Sēletí mo hono tokouá mo honau ngaahi fāmilí, ki he teleʻa ʻa ia naʻe tuʻu ʻi he fakatokelaú, (pea ko e hingoa ʻo e teleʻá ko ^aNimilote, ʻa ia ko e tauhingoa ki he tangata tuli manu mālohi ko iá), mo ʻenau ngaahi takanga monumanu iiki ʻa ia kuo nau tānaki fakatahá, ʻa e tangata mo e fefine, ʻo e faʻahinga kotoa pē.

2 Pea naʻa nau tau foki ʻa e ngaahi tauhele ʻo maʻu ʻa e fanga manupuna ʻo e ʻataá; pea naʻa nau teuteu foki ha vaka, ʻa ia naʻa nau ʻave ai mo kinautolu ʻa e fanga ika ʻo e ngaahi vaí.

3 Pea naʻa nau ʻave foki mo kinautolu ʻa e teseletí, ʻa ia, ko hono ʻuhingá, ko e hone; pea ko ia naʻa nau ʻave mo kinautolu ʻa e ngaahi taunga hone, pea mo e faʻahinga meʻa kotoa pē ʻa ia naʻe ʻi he funga ʻo e fonuá, mo e ngaahi tengaʻi ʻakau ʻo e faʻahinga kotoa pē.

4 Pea naʻe hoko ʻo pehē ʻi heʻenau aʻu hifo ki he teleʻa ko Nimiloté naʻe hāʻele hifo ʻa e ʻEikí ʻo fefolofolai mo e tokoua ʻo Sēletí; pea naʻá ne ʻafio mei ha loto ^aʻao, pea naʻe ʻikai mamata ʻa e tokoua ʻo Sēletí kiate ia.

5 Pea naʻe hoko ʻo pehē naʻe fekau ʻe he ʻEikí kiate kinautolu ke nau ʻalu atu ki he maomaonganoá, ʻio, ki he potu ko ia kuo teʻeki aʻu ki ai ha tangata. Pea naʻe hoko ʻo pehē naʻe muʻomuʻa ʻa e ʻEikí ʻiate kinautolu, ʻo ne fefolofolai mo kinautolu lolotonga ʻene ʻafio mei ha ^aʻao, ʻo ne fakahinohinoʻi ʻa e feituʻu ke nau fononga ki aí.

6 Pea naʻe hoko ʻo pehē naʻa nau fononga ʻi he maomaonganoá, ʻo nau foʻu ha ngaahi vaka lafalafa, ʻa ia naʻa nau folau atu ai ʻi he ngaahi vai lahi, pea naʻe fakahinohinoʻi ʻa kinautolu maʻu ai pē ʻe he toʻukupu ʻo e ʻEikí.

7 Pea naʻe ʻikai finangalo ʻa e ʻEikí ke tuku ke nau nofo ʻi he potu ki kō atu mei tahi ʻi he maomaonganoá, kae finangalo ke nau ʻalu atu ʻo aʻu ki he ^afonua ʻo e talaʻofá, ʻa ia naʻe mahuʻinga lahi hake ʻi he ngaahi fonua kehe kotoa pē, ʻa ia kuo tauhi ʻe he ʻEiki ko e ʻOtuá moʻo ha kakai māʻoniʻoni.

8 Pea kuó ne fuakava ʻi hono houhaú ki he tokoua ʻo Sēletí, ʻilonga ʻa kinautolu ʻe maʻu ʻa e fonua ko ʻeni ʻo e talaʻofá, ʻo fai atu mei he taimi ko iá ʻo taʻengatá, ʻoku totonu ke nau ^atauhi ia, ʻa ia ko e ʻOtua moʻoni pē tahá, pe ʻe ^btafiʻi atu ʻa kinautolu, ʻo ka tō kiate kinautolu ʻa hono kakato ʻo hono houhaú.

9 Pea ko ʻeni, te tau lava ʻo vakai ki he ngaahi tuʻutuʻuni ʻa e ʻOtuá ʻo kau ki he fonuá ni, ko ha fonua ia ʻo e talaʻofá; pea ʻilonga ha puleʻanga ʻe maʻu iá kuo pau ke nau tauhi ʻa e ʻOtuá, pe ʻe tafiʻi atu ʻa kinautolu ʻo ka tō mai kiate kinautolu ʻa hono kakato ʻo hono houhaú. Pea ʻe tō kiate kinautolu ʻa hono kakato ʻo hono houhaú ʻo ka kakato ʻenau angahalá.

10 He vakai, ko ha fonua ʻeni ʻoku mahuʻinga lahi hake ʻi he ngaahi fonua kehe kotoa pē; ko ia ko ia ia ʻe maʻu iá kuo pau te ne tauhi ʻa e ʻOtuá pe ʻe tafiʻi atu ia; he ko e tuʻutuʻuni taʻengata ia ʻa e ʻOtuá. Pea ʻo ka toki ^akakato ʻa e angahalá ʻi he fānau ʻo e fonuá, ʻe toki ^btafiʻi atu ʻa kinautolu.

11 Pea ʻe hoko ʻeni kiate kimoutolu, ʻE kau ^aSenitaile, koeʻuhi ke mou ʻiloʻi ʻa e ngaahi tuʻutuʻuni ʻa e ʻOtuá—koeʻuhi ke mou fakatomala, kae ʻikai fai atu ʻi hoʻomou ngaahi angahalá kae ʻoua ke kakató, koeʻuhi ke ʻoua naʻa mou ʻohifo hono kakato ʻo e houhau ʻo e ʻOtuá kiate kimoutolu ʻo hangē ko ia kuo fai ʻe he kakai ʻo e fonuá ki muʻá.

12 Vakai, ko ha fonua mahuʻinga ʻeni, pea ko e puleʻanga ke ne maʻu iá ʻe ^atauʻatāina mei he nofo pōpulá, pea mei he puke pōpulá, pea mei he ngaahi puleʻanga kehe kotoa pē ʻi he lalo langí, ʻo kapau pē te nau ^btauhi ki he ʻOtua ʻo e fonuá, ʻa ia ko Sīsū Kalaisi, ʻa ia kuo fakahā mai ʻi he ngaahi meʻa kuo mau tohí.

13 Pea ko ʻeni ʻoku ou hoko atu ʻa ʻeku lekōtí; he vakai, naʻe hoko ʻo pehē naʻe ʻomi ʻe he ʻEikí ʻa Sēleti mo hono kāingá ʻo aʻu atu ki he fuʻu tahi lahi ko ia ʻokú ne vahevahe ʻa e ngaahi fonuá. Pea ʻi heʻenau aʻu atu ki he tahí naʻa nau fokotuʻu honau ngaahi fale fehikitakí; pea nau ui ʻa e potú ko iá ko Molianikumea; pea nau nofo ʻi he ngaahi fale fehikitaki, pea nau nofo ʻi he ngaahi fale fehikitaki ʻi he matātahí ʻo feʻunga mo e taʻu ʻe fā.

14 Pea naʻe hoko ʻo pehē ʻi he ʻosi ʻa e taʻu ʻe faá naʻe toe hāʻele hifo ʻa e ʻEikí ki he tokoua ʻo Sēletí, ʻo ʻafio mei ha loto ʻao, ʻo fefolofolai mo ia. Pea naʻe fefolofolai ʻa e ʻEikí mo e tokoua ʻo Sēletí ʻi he houa ʻe tolu, pea ^avalokiʻi ia koeʻuhi ko e ʻikai te ne manatu ke ^bui ki he huafa ʻo e ʻEikí.

15 Pea naʻe fakatomala ʻa e tokoua ʻo Sēletí mei he kovi kuó ne faí, peá ne ui ki he huafa ʻo e ʻEikí koeʻuhi ko hono kāinga naʻe ʻiate iá. Pea naʻe folofola mai ʻa e ʻEikí kiate ia: Te u fakamolemoleʻi koe mo ho kāingá ʻi heʻenau ngaahi angahalá; kae ʻoua naʻá ke toe fai angahala, he kuo pau ke mou manatuʻi ʻe ʻikai ^afāinga maʻu ai pē ʻa hoku ^bLaumālié mo e tangatá; ko ia, kapau te mou fai angahala ʻo aʻu ki hono kakato ʻo hoʻomou angahalá, ʻe motuhi ʻa kimoutolu mei he ʻao ʻo e ʻEikí. Pea ko hoku lotó ʻeni ki he fonua te u foaki moʻomoutolu ke hoko ko homou tofiʻá; he ʻe hoko ia ko e fonua ʻoku ^cmahuʻinga lahi hake ʻi he ngaahi fonua kehe kotoa pē.

16 Pea naʻe folofola ʻa e ʻEikí: ʻAlu pea ngāue, pea foʻu, ha ngaahi vaka lafalafa ʻo fakatatau ki he sīpinga ʻo e ngaahi vaka ʻa ia kuo mou faʻu ki muʻa atú. Pea naʻe hoko ʻo pehē naʻe kamata ke ngāue ʻa e tokoua ʻo Sēletí, kae ʻumaʻā hono kāingá, ʻo nau foʻu ha ngaahi vaka lafalafa ʻo fakatatau ki he sīpinga kuo nau faʻuʻakí, ʻo hangē ko e ngaahi ^afakahinohino ʻa e ʻEikí. Pea naʻa nau iiki mo maʻamaʻa ʻi he fukahi vaí, ʻio, ʻo hangē ko hono maʻamaʻa ʻo ha manupuna ʻi he fukahi vaí.

17 Pea naʻe foʻu ia ʻi ha sīpinga naʻe ^amalu ʻaupito, ʻio ʻo nau lava ke taʻofi ʻa e hū ki ai ha vai ʻo hangē ko ha ipú; pea naʻe malu ʻa hono takelé ʻo hangē ko e malu ha ipú; pea naʻe malu ʻa e ngaahi kaokaó ʻo hangē ko ha ipú; pea naʻe tōtao ʻa e ongo mui vaká; pea naʻe malu hono funga vaká ʻo hangē ko ha ipú; pea ko hono lōloá ko e lōloa ia ʻo ha fuʻu ʻakau; pea ko hono matapaá, ʻo ka tāpuniʻi ia, naʻe malu ia ʻo hangē ko ha ipú.

18 Pea naʻe hoko ʻo pehē naʻe tangi ʻa e tokoua ʻo Sēletí ki he ʻEikí, ʻo ne pehē: ʻE ʻEiki, kuó u fai ʻa e ngāue kuó ke fekau kiate aú, pea kuó u foʻu ʻa e ngaahi vaká lafalafa ʻo fakatatau ki hoʻo ngaahi fakahinohino kiate aú.

19 Pea vakai, ʻE ʻEiki, ʻoku ʻikai ʻi loto ʻiate kinautolu ha maama; te mau fakaʻulí ki fē? Pea ko e tahá te mau mate foki, he ʻoku ʻikai te mau faʻa mānava, he ko e ʻeá pē ia ʻoku ʻi loto aí; ko ia te mau mate.

20 Pea naʻe folofola ʻa e ʻEikí ki he tokoua ʻo Sēletí: Vakai, ke ke ngaohi ha ava ʻi he funga vaká, pea mo e takelé foki; pea ʻo ka mou ka fulutāmakia ke mou fakaava ʻa e avá ʻo maʻu ai ha ʻea. Pea kapau leva ʻe ʻoho mai ʻa e vaí ki loto kiate kimoutolu, vakai, ke mou tāpuniʻi ʻa e avá, ke ʻoua naʻa mou mate ʻi he ʻoho mai ʻa e vaí.

21 Pea naʻe hoko ʻo pehē naʻe fai ia ʻe he tokoua ʻo Sēletí, ʻo hangē ko e fekau ʻa e ʻEikí.

22 Pea naʻá ne toe tangi ki he ʻEikí ʻo pehē: ʻE ʻEiki, vakai, kuó u fai ʻo hangē ko hoʻo fekau kiate aú; peá u teuteu ʻa e ngaahi vaká moʻo hoku kakaí, pea vakai ʻoku ʻikai ha maama ʻi loto ʻiate kinautolu. Vakai, ʻE ʻEiki, te ke tuku koā ke mau folau atu ʻi he fuʻu vai lahí ni ʻi he fakapoʻuli?

23 Pea naʻe folofola ʻa e ʻEikí ki he tokoua ʻo Sēletí: Ko e hā ʻa e meʻa ʻokú ke loto ke u fai ke mou maʻu ai ha maama ʻi homou ngaahi vaká? He vakai, ʻe ʻikai te mou lava ʻo maʻu ʻa e ngaahi kātupa, he ʻe laiki ia ʻo movetevete; pea he ʻikai ke mou ʻave ha afi mo kimoutolu, he ʻe ʻikai ke mou folau ʻi he maama ʻo e afí.

24 He vakai, te mou hangē ko ha tofuaʻa ʻi he loto tahí; he ʻe fasi ʻa e ngaahi fuʻu peau lalahi ʻiate kimoutolu. Ka neongo iá, te u toe ʻohake ʻa kimoutolu mei he ngaahi loloto ʻo e tahí; he kuo ʻalu atu ʻa e ngaahi ^amatangí mei hoku ngutú, pehē foki ki he ngaahi ^bʻuhá mo e ngaahi fuʻu vaí kuó u fekauʻi.

25 Pea vakai, ʻoku ou teuteuʻi ʻa kimoutolu ki he ngaahi meʻá ni; he ʻe ʻikai te mou faʻa folau atu ʻi he fuʻu moana ko ʻení, kapau ʻe ʻikai te u teuteuʻi ʻa kimoutolu ki he ngaahi peau ʻo e tahí, mo e ngaahi matangi kuo ʻalu atú, pea mo e ngaahi fuʻu vai ʻa ia ʻe ʻoho maí. Ko ia ko e hā ʻokú ke loto ke u teuteu maʻamoutolu ke mou maʻu ai ha maama ki he taimi ʻe folo hifo ai ʻa kimoutolu ʻi he ngaahi loloto ʻo e tahí?