1 Ma sa oo ina o atu Iareto ma lona uso, ma o la’ua aiga, ma uo foi a Iareto ma lona uso, ma o latou aiga, i lalo i le vanu lea sa i le itu i matu, (ma o le igoa o le vanu o ^aNimarota, ua faaigoa i le tagata tulimanu malosi) faatasi ma a latou lafu manu ia sa latou faapotopoto faatasi, o manu po’a ma manu fafine, o ituaiga eseese uma.

2 Ma sa latou tatao foi mailei ma seu manu felelei o le ea; ma sa latou saunia foi se faatanoa, na latou ave ai faatasi ma i latou i’a o vai.

3 Ma sa latou ave foi faatasi ma i latou o tesareta, ia a faamatalaina, o le lago meli; ma sa faapea ona latou ave faatasi ma i latou faamoega o lagomeli, ma ituaiga o mea uma sa i ai i luga o le laueleele, o fatu o ituaiga taitasi uma.

4 Ma sa oo ina ua latou o ifo i le vanu o Nimarota sa afio ifo le Alii ma fetautalatalaai ma le uso o Iareto; ma sa i ai o ia i totonu o se ^aao, ma sa le vaai atu le uso o Iareto ia te ia.

5 Ma sa oo ina poloaiina i latou e le Alii e tatau ona latou o atu i le vao, ioe, i le vaega lena e leai lava se tagata na oo i ai. Ma sa oo ina afio atu le Alii i o latou luma, ma fetalai mai ia te i latou ao tulai o ia i totonu o se ^aao, ma tuu mai faatonuga i le mea e tatau ona latou malaga i ai.

6 Ma sa oo ina latou malaga i le vao, ma fauina ni vaa, ia na latou sopoia ai vai e tele, a o taitaiina pea e le aunoa e le aao o le Alii.

7 Ma sa le tuuina atu i latou e le Alii e tuta mamao ese ma le sami i le vao, ae sa ia finagalo ia latou o mai seia oo mai lava i le ^alaueleele o le folafolaga, sa sili a’e i lo isi laueleele uma lava, lea na faasaoina e le Alii le Atua mo tagata amiotonu.

8 Ma sa ia tauto atu i le uso o Iareto i lona toasa, o soo se tasi na te mauaina lenei laueleele o le folafolaga, mai lena taimi ma le agai i luma ma le faavavau, e tatau ona ^aauauna atu ia te ia, le Atua moni ma toatasi na’o ia, a leai o le a ^etafiesea i latou pe a oo mai le atoatoa o lona toasa i luga o i latou.

9 Ma o lenei, e mafai ona tatou vaaia fetalaiga faatulafonoina a le Atua e faatatau i lenei laueleele, e faapea o se laueleele o le folafolaga; ma o soo se atunuu latou te mauaina ia auauna atu i le Atua, a leai o le a tafiesea i latou pe a oo mai le atoatoa o lona toasa i luga o i latou. Ma e oo mai le atoatoa o lona toasa i luga o i latou pe a matua i latou i le amioletonu.

10 Aua faauta, o se laueleele lenei ua silisili atu ona lelei i lo isi laueleele uma; o le mea lea o ia o le na te mauaina ia auauna atu i le Atua a leai o le a tafiesea o ia; ona o le fetalaiga faatulafonoina tumau e faavavau lea a le Atua. Ma o le a le ^atafiesea i latou seia oo ina oo mai le ^eatoatoa o le amioletonu i fanau a le laueleele.

11 Ma e oo mai lenei ia te outou, outou ^aNuuese e, ina ia outou iloa fetalaiga faatulafonoina a le Atua—ina ia outou salamo, ma aua tou te faaauau pea ia outou amioletonu seia oo mai le atoatoaga, ina ia outou le faatotō ifo le atoatoaga o le toasa o le Atua i o outou luga e pei foi ona sa faia e tagata sa aumau ai i le laueleele.

12 Faauta, o se laueleele silisili ona lelei lenei, ma o soo se atunuu e mauaina o le a ^asaoloto mai le pologa, ma mai le faatagataotaua, ma mai i isi atunuu uma e i lalo ifo o le lagi, pe afai latou te ^eauauna i le Atua o le laueleele, o ia lea o Iesu Keriso, o le ua faaalia atu i mea ua matou tusia.

13 Ma o lenei o le a ou faasolo atu i la’u talafaamaumau; aua faauta, sa oo ina aumai Iareto ma ona uso e le Alii seia oo atu lava i le sami tele lena ua vaeluaina le laueleele. Ma ina ua latou oo mai i le sami sa latou faatutū o latou faleie; ma sa latou faaigoaina le igoa o le nofoaga o Morianekumeri; ma sa latou nonofo i faleie, ma nonofo i faleie i luga o le matafaga mo le va o tausaga e fa.

14 Ma sa oo i le faaiuga o tausaga e fa, sa toe afio mai le Alii i le uso o Iareto, ma sa tu i totonu o se ao ma fetalai mai ia te ia. Ma mo le va o le tolu itula sa fetalai atu ai le Alii i le uso o Iareto, ma ^aa’oa’i o ia ona sa ia le manatua e ^evalaau atu i le suafa o le Alii.

15 Ma sa salamo le uso o Iareto i mea leaga na ia fai, ma ia valaau atu ai i le suafa o le Alii mo ona uso o e na faatasi ma ia. Ma sa fetalai mai le Alii ia te ia: O le a ou faamagaloina oe ma ou uso i a latou agasala; ae aua e te toe agasala, aua ia outou manatua o lo’u ^aAgaga e le ^efinau pea ma le tagata; o le mea lea, afai o le a outou agasala seia oo ina outou matua atoatoa o le a vavae ese outou mai luma o le Alii. Ma o o’u manatu ia e uiga i le laueleele lea o le a ou tuu atu ia te outou e fai ma o outou tofi; ona o se laueleele o le a ⁱsilisili ona lelei i lo isi laueleele uma.

16 Ma sa fetalai mai le Alii: Alu e galue ma fau ni vaa, e pei o vaa ia ua uma ona outou fausia. Ma sa oo ina alu atu le uso o Iareto e galue, ma ona uso foi, ma fausia vaa e pei o vaa ia ua uma ona latou fausia, e tusa ma ^afaatonuga a le Alii. Ma sa laiti i latou, ma sa māmā i latou i luga o le vai, e pei lava o le māmā o se manulele i luga o le vai.

17 Ma sa fausia i latou i se ala sa matuā ^amaopo lelei, e mafai ona to’a ai le suavai e pei lava o se ipu: ma o le liu sa maopo e pei o se ipu; ma o o latou itu sa maopo e pei o se ipu; ma o o latou taumua ma taumuli sa taufaasiusiu; ma o o latou fogavaa sa maopo e pei o se ipu; ma o lo latou uumi o le umi o se laau; ma o o latou faitotoa, pe a tapuni, sa maopo e pei o se ipu.

18 Ma sa oo ina tagi atu le uso o Iareto i le Alii, ua fai atu: Le Alii e, ua uma ona ou faia o le galuega na e poloaiina ai a’u, ma ua ou faia vaa e tusa e pei ona e faatonuina ai a’u.

19 Faauta foi, le Alii e, ua leai se malamalama i totonu o i latou; o fea matou te uli atu i ai? Ma o le a matou fano foi, ona e le mafai ona matou manava i totonu o vaa, vagana le ea lea ua i totonu; o lea o le a matou fano ai.

20 Ma sa fetalai mai le Alii i le uso o Iareto: Faauta, ia e faia se ava i luga o le fogavaa, ma lalo foi; ma a oo ina outou manaomia se ea ia outou tatala le ava ma maua ai le ea. Ma afai e faapea e sau le vai i o outou luga, faauta, ia outou tapuni le ava, ina ia outou le fano i le lolo.

21 Ma sa oo ina faapea ona faia e le uso o Iareto, e pei ona poloaiina ai e le Alii.

22 Ma sa toe tagi atu o ia i le Alii ua fai atu: Le Alii e, faauta ua uma ona ou faia e pei ona e poloaiina ai a’u; ma ua ou saunia vaa mo o’u tagata, faauta foi, ua leai se malamalama i totonu o vaa. Faauta, le Alii e, pe e te tuu ea i matou ia matou sopoia lenei vai tele i le pogisa?

23 Ma sa fetalai mai le Alii i le uso o Iareto: O le a se mea tou mananao ia ou faia ina ia outou maua se malamalama i totonu o o outou vaa? Aua faauta, e le mafai ona outou faia ni faamalama, ona o le a ta’eia nutililii; pe tou te ave foi afi faatasi ma outou, ona tou te le o i le malamalama o le afi;

24 Aua faauta, o le a pei outou o se tafola i totonu o le sami; ona o le a fafati galu faapei o mauga i luga o outou. Ae ui i lea, o le a ou toe ava’e outou mai le loloto o le sami; ona ua te’a atu ^amatagi mai lo’u gutu, e faapea foi ^euaga ma lologa ua ou auina atu.

25 Faauta foi, ua ou saunia outou e fetaiai ma nei mea; ona e le mafai ona outou sopoia lenei moana loloto vagana ai ua ou saunia outou e fetaiai ma galu o le sami, ma matagi ua te’a atu, ma lologa o le a oo mai. O lea o le a se mea tou te mananao ia ou saunia mo outou ina ia outou maua le malamalama pe a magoto ifo outou i le loloto o le sami?