1 Ket ita siak, ni Moroni, ituloyko ti mangted iti kasuratan ni Jared ken ti kabsatna.

2 Ta napasamak kalpasan ti panangisagana ti Apo kadagiti ^abato nga intugot ti kabsat ni Jared iti bantay, simmalog ti kabsat ni Jared iti bantay, ket inkabilna dagiti bato iti sasakayan a naisagana, a saggaysa ti tunggal murdongda; ket adtoy, nangtedda iti lawag kadagiti sasakayan.

3 Ket kasta ti panamaglawag ti Apo kadagiti bato iti kasipngetan, a mangted iti silaw kadagiti lallaki, babbai, ken ubbing, tapno saanda nga agballasiw iti nalawa a dandanum iti kasipngetan.

4 Ket napasamak nga idi maisaganada amin a kita ti taraon, tapno iti kasta makapagpautda iti danum, ken kasta met ti taraon dagiti arban ken pastorda, ken ania man a narungsot a nabiag wenno ayup wenno tumatayab nga itugotda—ket napasamak nga idi naaramiddan amin dagitoy a banag nagluganda kadagiti sasakayan wenno bilogda, ket inturongda iti baybay, nga intalekda ti bagbagida iti Apo a Diosda.

5 Ket napasamak nga imbilin ti Apo a Dios a nasken nga adda ^anarungsot nga angin a maipuyot iti rabaw ti danum, nga agturong iti naikari a daga; ket kasta ti panangipuruak ti angin kadakuada kadagiti dalluyon ti baybay.

6 Ket napasamak a namin-adu a darasda a nairareb iti tukot ti baybay, gapu kadagiti bantay a dalluyon a naiburak kadakuada, ken kasta met dagiti dadakkel ken nakaam-amak a bagyo a pinaltuad ti rungsot ti angin.

7 Ket napasamak nga idi mairarebda iti tukot awan ti danum a makadangran kadakuada, ta ^anapintek ti sasakayanda a kas iti malukong, ken kasta met a napintekda a kas iti ^bdaong ni Noe; ngarud idi nalikmotda iti dandanum immararawda iti Apo, ket pinatapawna manen ida.

8 Ket napasamak a saan a nagsardeng ti angin a nangipugso nga agturong iti naikari a daga idi addada iti dandanum; ket kasta ti panangyabog kadakuada ti angin.

9 Ket ^anagkantada iti panagdayawda iti Apo; wen, nagkanta ti kabsat ni Jared iti panagdayaw iti Apo, ket ^bnagyaman ken nagdaydayaw iti Apo iti nagmalem; ket idi dumteng ti rabii, saanda a nagsardeng a nagdaydayaw iti Apo.

10 Ket kasta ti pannakayabogda; ket awan ti nakaam-amak nga ayup ti baybay a nakaburak kadakuada, wenno baliena a nakadadael kadakuada; ket nagtultuloy nga adda silawda, addada man iti rabaw wenno iti uneg ti danum.

11 Ket kasta ti pannakayabogda, iti tallo-gasut-ken-uppat-a-pulo-ket-uppat nga aldaw iti danum.

12 Ket simmangladda iti kadaratan ti naikari a daga. Ket idi maibaddekda dagiti sakada iti igid ti baybay ti naikari a daga nagpaklebda iti rabaw ti daga, ket impakumbabada ti bagbagida iti Apo, ket nagarubos ti luada iti ragsakda iti Apo, gapu iti kaadu ti naumbi a kaasina kadakuada.

13 Ket napasamak a napanda iti rabaw ti daga, ket rinugianda a sinukay ti daga.

14 Ket adda uppat a lallaki nga annak ni Jared; ket naawaganda iti Jacom, ken Gilgah, ken Mahah, ken Orihah.

15 Ket naaddaan met ti kabsat ni Jared iti annak a lallaki ken babbai.

16 Ket nagdagup iti duapulo-ket-dua a kararua dagiti ^agayyem da Jared ken ti kabsatna; ket naaddaanda met iti annak a lallaki ken babbai sakbay nga immayda iti naikari a daga; ket ngarud nangin-inutda nga immadu.

17 Ket naisuroda a ^amagna a sipapakumbaba iti sango ti Apo; ken ^bnaisuroda met idiay ngato.

18 Ket napasamak a nangrugida a nagwaras iti rabaw ti daga, ken immaduda ket sinukayda ti daga; ket pimmigsada iti daga.

19 Ket nangrugi a limmakay ti kabsat ni Jared, ket nakitana nga iti saan a mabayag sumalogton iti tanem; gapuna kinunana ken ni Jared: Ummongenta a sangsangkamaysa dagiti taota tapno mabilangta ida, tapno maammuanta kadakuada ti tarigagayda kadata sakbay a sumalogta iti tanemta.

20 Ket kas maibatay naguummong a sangsangkamaysa dagiti tao. Ita duapulo-ket-dua a kararua ti bilang dagiti annak a lallaki ken babbai ti kabsat ni Jared; ket sangapulo-ket-dua ti bilang dagiti annak a lallaki ken babbai ni Jared, isu nga addaan iti uppat nga annak a lallaki.

21 Ket napasamak a binilangda dagiti taoda; ket kalpasan ti panangbilangda kadakuada, tinarigagayanda kadakuada dagiti banag a kayatda nga aramiden sakbay a sumalogda iti tanemda.

22 Ket napasamak a tinarigagayan dagiti tao kadakuada a nasken a ^amangtudingda iti maysa kadagiti lallaki nga annakda nga agbalin nga arida.

23 Ket ita adtoy, nadagsen daytoy kadakuada. Ket kinuna kadakuada ti kabsat ni Jared: Awan duadua a ^amangiturong daytoy iti pannakabalud.

24 Ngem kinuna ni Jared iti kabsatna: Bay-am ida a maaddaan iti ari. Ket kinunana ngarud kadakuada: Mangpilikayo kadagiti annaktayo a lallaki ti agbalin nga ari, uray asino ti kayatyo.

25 Ket napasamak a pinilida ti inauna nga anak ti kabsat ni Jared; ket Pagag ti naganna. Ket napasamak a nagkedked ket saan nga isu ti agbalin nga arida. Ket kinayat dagiti tao a piliten ti amana, ngem saan nga immannugot ti amana; ket binilinna ida a dida piliten ti asino man nga agbalin nga arida.

26 Ket napasamak a pinilida ti amin a lallaki a kakabsat ni Pagag, ngem dida kinayat.

27 Ket napasamak a kasta met dagiti lallaki nga annak ni Jared, uray pay isuda amin malaksid ti maysa; ket ni Orihah ti natudingan nga ari dagiti tao.

28 Ket nangrugi nga agturay, ket nangrugi a rimmang-ay dagiti tao; ket nagbalinda nga aglaplapusanan ti kinabaknangda.

29 Ket napasamak a natay ni Jared, ken kasta met ti kabsatna.

30 Ket napasamak a nagna a sipapakumbaba ni Orihah iti sango ti Apo, ken linaglagipna ti kinaindaklan dagiti banag nga inaramid ti Apo iti amana, ken kasta met nga insurona kadagiti taona dagiti naindaklan a banag nga inaramid ti Apo kadagiti ammada.