iVolanikalou
Ica 7


Wase 7

Sa lewa vakadodonu ko Oraia—Sa vakaduri na nodrau matanitu dau veiqati ko Sule kei Ko-ori ena dela ni kove itutu kei na veicacati—Era sa vunauca na parofita na nodra caka ca kei na nodra qaravi kalou matakau na tamata, ka ra sa veivutuni kina.

1 Ka sa yaco ni sa vakatulewa ena dela ni vanua ko Oraia ena ivalavala dodonu ena veisiga kece ni nona bula, ka sa levu vakaidina sara na nona veisiga.

2 Era sa sucu na luvena tagane kei na luvena yalewa; io, era sa lewe tolusagavulu kadua taucoko, ka ra lewe ruasagavulu katolu na tagane.

3 A sa yaco ni sucu ko Kipi ni sa qase ko koya. A sa yaco me buli me tui ko Kipi me kena isosomi; a sa sucu ko Korio na luve i Kipi.

4 Ia ni sa yabaki tolusagavulu karua ko Korio, sa vorati tamana, a sa toki ka laki tiko ena vanua ko Neori; a sa sucu na luvena tagane kei na luvena yalewa, ka ra sa rairai vinaka sara; o koya era sa lewevuqa kina na tamata era sa muri Korio ena vukudra na luvena.

5 Ena gauna sa vakasoqona rawa kina e dua na mataivalu a sa lako cake ki na vanua ko Moroni na nona itikotiko na tui, ka kauti koya vakavesu, a sa vakayacori kina na avosa i tuakai Jereti, ni a kaya ni ra na vakabobulataki.

6 Ia na vanua ko Moroni, na nona itikotiko na tui, sa volekata na vanua ka ra vakatoka na Nifaiti, ko Vanualala.

7 Ka sa yaco ni sa tiko vakavesu ko Kipi kei ira na nona tamata ena lewa i Korio na luvena me yacova ni sa qase sara; ia a sa sucu tale ko Sule na luve i Kipi ni sa qase sara ko koya, ena gauna ka tiko kina vakavesu.

8 Ka sa yaco ni sa cudruvi tuakana ko Sule; a sa tamata kaukauwa ka qaqa ko Sule ena kaukauwa vaka tamata; a sa dau vakatulewa vinaka talega.

9 A sa lako kina ko koya ki na delana ko Ifireimi, ka vakawaicalataka mai kina na oa, a sa bulia kina na iseleiwau sitila me nodra ko ira sa muri koya; ia ni sa vakaiyaragitaki ira oti ena iseleiwau sa lesu ki na koro ko Neori ka valuti Korio na tuakana, a sa kovea lesu kina na matanitu ka vakalesuya tale vei Kipi na tamana.

10 Ia oqo ena vuku ni ka sa vakayacora ko Sule, sa solia kina vua ko tamana na matanitu; a sa lewa ko koya ka sosomitaki tamana.

11 Ka sa yaco ni sa vakatulewa vakadodonu ko koya; ka sa vakatetea yani na nona matanitu ki na dela ni vanua taucoko, ni ra sa lewe vuqa sara mai na tamata.

12 Ka sa yaco ni ra sa lewe levu tale ga na luve i Sule, na tagane kei na yalewa.

13 Ka sa veivutunitaka ko Korio na veika ca sa kitaka; a sa solia kina vua ko Sule na kaukauwa ena nona matanitu.

14 Ka sa yaco ni ra sa lewe levu na luve i Korio, na tagane kei na yalewa. E dua vei ira na luvena tagane, na yacana ko Noa.

15 Ka sa yaco ni sa vorati Sule na tui ko Noa, ka vorati Korio tale ga na tamana; a sa totaki koya ko Ko-ori kei ira kece na tacina kei na vuqa na lewe ni vanua.

16 Ka sa valuti Sule na tui, ka rawa kina na imatai ni vanua ka sa nodra ivotavota vakawa; ka yaco me tui ko koya ena iwase ni vanua ko ya.

17 Ka sa yaco ni sa valuti Sule, na tui, tale; ka kauti Sule na tui yani vakavesu ki Moroni.

18 Ka sa yaco ni sa vakarau me vakamatei koya, eratou qai lako lo yani ena bogi na luve i Sule ki na loma ni vale i Noa ka vakamatei koya, eratou sa basuka na katuba ni vale ni veivesu ka kauti tamadratou lesu, ia eratou sa vakatikori koya tale ki na nona matanitu.

19 A sa tara cake kina na nona matanitu na luve i Noa me sosomitaki tamana; ia era sa sega tale ni rawai Sule na tui, ia, era sa kaukauwa sara ka sautu vakalevu, ko ira na tamata i Sule na tui.

20 Ka sa wase na vanua; sa rua na matanitu, na matanitu i Sule, kei na matanitu i Ko-ori, na luve i Noa.

21 A sa vakarota ko Ko-ori na luve i Noa vei ira na nona tamata me ra valuti Sule, ka sa vakadrukai ira kina ko Sule ka vakamatei Ko-ori.

22 Ia sa dua na luvei Ko-ori na yacana ko Nimiroti; a sa solia ko Nimiroti na matanitu i Ko-ori vei Sule, ka sa kune loloma kina ko koya ena mata i Sule; a sa lomani koya vakalevu ko Sule ka solia vua na veisolisoli lelevu, ka sa kitaka ko koya ena matanitu i Sule me vaka na nona gagadre.

23 Ena gauna tale ga ni lewa i Sule, era sa lako mai kina na parofita ena kedra maliwa na tamata ka ra a talai mai vua na Turaga, ka ra parofisaitaka ni sa cudruvi na vanua ena vuku ni nodra caka ca ka aqaravi kalou matakau na tamata; ia era na vakarusai kevaka era sega ni veivutuni.

24 Ka sa yaco ni ra sa vosa vakacacataki ira na parofita, ka vakalialiai ira ko ira na tamata. Ka sa yaco ni sa vakayaco lewa ko Sule na tui vei ira kece sa vosavakacacataki ira na parofita.

25 Ka sa tura e dua na lawa ena vanua taucoko, ka solia na kaukauwa vei ira na parofita me ra lako ena vanua cava ga era gadreva; ka ra sa veivutuni kina na tamata ena vuku ni ka oqo.

26 Ia ni ra sa veivutunitaka na nodra caka cala kei na nodra qaravi kalou tani, sa vakabulai ira kina na Turaga ka ra sa tiko sautu tale ena vanua. Ka sa yaco ni ra sa sucu tale na luvei Sule ni sa qase ko koya, na tagane kei na yalewa.

27 Ka sa sega tale na ivalu e na gauna ni lewa i Sule; a sa dau nanuma na veika lelevu sa vakayacora na Turaga vei ira na nona qase, ena nona kauti ira akosova mai na wasaliwa titobu ka yaco ki na vanua yalataki; a sa vakatulewa ena ivalavala dodonu ko koya ena gauna taucoko ni nona bula.