1 Ket ita siak, ni Moroni, ituloyko ti suratko. Ngarud, adtoy, napasamak a gapu iti ^analimed a kinnunsabo da Akish ken dagiti gayyemna, adtoy, napadisida ti pagarian ni Omer.

2 Nupay kasta, naasi ti Apo ken ni Omer, ken kasta met kadagiti annakna a lallaki ken kadagiti annakna a babbai a saan a nanggamgam iti pannakadadaelna.

3 Ket binallaagan ti Apo ni Omer iti tagtagainep a nasken a pumanaw iti daga; gapuna a pimmanaw ni Omer iti daga a kaduana ti kaamaanna, ket nagdaliasat iti adu nga aldaw, ket nakadanon ken limmabas iti turod ti ^aShim, ket nakadanon iti lugar ^ba nakadadaelan dagiti Nephite, ket nagpadaya manipud dita, ket nakadanon iti lugar a managanan iti Ablom, iti igid ti baybay, ket sadiay binangonna ti toldana, ken kasta met dagiti annakna a lallaki ken dagiti annakna a babbai, ken amin a kabbalayna, malaksid ni Jared ken ti kaamaanna.

4 Ket napasamak a natudingan ni Jared nga ari dagiti tao, babaen ti ima ti kinadangkes; ket intedna ti anakna a babai ken ni Akish nga agbalin nga asawana.

5 Ket napasamak a kinalikaguman ni Akish ti biag ti katuganganna a lalaki; ken inaramatna kadagiti nangisapataanna kadagiti nagkauna, ket nagun-odda ti ulo ti katuganganna a lalaki, bayat ti panagtugawna iti tronona, a makisarsarita kadagiti taona.

6 Ta nakaro unay ti panagwaras daytoy a nadangkes ken nalimed a gimong ta rinupsana ti puspuso dagiti amin a tao; ngarud nadawel a napapatay ni Jared iti tronona, ket sinukatan ni Akish nga agturay.

7 Ket napasamak a nangrugi nga agilem ni Akish iti anakna a lalaki, ngarud impupokna iti pagbaludan, ket pinagtalinaedna dita nga addaan iti bassit wenno awan a taraon agingga a naglak-am iti patay.

8 Ket ita nakapungtot ti kabsat ti naglak-am iti patay, (a Nimrah ti naganna) iti amana gapu iti dayta a naaramid ti amana iti kabsatna.

9 Ket napasamak nga inummong ni Nimrah ti bassit a bilang ti lallaki, ket naglibasda iti daga, ket napanda nakipagnaed ken ni Omer.

10 Ket napasamak a naaddaan ni Akish iti sabali pay nga annak a lallaki, ket naallukoyda ti puspuso dagiti tao, nupay kasta naikaridan kenkuana nga aramidenda ti amin a kita ti pagbasolan a maibatay iti tarigagayanna.

11 Ita nalaus ti tarigagay dagiti tao ni Akish a rumang-ay, a kas iti panagtarigagay ni Akish iti bileg; gapuna, indiayaan ida dagiti lallaki nga annak ni Akish iti kuarta, iti kasta a wagas ti panangallukoyda iti dakdakkel a bilang dagiti tao nga umasideg kadakuada.

12 Ket nangrugi ti gubat iti nagbaetan da Akish ken dagiti lallaki nga annakna, a nagpaut iti adu a tawen, wen, agingga iti pannakadadael ti dandani amin a tao iti pagarian, wen, dandani amin, malaksid ti tallopulo a kararua, ken dagiti pimmanaw a kadua iti balay ni Omer.

13 Gapuna, napasubli manen ni Omer iti daga a tawidna.

14 Ket napasamak a limmakay ni Omer; nupay kasta, naaddaan iti anak nga Emer idi lakayen; ket tinudinganna ni Emer nga ari a mangsukat kenkuana nga agturay.

15 Ket kalpasan ti panangtudingna ken ni Emer nga ari nakitana ti kappia iti daga iti uneg ti dua a tawen, ket natay, iti pannakakitana iti adu unay nga aldaw, a napno iti leddaang. Ket napasamak a ni Emer ti nagturay a sukatna, ket sinupusopanna dagiti tugot ti amana.

16 Ket rinugian manen ti Apo nga ikkaten ti lunod iti daga, ket nalaus ti panagrang-ay ti balay ni Emer iti babaen ti panangiturayna; ket iti uneg ti innem-a-pulo-ket-dua a tawen nagbalinda a nakapigpigsa, iti kasta nagbalinda a nakabakbaknang—

17 Ta addaanda iti amin a kita ti bunga, ken bukbukel, ken sedseda, ken napino a lino, ken balitok, ken pirak, ken agkakapateg a banag;

18 Ken kasta met ti amin a kita ti dinguen, ken ayup, ken baka, ken karnero, ken baboy, ken kalding, ken kasta met ti adu a kita ti ayup a napateg a taraon ti tao.

19 Ken addaanda met iti ^akabalio, ken asno, ken addada elepante ken curelom ken cumom; napategda amin iti tao, ken nangnangruna pay dagiti elepante ken curelom ken cumom.

20 Ket kasta ti panangibukbok ti Apo iti bendisionna iti daytoy a daga, a ^anapili a naisalsalumina iti amin a dagdaga; ket imbilinna nga asino man a mangtagikua iti daga nasken a tagikuaenna iti Apo, wenno ^bmadadaeldanto inton maluomda iti basbasol; ta iti dayta, kinuna ti Apo: Ibukbokkonto ti pakabuklan ti pungtotko.

21 Ket impatungpal ni Emer ti pangngeddeng iti kinalinteg babaen ti amin nga aldawna, ket naaddaan iti adu nga annak a lallaki ken babbai; ket naaddaan iti anak a Coriantum, ket tinudinganna ni Coriantum a mangsukat kenkuana nga agturay.

22 Ket kalpasan ti panangtudingna ken ni Coriantum a mangsukat kenkuana nga agturay nagbiag iti uppat a tawen, ket nakitana ti kappia iti daga; wen, ken kasta met a nakita ti ^aAnak ti Kinalinteg, ken nagragsak ken nagdaydayaw iti aldawna; ket natay a sitatalna.

23 Ket napasamak a sinurot ni Coriantum dagiti tugot ti amana, ket nagbangon iti adu a dadakkel a siudad, ket insurona ti naimbag kadagiti taona iti amin nga aldawna. Ket napasamak nga awanan iti anak agingga idi lakay unayen.

24 Ket napasamak a natay ti asawana, iti tawenna a sangagasut-ket-dua. Ket napasamak nga innala ni Coriantum nga asawa, idi lakayen, ti ubing a katulongan, ket naaddaan iti annak a lallaki ken babbai; gapuna nagbiag agingga nga immabot iti sangagasut-ken-uppat-a-pulo-ket-dua a tawen.

25 Ket napasamak a naaddaan iti anak a Com, ket sinukatan ni Com nga agturay; ket nagturay iti uppat-a-pulo-ket-siam a tawen, ket naaddaan iti anak a ni Heth; ken naaddaan met iti sabsabali pay nga annak a lallaki ken babbai.

26 Ket nagwaras manen dagiti tao iti amin a rabaw ti daga, ket sadiay manen a nangrugi ti nakaro a kinadangkes iti rabaw ti daga, ket nangrugi nga inarakup ni Heth dagiti nalimed a plano idi un-unana, a mangdadael iti amana.

27 Ket napasamak a pinadisina ti amana, ta pinapatayna iti espadana met laeng; ket sinukatanna nga agturay.

28 Ket dimteng manen dagiti propeta, a mangyar-araraw kadakuada ti panagbabawi—a nasken nga isaganada ti dalan ti Apo wenno adda dumteng a lunod iti rabaw ti daga; wen, ken addanto pay nakaro a bisin, a pakadadaelandanto no saanda nga agbabawi.

29 Ngem saan a pinati dagiti tao dagiti balikas dagiti propeta, ngem pinapanawda ketdi ida; ket sumagmamano kadakuada ti impuruakda iti abut sada binaybay-an ida a mapukaw. Ket napasamak nga inaramidda amin dagitoy a banag a maibatay iti bilin ti ari, ni Heth.

30 Ket napasamak a nangrugi ti nakaro a gawat iti daga, ket nagbalin a napardas unay ti pannakadadael dagiti agindeg gapu iti gawat, ta awan ti tudo iti rabaw ti daga.

31 Ket adda met dimteng a nagigita nga uleg iti rabaw ti daga, ket adu ti nasabidongan kadagiti tao. Ket napasamak a rinugian dagiti arbanda ti naglibas kadagiti nagita nga uleg, nga agturong iti daga iti abagatan, nga inawagan dagiti Nephite iti ^aZarahemla.

32 Ket napasamak nga adu kadakuada ti napukaw iti dalan; nupay kasta, sumagmamano kadakuada ti naglibas iti daga iti abagatan.

33 Ket napasamak a binilin ti Apo dagiti ^auleg a saanen a kumamat kadakuada, ngem agbalanganda ketdi iti dalan tapno saan a makapagna dagiti tao, tapno asino man nga agpanggep a magna matnagda kadagiti nagita nga uleg.

34 Ket napasamak a sinurot dagiti tao ti turong dagiti narungsot nga ayup, ket linamutda ti bangkay dagiti nadalupo iti dalan, agingga a nalamutda amin ida. Ita idi nakita dagiti tao a mapukawda rinugianda ti ^anagbabawi kadagiti basbasolda ket immararawda iti Apo.

35 Ket napasamak nga idi ^aimpakumbabada ti bagbagida a naan-anay iti sango ti Apo nangibaon iti tudo iti rabaw ti daga; ket nangrugi manen a nakaungar dagiti tao, ket sadiay nangrugi a nagbunga kadagiti pagilian iti amianan, ken kadagiti amin a pagilian iti aglawlaw. Ket impakita ti Apo ti bilegna kadakuada iti panangisalakanna kadakuada iti bisin.