ABABA A PANANGILAWLAWAG MAIPAPAN Iti Libro Ni Mormon

 Nasagraduan a kasuratan dagiti umili iti nagkauna nga America ti Libro ni Mormon a naikitikit kadagiti pinanid a metal. Uppat a kita a pinanid a metal ti masarsarita iti daytoy a libro:

  1. Dagiti Pinanid ni Nephi, a dua a kita: ti Babassit a Pinanid ken Dadakkel a Pinanid. Ad-adda a naipamaysa a maipaay ti immuna iti naespirituan a bambanag ken ti panangaskasaba ken panangisursuro dagiti propeta; iti naud-udi, kaaduanna ti sinakup dagiti nailubongan a pakasaritaan dagiti umili a naseknan (1 Nephi 9:2–4). Nupay kasta, manipud iti panawen ni Mosiah, nainayon met dagiti kangrunaan a naespirituan ken napateg a bambanag iti dadakkel a pinanid.
  2. Dagiti Pinanid ni Mormon, a nanglaon iti inyababa ni Mormon a Dadakkel a Pinanid ni Nephi, nga addaan iti adu a kapanunotan. Nairaman pay kadagitoy a pinanid ti pannakaituloy ti pakasaritaan ti paspasamak babaen ken ni Mormon ken dagiti innayon ti anakna a ni Moroni.
  3. Dagiti Pinanid ni Ether, a mangipakaammo iti pakasaritaan ti paspasamak dagiti tao ni Jared. Inyababa ni Moroni daytoy a kasuratan a nakailukonan ti bukodna a pampanunot ket pinagkaykaysana ti pakasaritaan dagiti pasamak babaen ti nagan a "Libro ni Ether."
  4. Dagiti Pinanid a Gambang nga inkuyog dagiti kailian ni Lehi manipud iti Jerusalem idi 600 s.c. a nanglaon iti "lima a libro ni Moises,...Ken kasta met ti kasuratan dagiti Hudio manipud idi punganay,...agingga iti panangrugi ti panagturay ni Sedekias, ari ti Judah; Ken kasta met dagiti padto dagiti nasantuan a propeta" (1 Nephi 5:11–13). Adu a paset ti sao manipud iti daytoy a pinanid, ti mangilawlawag iti maipapan ken ni Isaias ken dadduma a propeta ken saan a propeta iti Biblia, ti agparang iti Libro ni Mormon.

 Sagudayen ti Libro ni Mormon ti sangapulo-ket-lima a kangrunaan a paset wenno pannakagudgudua, maammuan malaksid iti maysa, a kas libro, a napauluan ti tunggal maysa babaen ti nagan ti kangrunaan a nangisurat. Naipatarus ti umuna a paset (ti umuna nga innem a libro, nga agpatingga iti Omni) manipud kadagiti Babassit a Pinanid ni Nephi. Nailukon iti nagbaetan ti Libro ni Omni ken Mosiah ti Dagiti Balikas ni Mormon. Pagsilpuenna ti kasuratan a naikitikit iti Babassit a Pinanid ken iti inyababa ni Mormon a Dadakkel a Pinanid.

 Ti kaatiddogan a paset, manipud iti Mosiah agingga iti Mormon, kapitulo 7, mairaman ti pannakaipatarus ti panangyababa ni Mormon kadagiti Dadakkel a Pinanid ni Nephi. Inkitikit ti anak ni Mormon a ni Moroni ti maudi a paset, manipud Mormon, kapitulo 8, agingga iti gibus ti pagbasaan, ket kalpasan ti panangileppasna iti kasuratan ti biag ti amana, ginupgopna ti kasuratan dagiti Jaredite (iti Libro ni Ether) ken kamaudiananna innayonna dagiti paset a maammuan a kas Libro ni Moroni.

 Iti agarup nga uppat-a-gasut-ken-duapulo-ket-maysa a tawen kalpasan ti ipapatay ni Cristo (421 k.p.), sinerraan ni Moroni, ti maudi a Nephite a propeta ken mannurat ti paspasamak, ti nasantuan a kasuratan ket inlemmengna babaen iti Apo, a mairuarto iti ud-udina nga aldaw, a kas iti impadto ti timek ti Dios manipud kadagiti propetana idi ugma. Idi sangaribu-walo-gasut-ken-duapulo-ket-tallo a tawen kalpasan ti ipapatay ni Cristo (1823 k.p.), sinarungkaran daytoy met laeng a Moroni, a nagungar a parsua, ni Propeta Joseph Smith ket inyawatna kenkuana dagiti nakitikitan a pinanid.