O Se Faamalamalamaga Puupuu e Uiga i le Tusi a Mamona

 O le Tusi a Mamona o le talafaamaumau paia o tagata Amerika anamua, sa togitogia foi i luga o ni itulau metala. E fa ituaiga o papatusi metala ua taʼua i le tusi lava ia:

  1. O Papatusi a Nifae, e lua ituaiga: o Papatusi Laiti ma Papatusi Tetele. O papatusi laiti sa faaaoga faapitoa mo mataupu faaleagaga ma auaunaga ma aoaoga a perofeta, a o papatusi tetele, sa faatumulia tele ai i se talafaasolopito faaletino o tagata ua faatatau i ai (1 Nifae 9:2–4). E ui i lea, mai le taimi o Mosaea, ua i ai foi i papatusi tetele ni isi o mea taua tele ma le faaleagaga.
  2. O Papatusi a Mamona, o le otootoga na faia e Mamona mai Papatusi Tetele a Nifae, ua i ai foi ni faamatalaga e tele. Sa i ai foi i nei papatusi se faaauauga o le talafaasolopito na tusia e Mamona ma ni faaopoopoga a lona atalii o Moronae.
  3. O Papatusi a Eteru, ua tuu mai ai le talafaasolopito sa Iaretō. O lenei talafaamaumau sa otootoina e Moronae, o lē sa faaopoopo i ai ni ana lava faamatalaga ma tuufaatasi le talafaamaumau ma le talafaasolopito aoao i lalo o le igoa, o le “Tusi a Eteru.”
  4. O Papatusi Apamemea o ni papatusi sa aumaia e le nuu o Liae mai Ierusalema i le 600 T.L.M. O nei papatusi sa aofia i “tusi e lima a Mose, … O le talafaamaumau foi o Iutaia mai le amataga, … e oo mai i le amataga o le nofoaiga a Setekaia, le tupu o Iuta; O valoaga foi a perofeta paia” (1 Nifae 5:11–13). E tele upusii mai nei papatusi, ua sii mai ai Isaia ma isi perofeta o le tusi paia ma perofeta ua lē mai le tusi paia, ua i le Tusi a Mamona.

 O le Tusi a Mamona ua i ai ni vaega po o ni vaevaega autu e sefulu ma le lima, ua taʼua, vagana ai se tasi, o ni tusi, ua faaigoaina i igoa o tagata autu taitoatasi na tusia. O le vaega muamua (o tusi muamua e ono, e gata mai i le tusi a Ominae) o le faaliliuga mai Papatusi Laiti a Nifae. O le va o le tusi a Ominae ma le tusi a Mosaea o loo i ai se faaopoopoga ua taʼua o Upu a Mamona. O lenei faaopoopoga ua sosoo ai le talafaamaumau na togitogia i Papatusi Laiti ma le Otootoga a Mamona o Papatusi Tetele.

 O le vaega sili ona umi, mai le tusi a Mosaea e oo atu i le tusi a Mamona mataupu 7, o se faaliliuga o le otootoga a Mamona o Papatusi Tetele a Nifae. O le vaega mulimuli, mai le Mamona, mataupu 8, e oo i le faaiuga o le tusi, sa togitogia e Moronae, le atalii o Mamona, o lē, ina ua uma ona ia tusia o le talafaamaumau o le olaga o lona tamā, na faia le otootoga o le talafaamaumau o sa Iaretō (le Tusi a Eteru lea) ma ia faaopoopo mulimuli ane i ai vaega ua taʼua o le Tusi a Moronae.

 Pe tusa o le tausaga e 421 T.A., na faamau ai e Moronae, le perofeta tusitalafaasolopito mulimuli o sa Nifaē, le talafaamaumau paia ma natia i le Alii, ina ia aumai i aso e gata ai, e pei ona valoia e le siufofoga o le Atua e ala mai i ana perofeta anamua. O le 1823 T.A., na oo mai ai lenei lava Moronae e tasi, ua avea nei ma tagata toetu, i le Perofeta o Iosefa Samita, ma tuu mai ia te ia i se aso mulimuli ane, papatusi ua togitogia.

 E faatatau i lenei lomiga: E i ai ni sese laiti i upu sa i lomiga ua mavae o le Tusi a Mamona sa faasalalauina i le gagana Peretania. O le lomiga lenei ua i ai ni faasaʼoga ua manatu ua tatau ai, ina ia ogatasi upu ma itulau muai tusia mo le uluai faasalalauga ma lomiga, atoa ma lomiga sa faasaʼoina e le Perofeta o Iosefa Samita.