1 Ket napasamak nga adda nariing a pannakabingay dagiti tao, iti kasta nabingaybingayda ditoy ken idiay ket nagsisinada iti napanan, a pinanawanda ni Nephi a maymaysa, a kasla nagtakder iti nagtengngaanda.

2 Ket napasamak a nagturong ni Nephi iti balayna, a ^amangpampanunot kadagiti banag nga impakita kenkuana ti Apo.

3 Ket napasamak iti kasta a panagpampanunotna—bayat ti pannakauppapayna gapu iti kinadangkes dagiti tao dagiti Nephite, dagiti nalimed nga aramidda iti sipnget, ken dagiti nadawel a panagpapatayda, ken dagiti panagsamsamda, ken amin a kita ti pagbasolan—ket napasamak iti kasta a naimpusuan a panagpampanunotna, adtoy, nakangngeg iti timek a nagkuna:

4 Mabendisionanka, Nephi, gapu kadagiti banag nga inaramidmo; ta naimatangak ti dimo ^apannakabannog a nangipakdaar iti balikas, nga intedko kenka, a para kadagiti tao. Ket saanka a nagbuteng kadakuada, ket saanmo a pinampanunot ti ^bbiagmo, ngem pinanunotmo ti ^cpagayatak, ken iti panangtungpalmo kadagiti bilinko.

5 Ket ita, gapu ta inaramidmo dagitoy nga awan pannakabannogmo, adtoy, bendisionanka iti agnanayon; ket aramidenka a naindaklan iti balikas ken iti aramid, iti pammati ken iti trabaho; wen, uray pay iti ^aamin a banag a maaramidmo a maibatay iti ^bbalikasmo, ta ^csaanka nga agdawat iti mailabsing iti pagayatak.

6 Adtoy, sika ni Nephi, ket siak ti Dios. Adtoy, ipakdaarko kenka iti sango dagiti anghelko, a maaddaanka iti bileg a mangituray kadagitoy a tao, ken saplitem ti daga iti ^abisin, ken iti angol, ken pannakadadael, a maibatay iti kinadangkes dagitoy a tao.

7 Adtoy, ikkanka iti bileg, tapno ania man ti patalgedam iti daga ^amapatalgedan met iti langit; ket ania man ti palusposam iti daga mapalusposan met iti langit; ket kasta ti kabilegmo kadagitoy a tao.

8 Ket kasta, a no ibagam a magudua daytoy a templo, maaramid.

9 Ket no ibagam iti daytoy a ^abantay, Agkusukoska ket tumapokka, maaramid.

10 Ket adtoy, no ibagam a sapliten ti Dios dagitoy a tao, mapasamak.

11 Ket ita adtoy, bilinenka, a mapanka ket ipakdaarmo kadagitoy a tao, a kastoy ti kinuna ti Apo a Dios, nga isu ti Kangatuan: Malaksid no agbabawikayo masaplitkayonto, nga uray la a ^amadadael.

12 Ket adtoy, ita napasamak nga idi naibaga ti Apo dagitoy a balikas ken ni Nephi, nagsardeng ket saan a nagtuloy iti balayna, ngem nagsubli kadagiti ummong a nawarawara iti rabaw ti daga, ket rinugianna nga impakdaar kadakuada ti balikas ti Apo a naisao kenkuana, maipanggep iti pannakadadael no saanda nga agbabawi.

13 Ita adtoy, iti laksid dayta naindaklan a milagro a naaramid ni Nephi iti panangibagana kadakuada maipanggep iti ipapatay ti pangulo nga ukom, pinatangkenda ti puspusoda ken dida dinengngeg dagiti balikas ti Apo.

14 Ngarud impakdaar ni Nephi kadakuada ti balikas ti Apo, a kinunana: Malaksid no agbabawikayo, kasta ti kinuna ti Apo, masaplitkayonto agingga a madadaelkayo.

15 Ket napasamak nga idi naipakdaar ni Nephi kadakuada ti balikas, adtoy, pinatangkenda pay la ti puspusoda ken dida dinengngeg dagiti balikasna; ngarud sinusikda, ket pinanunotda a tiliwen tapno maipupokda iti pagbaludan.

16 Ngem adtoy, adda kenkuana ti bileg ti Dios, ket saanda a maala nga ipisok iti pagbaludan, ta intalaw ti Espiritu ket inyadayona iti tengngada.

17 Ket napasamak a kasta ti papanna iti Espiritu, iti tunggal ummong, a nangipakdaar iti balikas ti Dios, agingga a naipakdaarnan kadakuada amin, wenno naidanonna kadagiti amin a tao.

18 Ket napasamak a saanda a denggen dagiti balikasna; ket nangrugida a nagsusupanget, isu a nabingaybingayda ket papatayenda ti tunggal maysa babaen ti espada.

19 Ket kasta ti naggibusan ti maika-pitopulo-ket-maysa a tawen a panangituray dagiti ukom kadagiti tao ni Nephi.