Tusitusiga Paia
Helamana 11


Mataupu 11

Ua faatauanau e Nifae le Alii ia suia la latou taua i se oge—E toatele tagata ua fano—Ua latou salamo, ma ua aioi atu Nifae i le Alii mo le timu—Ua maua e Nifae ma Liae faaaliga e tele—Ua faamausali e le au faomea a Katianetona i latou lava i le laueleele. E tusa o le 20–6 T.L.M.

1 Ma o lenei sa oo i le fitusefulu ma le lua o tausaga o le nofoaiga a faamasino sa faateteleina finauga, sa oo ina i ai taua i le laueleele atoa i totonu o tagata uma o Nifae.

2 Ma o lenei vaega afaalilolilo o le au faomea o i latou ia o e na faia pea lenei galuega o le faafanoga ma le amioleaga. Ma sa faia lenei taua i lena tausaga atoa; ma sa faia foi i le tausaga atoa e fitusefulu ma le tolu.

3 Ma sa oo i le tausaga lenei, na tagi atu ai Nifae i le Alii, ua faapea atu:

4 Le Alii e, aua e te tuuina lenei nuu ia faaumatia i le pelu; ae le Alii e, ia tuu mai ia i ai se aoge i le laueleele, e faaosoina ai i latou ia manatua le Alii lo latou Atua, ma atonu o le a latou salamo ai ma liliu mai ia te oe.

5 Ma sa faapea lava ona faia, e tusa ma upu a Nifae. Ma sa i ai se oge tele na oo mai i luga o le laueleele, i totonu o tagata uma o Nifae. Ma sa faapea ona faaauau pea o le oge i le fitusefulu ma le fa o tausaga, ma sa oo ina taofia le galuega o le faafanoga e ala i le pelu a ua mafatia ona o le oge.

6 Ma o lenei galuega o le faafanoga sa faaauau foi i le tausaga e fitusefulu ma le lima. Ona sa taia le laueleele sa oo ina matutu, ma sa le fua mai saito i le tau o saito; ma sa taia le laueleele atoa, e oo lava i totonu o sa Lamanā faapea foi i totonu o sa Nifaē, sa oo ina taia i latou ma fano ai le afe ma afe o i latou i vaega sili ona amioleaga o le laueleele.

7 Ma sa oo ina vaai tagata o le a fano i latou i le oge, ma sa amata ona latou amanatua le Alii lo latou Atua; ma sa amata ona latou manatua upu a Nifae.

8 Ma sa amata ona aioi atu tagata i o latou faamasino sili ma o latou taitai, ina ia latou fai atu ia Nifae: Faauta, ua matou iloa o oe o se tagata o le Atua, ma o lea ia e ole atu i le Alii lo tatou Atua ia aveese lenei oge mai ia te i tatou, nei faataunuuina aupu uma na e fai mai ai e uiga i le faaumatiaga o i matou.

9 Ma sa oo ina fai atu faamasino ia Nifae e tusa ma upu ia na mananao i ai. Ma sa oo ina ua vaai Nifae ua salamo tagata ma ua latou faamaualalalo i latou lava i le ie talatala, sa toe ole atu o ia i le Alii, ua fai atu:

10 Le Alii e, faauta ua salamo lenei nuu; ma ua latou tafi esea le vaega a Katianetona mai totonu ia te i latou ua oo ina le toe i ai i latou, ma ua latou natia a latou fuafuaga faalilolilo i le eleele.

11 O lenei, le Alii e, ona o lo latou lotomaualalo lenei, sei e liliu ese lou toasa, ma ia faamalieina lou toasa i le faaumatiaga o tagata amioleaga o e ua uma ona e faaumatiaina.

12 Le Alii e, sei e liliu ese lou toasa, ioe, lou toasa matautia, ma faia ia taofia lenei oge i lenei laueleele.

13 Le Alii e, sei e faafofoga mai ia te au, ma faia ina ia mafai ona faataunuuina e tusa ma a’u upu, ma auina mai le atimu i luga o le fogaeleele, ina ia mafai ona fua mai ona fua, ma ona saito i le tau o saito.

14 Le Alii e, sa e faafofoga mai i aa’u upu ina ua ou fai atu, Ia i ai se oge, ina ia taofia le malaia o le pelu; ma ua ou mautinoa o le a e finagalo i lenei lava taimi, e faafofoga mai i a’u upu, ona na e fetalai mai e faapea: Afai e salamo lenei nuu, o le a ou faasaoina i latou.

15 Ioe, le Alii e, ma ua e silasila mai ua latou salamo, ona o le oge ma le malaia ma le faafanoga ua oo mai i o latou luga.

16 Ma o lenei, le Alii e, pe e te liliu ese ea lou toasa, ma toe tofotofo i latou pe o le a latou auauna atu ia te oe? Afai o lea, Le Alii e, e mafai lava ona e faamanuiaina i latou e tusa ma au afioga ia na e fetalai mai ai.

17 Ma sa oo i le lona fitusefulu ma le ono o tausaga, sa liliu ese e le Alii lona toasa mai le nuu, ma ia faia ia to ifo le atimu i le eleele, sa oo ina fua mai i ona fua i le tau e fua mai ai. Ma sa oo ina fua mai ai e ia ona saito i le tau e fua mai ai.

18 Ma faauta, sa olioli tagata ma vivii atu i le Atua, ma sa tumu luga o le fogaeleele i le olioli; ma sa latou le toe saili e fasiotia Nifae, ae ua latou ava ia te ia o se perofeta asili, ma o se tagata o le Atua, ua i ai le mana tele ma le pule na tuuina mai ia te ia mai le Atua.

19 Ma faauta, o Liae, lona uso, sa le afaaitiitia ifo lava o ia mai ia te ia e faatatau i mea tau le amiotonu.

20 Ma sa faapea ona oo ina toe amata ona manuia o le nuu o Nifae i le laueleele, ma amata ona latou toe atina’e o latou nofoaga tuufua, ma amata ona faatoateleina ma salalau atu, seia oo ina latou faatumulia luga o le laueleele atoa, i le itu i matu ma le itu i saute, mai le sami i sisifo i le sami i sasae.

21 Ma sa oo ina iu le lona fitusefulu ma le ono o tausaga i le filemu. Ma sa amata le lona fitusefulu ma le fitu o tausaga i le filemu; ma sa salalau atu le aekalesia i luga o le laueleele atoa; ma o le vaega toatele o tagata, o sa Nifaē ma sa Lamanā, sa auai i le ekalesia; ma sa latou maua le filemu tele i le laueleele; ma sa faapea ona iu o le fitusefulu ma le fitu o tausaga.

22 Ma sa latou maua foi le filemu i le lona fitusefulu ma le valu o tausaga, vagana ai ni finauga itiiti e faatatau i matautu o mataupu faavae lea na faataatia mai e perofeta.

23 Ma i le tausaga e fitusefulu ma le iva sa amata ona i ai o finauga e tele. Peitai o Nifae ma Liae, ma le toatele o o laua uso o e sa malamalama e uiga i mataupu moni o aoaoga faavae, ona sa latou maua afaaaliga e tele i aso taitasi, sa oo ina latou tala’i atu i le nuu, ma o lea na oo ai ina latou faamutaina a latou finauga i lena lava tausaga.

24 Ma sa oo i le tausaga e valusefulu o le nofoaiga a faamasino i le nuu o Nifae, sa i ai se aofai o tagata faatuiese mai le nuu o Nifae, o e na o atu i sa Lamanā i ni tausaga ua mavae, ma latou ave i o latou lava luga le igoa o sa Lamanā, ma se aofai foi o e na tupuga moni mai sa Lamanā, na faaosoina i latou i le ita e i latou, po o na tagata faatuiese, o lea na latou amata ai se taua ma o latou uso.

25 Ma sa latou faia le fasioti tagata ma le gaoi; ma ona latou sosola ai lea i tua i mauga, ma i le vao ma nofoaga faalilolilo, ma faalalafi i latou lava ina ia le mafai ona maua i latou, ma maua se faaopoopoga i lo latou aofai i aso taitasi, e tusa ai ma tagata faatuiese na o atu ia te i latou.

26 Ma sa faapea ona oo i le taimi, ioe, i se va lava o ni tausaga e le tele naua, na avea ai i latou ma se vaega faomea e sili ona toatele; ma sa latou suesueina fuafuaga faalilolilo uma a Katianetona; ma sa faapea ona avea i latou ma tagata faomea a Katianetona.

27 O lenei faauta, sa faia e nei faomea se faatamaiga tele, ioe, o se faafanoga tele lava i totonu o le nuu o Nifae, ma i totonu foi o tagata o sa Lamanā.

28 Ma sa oo ina tatau ona taofia lenei galuega o le faafanoga; o lea na latou auina atu ai se autau o ni tagata malolosi i le vao ma luga o mauga e saili lenei vaega o faomea, ma faaumatia i latou.

29 Peitai faauta, sa oo ina toe tutulia mai i latou i tua i o latou lava laueleele i lena lava tausaga. Ma sa faapea ona iu o le tausaga e valusefulu o le nofoaiga a faamasino i luga o le nuu o Nifae.

30 Ma sa oo i le amataga o le tausaga e valusefulu ma le tasi sa latou toe o atu e faasagatau i lenei vaega o faomea, ma sa latou faaumatiaina le toatele; ma sa faapea foi ona asia i latou e se faafanoga tele.

31 Ma sa toe faamalosia i latou e foi ese mai le vao ma mauga i o latou lava laueleele, ona o le toatele naua o le aofai o ia faomea o e na faatumulia ai mauga ma le vao.

32 Ma sa oo ina faapea ona iu o lenei tausaga. Ma sa faatoateleina pea le au faomea ma faasolo malolosi, sa oo ina latou teena autau uma a sa Nifaē, ma autau foi a sa Lamanā; ma sa latou faatupuina se mata’u tele ia oo mai i tagata i luga o le laueleele atoa.

33 Ioe, ona sa latou asia le tele o vaega o le laueleele, ma faia faafanoga tetele ia te i latou; ioe, sa latou fasiotia le toatele, ma ave isi faatagataotaua i le vao, ioe, ma aemaise lava o o latou fafine ma a latou fanau.

34 O lea o lenei leaga tele, lea na oo mai i tagata ona o lo latou amioletonu, sa toe faaosoina ai i latou ia manatua le Alii lo latou Atua.

35 Ma sa faapea ona iu o le tausaga e valusefulu ma le tasi o le nofoaiga a faamasino.

36 Ma i le tausaga e valusefulu ma le lua sa toe amata foi ona agalo ia te i latou le Alii lo latou Atua. Ma i le tausaga e valusefulu ma le tolu sa amata ona faasolo ina faateleina lo latou amioletonu. Ma i le tausaga e valusefulu ma le fa sa latou le faaleleia o latou ala.

37 Ma sa oo i le tausaga e valusefulu ma le lima sa latou faasolo ina atili malolosi pea i lo latou faamaualuluga, ma i lo latou amioleaga; ma sa faapea foi ona toe matua i latou mo le faafanoga.

38 Ma sa faapea ona iu o le tausaga e valusefulu ma le lima.