1 Ket kasta a maimatangantayo no kasano ti kinasinsinan, ken kasta met ti di pannakaidna ti puspuso dagiti annak ti tattao; wen, makitatayo a ti Apo iti di matukod a kinaimbagna bendisionan ken ^aparang-ayenna dagiti ^bagtalek kenkuana.

2 Wen, ket makitatayo iti dayta a kanito a panangparang-ayna kadagiti taona, wen, iti maapit kadagiti talonda, dagiti arban ken dagiti pastorda, ken iti balitok, ken iti pirak, ken iti amin a kita ti napapateg a banag iti amin a langa ken sukog; pannakailisi ti bagbagida, ken panangisalakan kadakuada kadagiti kabusorda; pannakapalukneng ti puspuso dagiti kabusorda tapno saanda nga irakurak ti gubgubat a maibusor kadakuada; wen, iti ababa a pannao, agaramid iti amin a banag para iti pagimbagan ken pagragsakan dagiti taona; wen, ket daytanto ti kanito a ^apanangpatangkenda iti puspusoda, ket malipatanda ti Apo a Diosda, ket ^biludekludekda ti Nasantuan—wen, ket daytoy gapu iti kinalukayda, ken iti aglaplapusanan a kinarang-ayda.

3 Ket kasta ti pannakakitatayo a malaksid no ^adusaen ti Apo dagiti taona iti adu a pammarigat, wen, malaksid no isarungkarna kadakuada ti patay ken didigra, ken iti bisin ken iti amin a kita ti angol, didanto ^bmalagip.

4 O anian a kinamaag, ken anian a kaawan ti kaes-eskanna, ken anian a kinadakes, ken kinasairo, ken anian a ^alaka ti agaramid iti basol, ken anian a nagbuntog ti agaramid iti nasayaat, dagiti annak ti tattao; wen, anian a laka ti dumngeg kadagiti balikas ti dakes, ken mangituon iti ^bpuspusoda kadagiti awan ti kaes-eskanna a banag ti lubong!

5 Wen, anian a laka ti agbalin a ^anapalangguad; wen, anian a laka ti agpang-as, ken agaramid iti amin a kita ti pagbasolan; ken anian a buntogda a manglagip iti Apo a Diosda, ken dumngeg kadagiti pammagbagana, wen, anian a buntog ti ^bmagna iti dana ti sirib!

6 Adtoy, dida tarigagayan a ti Apo a Diosda, a ^anangparsua kadakuada, ti ^bmangiturong ken mangiturayto kadakuada; iti laksid ti naindaklan a kinaimbagna ken ti asina kadakuada, tinagibay-ada dagiti pammagbagana, ket dida kayat nga isu ti mangibagnos kadakuada.

7 O anian a nagdakkel ti ^akinaubbaw dagiti annak ti tattao; wen, nanumnumoda pay ngem iti tapok iti daga.

8 Ta adtoy, agakar-akar ti tapok ti daga, iti pannakaguduana, iti pammilin ti naindaklan ken agnanayon a Diostayo.

9 Wen, adtoy ti timekna dagiti turod ken dagiti bantay agtigerger ken ^amadayyeg.

10 Ket mawarada babaen ti ^abileg ti timekna, ket agbalinda a nalamuyot, wen, uray pay kas iti tanap.

11 Wen, babaen ti bileg ti timekna madayyeg ti ^asangabukel a daga;

12 Wen, babaen ti bileg ti timekna, madayyeg dagiti pamuon, uray pay ti tengngana.

13 Wen, ket no ibagana iti daga—Aggunayka—aggunay.

14 Wen, no ibagana iti ^adaga—^bAgsublika, tapno ^cpaatiddogenna ti aldaw iti adu nga oras—maaramid;

15 Ket kasta, a maibatay iti balikasna agsubli ti daga, ket agparang iti tao a saan nga agkutkuti ti init; wen, ket adtoy, agpayso daytoy; ta talaga a ti daga ti agkutkuti a saan ketdi a ti init.

16 Ket adtoy, met, no ibagana kadagiti ^adanum iti lansad—^bMaabbatanka—maaramid.

17 Adtoy, no ibagana itoy a bantay—bumangonka, ket ^aumayka a manggabur iti dayta a siudad, tapno maitanem—adtoy mapasamak.

18 Ket adtoy, no ^amangilemmeng ti tao iti kinabaknang iti daga, ket kuna ti Apo—Bay-an a ^bmailunod, gapu iti basolna a nangilemmeng—adtoy, mailunod.

19 Ket no kuna ti Apo—Mailunodka, tapno awan ti tao a makakita kenka manipud ita ken iti agnanayon—adtoy, awan ti tao a makaala manipud ita ken iti agnanayon.

20 Ket adtoy, no kuna ti Apo iti tao—Gapu kadagiti basolmo, mailunodka iti agnanayon—maaramid.

21 Ket no kuna ti Apo—Gapu kadagiti basolmo mapukawka iti imatangko—ibilinna a mapasamak.

22 Ket ay-ay pay ti pangibagaanna iti kastoy, ta isunto ti agaramid iti basol, ket saanto a maisalakan; ngarud, gapu itoy, tapno maisalakan dagiti tao, nairakurak ti panagbabawi.

23 Ngarud, nagasat dagiti agbabawi ken dumngeg iti timek ti Apo a Diosda; ta dagitoyto ti ^amaisalakan.

24 Ket ipalubos koma ti Dios, iti kinaindaklanna, a maiturong dagiti tao iti panagbabawi ken naimbag nga ar-aramid, tapno maisubli kadakuada ti tunggal ^aparabur, a maibatay kadagiti aramidda.

25 Ket kayatko a maisalakan amin a tao. Ngem mabasatayo nga iti naindaklan ken maudi nga aldaw addanto sumagmamano a mapapanaw, wen, mapapanaw iti imatang ti Apo;

26 Wen, a maipan iti kasasaad a di maputpot a ladingit, a pakatungpalan dagiti balikas a nagkuna: Isuda a nagaramid iti nasayaat maaddaan iti ^aagnanayon a biag; ket isuda a nagaramid iti dakes maaddaan iti agnanayon a ^bpannakailunod. Ket kasta. Amen.