1 Pea ko ʻeni, naʻe hoko ʻo pehē ʻi hono valungofulu mā ono ʻo e taʻú, naʻe kei nofo pē ʻa e kau Nīfaí ʻi he fai angahalá, ʻio, ʻi he fuʻu fai angahala lahi, lolotonga ia naʻe fuʻu tokanga lahi ʻa e kau ^aLeimaná ke tauhi ʻa e ngaahi fekau ʻa e ʻOtuá, ʻo fakatatau ki he fono ʻa Mōsesé.

2 Pea naʻe hoko ʻo pehē ʻi he taʻu ko ʻení naʻe ʻi ai ʻa e tokotaha ko Samuela, ko ha tangata Leimana, naʻá ne haʻu ki he fonua ko Seilahemalá, ʻo ne kamata ke malanga ki he kakaí. Pea naʻe hoko ʻo pehē naʻá ne malanga, ʻi he ngaahi ʻaho lahi, ʻaki ʻa e fakatomalá ki he kakaí, pea naʻa nau kapusi ia ki tuʻa, pea naʻá ne mei foki ki hono fonua ʻoʻoná.

3 Kae vakai, naʻe ongo mai kiate ia ʻa e leʻo ʻo e ʻEikí, ʻo fekau ke ne toe foki, ʻo kikite ki he kakaí ʻaki ʻa e meʻa kotoa pē ʻe hā mai ki hono ^alotó.

4 Pea naʻe hoko ʻo pehē naʻe ʻikai te nau fie tuku ke ne hū ki he koló; ko ia naʻá ne ʻalu ʻo kaka hake ki he funga ʻaá, pea mafao atu hono nimá ʻo kaila ʻaki ha leʻo-lahi, pea kikite ki he kakaí ʻaki ʻa e ngaahi meʻa kotoa pē naʻe fakahū ʻe he ʻEikí ki hono lotó.

5 Pea naʻá ne pehē kiate kinautolu: Vakai, ko au, Samuela, ko ha tangata Leimana, ʻoku ou lea ʻaki ʻa e ngaahi folofola ʻa e ʻEikí ʻa ia ʻokú ne fakahā ki hoku lotó; pea vakai kuó ne fakahā ki hoku lotó ke u pehē ki he kakaí ni, ʻoku tuʻunuku mai ʻa e ^aheletā ʻo e fakamaau totonú ki he kakaí ni; pea ʻe ʻikai ʻosi atu ʻa e taʻu ʻe fāngeau ka kuo tō ʻa e heletā ʻo e fakamāú ki he kakaí ni.

6 ʻIo, ʻoku tatali mai ha fuʻu ^afakaʻauha lahi ki he kakaí ni, pea kuo pau ke hoko ia ki he kakaí ni, pea ʻoku ʻikai ha meʻa te ne faʻa fakahaofi ʻa e kakaí ni ka ko e fakatomalá mo e tui ki he ʻEiki ko Sīsū Kalaisí, ʻa ia kuo pau ʻe hāʻele mai ki he māmaní, pea te ne kātekina ʻa e ngaahi meʻa lahi pea ʻe tāmateʻi ia koeʻuhi ko hono kakaí.

7 Pea vakai, kuo fakahā mai ia ʻe ha ^aʻāngelo ʻa e ʻEikí kiate au, pea naʻá ne ʻomi ʻa e ngaahi ongoongo ^bfakafiefia ki hoku laumālié. Pea vakai, kuo fekauʻi mai au kiate kimoutolu ke fakahā ia kiate kimoutolu foki, koeʻuhí ke mou maʻu ʻa e ngaahi ongoongo fakafiefiá; kae vakai ʻoku ʻikai te mou fie tali au.

8 Ko ia, ʻoku folofola peheni ʻe he ʻEikí: Koeʻuhi ko e fefeka ʻa e loto ʻo e kakai ʻo e kau Nīfaí, pea kapau ʻe ʻikai te nau fakatomala te u toʻo ʻeku folofolá meiate kinautolu, pea te u ^atoʻo hoku Laumālié meiate kinautolu, pea he ʻikai te u toe kātakiʻi ʻa kinautolu, pea te u fakakoviʻi ʻa e loto ʻo honau kāingá kiate kinautolu.

9 Pea ʻe ʻikai ʻosi atu ʻa e taʻu ʻe ^afāngeau ki muʻa kuó u pule ke teʻia ʻa kinautolu; ʻio, te u tauteaʻi ʻa kinautolu ʻaki ʻa e heletā mo e honge mo e mahaki fakaʻauha.

10 ʻIo, te u tauteaʻi ʻa kinautolu ʻaki ʻeku ʻita kakahá, pea ʻe ʻi ai ʻa e niʻihi ʻi he toʻu tangata hono ^afā ʻo homou ngaahi filí, ʻa ia te nau kei moʻui, ke vakai ki homou fakaʻauha ke ʻosiʻosingamālié; pea kuo pau ke hoko ʻeni ʻo ka ʻikai te mou fakatomala, ʻoku folofola ʻe he ʻEikí; pea ko e faʻahinga ko ia ʻo e toʻu tangata hono faá te nau fakahoko homou fakaʻauhá.

11 Ka kapau te mou fakatomala pea ^afoki ki he ʻEiki ko homou ʻOtuá te u taʻofi ʻa ʻeku ʻitá, ʻoku folofola peheni ʻe he ʻEikí; ʻio, ʻoku folofola ʻe he ʻEikí, ʻoku monūʻia ʻa kinautolu te nau fakatomala pea tafoki mai kiate aú, ka ʻe malaʻia ia ʻoku ʻikai te ne fakatomalá.

12 ʻIo, ʻe ^amalaʻia ʻa e fuʻu kolo lahí ni ko Seilahemalá; he vakai, ʻoku tupu ʻiate kinautolu ʻoku māʻoniʻoní ʻa hono fakahaofí; ʻio, ʻe malaʻia ʻa e fuʻu kolo lahí ni, he ʻoku ou ʻiloʻi, ʻoku folofola ʻe he ʻEikí, ʻoku ʻi ai ʻa e tokolahi, ʻio, ʻa e konga lahi ange ʻo e fuʻu koló ni, ʻa ia te nau fakafefeka honau lotó kiate au, ʻoku folofola ʻe he ʻEikí.

13 Ka ʻoku monūʻia ʻa kinautolu te nau fakatomalá, he teu fakahaofi ʻa kinautolu. Kae vakai, ka ne taʻeʻoua ʻa e kau māʻoniʻoni ʻa ia ʻoku nau ʻi he fuʻu kolo ní, vakai, te u fekau ke tō mai ha ^aafi mei he langí ʻo fakaʻauha ia.

14 Kae vakai, ʻoku fakahaofi ia koeʻuhi ko e kau māʻoniʻoní. Kae vakai, ʻe hoko ʻa e taimi ʻoku folofola ʻe he ʻEikí, ʻo ka mou ka kapusi ki tuʻa ʻa e kau māʻoniʻoní meiate kimoutolu, te mou toki taau mo e fakaʻauhá; ʻio, ʻe malaʻia ʻa e fuʻu kolo lahí ni, koeʻuhi ko e fai angahala mo e ngaahi anga-fakalielia ʻa ia ʻoku ʻi aí.

15 ʻIo, pea ʻe hoko ʻa e malaʻia ki he kolo ko Kitioné koeʻuhi ko e fai angahala mo e ngaahi anga-fakalielia ʻa ia ʻoku ʻi aí.

16 ʻIo, pea ʻe hoko ʻa e malaʻia ki he ngaahi kolo kotoa pē ʻa ia ʻoku ʻi he fonua takatakaí, ʻa ia ʻoku maʻu ʻe he kau Nīfaí, koeʻuhi ko e fai angahala mo e ngaahi anga-fakalielia ʻa ia ʻoku ʻi aí.

17 Pea vakai, ʻe hoko ha ^amalaʻia ki he fonuá, ʻoku folofola ʻe he ʻEiki ʻo e Ngaahi Kau Taú, koeʻuhi ko e kakai ʻoku ʻi he fonuá, ʻio, koeʻuhi ko ʻenau fai angahalá mo ʻenau ngaahi anga-fakalieliá.

18 Pea ʻe hoko ʻo pehē, ʻoku folofola ʻe he ʻEiki ʻo e Ngaahi Kau Taú, ʻio, ko hotau ʻOtua māfimafi mo moʻoní, ko ia ia ʻe ^afufuuʻi ha ngaahi koloa ʻi he kelekelé ʻe ʻikai te ne toe ʻilo ia, koeʻuhi ko e fuʻu malaʻia lahi ʻo e fonuá, tuku kehe pē ʻo kapau ko ha tangata māʻoniʻoni ia, pea te ne fufuuʻi hake ia ki he ʻEikí.

19 He ʻoku ou loto, ʻoku folofola ʻe he ʻEikí, ke nau fufuuʻi hake ʻenau ngaahi koloá kiate au; pea ʻe malaʻia ʻa kinautolu ʻoku ʻikai te nau fufuuʻi hake ʻenau ngaahi koloá kiate aú; he ʻoku ʻikai fufuuʻi hake ʻe ha taha ʻa ʻene ngaahi koloá kiate au ka ko e kau māʻoniʻoní pē; pea ko ia ia ʻoku ʻikai te ne fufuuʻi hake ʻene ngaahi koloá kiate aú, ʻoku malaʻia ia, kae ʻumaʻā foki mo e koloá, pea ʻe ʻikai toe maʻu ia ʻe ha taha koeʻuhi ko e malaʻia ʻo e fonuá.

20 Pea ʻe hoko mai ʻa e ʻaho te nau fufuuʻi hake ai ʻa ʻenau ngaahi koloá, koeʻuhi kuo tuku honau lotó ki he ngaahi koloá; pea ko e meʻa ʻi heʻenau tuku honau loto ki heʻenau ngaahi koloá, pea te nau fufuuʻi hake ʻenau ngaahi koloá ʻo ka nau ka feholaki ʻi he ʻao ʻo honau ngaahi filí; koeʻuhí ʻe ʻikai te nau fufuuʻi hake ia kiate au, ʻe malaʻia ʻa kinautolu mo ʻenau ngaahi koloá foki; pea ʻi he ʻaho ko iá ʻe teʻia ʻa kinautolu, ʻoku folofola ʻe he ʻEikí.

21 Vakai mai, ʻa kimoutolu ʻa e kakai ʻo e fuʻu koló ni, pea ^atokanga ki heʻeku ngaahi leá; ʻio, tokanga ki he ngaahi folofola ʻa ia ʻoku folofola ʻaki ʻe he ʻEikí; he vakai, ʻokú ne folofola ʻoku fakamalaʻiaʻi ʻa kimoutolu koeʻuhi ko hoʻomou ngaahi koloá, pea ʻoku fakamalaʻiaʻi foki mo hoʻomou ngaahi koloá koeʻuhi ko e tuku homou lotó ki aí, pea kuo ʻikai te mou tokanga ki he ngaahi folofola ʻa ia naʻá ne foaki ia kiate kimoutolú.

22 ʻOku ʻikai te mou manatuʻi ʻa e ʻEiki ko homou ʻOtuá ʻi he ngaahi meʻa kuó ne tāpuakiʻi ʻaki ʻa kimoutolú, ka ʻoku mou manatu maʻu ai pē ki hoʻomou ngaahi ^akoloá, kae ʻikai fakafetaʻi ai ki he ʻEiki ko homou ʻOtuá koeʻuhi ko ia; ʻio, ʻoku ʻikai tokanga homou lotó ki he ʻEikí, ka ʻoku fakafuofuolahi ia ʻi he ^bhīkisia lahi, ʻo aʻu ki he pōlepole, mo e ngaahi lea fielahi, mo e ngaahi ^cmeheka, mo e ngaahi fekeʻikeʻi, mo e tāufehiʻa, mo e ngaahi fakatanga, mo e ngaahi fakapō, mo e ngaahi angahala kehekehe kotoa pē.

23 He ko hono ʻuhinga ʻeni kuo tuku ai ʻe he ʻEiki ko e ʻOtuá ke hoko ʻa e malaʻia ki he fonuá, kae ʻumaʻā foki mo hoʻomou ngaahi koloá, pea kuó ne fai ʻeni koeʻuhi ko hoʻomou ngaahi angahalá.

24 ʻIo, malaʻia ki he kakaí ni, koeʻuhi ko e taimi ko ʻeni kuo hokó, ʻa ia ʻoku mou ^akapusi ai ki tuʻa ʻa e kau palōfitá, mo manukiʻi ʻa kinautolu, ʻo tolomakaʻi ʻa kinautolu, mo tāmateʻi ʻa kinautolu, mo fai ʻa e ngaahi faʻahinga angahala kovi kotoa pē kiate kinautolu, ʻo hangē ko ia naʻa nau fai ʻi he kuonga muʻá.

25 Pea ko ʻeni ko e taimi ʻoku mou talanoa aí, ʻoku mou pehē: Ka ne hoko ʻa hotau ngaahi ʻahó ʻi he ngaahi ʻaho ʻo ʻetau ngaahi ^atamai ʻo e kuonga muʻá, pehē kuo ʻikai te mau tāmateʻi ʻa e kau palōfitá; kuo ʻikai te mau tolomakaʻi ʻa kinautolu, ʻo kapusi ʻa kinautolu ki tuʻa.

26 Vakai ʻoku mou kovi ange ʻiate kinautolu; he hangē ʻoku moʻui ʻa e ʻEikí, ʻo ka haʻu kiate kimoutolu ha ^apalōfita pea fakahā kiate kimoutolu ʻa e folofola ʻa e ʻEikí, ʻa ia ʻoku fakamoʻoniʻi hoʻomou ngaahi angahalá mo e ngaahi hiá, ʻoku mou ^bʻita kiate ia, pea tuli ia ki tuʻa mo feinga ʻi he ngaahi founga kehekehe kotoa pē ke fakaʻauha ia; ʻio, te mou pehē ko ha ^cpalōfita loi ia, pea ko e tangata fai angahala ia, pea ʻoku ʻo e tēvoló, koeʻuhi ʻokú ne ^dfakamoʻoniʻi ʻoku kovi hoʻomou ngaahi ngāué.

27 Kae vakai, kapau ʻe haʻu ha tangata kiate kimoutolu ʻo pehē: Fai ʻeni, pea ʻoku ʻikai ha kovi; fai ʻena pea ʻe ʻikai te mou faingataʻaʻia; ʻio, te ne pehē: ʻAʻeva ʻi he hīkisia ʻo homou loto ʻomoutolú; ʻio, ʻaʻeva ʻi he hīkisia ʻo homou matá, pea fai ʻa e meʻa kotoa pē ʻoku holi ki ai homou lotó—pea kapau ʻe haʻu ha tangata kiate kimoutolu ʻo ne lea ʻaki ʻeni, te mou tali ia, ʻo pehē ko ha ^apalōfita ia.

28 ʻIo, te mou fakahikihikiʻi ia, pea te mou foaki kiate ia mei hoʻomou koloá; te mou foaki kiate ia mei hoʻomou koulá, pea mei hoʻomou silivá, pea te mou fakakofuʻi ia ʻaki ʻa e ngaahi kofu mahuʻinga; pea ko e meʻa ʻi heʻene lea ʻaki ʻa e ngaahi lea ^afakahekeheke kiate kimoutolu, peá ne pehē ʻoku lelei ʻa e meʻa kotoa pē, he ʻikai leva te mou fakaangaʻi ia.

29 ʻA kimoutolu ʻe toʻu tangata fai angahala mo paongataʻa; ʻa kimoutolu ʻa e kakai loto-fefeka mo kia-kekeva, ʻe fēfē hono fuoloa ʻo hoʻomou mahalo ʻe kātakiʻi ʻa kimoutolu ʻe he ʻEikí? ʻIo, ʻe fēfē hono fuoloa ʻo hoʻomou tuku ke tataki ʻa kimoutolu ʻe he kau fakahinohino ʻoku ^avale mo ^bkuí? ʻIo, ʻe fēfē hono fuoloa ʻo hoʻomou ^cfili ʻa e fakapoʻulí kae ʻikai ko e ^dmāmá?

30 ʻIo, vakai, kuo ʻosi houhau ʻa e ʻEikí kiate kimoutolu; vakai, kuó ne fakamalaʻiaʻi ʻa e fonuá koeʻuhi ko hoʻomou fai angahalá.

31 Pea vakai, ʻe hoko mai ʻa e taimi te ne fakamalaʻiaʻi ai ʻa hoʻomou ngaahi koloá, ke hoko ia ʻo ^ahomongofua, koeʻuhi ke ʻoua naʻa mou lava ʻo puke maʻu ia; pea ʻi he ngaahi ʻaho ʻo hoʻomou masivá ʻe ʻikai te mou faʻa tauhi ia.

32 Pea ʻi he ngaahi ʻaho ʻo hoʻomou masivá te mou tangi ki he ʻEikí; pea ʻe taʻeʻaonga hoʻomou tangí, he kuo hoko kiate kimoutolu ʻa hoʻomou tuēnoá, pea kuo fakapapauʻi homou fakaʻauhá; pea te mou toki tangi mo ngala ʻi he ʻaho ko iá, ʻoku folofola ʻe he ʻEiki ʻo e Ngaahi Kau Taú. Pea te mou toki tangilāulau, ʻo pehē:

33 ʻOiauē ^apehē ange mai naʻá ku fakatomala, ʻo ʻikai tāmateʻi ʻa e kau palōfitá, mo ^btolomakaʻi ʻa kinautolu, mo kapusi ʻa kinautolu ki tuʻa. ʻIo, ʻi he ʻaho ko iá te mou pehē: ʻOiauē pehē ange mai ne mau manatuʻi ʻa e ʻEiki ko homau ʻOtuá ʻi he ʻaho naʻá ne foaki ai kiate kimautolu ʻa ʻemau ngaahi koloá, pea pehē kuo ʻikai ke hoko ia ʻo homongofua ke mole ia ʻiate kimautolu; he vakai, kuo mole ʻemau ngaahi koloá meiate kimautolu.

34 Vakai, ʻoku mau tuku ha meʻangāue ʻi heni pea ʻi he ʻapongipongí kuo mole ia; pea vakai, kuo ʻave ʻemau ngaahi heletaá meiate kimautolu ʻi he ʻaho naʻa mau kumi ki ai ki he taú.

35 ʻIo, kuo mau fufuuʻi hake ʻemau ngaahi koloá pea kuo homo ia meiate kimautolu, koeʻuhi ko e malaʻia ʻo e fonuá.

36 ʻOiauē pehe ange mai naʻa mau fakatomala ʻi he ʻaho naʻe hoko mai ai ʻa e folofola ʻa e ʻEikí kiate kimautolú; he vakai kuo fakamalaʻiaʻi ʻa e fonuá, pea kuo hoko ʻo molengofua ʻa e ngaahi meʻa kotoa pē, pea ʻoku ʻikai te mau lava ʻo puke maʻu ia.

37 Vakai, kuo ʻātakaiʻi ʻa kimautolu ʻe he ngaahi laumālie ʻuli, ʻio, ʻoku takatakai ʻa kimautolu ʻe he kau ʻāngelo ʻa e tokotaha kuó ne feinga ke fakaʻauha homau laumālié. Vakai, ʻoku lahi fau ʻemau ngaahi angahalá. ʻE ʻEiki, he ʻikai te ke lava nai ʻo lolou ʻa ho houhaú meiate kimautolu? Pea ko e lea ʻeni te mou fai ʻi he ngaahi ʻaho ko iá.

38 Kae vakai, kuo hili ange ʻa e ngaahi ^aʻaho ʻo homou ʻahiʻahiʻi; kuo mou ^bfakatoloi ʻa e ʻaho ʻo hoʻomou fakamoʻuí kae ʻoua kuo tōmui ʻo taʻengata, pea kuo fakapapauʻi homou fakaʻauhá; ʻio, he kuo mou feinga ʻi he ngaahi ʻaho kotoa pē ʻo hoʻomou moʻuí ke maʻu ʻa ia ʻoku ʻikai te mou faʻa maʻú; pea kuo mou feinga ke maʻu ʻa e ^cfiefia ʻi he fai angahalá, ʻa ia ko ha meʻa ʻoku taʻehoa mo e anga ʻo e māʻoniʻoni ʻa ia ʻoku ʻi hotau Pule Taʻengata lahí.

39 ʻOiauē ʻa kimoutolu ʻa e kakai ʻo e fonuá, pehē ange ʻoku mou fanongo ki heʻeku ngaahi leá! Pea ʻoku ou lotua ke ʻofa ʻo lolou ʻa e houhau ʻo e ʻEikí meiate kimoutolu, pea ke mou fakatomala pea moʻui.