1 Ket ita napasamak iti maika-walo-pulo-ket-innem a tawen, nagtultuloy pay laeng ti kinadangkes dagiti Nephite, wen, iti nalaus a kinadangkes, idinto a nainget met ti panangtungpal dagiti ^aLamanite kadagiti bilin ti Dios, babaen iti paglintegan ni Moises.

2 Ket napasamak nga iti daytoy a tawen adda maysa a Samuel, a Lamanite, a dimteng iti daga ti Zarahemla, ket nangrugi a nangasaba kadagiti tao. Ket napasamak nga inkasabana, iti adu nga aldaw, ti panagbabawi kadagiti tao, ket pinagtalawda, ket dandani nagsubli iti ilina.

3 Ngem adtoy, immay ti timek ti Apo kenkuana, a nasken nga agsubli manen, ket ipadtona kadagiti umili ti ania man a banag nga umay iti ^apusona.

4 Ket napasamak a dida impalubos a sumrek iti siudad; ngarud napan iti rabaw ti pader, ket nagdeppa ken nagpukkaw, ket impadtona kadagiti umili dagiti banag nga inseksek ti Dios iti pusona.

5 Ket kinunana kadakuada: Adtoy, siak, ni Samuel, a Lamanite, ibagak dagiti balikas ti Apo nga inseksekna iti pusok; ket adtoy inseksekna iti pusok nga ibagak kadagitoy a tao a maipatay ti ^aespada ti linteg kadagitoy a tao; ket saan a lumbes ti uppat-a-gasut a tawen sa maipatay ti espada ti linteg kadagitoy a tao.

6 Wen, agur-uray ti nadagsen a ^apannakadadael kadagitoy a tao, ket awan duadua nga umay kadagitoy a tao, ket awan ti makaisalakan kadagitoy a tao malaksid ti panagbabawi ken pammati ken ni Apo Jesucristo, nga awan duadua nga umayto iti lubong, ken agsagabanto iti adu a banag ken mapapatayto nga agpaay kadagiti taona.

7 Ket adtoy, impalawag kaniak ti ^aanghel ti Apo, ket nangyeg iti naragsak a damag iti kararuak. Ket adtoy, naibaonak kadakayo tapno ipalawagko met, tapno maaddaankayo iti ^bnaimbag a damag; ngem adtoy didak awaten.

8 Ngarud, kastoy ti kinuna ti Apo: Gapu iti kinatangken ti puso dagiti Nephite, yadayok ti saok kadakuada malaksid no agbabawida, ken ikkatek ti ^aEspirituk kadakuada, ket diakto idan maanusan; ket pagbalinek ti puso dagiti kakabsatda a gumura kadakuada.

9 Ken saan a mapalabas ti ^auppat-a-gasut a tawen sakbay nga ipaayko ti pannaplitko; wen, isarungkarkonto kadakuada ti espada ken bisin ken angol.

10 Wen, isarungkarkonto kadakuada ti napalaus a pungtotko, ket addanto agbiag kadagiti ^amaikapat a kaputotan, kadagiti kabusoryo, a mangimatang iti pannakadadaelyo; ket umay daytoy nga awan duadua malaksid no agbabawikayo, kinuna ti Apo; ket yegto dagiti adda iti maikapat a kaputotan ti pannakadadaelyo.

11 Ngem no agbabawikayo ket ^aagsublikayo iti Apo a Diosyo pagmawmawek ti pungtotko, kinuna ti Apo; wen, kastoy ti kinuna ti Apo, nagasat dagiti agbabawi ken umay kaniak, ngem asi pay dagiti saan nga agbabawi.

12 Wen, ^aasi pay daytoy dakkel a siudad ti Zarahemla; ta adtoy, naisalakan gapu kadagiti nalinteg; wen, asi pay daytoy dakkel a siudad, ta mapattapattak, kinuna ti Apo, nga adu, wen, uray pay iti kadakkelan a paset daytoy a siudad, ti mangpatangken iti pusoda a maibusor kaniak, kinuna ti Apo.

13 Ngem nagasat dagiti agbabawi, gapu ta isalakanko ida. Ngem adtoy, no saan a gapu kadagiti nalinteg nga adda iti daytoy nabileg a siudad, adtoy, pababaek ti ^aapuy manipud iti langit ket dadaelenna ida.

14 Ngem adtoy, maispal gapu kadagiti nalinteg. Ngem adtoy, umay ti kanito, kinuna ti Apo, a no paksiatenyo dagiti nalinteg kadakayo, nakasaganakayonton a madadael; wen, asinto pay daytoy nabileg a siudad, gapu iti kinadangkes ken kinarimon nga adda kenkuana.

15 Wen, ken asi pay ti siudad ti Gideon, gapu kadagiti kinadangkes ken kinarimon nga adda kenkuana.

16 Wen, ken asi pay dagiti amin a siudad nga adda iti aglawlaw dayta a daga, a kukua dagiti Nephite, gapu iti kinadangkes ken kinarimon nga adda kadakuada.

17 Ket adtoy, dumtengto ti ^alunod iti dayta a daga, kinuna ti Apo dagiti Pangen, gapu iti pagimbagan dagiti tao nga adda iti daga, wen, gapu kadagiti kinadangkesda ken narimon nga aramidda.

18 Ket mapasamakto, kinuna ti Apo dagiti Pangen, wen, ti nabileg ken pudno a Diostayo, a siasino man a ^amangilemmeng iti kinabaknang ti daga saandanton a masapulan ida, gapu iti dakkel a pannakailunod ti daga, malaksid no italimeng ti nalinteg a tao kas pagayatan ti Apo.

19 Agsipud ta kayatko, kinuna ti Apo, nga italimengda kaniak ti kinabaknangda kas pagayatak; ket mailunod dagiti saan a mangitalimeng ti kinabaknangda kaniak. Gapu ta awan ti mangitalimeng ti kinabaknangda kaniak malaksid laeng dagiti nalinteg; ket ti siasino man a saan a mangitalimeng ti kinabaknangna kaniak kas pagayatak, mailunod, kasta met ti kinabaknang, ket awanto ti makaala gapu iti lunod ti daga.

20 Ket dumtengto ti aldaw nga ilemmengda ti kinabaknangda, agsipud ta naisaad ti pusoda iti kinabaknang; ket agsipud ta insaadda ti pusoda iti kinabaknang, ken ilemmengda ti kinabaknangda inton itarayanda ti kabusorda; agsipud ta saanda a maitalimeng kaniak kas pagayatak, mailunodda ken kasta met ti kinabaknangda; ken masaplitdanto iti dayta nga aldaw, kinuna ti Apo.

21 Adtoy dakayo, tao ti daytoy nabileg a siudad, ket ^adenggenyo dagiti saok; wen, denggenyo dagiti ibaga ti Apo; gapu ta adtoy, kinunana a mailunodkayo gapu iti kinabaknangyo, ken mailunod ti kinabaknangyo gapu ta insaadyo ti pusoyo kadagitoy, ket saankayo a dimngeg kenkuana a nangted kadagitoy kadakayo.

22 Saanyo a malagip ti Apo a Diosyo kadagiti banag a nangparaburanna kadakayo, ngem kanayonyo a malaglagip ti ^akinabaknangyo, a dikayo man la agyaman iti Apo a Diosyo gapu kadagitoy; wen, saan a nakayakay ti puspusoyo iti Apo, ngem dumakdakkelda nga aglablabes iti ^bkinatangsit, iti kinaparammag, ken iti napalalo a kinamanaglablabes, ^cpanagiinnapal, ap-apa, dakes a panunot, panagidadanes, ken pammapatay, ken amin a kita ti kinadakes.

23 Agsipud iti daytoy inkeddeng ti Apo a Dios a nasken nga adda lunod iti daga, ken kasta met iti kinabaknangyo, ket gapu daytoy iti kinadakesyo.

24 Wen, asi pay dagitoy a tao, gapu iti daytoy a kanito a dimteng, a ^apanangpapanawyo kadagiti propeta, ken nagang-angawanyo ida, ket inuboryo ida iti bato, ken pinatayyo ida, ken inaramidyo ti amin a kita ti kinadakes kadakuada, a kas iti naar-aramid idi un-unana a panawen.

25 Ita no agsaokayo, kunayo: No koma adda dagiti aldawmi kadagidi aldaw ti ^aammami idi un-unana, saanmi la ketdi a pinatay dagiti propeta; saanmi koma nga inubor ida, ken pinapanaw ida.

26 Adtoy dakdakeskayo ngem kadakuada; ta bayat ti panagbiag ti Apo, no umay ti ^apropeta kadakayo ket ipalawagna ti sao ti Apo, a mangpaneknek kadagiti basol ken kinadakesyo, ^bagpungtotkayo kenkuana, ket papanawenyo ket aramatenyo ti amin a wagas a mangdadael kenkuana; wen, kunaenyo a saan a pudno a ^cpropeta, a maysa a managbasol, ken pasurot ti sairo, agsipud ta ^dpaneknekanna a dakes ti aramidyo.

27 Ngem adtoy, no umay ti maysa a tao kadakayo ket kunana: Aramidem daytoy, ket awan ti kinadakes; aramidem dayta ket saankanto nga agsagaba: wen, kunana; Magnakayo a natangsit ti puspusoyo; wen, magnakayo a natangsit ti matmatayo, ken aramidenyo ti ania man a pagayatan ti pusoyo—ket no umay ti maysa a tao kadakayo ket kunana daytoy, awatenyo, ket annugotenyo nga isu ti ^apropeta.

28 Wen, itag-ayyonto; ket ikkanyo iti taraonyo; ikkanyo iti balitokyo, ken iti pirakyo, ket kawesanyo iti napateg a pagan-anay; gapu ta agibaga iti ^amangpatiray-ok kadakayo, ket kunana a nasayaat ti amin, gapuna awan ti masarakanyo kenkuana a basol.

29 O dakayo a nadangkes ken dakayo a sungani a kaputotan; dakayo a nasukir ken natangig a tattao, kasano ti kapaut ti panangipagarupyo a panangan-anus ti Apo kadakayo? Wen, kasano ti kabayag ti panangitulokyo iti bagbagiyo nga idalan ti ^amaag ken ^bbulsek a mangiturturong? Wen, kasano ti kabayag ti ^cpanangpiliyo iti kinasipnget a di ket ti ^dlawag?

30 Wen, adtoy, narubrobanen ti pungtot ti Apo a maibusor kadakayo; adtoy, inlunodna ti daga gapu iti kinadakesyo.

31 Ket adtoy, dumteng ti panawen nga ilunodna ti kinabaknangyo, ket agbalinda a ^anagalis, tapno diyo ida maiggaman; ken saanyo a mapagtalinaed ida iti aldaw ti kinapanglawyo.

32 Ket umararawkayonto iti Apo kadagiti aldaw ti kinapanglawyo; ket saanto a masungbatan ti ararawyo, agsipud ta napatalgedanen ti pannakadadaelyo; ket isunto ti panagsangit ken panagugaogyo iti dayta nga aldaw, kinuna ti Apo ti Pangen. Ket isunton ti panagladingityo, ket kunayo:

33 O ^anagbabawiak koma, ken saanko a pinatay dagiti propeta, ken ^binubor ida, ken pinapanaw ida. Wen, iti dayta nga aldaw kunaenyonto: O nalagipmi koma ti Apo a Diosmi iti aldaw nga intedna ti kinabaknangmi, ta saanda koma a nagbalin a nagalis ken napukawmi ida; gapu ta adtoy, awanen ti kinabaknangmi napukawmin.

34 Adtoy, idissomi ti maysa nga alikamen ditoy, ket inton kabigatanna awanen; ken adtoy, naalada dagiti espadami kadakami idi kasapulanmi ida a pakidangadang.

35 Wen, inlemmengmi dagiti kinabaknangmi ket nagpukawda kadakami, gapu iti pannakailunod ti daga.

36 O no nagbabawikami koma iti aldaw a naawatmi ti sao ti Apo; ta adtoy nailunod ti daga, ket nagbalin amin a banag a nagalis, ket saanmi a maiggaman ida.

37 Adtoy, nalikmutkami kadagiti demonio, wen, nalikmutkami kadagiti anghelna a mangdadael iti kararuami. Adtoy, napalalo ti kinadakesmi. O Apo, saanmo kadi a mapunas ti pungtotmo kadakami? Ket daytoyto ti pagsasaoyo kadagita nga aldaw.

38 Ngem adtoy, napalabasen ti ^aaldaw a pannakatingitingyo; ^bintantanyo ti aldaw ti pannakaisalakanyo agingga iti nalabes unayen ti kinaladawna, ket napatalgedanen ti pannakadadaelyo; wen, ta inaramatyo amin nga aldaw ti panagbiagyo iti panagsapulyo kadagiti saanyo a magun-od; ket sinapulyo ti ^cragsak babaen ti panagaramidyo iti kinadakes, banag a maisupadi iti wadan ti kinalinteg nga adda iti naindaklan ken Agnanayon a Pangulo.

39 O dakayo a tao iti pagilian, sapay koma ta dumngegkayo iti saok! Ket ikararagko a maikkat koma ti pungtot ti Apo kadakayo, ken agbabawi ket maisalakankayo.