1 Ut anajwan kik’ulman sa’ li xwaq ro’k’aal chihab’, eb’ laj Nefita toj ke’kana sa’ li maa’usilal, relik chi yaal, sa’ nimla maa’usilal, a’ut eb’ laj ^aLamanita ke’xk’e x’anchalil xch’ool chixpaab’ankil lix taqlahom li Dios, jo’ chanru lix chaq’rab’ laj Moises.

2 Ut kik’ulman naq sa’ li chihab’ a’in kiwan jun aj Samuel, aj Lamanita, kik’ulun sa’ li ch’och’ Tzarahemla, ut ki’ok chi jultikank aatin chiruheb’ li tenamit. Ut kik’ulman naq kixjultika, chiru k’iila kutan, li jalb’a-k’a’uxlej chiruheb’ li tenamit, ut eb’ a’an ke’risi chaq, ut ok raj re chi sutq’iik sa’ xch’och’ a’an.

3 A’ut k’ehomaq reetal, lix yaab’ xkux li Qaawa’ kichal rik’in, naq taasutq’iiq wi’chik, ut tixch’olob’ jo’ profeet chiruheb’ li tenamit jo’ k’ihal li k’a’ru taa’ok sa’ ^axch’ool.

4 Ut kik’ulman naq ink’a’ ke’xkanab’ naq taa’ok sa’ li tenamit, jo’kan naq xko’o ut kitaqe’ sa’ xb’een lix xaqxookil tz’ak, ut kixye’ li ruq’ ut kixjap re chi kaw xyaab’ xkux, ut kixch’olob’ jo’ profeet chiru li tenamit jo’ k’ihal li k’a’ru kixk’e li Qaawa’ sa’ xch’ool.

5 Ut kixye reheb: K’ehomaq reetal, laa’in, aj Samuel, jun aj Lamanita, ninye li raatin li Qaawa’ li naxk’e sa’ inch’ool; ut k’ehomaq reetal, xk’e sa’ inch’ool naq tinye re li tenamit a’in naq li yok’leb’ ch’iich’ re li raqb’a-aatin wan chi taqsinb’il sa’ xb’een li tenamit a’in; ut moko taanume’q ta kaahib’ cient chihab’ chi ink’a’ taat’ane’q li ^ayok’leb’ ch’iich’ re li raqb’a-aatin sa’ xb’een li tenamit a’in.

6 Relik chi yaal, li nimla ^asache’k na’oyb’enink re li tenamit a’in, ut taachalq chi yaal sa’ xb’een li tenamit a’in, ut maak’a’ naru chixkolb’al li tenamit a’in, ka’ajwi’ li jalb’a-k’a’uxlej ut xpaab’ankil li Qaawa’ Jesukristo, li taachalq chi yaal sa’ li ruchich’och’, ut tixk’ul k’iila rahilal ut taakamsiiq choq’ re lix tenamit.

7 Ut k’ehomaq reetal, jun ^ax’anjel li Qaawa’ kixch’olob’ chiwu, ut kixk’am ^bsahil esilal sa’ waam. Ut k’ehomaq reetal, kintaqlaak eerik’in re xch’olob’ankil ajwi’ cheru laa’ex, re texruuq chixk’ulb’al li sahil esilal; a’b’anan ink’a’ keraj ink’ulb’al.

8 Jo’kan ut, jo’ka’in naxye li Qaawa’: Xb’aan xkawil raameb’ lix tenamiteb’ laj Nefita, wi ink’a’ neke’xjal xk’a’uxl laa’in tinwisi chaq li waatin sa’ xyanqeb’, ut ^atinwisi chaq lin Musiq’ rik’ineb’, ut moko tinkuyeb’ ta chik, ut tinsutq’isi xch’ooleb’ li ras riitz’ineb’ re naq xik’ te’rileb’.

9 Ut moko taanume’q ta ^akaahib’ cient chihab’ chi maji’ nink’eheb’ chi sak’e’k; relik chi yaal, tinwula’aniheb’ rik’in li yok’leb’ ch’iich’ ut rik’in we’ej ut rik’in yajel.

10 Relik chi yaal, tinwula’aniheb’ sa’ xnimal injosq’il, ut te’wanq xkomoneb’ li ^axkaa tasal tenamit li toj te’wanq chi yo’yo, sa’ xyanqeb’ li xik’ neke’ilok eere, re te’ril eesachlijik chi junajwa; ut taachalq a’in chi yaal wi ink’a’ nekejal eek’a’uxl, chan li Qaawa’; ut eb’ li wankeb’ sa’ li xkaa tasal tenamit te’rula’ani eesachlijik.

11 A’b’anan wi nekejal eek’a’uxl ut ^anekexsutq’i rik’in li Qaawa’ lee Dios laa’in tinwisi chaq lin josq’il, chan li Qaawa’; relik chi yaal, jo’ka’in naxye li Qaawa’, osob’tesinb’ileb’ li te’xjal xk’a’uxl ut te’sutq’iiq wik’in, a’b’an rahilal sa’ xb’een li ani ink’a’ naxjal xk’a’uxl.

12 Relik chi yaal, ^arahilal sa’ xb’een li nimla tenamit a’in Tzarahemla; xb’aan naq k’ehomaq reetal, a’an xb’aaneb’ li tiikeb’ xch’ool naq kolb’il; relik chi yaal, rahilal sa’ xb’een li nimla tenamit a’in, xb’aan naq nink’e reetal, chan li Qaawa’, naq wankeb’ naab’al, relik chi yaal, lix k’ihal li nimla tenamit a’in, li te’xkawob’resi li raam chiwix, chan li Qaawa’.

13 A’b’an osob’tesinb’ileb’ li te’xjal xk’a’uxl, xb’aan naq eb’ a’an teb’inkol xyu’am. A’ut k’ehomaq reetal, wi ta maawa’ xb’aaneb’ li tiikeb’ xch’ool li wankeb’ sa’ li nimla tenamit a’in, k’ehomaq reetal, tintaqla raj li ^axam chi kub’eek chaq sa’ choxa ut chixsachb’al.

14 A’b’an k’ehomaq reetal, choq’ reheb’ li tiikeb’ xch’ool naq nakuyman. A’ut k’ehomaq reetal, taachalq xkutankil, chan li Qaawa’, naq jo’q’e teerisi chaq li tiikeb’ xch’ool sa’ eeyanq, toja’ ut naq texq’ano’q choq’ re li sache’k; relik chi yaal, rahilal chichalq sa’ xb’een li nimla tenamit a’in, xb’aan li maa’usilal ut li tz’eqb’eetalil li wan chixsa’.

15 Relik chi yaal, ut rahilal chichalq sa’ xb’een li tenamit Gideon, xb’aan li maa’usilal ut li tz’eqb’eetalil li wan chi sa’.

16 Relik chi yaal, ut rahilal chichalq sa’ xb’eeneb’ chixjunil li tenamit li wankeb’ sa’ li ch’och’ sa’ xsutam, li eechaninb’il xb’aaneb’ laj Nefita, xb’aan li maa’usilal ut li tz’eqb’eetalil li wankeb’ chi sa’.

17 Ut k’ehomaq reetal, taachalq jun li ^amajewank sa’ xb’een li ch’och’, chan li Qaawa’ reheb’ li teepal, sa’ xk’ab’a’eb’ li ani wankeb’ sa’ xb’een li ch’och’, relik chi yaal, xb’aan lix maa’usilaleb’ ut lix tz’eqb’eetalileb’.

18 Ut taak’ulmanq, chan li Qaawa’ reheb’ li Teepal, relik chi yaal, li qanimla ut yaalil Dios, naq ani ^anamuquk re li b’ihomal sa’ li ch’och’ moko tixtaw ta chik, xb’aan xnimal xmajewankil li ch’och’, ka’ajwi’ wi a’an jun winq tiik xch’ool ut naxmuq choq’ re li Qaawa’.

19 Xb’aan naq nawaj, chan li Qaawa’, naq te’xmuq xb’ihomaleb’ choq’ we; ut che’majewaaq li ani ink’a’ te’xmuq xb’ihomal choq’ we; xb’aan naq maajun naxmuq xb’ihomal choq’ we, ka’ajwi’ li tiik xch’ool; ut ani ink’a’ naxmuq xb’ihomal choq’ we, majewanb’il a’an, ut jo’kan ajwi’ li b’ihomal, ut maajun taak’uluq re li b’ihomal xb’aan xmajewankil li ch’och’.

20 Ut taachalq xkutankil naq te’xmuq xb’ihomaleb’, xb’aan naq xe’xk’e xch’ool chirix xb’ihomal; ut xb’aan naq ke’xk’e xch’ool chirix xb’ihomal, ut te’xmuq lix b’ihomal naq te’eeleliq chaq chiruheb’ li xik’ neke’ilok reheb’; rik’in naq ink’a’ te’xmuq choq’ we, che’majewaaq eb’ a’an rochb’een ajwi’ xb’ihomaleb’; ut sa’ li kutan a’an te’sak’e’q, chan li Qaawa’.

21 K’ehomaq reetal ex li wankex sa’ li nimla tenamit a’in, ut ^achex’ab’inq chiru li waatin; relik chi yaal, chex’ab’inq chiru li aatin li naxye li Qaawa’; xb’aan naq k’ehomaq reetal, a’an naxye naq majewanb’ilex xb’aan eeb’ihomal, ut jo’kan ajwi’ majewanb’il eeb’ihomal xb’aan naq xek’e eech’ool chirix, ut ink’a’ xex’ab’in chiru li raatin li kixk’e chaq eere.

22 Ink’a’ najultiko’ eere li Qaawa’ lee Dios sa’ li k’a’aq re ru kexrosob’tesi wi’, a’b’an junelik najultiko’ eere lee ^ab’ihomal, moko re ta xb’antioxinkil chiru li Qaawa’ lee Dios; relik chi yaal, moko nimob’resinb’il ta eech’ool chiru li Qaawa’, naniman b’an rik’in nimla ^bq’etq’etil, sa’ xnimankil eerib’, ut sa’ nimla terq’usink-ib’, ^ckaqalink, wech’ij-ib’, xik’ ilok, rahob’tesink, ut kamsink, ut li k’iila paay chi maa’usilal.

23 Xb’aan a’in naq li Qaawa’ Dios kixtaqla naq taachalq jun li majewank sa’ xb’een li ch’och’, ut sa’ xb’een ajwi’ eeb’ihomal, ut a’in xb’aan eemaa’usilal.

24 Relik chi yaal, rahilal sa’ xb’een li tenamit a’in, xb’aan li kutan a’in li ak xk’ulun, naq ^anekerisiheb’ chaq li profeet, ut nekereetz’uheb’, ut nekekutiheb’ chi pek, ut nekekamsiheb’, ut nekeb’aanu li k’iila paay chi maa’usilal reheb’, jo’ chanru ajwi’ ke’xb’aanu aj najter kutan.

25 Ut anajwan naq nekex’aatinak, nekeye: Wi ta kiwan qakutan sa’ xkutankileb’ ^aqayuwa’ najter, ink’a’ raj kiqakamsiheb’ li profeet; ink’a’ raj kiqakutiheb’ chi pek, ut kiqisiheb’ chaq.

26 K’ehomaq reetal, laa’ex nekeq’ax xmaa’usilaleb’ a’an; xb’aan naq jo’ naq yo’yo li Qaawa’, wi taachalq jun ^aprofeet sa’ eeyanq ut naxch’olob’ cheru li raatin li Qaawa’, li naxk’ut xyaalal lee maak ut lee maa’usilal, ^bnekexjosq’o’ rik’in, ut nekerisi chaq ut nekesik’ k’iila paay chi na’leb’ re xsachb’al; relik chi yaal, teeye naq a’an ^cprofeet aj b’alaq’, ut naq a’an aj maak, ut re laj tza, xb’aan naq ^dnaxch’olob’ xyaalal naq ink’a’ us eeb’aanuhom.

27 A’b’an k’ehomaq reetal, wi taachalq jun winq sa’ eeyanq ut tixye: B’aanuhomaq a’in, ut maak’a’ maa’usilal; b’aanuhomaq a’an ut ink’a’ teek’ul rahilal; relik chi yaal, tixye: B’ehinqex jo’ chanru xq’etq’etil eech’ool laa’ex, relik chi yaal, b’ehinqex jo’ chanru xq’etq’etil eeru, ut b’aanuhomaq jo’ k’ihal narataw eech’ool—ut wi taachalq jun winq sa’ eeyanq ut tixye a’in, teek’ul a’an, ut teeye naq a’an ^aprofeet.

28 Relik chi yaal, teetaqsi a’an, ut teek’e re a’an xkomon li k’a’ru eere; teek’e re xkomon lee oor, ut lee plaat, ut teetiqib’ rik’in aq’ej terto xtz’aq; ut rik’in naq naxye ^asahil aatin eere, ut naxye naq chaab’il chixjunil, moko teetaw ta maak rik’in.

29 Ex tasal tenamit aj maakex ut po’b’il eech’ool; ex tenamit kawujenaqex ut jip eek’a’uxl, toj jo’q’e nekek’oxla naq li Qaawa’ texxkuy? Relik chi yaal, jo’ najtil chik teekanab’ eerib’ chi b’eresiik xb’aaneb’ laj k’amol b’e ^ajipeb’ ut ^bmutz’eb’? Relik chi yaal, jo’ najtil chik ^cteesik’ ru li q’ojyin chiru li ^dsaqen?

30 Relik chi yaal, k’ehomaq reetal, ak lochlo xjosq’il li Qaawa’ cherix; k’ehomaq reetal, a’an xmajewa li ch’och’ xb’aan eemaa’usilal.

31 Ut k’ehomaq reetal, taachalq xkutankil naq tixmajewa eeb’ihomal, re naq ^ayolyol taakanaaq, re naq ink’a’ texruuq chixchapb’al; ut sa’ xkutankil eeneb’a’il ink’a’ texruuq chixk’uulankil.

32 Ut sa’ xkutankil eeneb’a’il tex’elajinq chiru li Qaawa’, ut maak’a’ taa’ok wi’ naq tex’elajinq, xb’aan naq ak chalenaq xsachb’al eeru sa’ eeb’een, ut ak ch’olch’o ru eesachlijik; toja’ ut naq texyaab’aq ut tex’ayaynaq sa’ li kutan a’an, chan li Qaawa’ reheb’ li Teepal. Toja’ ut naq taaraho’q eech’ool, ut teeye:

33 Aay, ^akinjal taxaq raj ink’a’uxl, ut ink’a’ raj taxaq kinkamsiheb’ li profeet, ut ^bkinkutiheb’ chi pek, ut kiwisiheb’ chaq. Relik chi yaal, sa’ li kutan a’an teeye: Aay, kijultiko’ taxaq raj chiqu li Qaawa’ qaDios sa’ li kutan naq kixk’e qab’ihomal, toja’ ut naq ink’a’ raj kikana chi yolyol ut kisache’ chiqu; xb’aan naq k’ehomaq reetal, li qab’ihomal xikenaq chaq qik’in.

34 K’ehomaq reetal, naqak’e jun k’anjeleb’aal arin ut wulajaq chik maak’a’; ut k’ehomaq reetal, li qayok’leb’ ch’iich’ maq’b’il chiqu sa’ li kutan xqasik’ wi’ choq’ re li pleet.

35 Relik chi yaal, xqamuq qab’ihomal ut xyole’ chaq sa’ quq’, xb’aan xmajewankil li ch’och’.

36 Aay, kiqajal taxaq raj qak’a’uxl sa’ li kutan naq kichal li raatin li Qaawa’ qik’in, xb’aan naq k’ehomaq reetal, majewanb’il li ch’och’, ut chixjunil li k’a’aq re ru yolyol xkana, ut ink’a’ naru naqachap.

37 K’ehomaq reetal, sutsuuko xb’aaneb’ li maa’us aj musiq’ej, relik chi yaal, sutsuuko xb’aaneb’ lix anjel a’an li kisik’ok re xsachb’al li qaam. K’ehomaq reetal, nim li qamaa’usilal. At Qaawa’, ma ink’a’ tatruuq chixsutq’isinkil chaq laa josq’il sa’ qab’een? A’inaq ut eeraatin sa’ li kutan a’an.

38 A’b’anan k’ehomaq reetal, ak numenaq ^axkutankil lix yalb’al eerix; ^bxeb’ay xkutankil eekolb’al toj reetal naq chi junajwa ink’a’ chik naru, ut ak ch’olch’o ru eesachlijik; relik chi yaal, xb’aan naq xesik’ chiru chixjunil lix kutan eeyu’am li k’a’ru ink’a’ kexru chixtawb’al, ut xesik’ ^cxsahil eech’ool rik’in xb’aanunkil maa’usilal, ut a’ na’leb’ a’an maamin naxk’am rib’ rik’in li tiikilal li wan rik’in li qanimla Jolomil re junelik.

39 Ex tenamit re li ch’och’, cherab’ihaq taxaq li waatin! Ut nintz’aama naq chi’isiiq chaq lix josq’il li Qaawa’ sa’ eeb’een, ut naq teejal eek’a’uxl ut texkole’q.