14. kapítuli

Samúel spáir birtu að nóttu til og nýrri stjörnu við fæðingu Krists—Kristur endurleysir menn frá stundlegum og andlegum dauða—Táknin um dauða hans verða m.a. þriggja daga myrkur, björg klofna og mikið umrót verður í náttúrunni. Um 6 f.Kr.

  Og nú bar svo við, að Lamanítinn Samúel spáði mörgu fleira, sem ekki er unnt að færa í letur.

  Og sjá, hann sagði við þá: Sjá, ég gef yður tákn. Fimm ár munu enn líða, en sjá, þá kemur Guðssonurinn til að endurleysa alla þá, sem á nafn hans trúa.

  Og sjá. Þetta gef ég yður sem tákn við komu hans. Því að sjá, mikil ljós verða á himni, svo mikil, að nóttina fyrir komu hans mun ekkert myrkur verða, þannig að manninum virðist sem dagur sé.

  Fyrir því verður einn dagur og nótt og dagur, sem væri það einn samfelldur dagur en engin nótt. Og þetta verður yður tákn, því að þér munuð vita, hvenær sól rís og hvenær hún sest. Þess vegna munuð þér vita með vissu, að um er að ræða tvo daga og eina nótt. Engu að síður verður nóttin eigi myrkvuð. En þetta verður nóttina áður en hann fæðist.

  Og sjá. Ný stjarna mun rísa, slík sem þér hafið aldrei áður séð, og hún skal einnig verða yður tákn.

  Og sjá. Ekki er allt upp talið, mörg tákn og undur verða á himni.

  Og svo ber við, að þér munuð öll verða furðu lostin og undrast, já, svo að þér fallið til jarðar.

  Og svo ber við, að hver sem trúa mun á Guðssoninn, sá hinn sami mun öðlast ævarandi líf.

  Og sjá. Þannig hefur Drottinn boðið mér með engli sínum að koma og segja yður þetta. Já, hann hefur boðið mér að spá fyrir yður. Já, hann hefur sagt við mig: Hrópa til þessa fólks að iðrast og greiða Drottni veg.

  10 Og vegna þess að ég er Lamaníti og hef talað til yðar þau orð, sem Drottinn hefur boðið mér, og vegna þess, að þau eru hörð í yðar garð, eruð þér mér reiðir, reynið að tortíma mér og vísið mér burt frá yður.

  11 En þér skuluð heyra orð mín, því að í þeim tilgangi er ég kominn upp á múra þessarar borgar, að þér megið heyra og þekkja dóma Guðs, sem bíða yðar vegna misgjörða yðar, og einnig til þess, að þér megið þekkja skilmála iðrunarinnar—

  12 Og einnig að þér megið vita um komu Jesú Krists, Guðssonarins, föður himins og jarðar, skapara allra hluta frá upphafi, og að þér megið vita um táknin um komu hans, þannig að þér megið trúa á nafn hans.

  13 Og ef þér trúið á nafn hans, þá munuð þér iðrast allra synda yðar og fáið þar með fyrirgefningu þeirra, fyrir verðleika hans.

  14 Og sjá enn. Annað tákn gef ég yður, já, tákn um dauða hans.

  15 Því að sjá. Hann hlýtur að deyja, til þess að hjálpræðið fái framgang. Já, óhjákvæmilegt verður og honum þóknanlegt, að hann deyi til að gjöra upprisu dauðra að veruleika og menn verði þar með leiddir í návist Drottins.

  16 Já, sjá. Þessi dauði gjörir upprisuna að veruleika og endurleysir allt mannkyn frá hinum fyrsta dauða—andlegum dauða. Því að með falli Adams útilokast allt mannkyn úr návist Drottins og telst dautt, bæði gagnvart því stundlega og andlega.

  17 En sjá. Upprisa Krists endurleysir mannkynið, já, allt mannkyn, og leiðir það aftur í návist Drottins.

  18 Já, hún gjörir skilmála iðrunarinnar að veruleika, þannig að hver sá, sem iðrast, mun ekki niður höggvinn og á eld kastað, en hver sá, sem ekki iðrast, verður niður höggvinn og á eld kastað. Og yfir þá kemur á ný hinn andlegi dauði, já, hinn annar dauði, því að þeir útilokast á ný frá öllu, sem réttlætinu tilheyrir.

  19 Iðrist þess vegna, iðrist, svo að þér leiðið ekki yfir yður fordæmingu og þennan síðari dauða með því að vita þessa hluti en breyta ekki eftir þeim.

  20 En sjá. Ég talaði við yður um annað tákn, tákn um dauða hans. Sjá, þann dag, þegar hann líður dauða, mun sólin myrkvast og neita að gefa yður birtu sína og einnig tunglið og stjörnurnar. Og ekkert ljós verður yfir öllu þessu landi, já, frá þeirri stundu, er hann líður dauða, og í þrjá daga til þess tíma, er hann rís aftur frá dauðum.

  21 Já, á þeirri stundu, er hann gefur upp andann, munu verða þrumur og eldingar í margar stundir, og jörðin mun nötra og skjálfa, og björgin á yfirborði jarðar, bæði þau, sem eru á jörðu og undir, sem þér á þessari stundu vitið, að eru traust eða að mestu úr einu föstu efni, þau munu molna sundur—

  22 Já, þau munu klofna í sundur, og ætíð síðan sjást með rifur og sprungur og í molum um allt yfirborð jarðar, já, bæði á jörðu og undir.

  23 Og sjá. Miklir fellibyljir verða og mörg fjöll munu lækkuð og verða sem dalir, og margir staðir, sem nú nefnast dalir, verða að afar háum fjöllum.

  24 Og margir þjóðvegir rifna sundur, og margar borgir falla í auðn.

  25 Og margar grafir munu opnast og láta af hendi marga af sínum dauðu, og margir heilagir munu birtast mörgum.

  26 Og sjá. Svo hefur engill sagt mér, því að hann sagði mér, að þrumur yrðu og eldingar í margar stundir.

  27 Og hann sagði mér, að þetta myndi gerast á meðan þrumurnar og eldingarnar stæðu yfir og fellibylurinn, og að myrkur mundi hylja gjörvallt yfirborð jarðar í þrjá daga.

  28 Og engillinn sagði mér, að margir mundu sjá stærri hluti en þessa, til þess að þeir mættu trúa, að þessi tákn og undur yrðu um allt landið og engin ástæða yrði til vantrúar meðal mannanna barna—

  29 Og það til þess að hver sá, sem vill trúa, megi frelsast, og hver sá, sem ekki vill trúa, megi hljóta réttlátan dóm. Einnig, að séu menn dæmdir, þá leiða þeir sjálfir yfir sig sinn eigin dóm.

  30 Og nú bræður mínir. Hafið hugfast og minnist þess, að hver, sem glatast, glatast sjálfum sér, og hver, sem illt gjörir, gjörir það sjálfum sér. Því að sjá, þér eruð frjálsir, yður leyfist að breyta sjálfstætt. Því að sjá, Guð hefur gefið yður þekkingu, og hann hefur gjört yður frjálsa.

  31 Hann hefur gefið yður það að þekkja gott frá illu, og hann hefur gefið yður að velja líf eða dauða. Og þér getið gjört gott og hlotið endurreisn til þess, sem gott er, eða endurheimt hið góða. Eða þér getið gjört illt og endurheimt hið illa.