1 Mo i bin hapen se long sem yia, luk, ^aNifae i givim jea blong jajmen long wan man we nem blong hem i Sesoram.

2 From se ol loa blong olgeta mo ol gavman blong olgeta i bin stanap tru long ^avoes blong ol pipol, mo olgeta we oli bin ^bjusum nogud fasin oli moa plante bitim olgeta we oli jusum gud fasin, nao from hemia, oli kam raep blong kasem fasin blong panis, from ol loa i bin kam nogud.

3 Yes, mo i no hemia nomo; oli wan stronghed pipol, inaf blong mekem se oli no save rulum olgeta tru long loa o jastis, be blong oli kilimded olgeta nomo.

4 Mo i bin hapen se Nifae i kam taed from ol rabis fasin blong olgeta; mo hem i ^alego jea blong jajmen, mo hem i tekem long hemwan wok blong prijim toktok blong God long ol dei blong hem we i stap, mo semmak long brata blong hem Lihae, long evri dei blong hem we i stap;

5 From tufala i tingbaot ol toktok we papa blong tufala Hileman i bin talem long tufala. Mo hemia i ol toktok we hem i talem:

6 “Luk, ol boe blong mi, mi wantem se yutufala i mas tingbaot blong obei ol komanmen blong God; mo mi wantem se yutufala i talemaot long ol pipol ol toktok ia. Luk, mi bin givim long yutufala ol nem blong ol fasfala ^apapa blong yumi we oli bin kamaot long graon blong Jerusalem; mo samting ia mi bin mekem blong taem we yutufala i tingbaot ol nem blong yutufala, bae yutufala i save tingbaot olgeta; mo taem we yutufala i tingbaot olgeta, bae yutufala i save tingbaot ol wok blong olgeta; mo taem we yutufala i tingbaot ol wok blong olgeta, bae yutufala i save tingbaot wanem we oli bin talem, mo tu, we oli bin raetem, se oli bin ^bgud.

7 From hemia, ol boe blong mi, mi wantem se yutufala i mekem samting we i gud, blong ol pipol oli save tokbaot mo raetem long saed blong yutufala, olsem we oli bin tokbaot mo raetem long saed blong olgeta tu.

8 Mo nao ol boe blong mi, luk mi gat samfala samting moa we mi wantem blong yutufala i mekem, samting ia we mi wantem, hem i blong yutufala i no mekem ol samting ia blong yutufala i save tokflas, be blong yutufala i save mekem ol samting ia blong hivimap blong yutufala bakegen wan ^arij samting long heven, yes, we i no save finis, mo we i no save lus; yes, blong yutufala i save gat ^bgudgudfala presen ia we i laef we i no save finis, we yumi gat wan stamba tingting blong ting se God i bin givim hemia long ol papa blong yumi.

9 O tingbaot, tingbaot, ol boe blong mi, ol ^atoktok we king Benjamin i bin talem long ol pipol blong hem; yes, tingbaot se i no gat wan narafala rod o wei, we bae oli sevem man, be tru long blad blong Jisas Kraes we i ^bpem praes, Kraes ia we bae i kam; yes, tingbaot se hem bae i kam blong ^dpemaot ^ewol.

10 Mo tingbaot tu ol ^atoktok we Amulek i bin talem long Siesrom, long bigtaon blong Amonaeha; from hem i bin talem long hem se, i tru se Lod bae i kam blong pemaot ol pipol blong hem, be, bae hem i no kam blong pemaot olgeta wetem ol sin blong olgeta, be blong pemaot olgeta aot long ol sin blong olgeta.

11 Mo hem i gat paoa we Papa i bin givim long hem blong pemaot olgeta aot long ol sin blong olgeta, from fasin blong sakem sin; from hemia, hem i bin ^asendem ol enjel blong hem blong talemaot ol gud nius blong fasin blong sakem sin, we i karem ol pipol i go long paoa blong Ridima, mekem se hem i save sevem sol blong olgeta.

12 Mo nao, ol boe blong mi, tingbaot, tingbaot se hem i antap long ^astrong ston blong Ridima blong yumi, we i Kraes, Pikinini blong God, we yutufala i mas bildim ^bfandesen blong yutufala; blong mekem se taem we devel bae i sendemaot ol strongfala win blong hem, yes, ol spia blong hem long wael win, yes, taem we ol ston blong aes blong hem mo ^dstrong win blong hem bae i foldaon long yutufala, bae oli no gat paoa ova long yutufala blong pulum yutufala i go daon long bigfala hol blong harem nogud mo trabol we i no gat en; hemia i from strong ston we yutufala i bin bildimap yutufala antap long hem, we i wan sua fandesen, wan fandesen we sapos ol man oli bildimap olgeta antap long hem, oli no save foldaon.”

13 Mo i bin hapen se hemia nao i ol toktok we Hileman i bin ^atijim long tufala boe blong hem; yes, hem i tijim tufala plante samting we oli no raetem, mo tu, plante samting we oli raetem.

14 Mo tufala i bin tingbaot ol toktok blong hem; mo from hemia, tufala i go, mo obei ol komanmen blong God, blong tijim toktok blong God long medel blong ol pipol blong Nifae, stat long bigtaon Plante;

15 Mo stat long ples ia i go long bigtaon blong Gid; mo long bigtaon blong Gid i go long bigtaon blong Myulek;

16 Mo tu, long wan bigtaon i go long wan narafala bigtaon kasem taem we oli bin go fored long medel blong evri pipol blong Nifae we oli stap long graon long Saot; mo stat long ples ia i go long graon blong Sarahemla, long medel blong Ol Man blong Leman.

17 Mo i bin hapen se oli prij wetem bigfala paoa, inaf blong mekem se oli blokem plante long ^aolgeta we oli pulaot we oli bin go long Ol Man blong Nifae, inaf blong mekem se oli bin kam mo talemaot ol sin blong olgeta, mo oli kasem baptaes from oli sakem sin, mo semtaem nomo oli bin gobak long Ol Man blong Nifae blong traem blong stretem wetem olgeta ol rong we oli bin mekem.

18 Mo i bin hapen se Nifae mo Lihae i prij long Ol Man blong Leman wetem bigfala paoa mo atoriti, from tufala i bin gat paoa mo atoriti we God i bin givim long tufala blong tufala i save ^atoktok, mo tu, God i bin givim long tufala wanem tufala i mas talem—

19 From hemia, tufala i bin toktok we i mekem se Ol Man blong Leman oli sapraes bigwan, mekem se tufala i ^awinim tingting blong olgeta, inaf blong mekem se i gat eit taosen long Ol Man blong Leman we oli stap long graon blong Sarahemla mo raonabaot we oli bin kasem baptaes from oli sakem sin, mo tufala i mekem olgeta oli luksave fasin nogud blong ol kastom blong ol papa blong olgeta.

20 Mo i bin hapen se Nifae mo Lihae i gohed, tufala i aot long ples ia blong go long graon blong Nifae.

21 Mo i bin hapen se wan ami blong Ol Man blong Leman i tekem tufala mo sakem tufala long ^akalabus; yes, stret long semfala kalabus ia we ol wokman blong Limhae oli bin sakem Amon mo ol brata blong hem insaed long hem.

22 Mo afta we oli sakem tufala long kalabus blong plante dei we tufala i no gat kaekae, luk, Ol Man blong Leman oli go insaed long kalabus blong tekem tufala blong oli save kilimded tufala.

23 Mo i bin hapen se i olsem we ^afaea i raonem Nifae mo Lihae, inaf blong mekem se oli fraet blong putum han blong olgeta long tufala, from oli fraet se bae oli bon. Be, Nifae mo Lihae, tufala i no bon; mo tufala i stap olsem se tufala i stanap long medel blong faea mo tufala i no bon.

24 Mo taem we tufala i luk se wan ^alongfala faea we i go antap i raonem tufala, mo i no bonem tufala, hat blong tufala i kasem strong paoa.

25 From tufala i luk se Ol Man blong Leman oli fraet blong putum han blong olgeta long tufala; mo tu, oli fraet blong kam kolosap long tufala, be oli stanap olsem se fasin blong sapraes i nokem olgeta blong oli no save toktok.

26 Mo i bin hapen se Nifae mo Lihae i stanap mo tufala i stat blong toktok long olgeta, se: “No fraet, from luk, hem i God we i bin soem long yufala gudfala samting ia, we hem i soem samting ia long yufala blong mekem se yufala i no save putum han blong yufala long mitufala blong kilimded mitufala.”

27 Mo luk, taem we tufala i talem ol toktok ia, graon i seksek tumas, mo ol wol blong kalabus oli seksek olsem se oli rere blong foldaon long graon; be luk, oli no foldaon. Mo luk, olgeta we oli bin stap long kalabus oli Ol Man blong Leman mo Ol Man blong Nifae we oli bin pulaot.

28 Mo i bin hapen se wan klaod blong ^atudak i kavremap olgeta, mo wan nogud fraet we i strong i bin kam long olgeta.

29 Mo i bin hapen se wan ^avoes i bin kamaot olsem se i bin kamaot antap long klaod blong tudak, i talem: “Yufala i sakem sin, yufala i sakem sin, mo nomo lukaotem blong panisim ol wokman blong mi we mi bin sendem long yufala blong talemaot ol gudnius long yufala.”

30 Mo i bin hapen se taem we oli harem voes ia, mo oli luk se i no wan voes blong tanda, mo tu, i no voes blong wan bigfala nogud noes, be luk, hem i wan ^akwaet voes we i sofsof stret, olsem se i wan slo toktok, mo i go tru i go kasem sol—

31 Mo i nomata we voes i sofsof, luk graon i seksek tumas, mo ol wol blong kalabus oli bin seksek bakegen, olsem se oli rere blong foldaon long graon; mo luk klaod blong tudak, we i bin kavremap olgeta, i no aot—

32 Mo luk voes ia i kamaot bakegen, i talem se: “Yufala i sakem sin, yufala i sakem sin, from kingdom blong heven i kolosap; mo yufala i nomo lukaotem blong prapa spolem gud ol wokman blong mi.” Mo i bin hapen se graon i seksek bakegen, mo ol wol oli seksek.

33 Mo tu, nambatri taem bakegen voes i kamaot, mo i talem long olgeta ol gudfala toktok we man i no save talemaot; mo ol wol oli seksek bakegen, mo graon i seksek olsem se i rere blong brok long pisis.

34 Mo i bin hapen se Ol Man blong Leman oli no save ronwe from klaod blong tudak we i kavremap olgeta; yes, mo tu, oli no save muv from fraet we i kam long olgeta.

35 Nao i gat wan long medel blong olgeta we i wan Man blong Nifae we i bin bon olsem wan Nifae, we long wan taem, hem i blong jos ia blong God be hem i bin pulaot long olgeta.

36 Mo i bin hapen se hem i tanem hem raon, mo luk, hem i luk tru long klaod blong tudak ol fes blong Nifae mo Lihae; mo luk, fes blong tufala i bin ^asaen tumas, hem i olsem ol fes blong ol enjel. Mo hem i luk se tufala i leftemap ol ae blong tufala i lukluk i go long heven; mo tufala i stap olsem se tufala i stap toktok o tufala i toktok laod long sam man we tufala i stap luk.

37 Mo i bin hapen se man ia i bin singaot long grup blong pipol ia, blong oli save tanem olgeta mo luk. Mo luk, God i bin givim paoa long olgeta blong oli tanem olgeta mo oli luk; mo oli luk ol fes blong Nifae mo Lihae.

38 Mo oli talem long man ia: “Luk, ?ol samting ia oli minim wanem, mo ol man ia oli stap toktok wetem huia?”

39 Nao nem blong man ia i Aminadab. Mo Aminadab i talem long olgeta: “Tufala i stap toktok wetem ol enjel blong God.”

40 Mo i bin hapen se Ol Man blong Leman oli talem long hem: “?^aWanem nao bae mifala i mas mekem blong mekem se klaod blong tudak ia i save kamaot blong i nomo kavremap mifala?”

41 Mo Aminadab i talem long olgeta: “Yufala i mas ^asakem sin, mo askem long voes ia, gogo kasem taem we bae yufala i gat ^bfet long Kraes, we Alma, mo Amulek, mo Siesrom, oli bin tijim yufala long hem; mo taem we bae yufala i mekem samting ia, klaod blong tudak bae i kamaot blong i nomo kavremap yufala.”

42 Mo i bin hapen se olgeta evriwan i stat blong askem long voes blong hem we i bin mekem graon i seksek; yes, oli bin askem kasem taem we klaod blong tudak i aot.

43 Mo i bin hapen se taem we oli lukluk raonabaot, mo oli luk se klaod blong tudak i aot blong i nomo kavremap olgeta, luk, oli luk se wan longfala faea we i go antap i ^araonem olgeta, yes evri sol.

44 Mo Nifae mo Lihae i stap long medel blong olgeta; yes, longfala faea we i go antap i raonem olgeta; yes, i olsem se oli stap long medel blong faea ia we i stap laet, be stil i no bonem olgeta, mo tu, i no bin bonem ol wol blong kalabus; mo olgeta i kam fulap wetem ^aglad we toktok i no naf blong talem mo i fulap long glori.

45 Mo luk, ^aTabu Spirit blong God i bin kam, i aot long heven i kam daon, mo i go insaed long hat blong olgeta, mo oli fulap olsem se i wetem faea, mo oli save ^btalemaot ol gudfala toktok.

46 Mo i bin hapen se wan voes i kamaot long olgeta, yes, wan naes voes, olsem se i wan slo toktok, i talem:

47 “^aPis, pis i stap wetem yufala, from fet blong yufala long Pikinini blong mi we mi Lavem Hem Tumas, we i bin stap stat long stat blong wol ia.”

48 Mo nao, taem we oli harem samting ia, oli lukluk i go antap wetem ol ae blong olgeta olsem blong luk se long wea nao voes ia i bin kamaot long hem; mo luk, oli luk ol ^aheven oli open; mo ol enjel oli bin aot long heven oli kam daon mo givhan long olgeta.

49 Mo i bin gat raonabaot tri handred sol we oli bin luk mo oli bin harem ol samting ia; mo ol enjel oli talem long olgeta blong go mo no sapraes, mo tu, oli no mas gat tu tingting.

50 Mo i bin hapen se oli go, mo oli tijim ol pipol, oli talemaot truaot evri eria raonabaot, evri samting we oli bin harem mo oli bin luk, inaf blong mekem se bigfala pat blong Ol Man blong Leman oli biliv long olgeta, from ol tru bigfala samting we oli bin kasem, mo oli bin soemaot.

51 Mo olgeta we i bin ^abiliv, oli putumdaon ol tul blong faet blong olgeta, mo tu, fasin blong no laekem man, mo tu, kastom blong ol papa blong olgeta.

52 Mo i bin hapen se oli lego long Ol Man blong Nifae, ol graon we oli bin stap long olgeta.