Ngaahi Folofolá
Hilamani 6


Vahe 6

ʻOku malanga ʻa e kau Leimana māʻoniʻoní ki he kau Nīfai fai angahalá—ʻOku tuʻumālie ʻa e ongo kakaí fakatouʻosi ʻi ha kuonga ʻo e melino mo e mahu—ʻOku hanga ʻe Lusifā, ko e tupuʻanga ʻo e angahalá, ʻo ueʻi hake ʻa e loto ʻo e kau fai angahalá mo e kau kaihaʻa ʻa Katianetoní ke fakapō mo fai angahala—ʻOku maʻu ʻe he kau kaihaʻá ʻa e puleʻanga ʻo e kau Nīfaí. Taʻu 29–23 K.M. nai.

1 Pea naʻe hoko ʻo pehē ʻi he ʻosi ange hono onongofulu mā ua ʻo e taʻu ʻo e pule ʻa e kau fakamāú, kuo hoko ʻa e ngaahi meʻá ni kotoa pē pea kuo hoko ʻa e kau Leimaná, ʻa e tokolahi ange ʻo kinautolu, ko ha kakai māʻoniʻoni, ʻo aʻu ki he lahi ange ʻenau amāʻoniʻoní ʻi he kau Nīfaí, koeʻuhi ko ʻenau fai mālohí mo ʻenau tuʻu maʻu ʻi he tuí.

2 He vakai, naʻe ʻi ai ʻa e tokolahi ʻo e kau Nīfaí kuo afakafefeka honau lotó pea ʻikai fie fakatomala, pea fuʻu fai angahala lahi ʻaupito, ʻo aʻu ki heʻenau liʻaki ʻa e folofola ʻa e ʻOtuá mo e ngaahi malanga mo e ngaahi kikite kotoa pē ʻa ia naʻe fai kiate kinautolú.

3 Ka neongo iá, naʻe maʻu ʻe he kakai ʻo e Siasí ʻa e fuʻu fiefia lahi koeʻuhi ko e fakaului ʻo e kau Leimaná, ʻio, koeʻuhi ko e siasi ʻo e ʻOtuá, ʻa ia kuo fokotuʻu ʻiate kinautolú. Pea naʻa nau afeohi lelei ʻiate kinautolu, ʻo nau fefiefiaʻaki ʻiate kinautolu, pea nau maʻu ʻa e fuʻu fiefia lahi.

4 Pea naʻe hoko ʻo pehē naʻe ʻalu hifo ʻa e tokolahi ʻo e kau Leimaná ki he fonua ko Seilahemalá, ʻo nau fakahā ki he kakai ʻo e kau Nīfaí ʻa e anga ʻo honau afakauluí, pea naʻa nau naʻinaʻi kiate kinautolu ke nau tui mo fakatomala.

5 ʻIo, pea naʻe malanga ʻa e tokolahi ʻi he fuʻu mālohi mo e mafai lahi, ʻo nau fakatafoki ai ha tokolahi ʻo kinautolu ki he fuʻu loto-fakatōkilalo lahi, ke hoko ko e kau ākonga anga-fakatōkilalo ʻa e ʻOtuá mo e Lamí.

6 Pea naʻe hoko ʻo pehē naʻe ʻalu atu ʻa e kau Leimana tokolahi ki he fonua ʻi he fakatokelaú; pea naʻe ʻalu foki mo Nīfai mo Līhai ki he afonua ʻi he fakatokelaú, ke malanga ki he kakaí. Pea naʻe ʻosi pehē hono onongofulu mā tolu ʻo e taʻú.

7 Pea vakai, naʻe ʻi ai ʻa e melino ʻi he fonuá hono kotoa, ʻo aʻu ki he ʻalu ʻa e kau Nīfaí ki he potu kotoa pē ʻo e fonuá ʻa ia naʻa nau fie ʻalu ki aí, ʻo tatau ai pē pe ʻi he kau Nīfaí pe ʻi he kau Leimaná.

8 Pea naʻe hoko ʻo pehē naʻe ʻalu foki mo e kau Leimaná ki he potu kotoa pē ʻa ia naʻa nau fie ʻalu ki aí, ʻo tatau ai pē pe ʻi he kau Leimaná pe ʻi he kau Nīfaí; pea ko ia naʻa nau nofo mo moʻui faʻiteliha ʻi heʻenau feohí, pea fefakatauʻaki, pea ke maʻu ha tupu, ʻo fakatatau ki honau lotó.

9 Pea naʻe hoko ʻo pehē naʻa nau fakaʻau ʻo fuʻu koloaʻia ʻaupito, ʻa e kau Leimaná mo e kau Nīfaí fakatouʻosi; pea naʻa nau maʻu ʻo fuʻu lahi ʻaupito ʻa e koulá, mo e silivá, mo e ngaahi faʻahinga ukamea mahuʻinga kotoa pē, ʻi he fonua ʻi he tongá mo e fonua ʻi he tokelaú fakatouʻosi.

10 Ko ʻeni naʻe ui ʻa e fonua ʻi he tongá ko Līhai, pea naʻe ui ʻa e fonua ʻi he tokelaú ko aMūleki, ʻa ia ko e tauhingoa ki he foha ʻo Setikiá; he naʻe ʻomi ʻe he ʻEikí ʻa Mūleki ki he fonua ʻi he tokelaú, mo Līhai ki he fonua ʻi he tongá.

11 Pea vakai, naʻe ʻi ai ʻa e faʻahinga kotoa pē ʻo e koulá ʻi he ongo fonuá ni fakatouʻosi, pea mo e silivá, mo e ngaahi ukamea mahuʻinga ʻo e faʻahinga kotoa pē; pea naʻe ʻi ai foki mo e kau tangata tufunga poto ʻaupito, ʻa ia naʻa nau ngāue ʻaki ʻa e ngaahi ukamea kehekehe kotoa pē mo nau fakamaʻa ia; pea ko ia naʻa nau fakaʻau ʻo koloaʻia.

12 Naʻa nau tō ʻa e kēlení ʻo fuʻu lahi, ʻi he tokelaú mo e tongá fakatouʻosi; pea naʻa nau fuʻu tuʻumālie ʻaupito, ʻi he tokelaú mo e tongá fakatouʻosi. Pea naʻa nau fakatokolahi ʻo fakaʻau ʻo fuʻu mālohi ʻi he fonuá. Pea naʻa nau tauhi ʻa e ngaahi takanga monumanu iiki tokolahi mo e ngaahi takanga monumanu lalahi, ʻio, ʻa e fanga manu sisino tokolahi.

13 Vakai naʻe ngāue honau kakai fefiné ʻo filo, mo nau ngaohi ʻa e ngaahi faʻahinga tupenu kotoa pē, ʻo e līneni tuʻovalevale mo e faʻahinga tupenu kotoa pē, ke fakakofu ʻaki ʻenau telefuá. Pea naʻe ʻosi pehē atu ʻi he melino ʻa hono onongofulu mā fā ʻo e taʻú.

14 Pea ʻi hono onongofulu mā nima ʻo e taʻú naʻa nau maʻu foki ʻa e fuʻu fiefia mo e melino lahi, ʻio, ʻa e ngaahi malanga mo e ngaahi kikite lahi naʻe kau ki he ngaahi meʻa ʻe hoko. Pea naʻe ʻosi pehē atu hono onongofulu mā nima ʻo e taʻú.

15 Pea naʻe hoko ʻo pehē ʻi hono onongofulu mā ono ʻo e taʻu ʻo e pule ʻa e kau fakamāú, vakai naʻe fakapoongi ʻa aSisolami ʻi he nima ʻo ha tokotaha taʻeʻiloa lolotonga ʻene nofo ʻi he nofoʻanga fakamaauʻangá. Pea naʻe hoko ʻo pehē ʻi he taʻu pē ko iá, naʻe fakapoongi foki mo hono foha, ʻa ia kuo fili ʻe he kakaí ko hono fetongí. Pea naʻe ʻosi pehē hono onongofulu mā ono ʻo e taʻú.

16 Pea ʻi he kamataʻanga ʻo hono onongofulu mā fitu ʻo e taʻú naʻe toe kamata ʻa e kakaí ke fuʻu fai angahala ʻaupito.

17 He vakai, kuo hanga ʻe he ʻEikí ʻo tāpuakiʻi ʻa kinautolu ʻo fuoloa ʻaki ʻa e ngaahi koloa ʻo e māmaní kuo ʻikai ai ke ueʻi hake ʻa kinautolu ke ʻita, pe ki he ngaahi tau, pe ki he lilingi toto; ko ia naʻe kamata ke tuku honau lotó ki he ngaahi koloá; ʻio, naʻa nau kamata ke feinga ke fakatupu paʻanga koeʻuhi ke hiki hake ʻa kinautolu ke māʻolunga ange ʻi he taha kehé; ko ia naʻa nau kamata ke fai ʻa e ngaahi fakapō afufū, mo kaihaʻa mo vete koloa, koeʻuhi ke lava ʻo maʻu ha tupu.

18 Pea ko ʻeni vakai, ko e kau fakapō mo e kau kaihaʻá ni ko e kautaha ia kuo fokotuʻu ʻe Kisikumeni mo aKatianetoni. Pea ko ʻeni kuo hoko ʻo pehē naʻe tokolahi, ʻi he kau Nīfaí, ʻa e kau kaihaʻa ʻa Katianetoní. Kae vakai, naʻa nau tokolahi ange ʻi he konga angakovi taha ʻo e kau Leimaná. Pea naʻe ui ʻa kinautolu ko e kau kaihaʻa ʻa Katianetoní mo e kau fakapō.

19 Pea ko kinautolu ia ʻa ia naʻa nau fakapoongi ʻa e fakamaau lahi ko Sisolamí, mo hono fohá, lolotonga ʻena ʻi he nofoʻanga fakamāú; pea vakai, naʻe ʻikai ke ʻiloʻi ʻa kinautolu.

20 Pea ko ʻeni naʻe hoko ʻo pehē ʻi he ʻiloʻi ʻe he kau Leimaná ʻoku ʻiate kinautolu ʻa e kau kaihaʻá naʻa nau fuʻu loto-mamahi ʻaupito; pea naʻa nau fai ʻa e meʻa kotoa pē ʻi honau mālohí ke fakaʻauha ʻa kinautolu mei he funga ʻo e māmaní.

21 Kae vakai, naʻe ueʻi hake ʻe Sētane ʻa e loto ʻo e tokolahi ʻo e kau Nīfaí, ʻo aʻu ki heʻenau kau ki he ngaahi kautaha ʻo e kau kaihaʻa ko iá, ʻo nau fai ʻenau ngaahi fuakavá mo ʻenau ngaahi fakapapaú, ke nau femaluʻiʻaki mo fefakahaofiʻaki ʻi he fakatuʻutāmaki kotoa pē te nau ʻi aí, koeʻuhi ke ʻoua naʻa tauteaʻi kinautolu koeʻuhi ko ʻenau ngaahi fakapoó, mo ʻenau ngaahi vete koloá, mo ʻenau ngaahi kaihaʻá.

22 Pea naʻe hoko ʻo pehē naʻe ʻi ai ʻenau ngaahi fakaʻilonga, ʻio, ʻa ʻenau ngaahi fakaʻilonga afakapulipuli, mo ʻenau ngaahi lea fakapulipuli; pea naʻa nau fai ʻeni koeʻuhi ke nau ʻiloʻi ai ha taha ʻa ia kuó ne fai ʻa e fuakavá, neongo pe ko e hā ha angahala ʻe fai ʻe hono tokouá ke ʻoua ʻe fai ha kovi kiate ia ʻe hono tokouá, pe ko kinautolu ʻoku kau ki he kautahá ni, ʻa ia kuo nau fai ʻa e fuakava ní.

23 Pea ko ia naʻa nau lava ai ʻo fakapō, mo vete koloa, mo kaihaʻa, mo fai feʻauaki mo fai ʻa e faʻahinga angahala kotoa pē, ʻo fepaki mo e ngaahi lao ʻo honau fonuá pea mo e ngaahi fono ʻa honau ʻOtuá.

24 Pea ʻilonga ha taha ʻa ia naʻe kau ki heʻenau kautahá te ne fakahā ki he māmaní ʻa ʻenau fai aangahalá mo ʻenau ngaahi ngāue fakalieliá, ʻe fakamāuʻi ia, ʻo ʻikai fakatatau ki he ngaahi lao ʻa honau fonuá, kae fakatatau ki he ngaahi lao ʻo ʻenau fai angahalá, ʻa ia kuo fokotuʻu ʻe Katianetoni mo Kisikumení.

25 Ko ʻeni vakai, ko e ngaahi fuakava mo e ngaahi afakapapau fakapulipuli ʻeni ʻa ia naʻe fekau ʻe ʻAlamā ki hono fohá ke ʻoua naʻa ʻoatu ki he kakai ʻo e māmaní, telia naʻa hoko ia ko ha meʻa ke ʻohifo ai ʻa e kakaí ki he fakaʻauha.

26 Ko ʻeni vakai, naʻe ʻikai ke ʻomi ʻa e ngaahi fakapapau mo e ngaahi fuakava afakapulipuli ko iá kia Katianetoni mei he ngaahi lekooti ʻa ia naʻe tuku kia Hilamaní; kae vakai, naʻe fakahū ia ki he loto ʻo Katianetoní ʻe he tokotaha b ko ia ʻa ia naʻá ne fakataueleʻi ʻetau ʻuluaki ongo mātuʻá ke na kai ʻa e fua tapú—

27 ʻIo, ʻa e tokotaha pē ko ia ʻa ia naʻe alea fakafufū mo aKeiní, kapau te ne fakapoongi ʻa hono tokoua ko ʻĒpeli ʻe ʻikai fakahā ia ki he māmaní. Pea naʻá ne alea fakafufū mo Keini mo kinautolu naʻe muimui ʻiate iá ʻo kamata mei he taimi ko iá.

28 Pea ko ia foki ʻa e tokotaha tatau naʻá ne fakahū ki he loto ʻo e kakaí ke nau alanga ha taua ke feʻunga hono māʻolungá ke nau lava ai ʻo aʻu ki he langí. Pea ko ia ia ʻa e tokotaha tatau pē naʻá ne tataki atu ʻa e kakai ʻa ia naʻa nau haʻu mei he taua ko iá ki he fonua ní; ʻa ia naʻá ne fakamafola ʻa e ngaahi ngāue ʻo e fakapoʻulí mo e ngaahi meʻa fakalieliá ʻi he funga kotoa ʻo e fonuá, kae ʻoua kuó ne toho hifo ʻa e kakaí ki ha fakaʻauha bfakaʻaufuli, pea ki ha heli taʻengata.

29 ʻIo, ko e tokotaha tatau pē ia ʻa ia naʻe fakahū ki he loto ʻo aKatianetoní ke ne fai atu ʻa e ngāue ʻo e fakapoʻulí, mo e fakapō fufuú; peá ne fakatupu ia talu mei he kamataʻanga ʻo e tangatá ʻo fai mai ki he taimi ko ʻení.

30 Pea vakai, ko ia ia ʻa e atupuʻanga ʻo e angahala kotoa pē. Pea vakai, ʻokú ne fai atu ʻa ʻene ngaahi ngāue ʻo e fakapoʻulí mo e fakapō fufuú, pea ʻokú ne tukufakaholo mai ʻenau ngaahi alea fakafufuú, mo ʻenau ngaahi fakapapaú, mo ʻenau ngaahi fuakavá, mo ʻenau ngaahi faʻufaʻu ʻo e fai angahala fakamanavaheé, mei he toʻu tangata ki he toʻu tangata ʻo fakatatau mo ʻene lava ke maʻu ʻa e loto ʻo e fānau ʻa e tangatá.

31 Pea ko ʻeni vakai, kuó ne maʻu ʻa e fuʻu mālohi lahi ki he loto ʻo e kau Nīfaí; ʻio, ʻo aʻu ki heʻenau hoko ʻo fuʻu fai angahala ʻaupito; ʻio, kuo afe hanau tokolahi mei he hala ʻo e māʻoniʻoní, ʻo nau amolomoloki hifo ʻi honau lalo vaʻé ʻa e ngaahi fekau ʻa e ʻOtuá, pea nau afe ki honau ngaahi hala ʻonautolu pē, ʻo nau fokotuʻu maʻanautolu ʻa e ngaahi tamapua ʻaki ʻenau koulá mo ʻenau silivá.

32 Pea naʻe hoko ʻo pehē naʻe hoko mai kiate kinautolu ʻa e ngaahi angahalá ni ʻi he vahaʻataimi ʻo e ngaahi ataʻu siʻi pē, ʻo aʻu ki he hoko ai kiate kinautolu hano konga lahi ʻi hono onongofulu mā fitu taʻu ʻo e pule ʻa e kau fakamāú ki he kakai ʻo Nīfaí.

33 Pea naʻa nau tupulaki ʻi heʻenau ngaahi angahalá ʻi hono onongofulu mā valu ʻo e taʻú foki, ʻo tupu ai ʻa e fuʻu loto-mamahi mo e tangilāulau ʻa e kau māʻoniʻoní.

34 Pea ko ia ʻoku tau vakai naʻe kamata ke fakaʻauʻau hifo ʻa e kau Nīfaí ʻi he taʻetui, ʻo nau tupulaki ʻi he fai angahalá mo e ngaahi anga-fakalieliá, ka naʻe kamata ke tupulaki lahi ʻaupito ʻa e kau Leimaná ʻi he ʻiloʻi ʻo honau ʻOtuá; ʻio, naʻa nau kamata ke tauhi ʻene ngaahi tuʻutuʻuní mo ʻene ngaahi fekaú, ʻo ʻaʻeva ʻi he moʻoni mo e angatonu ʻi hono ʻaó.

35 Pea ko ia ʻoku vakai naʻe kamata ke amahuʻi atu ʻa e Laumālie ʻo e ʻEikí mei he kau Nīfaí, koeʻuhi ko e angahala mo e fefeka ʻo honau lotó.

36 Pea ko ia ʻoku tau vakai naʻe kamata ke lilingi hifo ʻe he ʻEikí ʻa hono Laumālié ki he kau Leimaná, koeʻuhi ko ʻenau loto-fakatōkilaló mo ʻenau fie tui ki heʻene ngaahi folofolá.

37 Pea naʻe hoko ʻo pehē naʻe tuli holo ʻe he kau Leimaná ʻa e kau kaihaʻa ʻa Katianetoní; pea naʻa nau malanga ʻaki ʻa e folofola ʻa e ʻOtuá ʻi he lotolotonga ʻo kinautolu naʻe fai angahala lahi ange ʻiate kinautolú, ʻo aʻu ki hono fakaʻauha ʻo ʻosiʻosingamālie ʻo e kautaha ʻo e kau kaihaʻa ko ʻení mei he kau Leimaná.

38 Pea naʻe hoko ʻo pehē ʻi he faʻahi ʻe tahá, naʻe langa hake mo poupouʻi ʻa kinautolu ʻe he kau Nīfaí, ʻo kamata ʻi honau niʻihi ʻa ia naʻe fai angahala angé, ʻo aʻu ki heʻenau mafola atu ʻi hono kotoa ʻo e fonua ʻo e kau Nīfaí, pea kuo nau fakataueleʻi ʻa e konga lahi ange ʻo e kau māʻoniʻoní kae ʻoua kuo nau kamata ke tui ki heʻenau ngaahi ngāué pea maʻu ʻenau ngaahi koloa veté, pea kau mo kinautolu ʻi heʻenau ngaahi fakapō fufuú mo e ngaahi kautaha fufuú.

39 Pea naʻe pehē ʻenau maʻu hono puleʻi kotoa ʻo e puleʻangá, ʻo aʻu ki heʻenau molomoloki hifo ʻi honau lalo vaʻé mo taaʻi mo hae mo fulituʻa ki he amasivá mo e angamaluú mo e kau ākonga loto-fakatōkilalo ʻa e ʻOtuá.

40 Pea ko ia ʻoku tau vakai naʻa nau ʻi ha tuʻunga fakamanavahē, pea naʻa nau fakaʻau ke ataau mo e fakaʻauha taʻengata.

41 Pea naʻe hoko ʻo pehē naʻe ʻosi pehē hono onongofulu mā valu taʻu ʻo e pule ʻa e kau fakamāú ki he kakai ʻo Nīfaí.