1 Kilang, met kedekedeo nan pahr weneisek duwau en mwehin sounkopwung kan ong aramas en Nihpai kan, Nihpai, nein Ilemen pwutako, pwurala nan sahpw en Saraemla sang sahpw en paliepeng.

2 Pwe e kohwei rehn aramas akan me mih nan sahpw en paliepeng, oh kalohngkihong irail mahsen en Koht, oh kokohpehng irail soahng tohto;

3 Oh re soikala ah padahk kan koaros, kahrehda e sohte kak mihmi rehrail, ahpw pwurehng pwurodo nan uhdaken sapwe.

4 Oh nan ahnsouo e kilikilang aramas akan mihmi nan irair en mour suwed apwal, oh pwihn en Kadiendon lipirap kan me mihmihla nan sehr en sounkopwung kan—pwehki ar kalowehdier manaman oh mweimwei nan sahpwo; pwilikihdi sapwellimen Koht kosonned akan, oh ni sohte ekiste pwung mwohn Koht; sohte wia doadoahk pwuhng ong aramas akan;

5 Kaloke me pwung kan pwehki ar mour pwung; mweidala me sapwung kan oh me suwed kan ar sohte kalokolok pwehki neirail mwohni; oh kapatahiong en kolokol pwukoahn kaun nan koapworment, pwe en kaunda oh wia nin duwen nsenarail kan, pwe re en kak kepwehpwehla oh sampah en kepinga irail, oh, kapatahiong, pwe irail en kak mengeiong wie tiahk en kamwahl, oh pirap, oh kamaramas, oh wia nin duwen pein nsenarail kan—

6 Met e sohte lel sounpar kei a dihp lap wet lelohngehr Mehn Nihpai kan; oh ahnsou me Nihpai kilangadahr, ah mohngiong udahn pahtoukihla mehlel; oh e ahpw werikihla ni ah palingehn eh lokolok:

7 Oh, ma ei ahnsou duwehte ahnsou me ei pahpa Nihpai tepin kohdo sang nan sahpw en Serusalem, pwe I en kak iang ih pereperen nan sahpw en inou; ahnsouo nah aramas kan kin mengei en alehdi kaweid, kehlail en kapwaiada sapwellimen Koht kosonned akan, oh pwand en lohdi nan dihp; oh re kin mwadang en rong mahsen kan en Kauno—

8 Ei, ma ei ahnsou duwehte ahnsou pwuko, eri ei palingehn pahn ahneki peren nan mour pwung en riei kan.

9 Ahpw kilang, e koasoandi me ei ahnsou iei rahn pwukat, oh me ei palingehn pahn direkihla pahtou pwehki wiewia suwed en riei kan.

10 Oh kilang, kedekedeo met wiawi pohn doulik ehu, me mih nan ahn Nihpai mwetuwelo, me karanih ahl lap me kohla nan wasahn netinet laud, me mih nan kahnihmw en Saraemla; eri, Nihpai poaridi pohn doulik nan ah mwetuwelo, doulik wet pil karanihte kehl en mwetuwelo me ahl lapo tang nihmwah.

11 Kedekedeo mie ohl kei me alialu wasaho oh kilangada Nihpai ni eh wie kapaka ngidingid ong Koht pohn douliko; oh re tangala oh ndaiong aramas kan dahme re kilangehr, oh aramas kan ahpw kapokonpenehr pwe re en kak esehda dah kahrepen mwahiei lap ong wiewia suwed en aramas ko.

12 Oh met, ahnsou me Nihpai kesihnenda e ahpw kilangada pokon en aramas kan me pokonpenehr.

13 Kedekedeo e ahpw kihpeseng ewe oh ndaiong irail: Kilang, dahme kumwail pokonkipene? Pwe I en ndaiong kumwail duwen amwail wiewia suwed kan?

14 Ei, pwehki ei douda pohn ei doulik pwe I en kak poadidiong ei kapakap ong ei Koht, pwehki pahtou mehlel en ei mohngiong, pwehki amwail wiewia suwed kan!

15 Oh pwehki ei wie sengiseng oh mwamwahiei me kumwail pokonkipenehr, oh pwuriamweiki; ei, oh kumwail udahn anahne pwuriamwei; ei, kumwail anahne pwuriamwei pwehki kumwail mweidehngehr tepilo en koledi amwail mohngiong kan.

16 Ei, ia mwomwen amwail kak dukiong kasongosong en ih me songosong en kesehdihla palingehnemwail kan nan pahtou poatoapoat oh kahpwal soutuk?

17 Oh kumwail koluhla, kumwail koluhla! Dahme kumwail pahn mehkihla? Kumwail sohpeila, kumwail sohpeilahng Kauno amwail Koht. Dahme e ketin likidmeliekinkumwailla?

18 Met pwehki amwail mohngiong kan keptakailahr; ei, kumwail sohte men rong kepitien silepen sihpw mwahuo; ei, kumwail kahrehiongehr e ketin engiengdahng kumwail.

19 Oh kilang, ma kumwail sohte pahn koluhla, e sohte pahn kihkumwailpene ahpw e pahn kamwereikumwailpeseng oh kumwail pahn wiahla kenen kidi oh mahn lawalo sali.

20 Oh, ia mwomwen amwail kak manokehla amwail Koht nan rahnohte me e ketin doareikumwailla?

21 Ahpw kilang, met kin wiawi pwe kumwail en kin kepwehpwehla, pwe aramas en kin kepinga kumwail, ei, oh pwe kumwail en kak alehdi kohl oh silper. Oh kumwail katengedier amwail mohngiong kan pohn dipwisou en kepwehpwe kan oh soahng mwahl en sampah, me kahrehda amwail kamaramas, oh kulih, oh pirap, oh karaun likamwih mehn mpamwail, oh wia soahngen dihp koaros.

22 Oh pwehki kahrepe wet keriah pahn kohieng kumwail ma kumwail sohte pahn koluhla. Pwe ma kumwail sohte pahn koluhla, kilang, kahnihmw lap wet, oh pil kahnihmw lap koaros me kapilpene, me mih nan sapwatail, pahn kohsang kumwail me pahn kahrehda kumwail en sohla kak kousoan loalle; pwe kilang, Kauno sohte pahn ketikihong kumwail kehlail, nin duwen eh ketin wiahier, pwe kumwail en kak powehdi amwail imwintihtih kan.

23 Pwe kilang, Kauno ketin mahsanih: I sohte pahn kasalehiong me suwed kan ei kehlail, ong ehu pwihn de pil ehu, ihte ong irail kan me pahn koluhkihla diparail kan, oh rong ei mahsen kan. Eri met, I men kumwail en kilang, riei ko, me e pahn mwahu ong Mehn Leimen kan sang kumwail ihte ma kumwail pahn koluhla.

24 Pwe kilang, re kin momourki mour pwung mwahu sang kumwail, pwe re sohte wiahda dihp nan ar wehwehki dahme kumwail alehdier; eri Kauno pahn kupwur kalahngan ong irail; ei, e pahn ketin kareireiala arail rahn akan oh katohtowehla kadaudokerail kan, mehlel nan ahnsouo me kumwail pahn kamwomwala mehlel ihte ma kumwail pahn koluhla.

25 Ei, meid suwed ong kumwail pwehki tiahk suwed lap me kohieng kumwailehr; oh kumwail patehngehr, ei, ong pwihn mwersuwed rir me Kadiendon wiahdahr!

26 Ei, meid suwed pahn kohieng kumwail pwehki pohnmwahso me kumwail mweidengehr en pidolong nan amwail mohngiong kan me kihkumwaildahr daulih dahme mwahuo pwehki amwail kepwehpwehla mehlel!

27 Ei, meid suwed ong kumwail pwehki amwail wiewia suwed kan oh tiahk suwed kan!

28 Oh ma kumwail sohte pahn koluhla kumwail pahn mehla; ei, mehlel sapwamwail kan pahn kohsang kumwail, oh kumwail pahn kamwomwasang pohn pwelen sampah.

29 Kilang met, I sohte pein wie koaskoasoaiahki mepwukat pahn wiawi, pwe dene sang ei pein ese mepwukat; ahpw kilang, I ese mepwukat mehlel pwehki Kauno Koht ketin kasalehiong ie, eri I kadehdehki me re pahn wiawi.