1 Adtoy, ita napasamak nga idi naibaga ni Nephi dagitoy a balikas, adda lallaki a maibilang kadakuada a nagtaray iti pangukoman; wen, uray la a lima ti napan, ket kinunada iti bagbagida, bayat ti papanda:

2 Adtoy, ita ammotayon nga awan duadua no daytoy a lalaki ket propeta ken binilin ti Dios a mangipadto kadatayo kadagiti kasta a nakaskasdaaw a banag. Adtoy, saantayo a mamati nga inaramidna; wen, saantayo a mamati nga isu ti propeta; nupay kasta, no agpayso dagitoy banag nga imbagana maipanggep iti pangulo nga ukom, a matay, mamatitayo ngarud a pudno dagiti dadduma a balikas nga imbagana.

3 Ket napasamak a nagtarayda iti pempennekda, ket simrekda iti pangukoman; ket adtoy, nadalupo ti pangulo nga ukom iti daga, a ^anadigos iti dara.

4 Ket ita adtoy, idi nakitada daytoy nasdaawda iti uray la nga, iti kasta natuangda iti daga; gapu ta dida namati kadagiti balikas nga imbaga ni Nephi maipanggep iti pangulo nga ukom.

5 Ngem ita, namatida idi nakitada, ket nagbutengda amangan no mapasamak amin a pangngeddeng nga imbaga ni Nephi kadagiti tao; ngarud nagkintayegda, ket natuangda iti daga.

6 Ita, dagus kalpasan ti nadawel a pannakapapatay ti ukom—isu a binagsol ti kabsatna babaen ti kawes a panglimlimo, sa naglibas, ket nagtataray dagiti katulongan a nangibaga kadagiti tao, nga inyik-ikkisda kadakuada ti pammapatay;

7 Ket adtoy naguurnong dagiti tao iti pangukoman—ket adtoy, iti siddaawda nakitada dagiti lima a lallaki a nadaleb iti daga.

8 Ket ita adtoy, awan ti ammo dagiti tao maipanggep iti ummong a naguummong iti ^aminuyongan ni Nephi; ngarud kinunada iti bagbagida: Dagitoy a lallaki ti nangpapatay a sidadawel iti ukom, ket sinaplit ida ti Dios tapno saandatayo a malibasan.

9 Ket napasamak a tiniliwda ida, ket pinungoda ida sada imbalud. Ket naipakdaar iti ganggannaet ti pannakapapatay ti ukom, ket natiliwen ken naibaluden dagiti nangpapatay a sidadawel.

10 Ket napasamak a naguummong dagiti tao iti kabigatanna tapno agladingit ken ^aagayuno, iti pannakaipumpon ti naindaklan a pangulo nga ukom a napapatay.

11 Ken kasta met dagidiay ukom nga adda iti minuyongan ni Nephi, ket nangngegda dagiti balikasna, napanda met iti pamumpon.

12 Ket napasamak a nagdamagda kadagiti tao, a kinunada: Sadino ti yan dagiti lima a naibaon nga agdamag iti maipanggep iti pangulo nga ukom no agpayso a natay? Ket insungbatda: Maipanggep kadagitoy lima nga imbagayo nga imbaonyo, dimi ammo; ngem adda lima nga isuda dagiti nadawel a mammapatay, nga imbaludmi.

13 Ket napasamak a tinarigagayan dagiti ukom a maisaklangda; ket naisaklangda, ket adtoy isuda dagiti lima a naibaon; ket adtoy dinamag dagiti ukom kadakuada ti maipanggep iti dayta a banag, ket imbagada kadakuada ti amin nga inaramidda, a kinunada:

14 Nagtaraykami nga immay iti pangukoman, ket idi nakitami ti amin a banag a pinaneknekan ni Nephi, nasdaawkami iti uray la nga ket nadalupokami iti daga; ket idi agsubli ti riknami iti pannakasdaawmi, adtoy impandakami iti pagbaludan.

15 Ita, maipanggep iti nadawel a pannakapapatay daytoy a tao, dimi ammo no asino ti akin-aramid; ket daytoy laeng ti ammomi, nagtaraykami nga immay a maibatay iti tarigagayyo, ket adtoy natayen, a maibatay kadagiti balikas ni Nephi.

16 Ket ita napasamak nga inlawlawag dagiti ukom ti banag kadagiti tao, ket inyikkisda ti ibubusorda ken ni Nephi, a kinunada: Adtoy, ammotayo a nalabit a nakitulag daytoy a Nephi iti no asino a mangpapatay iti ukom, sa kalpasanna ipakdaarna kadatayo, tapno mapasurotnatayo iti pammatina, tapno mapagbalinna ti bagina a naindaklan a tao, a pinili ti Dios, ken propeta.

17 Ket ita adtoy, sapulentayo daytoy a tao, ket ipudnona ti biddutna ken ibagana kadatayo ti pudno a nangpapatay a sidadawel iti ukom.

18 Ket napasamak a nawayawayaan dagiti lima iti aldaw ti pamumpon. Nupay kasta, binabalawda dagiti ukom kadagiti balikas nga imbagada a maibusor ken ni Nephi, ket kinasupangetda ti tunggal maysa, iti kasta ti panangrikiarda kadakuada.

19 Nupay kasta, imbilinda a matiliw ni Nephi ken mapungo ket maidatag iti ummong, ket rinugianda a pagsaludsodan iti nasikap a wagas tapno maballikogda, tapno dusaenda iti patay—

20 Kinunada kenkuana: Nakikumplotka; asino daytoy a tao a nangaramid iti nadawel a pammapatay? Ita ibagam kadakami, ket awatem ti biddutmo; a kunam, Adtoy ti kuarta; ken kasta met nga itdenmi kenka ti biagmo no ibagam kadakami, ken awatem ti nagtulaganyo kenkuana.

21 Ngem kinuna ni Nephi kadakuada: O dakayo a ^amaag, dakayo a saan a nakugit ti pusona, dakayo a bulsek, ken dakayo a ^bnasukir a tattao, ammoyo kadi no kasano ti kapaut ti panagibtur ti Apo a Diosyo iti panangitultuloyyo iti kastoy a wagas ti panagbasolyo?

22 O rugianyo koman ti agasug ken ^aagdung-aw, gapu iti dakkel a pannakadadael a mangur-urayen kadakayo itoy a kanito, malaksid no agbabawikayo.

23 Adtoy kunayo nga inabuloyak ti tao a mangpapatay iti nadawel ken ni Seezoram, ti pangulo nga ukomtayo. Ngem adtoy, kunak kadakayo, a gapu daytoy iti panangipaneknekko kadakayo tapno maammuanyo ti maipanggep itoy a banag; wen, uray pay ti agsaksi kadakayo, tapno maammuak ti kinadangkes ken dagiti makarimon nga aramid ti dadduma kadakayo.

24 Ket gapu ta naaramidko daytoy, kunayon nga inabuloyak ti tao a mangaramid itoy a banag; wen, gapu ta impakitak kadakayo daytoy a tanda kaungetdakon ken kayatyo a dadaelen ti biagko.

25 Ket ita adtoy, ipakitak kadakayo ti sabali a tanda, ket kitaek no itoy a banag kayatdak a dadaelen.

26 Adtoy kunak kadakayo: Mapankayo iti balay ni Seantum, a ^alalaki a kabsat ni Seezoram, ket kunayo kenkuana—

27 Immabuloy kadi ni Nephi, ti agpampammarang a propeta, a nangipadto iti adu a kinadakes maipanggep kadagitoy a tao, kenka, iti nadawel a panangpapataymo ken ni Seezoram, a kabsatmo?

28 Ket adtoy, kunana kadakayo, Saan.

29 Ket kunayonto kenkuana: Pinapataymo kadi a sidadawel ti kabsatmo?

30 Ket agbutengton, ket dina ammo ti sawenna. Ket adtoy, aglibakto kadakayo; ket agpammarangto a masdaaw; nupay kasta, ket ipakdaarnanto kadakayo nga awan basolna.

31 Ngem adtoy, untonenyonto, ket makakitakayonto iti dara iti gayadan ti kagayna.

32 Ket no makitayon daytoy, kunayonto: Naggapuan daytoy a dara? Dimi kadi ammo a dara ti kabsatmo?

33 Ket agtigergerto, ken bumsagto, a kasla dimtengen kenkuana ni patay.

34 Ket kalpasanna kunayonto: Gapu itoy a buteng ken bebessag a mailadawan iti rupam, adtoy, ammomi a nagbasolka.

35 Ket ad-addanton ti butengna; ket kalpasanna agpudnonto kadakayo, ket saannanton nga ilibak nga isu ti akin-aramid itoy nadawel a pammapatay.

36 Ket kalpasanna kunananto kadakayo, a siak, ni Nephi, awan ti ammok maipanggep iti dayta a banag malaksid iti pannakaitedna kaniak babaen ti bileg ti Dios. Ket isunton ti pannakaammoyo a napudnoak a tao, nga imbaonnak ti Dios kadakayo.

37 Ket napasamak a napanda ket inaramidda, iti kas iti imbaga ni Nephi kadakuada. Ket adtoy, agpayso dagiti balikas nga imbagana; ta maibatay kadagiti balikas nagulbod; ken kasta met a maibatay kadagiti balikas nagpudno.

38 Ket naisaklang a mangpaneknek nga isu a mismo ti nadawel a mammapatay, iti kasta nawayawayaan dagiti lima, ken kasta met ni Nephi.

39 Ket adda sumagmamano kadagiti Nephite a namati kadagiti balikas ni Nephi; ken adda met sumagmamano, a namati gapu iti pammaneknek dagiti lima, ta napasurotda bayat ti kaaddada iti pagbaludan.

40 Ket ita adda sumagmamano kadagiti tao, a nagkuna a propeta ni Nephi.

41 Ket adda dagiti sabali a nagkuna: Adtoy, isu ti Dios, ta no saan nga isu ti Dios dina koma ammo amin a banag. Ta adtoy, imbagana kadatayo ti adda iti puspusotayo, ket kasta met nga imbagana dagiti banag; ket naipakaammona kadatayo ti pudno a nadawel a namapatay iti pangulo nga ukomtayo.