1 Dagiti balikas nga insao ni Jacob, ti lalaki a kabsat ni Nephi, kadagiti tattao ni Nephi, kalpasan ti ipapatay ni Nephi:

2 Ita, patpatgek a kakabsatko, siak, ni Jacob, kas mayannurot iti pagrebbengan iti kinaaddak iti sidong ti turay ti Dios, sireregtaak nga annongen ti akemko a sipaparbeng, ken tapno maikkat kadagiti pagan-anayko dagiti basolyo, immayak ditoy templo ita nga aldaw tapno ipakdaarko kadakayo ti balikas ti Dios.

3 Ket dakayo a mismo ammoyo nga agingga ita naregtaak iti pagrebbengan ti akemko; ngem ita nga aldaw madagsenannak ti ad-adda a tarigagay ken danag para iti pagimbagan dagiti kararuayo ngem iti naipalabas.

4 Ta kitaen, agginga ita, nagtultulnogkayo iti balikas ti Apo, nga intedko kadakayo.

5 Ngem kitaenyo, imdengandak, ket ammuenyo a babaen ti tulong ti mannakabalin-amin a Namarsua iti langit ken daga maibagak kadakayo ti maipapan kadagiti ^apampanunotyo, no kasano a mangrugikayon nga agaramid iti basol, basol a makitak a makarimon, wen, ken makarimon iti Dios.

6 Wen, pagladingitenna ti kararuak ket palnedennak iti bain iti imatang ti Namarsua kaniak, a nasken nga ipaneknekko kadakayo ti maipanggep iti kinadakes ti panagpuspusoyo.

7 Kasta met a pagladingitennak ket nasken nga agaramatak iti kasta unay ti ^akinabatad a panagsao maipanggep kadakayo, iti sango dagiti assawa ken annakyo, adu kadakuada ti nakadungdungngo ti rikna ken ^bnadalus ti dayaw ken naemma iti sango ti Dios, banag a makaparagsak iti Dios;

8 Ket pagarupek nga immayda tapno dumngeg iti makaay-ayo a ^abalikas ti Dios, wen, ti balikas a mangpaimbag iti nasugatan a kararua.

9 Gapu ta kasta, padagsenanna ti kararuak ta nasken a mapilitnak, gapu iti nainget a bilin a naawatko iti Dios, a balakadankayo a mayannurot kadagiti basbasolyo; a mangpadakkel kadagiti sugat dagiti nasugatanen, imbes a liwliwaen ken paimbagen dagiti sugatda; ken kadagiti saan pay nasugatan, imbes nga agpennekda iti makaay-ayo a balikas ti Dios addaan dagiti daga a naikabil a mangduyok kadagiti kararuada ken mangsugat kadagiti naemma a pampanunotda.

10 Ngem, nupay kasta ti kinaindaklan ti annongen, nasken nga aramidek ti mayannurot iti kinaiget ti ^abilbilin ti Dios, ken ibagak kadakayo ti maipanggep kadagiti kinadakesyo ken dagiti kinarimonyo, iti imatang iti natarnaw ti panagpuspuso, ken ti nasneban a puso, ken iti apagbiit a panangkita ti ^bmakasukisok a mata ti Mannakabalin a Dios.

11 Gapuna, nasken nga ibagak kadakayo ti kinapudno a mayannurot iti ^akinalawag a balikas ti Dios. Ta kitaenyo, bayat iti panagdamagko iti Apo, immay kaniak ti pammilin, a kunana: Jacob, inkanto iti templo inton bigat, ket ipakdaarmo ti balikas nga itedkonto kenka para kadagitoy a tattao.

12 Ket ita kitaen, kakabsatko, daytoy ti balikas nga ipakdaarko kadakayo, nga adu kadakayo ti nangrugin a mangbirok iti balitok, ken iti pirak, ken iti amin a kita ti napateg a ^aminas, a naruay unay iti daytoy a daga, a ^bdaga a naikari para kadakayo ken kadagiti kaputotanyo.

13 Ket immisem a maay-ayatan kadakayo ti ima ti manangipaay, ta nakagun-odkayo iti nabuslon a kinabaknang; ket gapu ta nakagun-od ti sumagmamano kadakayo iti nabusbuslon ngem kadagiti kakabsatyo nagbalinkayo a ^anatangsit iti kinapalangguad dagiti pusoyo, ket nasukir ken napannakkelkayo gapu iti kinangina ti kawesyo, ket indadanesyo dagiti kakabsatyo gapu ta impagarupyo a nasaysayaatkayo ngem isuda.

14 Ket ita, kakabsatko, ipagarupyo kadi a maikalintegannakayo ti Dios iti daytoy a banag? Kitaen, kunak kadakayo, Saan. Ngem kedngannakayo, ket no ipilityo dagitoy a bambanag nasken nga umay a sidadaras ti panangukomna kadakayo.

15 O ta ipakitana koma kadakayo a masarutnakayo, ket iti maminsan laeng a panangkitana kadakayo, maidugmamnakayo iti katapokan!

16 O ta mawaywayaannakayo manipud iti daytoy a kinadangkes ken kinarimonyo. Ken, O ta dumngegkayo koma kadagiti pammilinna, ken saanyo ipalubos a daytoy a ^akinapalangguad dagiti pusoyo ti mangdadael dagiti kararuayo!

17 Panunotenyo dagiti kakabsatyo a kas iti bagbagiyo, ken mannakigayyem unay iti amin ken naparabur kadagiti ^asanikuayo, tapno ^bisuda ket bumaknang met a kas kadakayo.

18 Ngem sakbay nga agsapulkayo iti ^akinabaknang, sapulenyo ti ^bpagarian ti Dios.

19 Ket inton magun-odyon ti namnama ken ni Cristo magun-odyonto ti kinabaknang, no sapulenyo ida; ket sapulenyonto ida iti gagem nga ^aagaramid iti naimbag—mangkawes kadagiti lamulamo, ken mangpakan kadagiti mabisin, ken mangwayawaya kadagiti naadipen a balud, ken mangipaay iti bang-ar kadagiti masaksakit ken naparigatan.

20 Ket ita, kakabsatko, naisaokon kadakayo ti maipanggep iti kinapalangguad; ken kadakayo a nangparigat kadagiti kaarrubayo, ken indadanesyo gapu ta napalangguad dagiti puspusoyo, kadagiti bambanag nga inted ti Dios kadakayo, ania ti masaoyo iti daytoy?

21 Saanyo kadi ipagarup a makarimon dagita a bambanag kenkuana a nangparsua ti amin a lasag? Ket kas kapateg ti panagkitana iti maysa a parsua ti sabali. Ket naggapu ti amin a lasag iti tapok; ket iti kastoy met laeng a panggep a pinarsuana ida, ta rumbeng a tungpalenda ti ^abilbilinna ken itan-ok isuna iti agnanayon.

22 Ket ita isardengkon ti agsao kadakayo ti maipanggep iti daytoy a kinapalangguad. Ket no saan koma a nasken nga agsaoak kadakayo iti maipanggep iti nakarkaro a krimen, aglaplapusanan koma ti rag-o ti pusok gapu kadakayo.

23 Ngem mangpadpadagsen kaniak ti balikas ti Dios gapu kadagiti nakarkaro a krimenyo. Agsipud ta kitaen, kinuna ngarud ti Apo: Mangrugin a kumaro ti kinadakes dagitoy a tattao; saanda maawatan ti nasantuan a kasuratan, ta ikalikagumda nga ikalintegan dagiti bagbagida ti panagaramidda kadagiti kinabalangkantis, gapu kadagiti bambanag a naisurat maipanggep ken ni David, ken ni Solomon nga anakna.

24 Kitaen, agpayso a da David ken ^aSolomon ket addaan ti adu nga ^basawa ken kamalala, banag a makarimon kaniak, kinuna ti Apo.

25 Gapuna, kinuna ngarud ti Apo, inturongko dagitoy a tattao a rumuar manipud iti Jerusalem, babaen ti bileg ti imak, tapno makapatanorak iti ^analinteg a sanga manipud iti bunga ti lomo ni Jose.

26 Gapuna, siak nga Apo a Dios saanko nga ipalubos nga agaramidto dagitoy a tattao iti kas kadakuada idi ugma.

27 Gapuna, kakabsatko, denggendak, ken imdenganyo ti balikas ti Apo: Ta awanto iti asinoman kadakayo ti maaddaan iti nasursurok ngem ^amaysa nga asawa; ken awanto ti kamalalana;

28 Agsipud ta siak, ti Apo a Dios, maragsakan iti ^akinadalus ti dayaw dagiti babbai. Ken makarimon kaniak dagiti ar-aramid ti kinabalangkantis; kinuna ngarud ti Apo ti Pangen.

29 Gapuna, nasken a tungpalento dagitoy a tattao dagiti bilinko, kinuna ti Apo ti Pangen, wenno ^amailunodto ti daga maigapu kadakuada.

30 Agsipud ta no siak, kinuna ti Apo ti Pangen, mangpatanorak iti ^akaputotan a para kaniak, bilinek dagiti tattaok; ta no saan dumngegdanto kadagitoy a bambanag.

31 Agsipud ta kitaen, siak, ti Apo, nakitakon ti leddaang, ken nangngegkon ti panagdung-aw dagiti babbai nga annak dagiti tattaok iti daga ti Jerusalem, wen, ken iti amin a dagdaga dagiti tattaok, gapu iti kinadakes ken dagiti kinarimon dagiti assawada.

32 Ket saankonto nga ipalubos, kinuna ti Apo ti Pangen, a dagiti sangit dagitoy napipintas a babbai nga annak dagitoy a tattao, nga inturongko a rumuar manipud iti Jerusalem, umaydanto kaniak a mangbusor kadagiti tattao ti tattaok, kinuna ti Apo ti Pangen.

33 Agsipud ta saandanto maitaray nga adipen dagiti babbai nga annak ti tattaok gapu iti kinaalumamayda, malaksid no sarungkarakto ida iti nakaro a lunod, uray pay iti pannakadadael; agsipud ta saandanto nga agaramid kadagiti ^akinabalangkantis, a kas kadakuada idi ugma, kinuna ti Apo ti Pangen.

34 Ket ita kitaen, kakabsatko, ammoyo a naited dagitoy a bilin iti amatayo, a ni Lehi; gapuna, idi pay nga ammoyo ida; ket inyegyo iti bagiyo iti nakaro a pangngeddeng; agsipud ta nagaramidkayo kadagitoy a bambanag a saan koma a rumbeng nga inaramidyo.

35 Kitaen, ^anakarkaro dagiti kinadangkes nga inaramidyo ngem dagiti Lamanita, dagiti kakabsattayo. Pinagladingityo ti puspuso dagiti naalumamay nga assawayo, ken pinukawyo ti panagtalek dagiti annakyo, gapu kadagiti dakes a pagwadan nga impakitayo kadakuada; ket dumanonto iti Dios dagiti sasaibbek ti puspusoda a maibusor kadakayo. Ket gapu iti kinainget ti balikas ti Dios, a dumarop kadakayo, adu a puspuso ti natay, a naduyok iti nauneg a sugsugat.