1 Ae faauta, o a’u, o Iakopo, ou te fia tautala atu ia te outou o e loto mamā. Ia outou tepa taulai atu i le Atua ma le mausalī o le mafaufau, ma tatalo atu ia te ia ma le faatuatua tele, ma o le a ia faamafanafanaina outou i o outou puapuaga, ma o le a ia aioia a outou tagi, ma auina ifo faasalaga i luga o i latou o e latou te saili lo outou faafanoga.

2 E, outou uma o e loto mamā, ia ea i luga o outou ulu ma tali le afioga fimalie a le Atua, ma taumamafa fiafia i lona alofa; auā tou te mafai, pe afai e ^amausalī o outou mafaufau, e faavavau.

3 Ae oi talofa, oi talofa, ia te outou o e ua le loto mamā, i latou ua ^aeleelea pea i le aso nei i luma o le Atua; auā vaganā ai ua outou salamo o le a fetuuina le laueleele ona o outou; ma o sa Lamanā o e ua lē eleelea e pei o outou, ae ui ina ^efetuuina i latou i se fetuu tiga, o le a latou sasa ia te outou e oo lava ina faatafunaina.

4 Ma ua vave ona oo mai o le taimi, sei vaganā ai ua outou salamo o le a fai mo latou le laueleele o lo outou tofi, ma o le a ^ata’ita’i ese e le Alii le Atua e amiotonu mai totonu ia te outou.

5 Faauta, o sa Lamanā o outou uso, o e ua outou inoino i ai ona o lo latou eleelea ma le fetuu ua oo mai i luga o o latou pa’u, ua sili atu ona amiotonu nai lo outou; ona ua latou lē ^afaagaloina le poloaiga a le Alii, na tuu mai i lo tatou tamā—e faapea ia tatau ona na’o le tasi le avā e i ai ia te i latou, ma e lē tatau ona i ai ni a latou palake, ma e lē tatau ona i ai ni faitaaga e faia e i latou.

6 Ma o lenei, ua latou tausisi e tausi lenei poloaiga; o le mea lea, ona o le tausisi i le tausia o lenei poloaiga, o le a lē faaumatia ai i latou e le Alii le Atua, ae o le a ^aalofa mutimutivale o ia ia te i latou, ma o le a avea i latou ma tagata faamanuiaina i se aso.

7 Faauta, ua ^aalolofa a latou tane ia latou avā, ma ua alolofa a latou avā ia latou tane; ma ua alolofa a latou tane ma a latou avā ia latou fanau; ma o lo latou lē talitonu ma lo latou inoino ia te outou e afua mai i le amioletonu o o latou tamā; o le mea lea, e faapefea ona sili atu lo outou lelei nai lo i latou, i le silafaga a lo outou Foafoa silisili?

8 E, o’u uso e, ou te fefe se’i vaganā ai ua outou salamo ia outou agasala, o le a sili atu le papa’e o o latou pa’u nai lo outou, pe a aumai outou faatasi ma i latou i luma o le nofoalii o le Atua.

9 O le mea lea, ou te tuu atu ai ia te outou se poloaiga, o le afioga lea a le Atua, ia outou lē toe faifai faasaga ia te i latou ona o le uliuli o o latou pa’u; pe tou te faifai faasaga ia te i latou ona o lo latou eleelea; ae ia outou manatua lo outou lava eleelea, ma ia manatua o lo latou eleelea na ala mai ona o o latou tamā.

10 O le mea lea, ia outou manatua a outou ^afanau, le ala ua outou faatiga ai o latou loto ona o le faata’ita’iga ua outou faia i o latou luma; o lenei foi, ia outou manatua e mafai, ona o lo outou eleelea, ona aumai a outou fanau i le faafanoga, ma faaputu ai i luga o o outou ulu a latou agasala i le aso gataaga.

11 E, o’u uso e, faalogo mai ia i a’u upu; fafagu mai mafaufau o o outou agaga; lūlū outou lava ia ina ia outou ^afeala mai le moe o le oti; ma tatala ese outou lava mai tiga o ^eseoli ina ia lē mafai ona avea outou ma ⁱagelu a le tiapolo, e lafoaiina i lena lepa afi ma le teiō o le ^ooti faalua lea.

12 Ma o lenei o a’u, o Iakopo, e tele isi mea na ou tautala atu ai i le nuu o Nifae, na ou lapatai atu ai ia te i latou e faasaga i le ^afaitaaga ma le ^emataaitu, ma ituaiga o agasala eseese uma, ma ta’u atu ia te i latou o latou iuga leaga matautia.

13 Ma e le mafai ona tusia i luga o ^anei papatusi le tasi vaeselau o taualumaga āuiluma a lenei nuu, ua amata nei ona faatoateleina; ae o le tele o a latou taualumaga ua tusia i luga o papatusi tetele, ma a latou taua, ma a latou finauga, ma nofoaiga a o latou tupu.

14 O nei papatusi ua ta’ua o papatusi a Iakopo, ma sa faia e le lima o Nifae. Ma ua ou faaiuina le tautala atu i nei upu.