1 Kae vakai, ko au, Sēkope, ʻoku ou fie lea kiate kimoutolu ʻoku loto-maʻá. Sio ki he ʻOtuá ʻi he ʻatamai ʻoku tuʻu maʻu, pea lotu kiate ia ʻi he fuʻu tui lahi, pea te ne fakafiemālieʻi ʻa kimoutolu ʻi homou ngaahi faingataʻaʻiá, pea te ne taukapoʻi ʻa kimoutolu, ʻo fekau hifo ʻa e tautea kiate kinautolu ʻoku feinga ke fakaʻauha ʻa kimoutolú.

2 ʻOiauē ʻa kimoutolu kotoa pē ʻoku loto-maʻá, hiki hake homou ʻulú, pea tali ʻa e folofola fakafiemālie ʻa e ʻOtuá, pea keinanga ʻi heʻene ʻofá; he te mou lava ʻo fai ia, ʻo kapau ʻe ^atuʻu maʻu ʻa homou ʻatamaí ʻo taʻengata.

3 Kā, ʻe malaʻia, ʻe malaʻia, ʻa kimoutolu ʻoku ʻikai loto-maʻá, ʻa kimoutolu ʻoku ^aʻuli he ʻahó ni ʻi he ʻao ʻo e ʻOtuá; he ka ʻikai te mou fakatomala, ʻoku fakamalaʻiaʻi ʻa e fonuá koeʻuhi ko kimoutolu; pea ko e kau Leimaná, ʻa ia ʻoku ʻikai te nau ʻuli ʻo hangē ko kimoutolú, ka neongo iá naʻe ^bfakamalaʻiaʻi ʻa kinautolu ʻaki ha tautea mamafa, te nau fakamamahiʻi ʻa kimoutolu ʻo aʻu ki he fakaʻauha.

4 Pea ʻoku haʻu vave ʻa e taimi, kapau ʻe ʻikai te mou fakatomala te nau maʻu ʻa e fonua ʻo homou tofiʻá, pea ʻe hanga ʻe he ʻEiki ko e ʻOtuá ʻo ^atataki atu ʻa e kau māʻoniʻoní meiate kimoutolu.

5 Vakai, ko e kau Leimana ko homou kāingá, ʻa ia ʻoku mou fehiʻa ki ai koeʻuhi ko ʻenau ʻulí mo e fakamalaʻia kuo hoko ki honau kilí, ʻoku nau māʻoniʻoni ange ʻiate kimoutolu; he kuo ʻikai ^angalo ʻiate kinautolu ʻa e fekau ʻa e ʻEikí, ʻa ia naʻe tuku ki heʻetau tamaí—pea ke nau maʻu ha uaifi ʻe toko taha pē, pea ke ʻoua naʻa nau maʻu ha sinifu ʻe toko taha, pea ke ʻoua naʻa nau fai ha feʻauakí ʻiate kinautolu.

6 Pea ko ʻeni, ko e fekaú ni ʻoku nau tokanga ke tauhi ko ia, ko e meʻa ʻi he tokanga ko iá, ʻo tauhi ʻa e fekau ní, ʻe ʻikai fakaʻauha ʻa kinautolu ʻe he ʻEiki ko e ʻOtuá, ka te ne ^aʻaloʻofa kiate kinautolu; pea ʻe ʻi ai ʻa e ʻaho te nau hoko ai ko ha kakai monūʻia.

7 Vakai, ʻoku ^aʻofa ʻa honau ngaahi husepānití ʻi honau ngaahi uaifí, pea ʻoku ʻofa ʻa honau ngaahi uaifí ʻi honau ngaahi husepānití; pea ʻoku ʻofa ʻa honau ngaahi husepānití mo honau ngaahi uaifí ʻi heʻenau fānaú; pea ʻoku tupu ʻa ʻenau taʻetuí mo ʻenau fehiʻa ʻiate kimoutolú mei he fai angahala ʻa ʻenau ngaahi tamaí; ko ia, ʻoku fēfē ʻa hono lahi ange hoʻomou leleí ʻiate kinautolu, ʻi he ʻao ʻo homou Tupuʻanga māfimafí?

8 ʻOiauē ʻe hoku kāinga, ʻoku ou manavahē telia naʻa ʻikai te mou fakatomala mei hoʻomou ngaahi angahalá pea hinehina ange ʻa honau kilí ʻi homou kilí, ʻo ka ʻomi ʻa kimoutolu fakataha mo kinautolu ki he ʻafioʻanga ʻo e ʻOtuá.

9 Ko ia, ʻoku ou tuku ha fekau kiate kimoutolu, ʻa ia ko e folofola ʻa e ʻOtuá, ke tuku hoʻomou angatuʻu kiate kinautolu koeʻuhi ko e lanu fakapoʻupoʻuli ʻo honau kilí; pea ʻoua foki naʻa mou fehiʻa ʻiate kinautolu koeʻuhi ko ʻenau ʻulí; ka mou manatuʻi pē ʻa hoʻomou ʻuli ʻamoutolú, pea manatuʻi naʻe tupu ʻa ʻenau ʻulí mei heʻenau ngaahi tamaí.

10 Ko ia, ke mou manatuʻi ʻa hoʻomou ^afānaú, ʻa e anga ʻo hoʻomou fakatupu ha mamahi lahi ʻo honau lotó ko e tupu mei he sīpinga kuo mou fokotuʻu ʻi honau ʻaó; pea ko e tahá, manatu te mou lava, koeʻuhi ko hoʻomou ʻulí ʻo ʻomi ʻa hoʻomou fānaú ki he fakaʻauha, pea ʻe ʻekeʻi mei homou ʻulú ʻa ʻenau ngaahi angahalá ʻi he ʻaho fakaʻosí.

11 ʻOiauē ʻe hoku kāinga, tokanga ki heʻeku ngaahi leá; fakaake ʻa e ngaahi ivi ʻo homou laumālié; fafangu ʻa kimoutolu koeʻuhi ke mou ^aʻā hake mei he mohe ʻo e maté; pea vete ange ʻa kimoutolu mei he mamahi ʻo ^bhelí koeʻuhi ke ʻoua naʻa mou hoko ko ha kau ^cʻāngelo ʻa e tēvoló, ke lī hifo ki he ano ʻo e afi mo e maka-vela, ʻa ia ko e ^dmate ʻanga uá.

12 Pea ko ʻeni ko au, Sēkope, naʻá ku lea ʻaki mo ha ngaahi meʻa lahi ange ki he kakai ʻo Nīfaí, ʻo fakatokanga kiate kinautolu ʻo kau ki he ^afeʻauakí mo e ^bholi kovi fakakakanó, mo e ngaahi faʻahinga angahala kotoa pē, ʻo tala kiate kinautolu ʻa honau ngaahi nunuʻa fakamanavaheé.

13 Pea ko ha vahe teau ʻe taha ʻo e ngaahi meʻa naʻe hoko ki he kakai ní, ʻa ia kuo fakaʻau ke nau tokolahi ange, ʻoku ʻikai lava ʻo tohi ia ki he ngaahi peleti ko ^aʻení; kā kuo tohi ha ngaahi meʻa lahi ʻi he ngaahi peleti lalahí, mo ʻenau ngaahi taú, mo ʻenau ngaahi fakakikihí, mo e pule ʻa honau ngaahi tuʻí.

14 ʻOku ui ʻa e ngaahi peletí ni ko e ngaahi peleti ʻa Sēkopé, pea naʻe ngaohi ia ʻe he nima ʻo Nīfai. Pea ʻoku ou fakaʻosi hono lea ʻaki ʻo e ngaahi leá ni.